TAKGALHTAWAKGA 37
¿Tuku wan Biblia xlakata tumin chu taskujut?
¿Minit kilhtamaku lu lilakgaputsanita taskujut chu tumin? Max tuwa makgkatsiyaw nakgalhiyaw tuku maklakaskinaw chu namaxkiyaw Jehová takaknin nema lakgchan. Biblia kinkamaxkiyan laktlan tastakyaw nema nakinkamakgtayayan.
1. ¿Tuku wan Biblia xlakata taskujut?
Dios lakaskin pi kalipaxuwaw kintaskujutkan. Biblia wan pi «ni anan tuku tlakg tlan pi chatum chixku [...] nalipaxuwa lhuwa xtaskujut» (Eclesiastés 2:24). Jehová lhuwa skuja. Akxni tlawayaw chuna la xla, limasiyayaw pi na lhuwa skujaw, tlawamaw tuku xla lakgati chu uma lu kinkamakgapaxuwayan.
Taskujut lu xlakaskinka, pero ni kilimastatkan talakaskin pi tlakg xlakaskinka nalitaxtu nixawa takaknin nema maxkiyaw Jehová (Juan 6:27). Xla kinkamalaknuniyan pi nakinkamaxkiyan tuku maklakaskinaw komo wa pulana nawiliyaw kkilatamatkan.
2. ¿Tuku wan Biblia xlakata tumin?
Maski Biblia wan pi «tumin litamakgtayakan», na wan pi komo kajwatiya nalilakgaputsayaw ni kintikaliminin tapaxuwan (Eclesiastés 7:12). Wa xlakata, Biblia kinkawaniyan pi ni kapaxkiw tumin chu kinkamaxkiyan uma tastakyaw: «Kalipaxuwatit tuku kgalhiyatit» (kalikgalhtawakga Hebreos 13:5). Akxni lipaxuwayaw tuku kgalhiyaw kinkamakgtayayan ni lhuwa tuku nakgalhiputunaw. Nachuna, kinkamakgtayayan ni nalaklinaw tumin (Proverbios 22:7). Kinkamakgtayayan ni nakgamananaw niku tlajakan tumin chu ni tunkun nakanajlayaw akxni wi tiku kinkawaniyan pi tlan lakapala natlajayaw lhuwa tumin.
3. ¿La tlan xatapaxuwan nalimakgtayananaw kintuminkan?
Jehová chatum Dios tiku lhuwa tuku masta chu akinin tlawayaw chuna la xla akxni “xatapaxuwan mastayaw chu limakgtayananaw tuku kgalhiyaw” (1 Timoteo 6:18). Pulaktum la tlan namaklakaskinaw kintuminkan wa akxni xatapaxuwan namastayaw xlakata nalitamawakan tuku tamaklakaskin kcongregación chu nakalimakgtayayaw kinatalankan tiku namaklakaskinkgo. Tuku tlakg xlakaskinka akxilha Jehová ni wa la xlilhuwa mastayaw, wata wa akxilha komo xatapaxuwan mastayaw. Komo xliputum kinakujkan mastayaw, napaxuwayaw chu namakgapaxuwayaw Jehová (kalikgalhtawakga Hechos 20:35).
TLAKG KALAKPUTSANANIW
Kaʼakxilhwi tuku tlan kitaxtu akxni akxilhaw taskujut chuna la xlilat chu akxni lipaxuwayaw tuku kgalhiyaw.
4. Limalankiya Jehová akxni tlan skujni litaxtuya
Tuku tlawayaw chu la likatsiyaw kkintaskujutkan limasiya la talalinaw Jehová. Kaʼakxilhtit VIDEO chu kalichuwinantit uma:
-
¿Tuku tlakg kaks malakawaniyan xlakata xtayat Jason chu la xʼakxilha xtaskujut?
-
¿Tuku tlawalh xlakata naʼakxilha taskujut chuna la xlilat?
Kalikgalhtawakgatit Colosenses 3:23, 24 chu kalichuwinantit uma:
-
¿Tuku xlakata lu xlakaskinka naskujaw “xliputum kinakujkan chu kilitliwakgakan”?
Taskujut xlakaskinka, pero nikxni kilimastatkan talakaskin pi tlakg xlakaskinka nalitaxtu nixawa takaknin nema maxkiyaw Jehová.
5. Tuku tlan kitaxtu akxni lipaxuwayaw tuku kgalhiyaw
Lhuwa latamanin lu liskujkgo xlakata namakgstokgwilikgo lhuwa tumin, pero Biblia tanu tastakyaw nema kinkamaxkiyan. Kalikgalhtawakgatit 1 Timoteo 6:6-8 chu kalichuwinantit uma:
-
¿Tuku tastakyaw kinkamaxkiyan Biblia?
Tlan napaxuwayaw maski ni lhuwa tuku kgalhiyaw. Kaʼakxilhtit VIDEO chu kalichuwinantit uma:
-
¿Tuku xlakata umakgolh familias paxuwakgo maski ni lhuwa tumin kgalhikgo?
Pero ¿tuku kitaxtu komo tlakg nakgalhiputunaw maski lhuwata tuku kgalhiyaw? Jesús wililh akgtum liʼakxilhtit nema masiya pi nitlan nakinkakitaxtuniyan. Kalikgalhtawakgatit Lucas 12:15-21 chu kalichuwinantit uma:
-
¿Tuku masiyaniyan liʼakxilhtit nema wililh Jesús? (Kaʼakxilhtit versículo 15).
Kalikgalhtawakgatit Proverbios 10:22 chu katamalakxtupitit 1 Timoteo 6:10. Alistalh kalichuwinantit uma:
-
¿Tuku tlakg xlakaskinka, xʼamigo Jehová nalitaxtuya o lhuwa tumin nakgalhiya? ¿Tuku xlakata?
-
¿Tuku nitlan kitaxtu akxni lhuwa tumin kgalhiputunaw?
6. Jehová nakinkamaxkiyan tuku maklakaskinaw
Akxni ni kgalhiyaw taskujut chu akxni ni kinkaʼakchaniyan tumin kinkamakgtayayan nakatsiyaw la xlilhuwa lipawanaw Jehová. Kaʼakxilhtit VIDEO xlakata nakatsiyatit tuku nakinkamakgtayayan akxni chuna natitaxtuyaw chu alistalh kalichuwinantit uma:
-
Chuna la akxilhwi kvideo, ¿tuku tuwa titaxtulh uma tala?
-
¿Tuku tlawalh xlakata xtayanilh?
Kalikgalhtawakgatit Mateo 6:25-34 chu kalichuwinantit uma:
-
¿Tuku kamalaknuni Jehová tiku pulana wilikgo xTamapakgsin kxlatamatkan?
MAKGAPITSIN WANKGO: «Lhuwa kiliskujat xlakata nakkamaxki tuku maklakaskin kifamilia. Nila kan kputum tamakxtumit».
-
¿Tuku texto xalak Biblia makanajliyan pi Jehová namaxkiyan tuku maklakaskina komo pulana nawiliya mintakaknin?
TUKU KATSINIW
Taskujut chu tumin xlakaskinka, pero nikxni namastayaw talakaskin pi uma natlawa nialh naskujnaniyaw Jehová.
¿Tuku xkgalhtinanti?
-
¿Tuku namakgtayayan naʼakxilha taskujut chuna la xlilat?
-
¿La namakgtayayan komo nalipaxuwaya tuku kgalhiya?
-
Komo Jehová malaknu pi nakamaxki tuku maklakaskinkgo xlakskujnin, ¿la nalimasiyaya wix pi kanajlaya uma tamalaknun?
TLAKG KAKATSINI
Kakatsi tuku wan Biblia xlakata tumin.
«¿Xkuenta tumin putum tuku nitlan anan?» (Artículo xalak jw.org)
Kaʼakxilhti la tlan nalimakgapaxuwayaw Jehová akxni wi tuku mastayaw.
«¿Tuku wan Biblia xlakata mastakan?» (Artículo xalak jw.org)
¿Tlan kgamanankan kaj xlakata tlajakan tumin?
“El punto de vista bíblico: Los juegos de azar” (¡Despertad!, marzo kata 2015)
Kaʼakxilhti tuku makgtayalh nalakgpali xlatamat chatum chixku tiku xkgalhanan chu xkgamanan xlakata xtlajalh tumin.
«Lu xaklakgati carreras de caballos» (Artículo xla Makatsinina)
Max na nalakgatiya uma
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
