Jesús wa «xʼakgxakga congregación» xla kstalaninanin Cristo (Efesios 5:23). La uku, Jesús kapulalima kstalaninanin kKatiyatni chu maklakaskima «skujni xatalipaw chu xaskgalala» (kalikgalhtawakga Mateo 24:45). Jesús laksakli uma «skujni», wa xlakata kgalhi limapakgsin. Maski chuna, kskujni Cristo litaxtu chu kamakgtaya xnatalan Cristo. ¿Tiku uma skujni? ¿La kinkamakgtayayan?

1. ¿Tiku «skujni xatalipaw chu xaskgalala»?

Jehová ankgalhin maklakaskinit makgapitsi lakchixkuwin xlakata nakapulalin xkachikin (Malaquías 2:7; Hebreos 1:1). Akgtum liʼakxilhtit, akxni xninita Jesús, wa apóstoles chu lakgkgolotsin xalak Jerusalén tiku pulalinkgolh congregación (Hechos 15:2). Chuna la amacha kilhtamaku, la uku, makgapitsi lakgkgolotsin pulalinankgo chu kalilakgapaskan la Lakgkgolotsin tiku Pulalinkgo xtatayananin Jehová (Cuerpo Gobernante). Xlakan kinkamaxkikgoyan tuku matliwakglha kintakanajlakan chu pulalinkgo la lichuwinamaka Dios. Uma wa «skujni xatalipaw chu xaskgalala, uma tiku xmalana [Jesús] kalakgayawalh» uma taskujut (Mateo 24:45a). Putum tiku katatapakgsikgo Lakgkgolotsin tiku Pulalinankgo wa kstalaninanin Cristo tiku kalilaksakkanit espíritu santo chu kgalhkgalhimakgo xlakata natamapakgsinankgo Cristo kxTamapakgsin xalak akgapun akxni nasputa xlatamatkan unu kKatiyatni.

2. ¿Tuku uma liwat xaʼespiritual nema masta skujni xatalipaw?

Jesús wa pi skujni xatalipaw xʼama “kamaxki [amakgapitsi kstalaninanin Cristo] xtawaykan akxni xlilat” (Mateo 24:45b). Xtachuna la liwat nema wayaw chali chali kinkamatliwakglhan chu kinkamakgtayayan ni lu natatatlayaw, liwat xaʼespiritual, uma kilhchanima tastakyaw nema takilhtinit kxTachuwin Dios, kinkamaxkiyan litliwakga xlakata ni namakgxtakgaw Jehová chu namakgantaxtiyaw taskujut nema kinkalakgayawanitan Jesús (1 Timoteo 4:6). Uma liwat xaʼespiritual kinkamaxkikanan ktamakxtumit, kʼasambleas, klikgalhtawakga chu kvideos nema takilhtikgonit kBiblia. Putum uma kinkamakgtayayan naʼakgatekgsaw tuku lakaskin Jehová chu tlakg tlan natalalinaw.

 TLAKG KALAKPUTSANANIW

3. Xkachikin Jehová liwana xlitalakkaxtawilat

Jesús kapulalima Lakgkgolotsin tiku Pulalinankgo xlakata nalakkaxwilikgo taskujut nema tlawakgo xtatayananin Jehová. Kxapulana siglo, congregación xla kstalaninanin Cristo nachuna xtalakkaxtawilanit. Kaʼakxilhtit VIDEO.

Kalikgalhtawakgatit 1 Corintios 14:33, 40 chu kalichuwinantit uma:

• Chuna la wan umakgolh texto, ¿la lakaskin Jehová pi kaskujkgolh xtatayananin? ¿Tuku xlakata chuna lakpuwana?

4. Skujni xatalipaw lakkaxwili la nalichuwinanaw Dios

Xapulana kstalaninanin Cristo lu xlakaskinka xʼakxilhkgo nalichuwinankgo Dios. Kalikgalhtawakgatit Hechos 8:14, 25 chu kalichuwinantit uma:

• ¿Tiku xpulalinkgo la xlichuwinankan Dios kxapulana siglo?

• ¿Tuku tlawakgolh Pedro chu Juan akxni amakgapitsi apóstoles kawanikgolh tuku xlitlawatkan xwanit?

Tuku tlakg liskujkgo Lakgkgolotsin tiku Pulalinankgo wa nalakkaxwilikgo la natalichuwinan Dios. Kaʼakxilhtit VIDEO.

 Jesús masiyalh pi lu xlakaskinka nalichuwinanaw Dios. Kalikgalhtawakgatit Marcos 13:10 chu kalichuwinantit uma:

• ¿Tuku xlakata Lakgkgolotsin tiku Pulalinankgo lu xlakaskinka akxilhkgo nalichuwinankan Dios?

• ¿Tuku xlakata lakaskinaw pi «skujni xatalipaw chu xaskgalala» nalakkaxwili uma taskujut nema tlawamaka kxlikalanka katiyatni?

5. Skujni xatalipaw kinkapulalinan

Lakgkgolotsin tiku Pulalinankgo kamakgtayakgo kstalaninanin Cristo kxlikalanka katiyatni. ¿La laksaka tuku xlitatlawat kxkachikin Dios? Kaʼakxilhti tuku xtlawakgo lakgkgolotsin tiku xpulalinankgo kxapulana siglo. Kalikgalhtawakgatit Hechos 15:1, 2 chu kalichuwinantit uma:

• ¿Tuku taʼakglhuwit kgalhikgolh kstalaninanin Cristo kxapulana siglo?

• ¿Tiku skinikgolh tamakgtay Pablo, Bernabé chu amakgapitsi kstalaninanin Cristo xlakata tlan xlakkaxtlawakgolh uma taʼakglhuwit?

Kalikgalhtawakgatit Hechos 15:12-18 chu 23-29 chu kalichuwinantit uma:

• ¿Tuku pulana tlawakgolh lakgkgolotsin tiku xpulalinankgo xlakata Dios xkamakgtayalh nakatsikgo tuku natlawakgo? (Kaʼakxilhtit versículos 12 15 chu 28).

Kalikgalhtawakgatit Hechos 15:30, 31 chu 16:4, 5 chu kalichuwinantit uma:

• ¿Tuku tlawakgolh kstalaninanin Cristo akxni kgaxmatkgolh tuku xlaksakkgonit lakgkgolotsin?

• ¿Tuku limasiya pi Jehová kasikulunatlawalh xlakata kgalhakgaxmatnankgolh?

Kalikgalhtawakgatit 2 Timoteo 3:16 chu Santiago 1:5 chu kalichuwinantit uma:

• Akxni Lakgkgolotsin tiku Pulalinkgo xtatayananin Jehová wi tuku laksakkgo, ¿tuku tlawakgo xlakata Dios nakamakgtaya?

 TUKU KATSINIW

Lakgkgolotsin tiku Pulalinankgo wa «skujni xatalipaw chu xaskgalala» nema Cristo laksaknit. Uma skujni kapulalin chu kamatliwakglhni xtakanajlakan kstalaninanin Cristo kxlikalanka katiyatni.

¿Tuku xkgalhtinanti?

• ¿Tiku laksakli «skujni xatalipaw chu xaskgalala»?

• ¿La kinkamakgtayakgoyan Lakgkgolotsin tiku Pulalinankgo?

• ¿Kanajlaya wix pi Lakgkgolotsin tiku Pulalinankgo wa «skujni xatalipaw chu xaskgalala»?