TAKGALHTAWAKGA 30
¡Tiku xkapaxkiya tlan nalatamaparakgo!
Lu kinkakatsaniyan chu lu lakgaputsayaw akxni wi tiku niy. Wa xlakata Biblia wan pi linin kintalamakgasitsinkan (1 Corintios 15:26). Ktakgalhtawakga 27, wix katsini pi Jehová namasputu uma talamakgasitsin. Pero ¿tuku nakakitaxtuni tiku nikgonita? Kʼuma takgalhtawakga, wix tlan nakatsiniya atanu lu tlan xtamalaknun Jehová: xla nakamalakastakwani lhuwa latamanin xlakata xatapaxuwan nalatamakgo putum kilhtamaku. ¡Xlakan nalatamaparakgo! Pero ¿tlan chuna nala? Chu ¿niku nalakastakwanankgo, kʼakgapun o kKatiyatni?
1. ¿Tuku tlawaputun Jehová xpalakata tiku nikgonita?
Jehová xlikana kamalakastakwaniputun tiku nikgonita. Job, chatum chixku tiku lu xkgalhi takanajla, liwana xkatsi pi Dios, ni xʼama patsankga o akgtsonkgswa akxni xla xnilh chu xtawi «kPutaknun». Wanilh Dios: «Wix nakintachuwinana chu akit nakkgalhtiyan» (kalikgalhtawakga Job 14:13-15).
2. ¿La katsiyaw pi tiku nikgonita tlan nalakastakwanankgo?
Akxni Jesús xlama kKatiyatni, Dios xmaxkinit xlimakgatliwakga xlakata tlan xkamalakastakwanilh tiku xnikgonita. Wa xlakata Jesús malakastakwanilh chatum aktsu tsumat tiku xkgalhi 12 kata chu na malakastakwanilh xkgawasa chatum puskat tiku xninita xchixku (Marcos 5:41, 42; Lucas 7:12-15). Alistalh nilh Lázaro tiku xʼamigo xwanit. Chu maski akgtatita kilhtamaku lata xninit chu xmaknukanit, Jesús malakastakwanilh. Akxni Jesús xtlawaninita oración Dios, akxilhli putaknun chu wa: «¡Lázaro, kataxtu!». Chu «chixku tiku xninit taxtulh», ¡lakastakwanalh! (Juan 11:43, 44). ¡Kalakpuwanti la paxuwakgolh xfamilia chu xʼamigos Lázaro!
3. ¿Nalatamaparakgo tiku xkapaxkiya nema nikgonita?
Biblia malaknu pi «Dios nakamalakastakwani» (Hechos 24:15). Putum latamanin nema Jesús kamalakastakwanilh ni xʼankgonit kʼakgapun (Juan 3:13). Putum paxuwakgolh akxni kamaspitnika xlatamatkan unu kKatiyatni. Chuna la tlawalh amacha kilhtamaku, nialh makgas Jesús nakamalakastakwani lhuwa latamanin xlakata nalipaxuwakgo latamat putum kilhtamaku unu kKatiyatni akxni akgtum paraíso nawan. Xla wa pi putum tiku wilakgo kxtalakapastakni Dios, nalakastakwanankgo, asta tiku nialh kalakapastakkan (Juan 5:28, 29).
TLAKG KALAKPUTSANANIW
Kaʼakxilhwi pi Biblia limasiya pi tiku nikgonita tlan nalakastakwanankgo chu uma tamalaknun nakgantaxtu. Na kaʼakxilhwi pi talakastakwanat tlan kinkamamakgkatsiniyan chu kinkamaxkiyan takgalhkgalhin.
4. Jesús limasiyalh pi tlan kamalakastakwani tiku nikgonita
Tlakg kakatsi tuku tlawalh Jesús xpalakata xʼamigo Lázaro. Kalikgalhtawakgatit Juan 11:14 chu 38-44 chu kalichuwinantit uma:
-
¿Tuku xlakata katsiyaw pi Lázaro xlikana xninit? (Kaʼakxilhtit versículo 39).
-
Komo Lázaro kʼakgapun xwilacha, ¿xtalakaskin pi Jesús xmalakastakwanilh unu kKatiyatni?
5. ¡Lhuwa tiku nalatamaparakgo!
Kalikgalhtawakgatit Salmo 37:29 chu kalichuwinantit uma:
-
¿Niku nalatamakgo lhuwa latamanin nema nalakastakwanankgo?
Jesús ni kajwatiya katikamalakastakwanilh tiku xkakninanikgo Jehová; na nakamalakastakwani lhuwa amakgapitsi latamanin. Kalikgalhtawakgatit Hechos 24:15 chu kalichuwinantit uma:
-
Akxni nakamalakastakwanikan latamanin, ¿tiku akxilhputuna wix?
Jesús tlan nakamalakastakwani tiku nikgonita, xtachuna la chatum tlat mastakwani xkgawasa tiku lhtatama
6. Talakastakwanat tlan mamakgkatsininan chu masta takgalhkgalhin
Lhuwa latamanin tiku makgatsankgakgonit tiku lu xpaxkikgo tlan kamamakgkatsininit chu kamakgtayanit tuku lichuwinan Biblia xlakata xtsumat Jairo. Kalikgalhtawakgatit tuku lalh anta kLucas 8:40-42 chu 49-56.
Akxni Jesús nina xmalakastakwani aktsu tsumat, wanilh Jairo: «Ni kapekuanti, kajwatiya kakgalhi takanajla» (kaʼakxilhtit versículo 50). ¿La namakgtayayan takgalhkgalhin xla talakastakwanat...
-
... akxni niy tiku lu xpaxkiya?
-
... akxni milatamat kalipekua natawila?
Kaʼakxilhtit VIDEO chu kalichuwinantit uma:
-
¿La kamakgtayanit chu tlan kamamakgkatsininit xnatlatni Phelicity takgalhkgalhin xla talakastakwanat?
MAKGAPITSIN WANKGO: «Akit ni kkanajla pi tiku nikgonita nalakastakwanankgo xlakata nalatamaparakgo unu kKatiyatni».
-
¿Tuku lakpuwana wix?
-
¿Tuku texto xmaklakaskinti xlakata nalimasiyaya pi naʼanan talakastakwanat unu kKatiyatni?
TUKU KATSINIW
Biblia wan pi lhuwa latamanin nalakastakwanankgo. Jehová lakaskin pi kalatamaparakgolh chu maxkinit Jesús limakgatliwakga xlakata nakamalakastakwani.
¿Tuku xkgalhtinanti?
-
¿Tuku xlakata katsiyaw pi Jehová chu Jesús kamalakastakwaniputunkgo latamanin?
-
¿Niku nalatamakgo lhuwa latamanin nema nalakastakwanankgo: kʼakgapun o kKatiyatni? ¿Tuku xlakata chuna lakpuwana?
-
¿Tuku makanajliyan pi tiku xkapaxkiya tlan nalatamaparakgo?
TLAKG KAKATSINI
Kaʼakxilhti makgapitsi tastakyaw nema namakgtayayan natayaniya mintalipuwan.
“Ayuda para quienes están de duelo” (¡Despertad!, núm. 3 kata 2018)
Komo wi tiku lipuwama xlakata nilh tiku lu xpaxki, ¿tlan namakgtaya xtastakyaw Biblia?
Kaʼakxilhti la tlan nakamakgtayaya tiku laktsujku akxni niy tiku lu xpaxkikgo.
¿Wi tiku nalakastakwanankgo kʼakgapun? ¿Wi tiku ni katilakastakwanankgolh?
Max na nalakgatiya uma
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
