Kgalhni lu xlakaskinka. Nila xlatamaw komo ni xkgalhiw. Xlakata Dios kinkamalakatsukin wa lakgchan nakinkawaniyan la nalimaklakaskinaw kgalhni. ¿Tuku wan Dios xlakata kgalhni? ¿Tlan nawayaw o nakinkawilinikanan kgalhni? ¿Tuku namakgtayayan liwana nalaksaka tuku natlawaya?

1. ¿Tuku lakpuwan Jehová xlakata kgalhni?

Makgasata Jehová kawanilh xlakskujnin: «Xlatamat putum tuku staknama wi kxkgalhni» (Levítico 17:14). Jehová wan pi kgalhni wa latamat. Chu komo latamat akgtum xtamaskiwin Dios, xaskulunku chu lhuwa xtapalh, nachuna kiliʼakxilhatkan kgalhni.

2. ¿Wan Dios pi nitlan namaklakaskinaw kgalhni?

Akxni nina xʼanan congregación xla kstalaninanin Cristo, Jehová kalimapakgsilh kskujnin pi ni xwakgolh kgalhni (kalikgalhtawakga Génesis 9:4 chu Levítico 17:10). Chu akxni xwija congregación, Jehová mastapa uma limapakgsin. Lakgkgolotsin tiku xpulalinankgo kamaxkikgolh uma limapakgsin kstalaninanin Cristo: «Chuntiya kalakgmakgantit [...] kgalhni» (kalikgalhtawakga Hechos 15:28, 29).

¿Tuku wamputun nalakgmakganaw kgalhni? Komo mimakuchina xwanin pi xlakgmakganti kuchu, wix nialh xwat kuchu, ¿nixlikana? Pero ¿xwat liwat nema tatlawakanit kuchu o xlilhtukuka kuchu? Xlikana pi ni. Uma na xtachuna akxni lakgmakganaw kgalhni. Kgalhakgaxmatkan Dios wamputun pi ni nalikgotnanaw kgalhni, ni nawayaw liwa nema ni stajmakganikanit xkgalhni chu liwat nema lakgmakankan kgalhni.

¿Chu tuku nawanaw xlakata la maklakaskinkgo kgalhni makuchinanin? Makgapitsi la maklakaskinkgo kgalhni makuchinanin talalakatawaka xlimapakgsin Dios, akgtum liʼakxilhtit wa akxni wi tiku wilinikan kgalhni o tuku litakgatsi kgalhni: glóbulos rojos, glóbulos blancos, plaquetas chu plasma. Pero min kilhtamaku max ni liwana tasiya pi lakatsalamaka xlimapakgsin Dios. Akgtum liʼakxilhtit, akxni wi tiku kuchikan, makuchinanin maklakaskinkgo tuku lakmaxtukan nema litakgatsi kgalhni o watiya maklakaskinkan xkgalhni tiku kuchimaka. Akxni akxilhnitawa tuku tlakg tlan, kinchatunukan nalaksakaw tuku natlawayaw (Gálatas 6:5). a

 TLAKG KALAKPUTSANANIW

3. Kalaksakti tuku namakgapaxuwa Jehová

¿Tuku namakgtayayan liwana nalaksaka tuku natlawaya chu ni natalalakatawaka tuku lakpuwan Dios xlakata kgalhni? Kaʼakxilhtit VIDEO chu alistalh kalichuwinantit pi lu xlakaskinka natlawayaw tuku min kpakgalhu:

• Kaskinti liskgalala kmiʼoración (Santiago 1:5).

• Kaputsa tastakyaw xalak Biblia nema namakgtayayan liwana nalaksaka tuku natlawaya (Proverbios 13:16).

• Kalakputsanani tuku likuchun maklakaskinkgo makuchinanin niku wix lapat.

• Liwana kakatsi tuku ni katimakgamakglhtinanti.

• Akxni wi tuku nalaksaka kuenta katlawa pi mintalakapastakni tlan natawila (Hechos 24:16). b

• Kalakapastakti pi niti lakgchan nawaniyan tuku mililaksakat, nipara tiku tamakgaxtokga, nipara chatum kgolotsin xalak congregación o tiku limakgalhtawakgeman Biblia (Romanos 14:12).

• Katsokgwili tuku laksakti.

4. Xtatayananin Jehová kputsayaw tuku tlakg tlan nakinkalikuchikanan

Kkgalhakgaxmataw xlimapakgsin Dios xlakata kgalhni, pero uma ni wamputun pi ni kmakglhtinanaw atanu likuchun nema tlakg tlan. Kaʼakxilhtit VIDEO.

Kalikgalhtawakgatit Tito 3:2 chu kalichuwinantit uma:

• ¿Tuku xlakata ni nakatalalakatawakayaw makuchinanin chu liwana nakatachuwinanaw?

 5. Tuku tamakxtunikan pulaktati nema litakgatsi kgalhni

Kgalhni pulaktati tuku litakgatsi: glóbulos rojos, glóbulos blancos, plaquetas chu plasma. Pero uma pulaktati wi tuku kgalhikgo nema tlan kalakmaxtukan c chu makgapitsi tlan kamaklakaskinkan klikuchun xlakata nakalikuchikan makgapitsi tajatat o xlakata nalimachokgokan kgalhni.

Chatunu kstalanina Cristo talakaskin nalistakyawa Biblia xtalakapastakni xlakata liwana nakatsi komo namakgamakglhtinan tuku tamakxtunikan pulaktati nema litakgatsi kgalhni. Max makgapitsin ni makglhtinankgo likuchun nema kgalhi tuku tamakxtunikanit pulaktati nema litakgatsi kgalhni. Chu amakgapitsin max lakpuwankgo pi ni anan taʼakglhuwit komo namakglhtinankgo.

Akxni wi tuku nalaksaka natlawaya kalilakpuwanti uma takgalhskinin:

• ¿La nakwani makuchina tuku xlakata ni kmakglhtinan makgapitsi tuku lakmaxtunikanit pulaktati nema litakgatsi kgalhni?

 TUKU KATSINIW

Jehová lakaskin pi lhuwa xtapalh kaʼakxilhwi kgalhni.

¿Tuku xkgalhtinanti?

• ¿Tuku xlakata Jehová wan pi kgalhni lhuwa xtapalh?

• ¿Tuku xlakata katsiyaw pi Dios ni kajwatiya kinkawaniyan ni nawayaw kgalhni, wata na kilhchanima ni nakinkawilinikanan?

• ¿Tuku namakgtayayan liwana nalaksaka tuku nalikuchuna?