Kxlikalanka katiyatni tanu tanu tuku lakpuwankgokan xlakata kuchu. Makgapitsi latamanin min kilhtamaku katawakgo kuchu xʼamigoskan. Amakgapitsi nipara tsinu wakgo. Pero amakgapitsi lu lakgatikgo wakgo chu asta likgachikgo. ¿Tuku wan Biblia xlakata kuchu?

1. ¿Tlan o nitlan wakan kuchu?

Biblia ni wan pi nitlan wakan kuchu. Wata xTachuwin Dios wan pi «vino nema makgapaxuwa xnaku chixku», na akgtum xtamaskiwin Jehová (Salmo 104:14, 15). Nachuna, Biblia kalichuwinan lakchixkuwin chu lakpuskatin tiku ni makgxtakgkgolh Dios chu xwakgo kuchu (1 Timoteo 5:23).

2. ¿Tuku tastakyaw kamaxki Biblia tiku wakgo kuchu?

Jehová wan pi nitlan kgachikan chu na nitlan wakan lhuwa kuchu (Gálatas 5:21). Biblia wan: «Ni katawila kxlakgstipankan tiku wakgo lhuwa kuchu» (Proverbios 23:20). Wa xlakata, komo wayaw kuchu akxni kiʼakstukan wilaw o akxni katawilaw amakgapitsin, ni kiliwatkan lhuwa kuchu chu nialh nakatsiyaw tuku natlawayaw o nialh liwana nalakapastaknanaw. Na ni kiliwatkan lhuwa kuchu pi asta nakinkamakgatatatlayan. Komo nila machokgoyaw la xlilhuwa wayaw, tlakg tlan nawan nipara tsinu nawayaw.

3. ¿La nalimasiyayaw pi maxkiyaw kakni tuku amakgapitsin nalaksakkgo natlawakgo?

Chatunu chatunu xlilaksakat komo nawa o ni nawa kuchu. Ni kilimakgtanutkan komo wi tiku laksaka nawa tsinu. Na ni kiliwanitkan achatum pi kawalh komo xla ni waputun (Romanos 14:10). Chu laksakaw ni nawayaw kuchu komo amakgapitsin nitlan katilimakgkatsikgolh (kalikgalhtawakga Romanos 14:21). Kalakapastakwi pi kstalanina Cristo ni putsa «tuku xʼakstu nalitamakgtaya, wata wa tuku nalitamakgtaya achatum» (kalikgalhtawakga 1 Corintios 10:23, 24).

 TLAKG KALAKPUTSANANIW

4. Kalaksakti komo nawaya o ni nawaya kuchu

¿Tuku xlakpuwan Jesús xlakata wakan kuchu? Xlakata nakatsiyaw, kalichuwinaw xapulana milagro nema tlawalh. Kalikgalhtawakgatit Juan 2:1-11 chu kalichuwinantit uma:

• Chuna la likgalhtawakgaw kʼumakgolh versículo, ¿tuku lakpuwan Jesús xlakata kuchu chu xlakata tiku wakgo?

• Komo Jesús ni wa pi nitlan wakan kuchu, ¿la xliʼakxilhat chatum kstalanina Cristo komo achatum laksaka nawa?

Pero maski chatum kstalanina Cristo tlan nawa kuchu, uma ni wamputun pi putum kilhtamaku tlan chuna natlawa. Kalikgalhtawakgatit Proverbios 22:3 chu kalichuwinantit komo tlan xwat kuchu akxni:

• Pimpat matlawaniya putlaw o namaskujuya akgtum maquina.

• Pimpat kgalhiya chatum aktsu skgata.

• Makuchina wanin pi nitlan nawaya.

• Tuwa makgkatsiya namalakgachokgoya la xlilhuwa kuchu nawaya.

• Limapakgsin ni maxkiyan talakaskin nawaya kuchu.

• Anta wi chatum tiku lakpuwanit nialh nawa kuchu xlakata xapulana nila xmakgxtakga.

¿Milimastat kuchu kʼakgtum tamakgaxtokgat o kʼatanu paskua nema natlawaya? Xlakata nakatsiya tuku militlawat, kaʼakxilhtit VIDEO.

Kalikgalhtawakgatit Romanos 13:13 chu 1 Corintios 10:31, 32. Akxni likgalhtawakganitantita akgatunu texto, kalichuwinantit uma:

• ¿La namakgtayayan umakgolh tastakyaw nalaksaka tuku namakgapaxuwa Jehová?

 5. Kalakkaxwili la xlilhuwa kuchu nawaya

Komo nalaksaka nawaya kuchu, kalakapastakti pi maski Jehová ni wan pi nitlan nawakan, ni lakgati tiku wa lhuwa kuchu. ¿Tuku xlakata? Kalikgalhtawakgatit Oseas 4:11, 18 chu kalichuwinantit uma:

• ¿Tuku max nala komo chatum lataman wa lhuwa kuchu?

¿Tuku nakinkamakgtayayan ni namalakatsaliyaw la xlilhuwa wayaw kuchu? Ni tlankajwa kiliwanatkan, liwana kilikatsitkan tuku tlan tlawayaw chu tuku nila tlawayaw. Kalikgalhtawakgatit Proverbios 11:2 chu kalichuwinantit uma:

• ¿Tuku xlakata tlan kitaxtu komo nalaklhkawiliya la xlilhuwa kuchu nawaya?

6. Katsalani kuchu

 TUKU KATSINIW

Kuchu akgtum xtamaskiwin Jehová, pero xla ni lakgati tiku xakgotni chu tiku malakatsali la xlilhuwa wa kuchu.

¿Tuku xkgalhtinanti?

• ¿Tuku wan Biblia xlakata wakan kuchu?

• ¿Tuku nitlan kitaxtu akxni malakatsalikan la xlilhuwa wakan kuchu?

• ¿La limasiyayaw pi maxkiyaw kakni tuku amakgapitsin laksakkgo xlakata kuchu?