TAKGALHTAWAKGA 58
Nikxni kamakgxtakgti Jehová
Xaxlikana kstalaninanin Cristo ni mastayaw talakaskin pi wi tiku o wi tuku natlawa pi nialh nakakninaniyaw Jehová. Liwana kkatsiyaw pi wix nachuna makgkatsiya chu Jehová lu xtapalh liʼakxilha pi ni makgxtakga (kalikgalhtawakga 1 Crónicas 28:9). ¿Tuku max xtlawalh pi namakgxtakgputuna Dios? ¿Tuku tlan natlawaya xlakata ni namakgxtakga Dios?
1. ¿Tuku max natlawakgo makgapitsi latamanin xlakata lakaskinkgo pi namakgxtakgaw Jehová?
Makgapitsi latamanin max natlawaputunkgo pi nialh naskujnaniyaw Jehová. ¿Tiku max chuna natlawaputunkgo? Makgapitsin wa tiku makgxtakgkgonit xaxlikana chu wankgo taʼakgsanin xlakata xkachikin Dios xlakata nalakxtlawakgo kintakanajlakan. Umakgolh latamanin kalimapakuwikan apóstatas. Na wilakgo makgapitsi xpulalinanin takanajla tiku malakgatumikgo tuku nixaxlikana kimpalakatakan xlakata nakaʼakgskgawikgo latamanin chu natlawakgo pi natamakgatlinikgo tuku xaxlikana. Lu nitlan xkitaxtulh komo xkatalawaniw xtalamakgasitsin xkachikin Dios, na nitlan nalikgalhtawakgayaw xlikgalhtawakgakan, nipara natanuyaw kxpaginajkan xla internet chu naʼakxilhaw xvideojkan. Akxni Jesús kalichuwinalh tiku tlawaputunkgo pi kamakgxtakgwi Jehová, xla wa: «Ni kakakuentajtlawanikgotit. Pulalinanin tiku xalakgaxokgo litaxtukgo. Wa xlakata, komo chatum lakgaxokgo napulalin atanu lakgaxokgo, xchatiykan akxtum natajukgoyacha niku kapulhman» (Mateo 15:14).
2. ¿La nalimasiya tuku laksakaw pi ni makgxtakgaw Jehová?
Xlakata paxkiyaw Jehová, nipara tsinu makgtanuputunaw knixaxlikana takanajla o religión. Kintaskujutkan o kaxatukawa atanu tuku tlawayaw, ni xlimakgtanut knixaxlikana takanajla. Jehová kawani xkachikin: «Kamakgxtakgtit chu kataxtutit» kxaLanka Babilonia (Apocalipsis 18:2, 4).
TLAKG KALAKPUTSANANIW
Kaʼakxilhti tuku tlan natlawaya xlakata niti namamakgxtakgniyan Jehová. Na kaʼakxilhti pi akxni makgxtakgaw xaLanka Babilonia limasiyayaw pi ni makgxtakgaw Jehová.
3. Ni naʼakgskgawikgoyan nixaxlikana makgalhtawakgenanin
¿Tuku natlawayaw komo wi tiku nakinkalitachuwinanan tuku nitlan xlakata xkachikin Jehová? Kalikgalhtawakgatit Proverbios 14:15 chu kalichuwinantit uma:
-
¿Tuku xlakata skgalala kiliwanatkan chu ni nakanajlayaw putum tuku nakinkawanikanan?
Kalikgalhtawakgatit 2 Juan 10-11 chu kalichuwinantit uma:
-
¿Xlilat nakatalalinaw apóstatas?
-
Maski ni katachuwinanaw apóstatas, ¿tuku max xtlawalh pi xtsukuw lakpuwanaw la lakpuwankgo?
-
Komo kuenta xtlawaw tuku nitlan wankan xlakata Jehová o xlakata xkachikin, ¿la lakpuwana wix pi xmakgkatsilh Jehová?
4. Ni kamakgxtakgti Dios akxni chatum tala tlawa akgtum talakgalhin
Komo nakatsiyaw pi chatum tiku xalak congregación tlawanit akgtum lanka talakgalhin, ¿tuku kilitlawatkan? Kaʼakxilhti tuku kinkamasiyaniyan limapakgsin nema Dios kamaxkilh xamakgan Israel. Kalikgalhtawakgatit Levítico 5:1.
Chuna la wan uma versículo, komo katsiyaw pi chatum lataman tlawanit akgtum lanka talakgalhin, kiliwanitkan lakgkgolotsin xalak congregación. Pero pulana nawaniyaw tiku tlawanit uma talakgalhin pi wa kakatachuwinalh lakgkgolotsin chu kakawanilh tuku tlawanit. Komo ni chuna natlawa, akinin nalimasiyayaw pi ni makgxtakgaw Jehová chu nakawaniyaw lakgkgolotsin. ¿Tuku xlakata uma limasiya pi ni makgxtakgaw chu paxkiyaw...
-
... Jehová?
-
... tiku tlawanit talakgalhin?
-
... putum congregación?
Komo chatum tala tlawanit tuku nitlan, ¡kamakgtaya!
5. Katamakgatlini xaLanka Babilonia
Kalikgalhtawakgatit Lucas 4:8 chu Apocalipsis 18:4, 5 chu kalichuwinantit uma:
-
¿Talhkatawilanitku kintukuwani kʼakgtum lista xla nixaxlikana takanajla?
-
¿Kmakgtapakgsi kʼakgtum organización niku makgtanuma nixaxlikana takanajla?
-
¿Makgtanu o tataya nixaxlikana takanajla tuku kliskuja?
-
Xliputum tuku ktlawa, ¿nialhpara tsinu makgtanuma knixaxlikana takanajla?
-
Komo kkgalhtinalh pi «chuna», akgtum o akgtiy takgalhskinin, ¿tuku kililakgpalit?
Kaxatukawa tuku nalaksaka, kalimasiyalh pi ni makgxtakga Jehová chu na kamakgtayan ni nalilakgaputsaya alistalh.
¿Tuku natlawaya komo wi tiku nawaniyan pi kalimakgtayananti tumin kʼakgtum organización nema makgtanuma knixaxlikana takanajla?
MAKGAPITSIN WANKGO: «Pero komo ni kkatsi tuku wankgo apóstatas xlakata xtatayananin Jehová, ¿la nakkgalhmakgtaya tuku xaxlikana?».
-
¿Tlan chuna nalakpuwanaw? ¿Tuku xlakata?
TUKU KATSINIW
Komo ni makgxtakgputunaw Jehová, talakaskin ni nakatalalinaw tiku kinkaʼakgskgawiputunan.
¿Tuku xkgalhtinanti?
-
¿Tuku xlakata ni xlilat nakgaxmataw tuku wankgo apóstatas?
-
Komo chatum tala tlawanit lanka talakgalhin, ¿tuku kilitlawatkan?
-
¿Tuku kilitlawatkan xlakata namakgantaxtiyaw limapakgsin niku wan pi ni kilimakgtanutkan nipara tsinu knixaxlikana takanajla?
TLAKG KAKATSINI
Kaʼakxilhti tuku tlan natlawaya akxni amakgapitsin latamanin lichuwinankgo tuku nixaxlikana xlakata xtatayananin Jehová.
«¿Liwana katsiyaw tuku lalh?» (Makatsinina, agosto kata 2018)
¿La nakatsiyaw komo akgtum organización o tuku makgtlawayaw makgtanuma kxaLanka Babilonia?
¿Tuku tlawakgonit makgapitsi latamanin xlakata namaxlajwanikgo kintakanajlakan?
Kbiografía nema wanikan: «Lata akxni aktsujku xakwanit xakputsama Dios», kaʼakxilhti la chatum sacerdote sintoísta makgxtakglhli nixaxlikana takanajla.
«Biblia kalakgpalinilh xlatamatkan» (Artículo xla Makatsinina)
Max na nalakgatiya uma
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
