TAKGLHTAWAKGA 38
Kapaxtikatsiniw Jehová xlakata latamat
Kkilatamatkan lhuwa tuku tlan lipaxuwayaw. Maski min kilhtamaku titaxtuyaw taʼakglhuwit, tlan chuntiya lipaxuwayaw kilatamatkan. ¿La tlan nalimasiyaniyaw Jehová pi paxtikatsiniyaw uma tamaskiwin? Chu ¿tuku xlakata lu xlakaskinka napaxtikatsiniyaw?
1. ¿Tuku xlakata xtapalh naliʼakxilhaw latamat?
Lhuwa xtapalh kiliʼakxilhatkan latamat xlakata wa xtamaskiwin xapaxkina kinTlatkan, Jehová. Xla wa “xmalakatsukina latamat”, xlakata wa malakatsukilh putum tuku staknan (Salmo 36:9). «Xla kamaxki putum latamanin latamat chu tajaxanat chu putum tuku maklakaskinkgo» (Hechos 17:25, 28). Wa xlakata, wa Jehová kinkamaxkiyan tuku maklakaskinaw xlakata nalatamayaw. Nachuna, xla tlawa pi kalipaxuwaw kilatamatkan (kalikgalhtawakga Hechos 14:17).
2. ¿La tlan nalimasiyaniyaw Jehová pi paxtikatsiniyaw xlakata latamat?
Lata akxni xwila kxpan mintse, Jehová akxilhni. Biblia lichuwinan chatum kskujni Dios tiku xwanikan David, xla wanilh kʼoración: «Milakgastapu kiʼakxilhkgolh akxni xakwi kxpan kintse» (Salmo 139:16). Jehová lhuwa xtapalh liʼakxilha milatamat (kalikgalhtawakga Mateo 10:29-31). Jehová lu nitlan limakgkatsi akxni wi tiku makgni xtalataman, o akxni wi tiku xʼakstu makgnikan (Éxodo 20:13). a Na nitlan xlimakgkatsilh komo kalipekua xwiliw kilatamatkan o kalipekua xwiliw xlatamatkan amakgapitsin. Akxni kuentajtlawayaw kilatamatkan chu maxkiyaw kakni xlatamatkan amakgapitsin, limasiyayaw pi lhuwa xtapalh liʼakxilhaw uma tamaskiwin.
TLAKG KALAKPUTSANANIW
Kaʼakxilhwi la tlan nalimasiyayaw pi paxtikatsiniyaw Jehová xlakata latamat.
3. Katamakgtakgalhti xlakata ni lu natatatlaya
Kstalaninanin Cristo tiku malaknunikgonit Jehová pi natlawakgo xtalakaskin maklakaskinkgo xlatamatkan chuna la xla lakaskin. Makamaxkikgonit Dios xmaknikan la akgtum xasanto tamakamastan, wa xlakata kuenta xlitlawatkan. Kalikgalhtawakgatit Romanos 12:1, 2 chu kalichuwinantit uma:
-
¿Tuku xlakata kuenta militlawat mimakni chu mintalakapastakni?
-
¿La tlan chuna natlawaya?
4. Katamakgtakgalhti chu kakamakgtakgalhti amakgapitsin
Biblia kinkawaniyan pi kalakgmakgaw putum tuku kalipekua wili latamat. Kaʼakxilhtit VIDEO chu kakatsitit tuku kilitlawatkan xlakata ni kalipekua nawiliyaw kilatamatkan.
Kalikgalhtawakgatit Proverbios 22:3 chu kalichuwinantit tuku xlitlawat chatum lataman xlakata ni naʼakgspula tuku nitlan...
-
... kxchik.
-
... kxtaskujut.
-
... akxni kgamanan.
-
... akxni matlawanima putlaw o waka kʼatanu putlaw.
5. Xtapalh kaliʼakxilhti xlatamat aktsu skgata nema nina lakachin
David lichuwinalh la akxilha Jehová latamat chu xlatamat chatum aktsu skgata nema nina lakachin. Kalikgalhtawakgatit Salmo 139:13-17 chu kalichuwinantit uma:
-
¿Tuku kilhtamaku xtapalh liʼakxilha Jehová xlatamat chatum lataman: akxni lakachin o akxni lakatsuku?
Limapakgsin nema Jehová kamaxkilh Israelitas xkamakgtaya lakpuskatin tiku xʼamakgo kgalhikgo kskgatakan chu na xmakgtaya aktsu skgata nema nina xlakachin. Kalikgalhtawakgatit Éxodo 21:22, 23 chu kalichuwinantit uma:
-
¿La xʼakxilha Jehová akxni wi tiku xmakgni aktsu skgata nema nina xlakachin, maski nichuna xtlawaputun?
-
Wa xlakata, ¿la namakgkatsi komo wi tiku chuna natlawa maski liwana katsi pi nitlan? b
-
Chu wix, ¿la akxilha tuku lakpuwan Dios?
Asta chatum puskat tiku xtapalh akxilha latamat max nalakpuwan pi tlakg tlan nakitaxtu komo namakgan kskgata. Kalikgalhtawakgatit Isaías 41:10 chu kalichuwinantit uma:
-
Komo chatum puskat fuerza nawanikan pi kamakgalh kskgata, ¿tiku xliskinit tamakgtay? ¿Tuku xlakata?
MAKGAPITSIN WANKGO: «Chatunu lakpuskatin xʼakstukan kalakgchan nalaksakkgo komo namakgankgo kskgatakan o ni».
-
¿Tuku makanajliyan pi Jehová lhuwa xtapalh liʼakxilha xlatamat chatum puskat tiku nina lakachin kskgata chu na xtapalh akxilha skgata?
TUKU KATSINIW
Latamat akgtum xtamaskiwin Jehová. Biblia kinkamasiyaniyan lhuwa xtapalh naliʼakxilhaw kilatamatkan chu xlatamatkan amakgapitsin, namakgtakgalhaw chu napaxkiyaw.
¿Tuku xkgalhtinanti?
-
¿Tuku likatsiyaw pi Jehová xtapalh akxilha kilatamatkan?
-
¿La makgkatsi Jehová akxni wi tiku xʼakstu makgnikan o makgni atanu lataman?
-
¿Lhuwa xtapalh liʼakxilha latamat? ¿Tuku xlakata?
TLAKG KAKATSINI
¿La tlan napaxtikatsiniyaw Jehová xlakata kilatamat?
¿Tlan natapati Dios chatum puskat tiku makgalh kskgata nema nina xlakachin makgasata?
«¿Tuku wan Biblia xlakata makgankan skgata?» (Artículo xalak jw.org)
Kaʼakxilhti tuku lakpuwan Dios xlakata latamat chu la uma namakgtayayan akxni nalaksaka tuku nalipaxuwaya.
“¿Se justifica la participación en los deportes de riesgo?” (¡Despertad!, 8 xla octubre kata 2000)
Komo chatum lataman lakpuwanit xʼakstu namakgnikan, ¿tuku namakgtaya nichuna natlawa? Kaʼakxilhti tastakyaw nema masta Biblia.
a Jehová lu kalilakgaputsa tiku lu lipuwamakgo (Salmo 34:18). Xla katsi tuku makgkatsikgo tiku xʼakstu kamakgniputunkan chu kamakgtayaputun tiku chuna makgkatsikgo. Kaʼakxilhti laktlan tastakyaw nema min kʼartículo «¿Tlan nakimakgtaya Biblia komo nialh klatamaputun chu klakpuwanit kiʼakstu nakimakgnikan?», nema min ksección «Tlakg kakatsini» xla uma takgalhtawakga.
b Tiku makgankgonit kskgatakan makgasata ni xlilakpuwanatkan pi nikxni katikatapatika; Jehová katapatiputun. Tlakg nakatsiya xlakata uma kʼartículo nema wanikan: «¿Tuku wan Biblia xlakata makgankan skgata?», nema min ksección «Tlakg kakatsini» xla uma takgalhtawakga.
You May Also Like
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
