TAKGALHTAWAKGA 36
Xaʼakgstitum kalatamaw chu ni kaʼakgskgawinaw
Putum latamanin lakaskinkgo pi xʼamigoskan ni naʼakgskgawinankgo chu Jehová nachuna lakaskin xpalakata xʼamigos. Pero tuwa tamakgkatsi xaʼakgstitum nalatamayaw xlakata lhuwa latamanin kaʼakgskgawikgo amakgapitsin. ¿Tuku tlan kitaxtu akxni ni akgskgawinankan?
1. ¿Tuku xlakata lu xlakaskinka ni naʼakgskgawinanaw?
Akxni ni kaʼakgskgawiyaw amakgapitsin limasiyaniyaw Jehová pi paxkiyaw chu pi maxkiyaw kakni. Kalakapastakti pi Jehová katsi putum tuku lakapastakaw chu tuku tlawayaw (Hebreos 4:13). Xla katsi akxni xaʼakgstitum latamayaw chu lu xtapalh akxilha. Xtachuwin wan: «Jehová ni kaʼakxilhputun tiku katsinikgo akgskgawinankgo, pero lu tlan katalalin tiku xaʼakgstitum» (Proverbios 3:32).
2. ¿La nalimasiyayaw pi ni akgskgawinanaw?
Jehová lakaskin “nalawaniyaw tuku xaxlikana kinchatunukan” (Zacarías 8:16, 17). ¿Tuku kilhchanima uma? Pi ni kaʼakgskgawiyaw o ni kawaniyaw tuku ni xaxlikana kifamiliajkan, tiku kataskujaw, natalan xalak congregación chu nipara mapakgsinanin. Tiku ni akgskgawinankgo ni kgalhanankgo chu ni akgskgawimakglhtinankgo tumin (kalikgalhtawakga Proverbios 24:28 chu Efesios 4:28). Nachuna, mastakgo lilakgaxokgon (Romanos 13:5-7). Xliputum kilatamatkan “xaʼakgstitum latamaputunaw putum kilhtamaku” (Hebreos 13:18).
3. ¿Tuku tlan kitaxtu akxni ni akgskgawinanaw?
Akxni amakgapitsin katsikgo pi ni akgskgawinanaw kinkalipawankgoyan. Na makgtayananaw ni namakpuwanaw chu nalalipawanaw kcongregación, xtachuna la akgtum familia. Nachuna, kintalakapastaknikan tlan tawila. Akxni ni akgskgawinanaw tlawa pi «nalimaxkikan kakni xtamasiy kiLakgmaxtunakan Dios», chu max natlawa pi amakgapitsin na naskujnaniputunkgo Jehová (Tito 2:10).
TLAKG KALAKPUTSANANIW
Kaʼakxilhwi pi akxni ni akgskgawinanaw kinkamakgtayayan xlakata tlan natalalinaw Jehová chu na kaʼakxilhwi tuku kilhtamaku tlan nalimasiyayaw pi ni akgskgawinanaw.
4. Jehová kapaxki tiku ni akgskgawinankgo
Kalikgalhtawakgatit Salmo 44:21 chu Malaquías 3:16 chu kalichuwinantit uma:
-
¿Xlilat nalakpuwanaw pi tlan namatsekgaw tuku xaxlikana? ¿Tuku xlakata chuna lakpuwana?
-
Komo nawanaw tuku xaxlikana maski tuwa namakgkatsiyaw, ¿la lakpuwana wix pi namakgkatsi Jehová?
Akxni laktsu kamanan wankgo tuku xaxlikana, makgapaxuwakgo xnatlatnikan. Nachuna, akxni wanaw tuku xaxlikana makgapaxuwayaw Jehová
5. Nikxni kaʼakgskgawinaw
Lhuwa latamanin lakpuwankgo pi akxni ni akgskgawinankan ni putum kilhtamaku tlan kitaxtu, pero kaʼakxilhwi tuku tlan kitaxtu akxni ni akgskgawinanaw. Kaʼakxilhtit VIDEO.
Kalikgalhtawakgatit Hebreos 13:18 chu kalichuwinantit xlakata la tlan ni naʼakgskgawinanaw...
-
... kfamilia.
-
... ktaskujut o kʼescuela.
-
... akxni wi atanu tuku tlawayaw.
6. Tlan kitaxtu akxni ni akgskgawinanaw
Max nakinkaliminiyan makgapitsi taʼakglhuwit akxni ni akgskgawinanaw, pero alistalh tlan kitaxtu. Kalikgalhtawakgatit Salmo 34:12-16 chu kalichuwinantit uma:
-
¿La litamakgtayayaw akxni ni akgskgawinanaw?
-
Akxni xachixku chu xapuskat ni laʼakgskgawikgo, xtamakgaxtokgatkan tlakg tatliwakglha
-
Akxni skujnin ni akgskgawinankgo tlakg kalipawankan
-
Akxni latamanin ni akgskgawinankgo, mapakgsinanin tlan kaʼakxilhkgo
MAKGAPITSIN WANKGO: «Ni talakgalhin wankan xalaktsu taʼakgsanin».
-
¿Lakpuwana wix pi Jehová xkajni putum taʼakgsanin? ¿Tuku xlakata chuna lakpuwana?
TUKU KATSINIW
Jehová lakaskin pi xʼamigos ni naʼakgskgawinankgo akxni wi tuku wankgo chu tlawakgo.
¿Tuku xkgalhtinanti?
-
¿La nalimasiyayaw pi ni akgskgawinanaw?
-
¿Tuku xlakata ni kililakpuwanatkan pi tlan namatsekgaw tuku xaxlikana?
-
¿Tuku xlakata lu xlakaskinka ni naʼakgskgawinana?
TLAKG KAKATSINI
¿La tlan nakamakgtayakgo natlatni xkamanankan xlakata ni naʼakgskgawinankgo?
¿Tuku tasikulunalin namakglhtinankgo tiku makgantaxtikgo tuku malaknukgo?
Kamakgantaxti tuku malaknuya chu namakglhtinana tasikulunalin (9:09)
Kaʼakxilhti tuku xlakata kilimastatkan lilakgaxokgon maski tumin nitlan nalimaklakaskinkan.
¿Tuku makgtayalh chatum chixku tiku xʼakgskgawimakglhtinan tumin nalakgpali xlatamat?
«Kkatsinilh pi Jehová tlan likatsi chu kinkatapatiyan» (Makatsinina, 1 xla mayo kata 2015)
Max na nalakgatiya uma
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
