TAKGALHTAWAKGA 59
Wix tlan natayaniya taputsastalanit
Putum kstalaninanin Cristo titaxtukgo taputsan o taputsastalanit. ¿Xlilat napekuaniyaw uma?
1. ¿Tuku xlakata ni kaks kinkamalakawaniyan taputsastalanit?
Biblia liwana wan pi «putum tiku kakninaniputunkgo Dios kxlatamatkan chuna la kstalaninanin Cristo Jesús, na nakaputsastalanikan» (2 Timoteo 3:12). Jesús putsastalanika xlakata ni xmakgtapakgsi kxkakilhtamaku Satanás. Chu xlakata akinin na ni makgtapakgsiyaw kkakilhtamaku, ni kaks lilakawanaw pi mapakgsinanin chu amakgapitsi takanajla xalak uma kakilhtamaku nakinkaputsastalanikgoyan (Juan 15:18, 19).
2. ¿Tuku kilitlawatkan xlakata natayaniyaw taputsastalanit?
Talakaskin tlakg nalipawanaw Jehová la uku. ¿Chu la tlan chuna natlawayaw? Talakaskin nalimaxtuyaw kilhtamaku chali chali xlakata natlawayaw oración chu nalikgalhtawakgayaw xTachuwin. Na talakaskin ni namakgxtakgaw tamakxtumit xalak congregación. Putum uma namakgtayayan ni napekuana chu natayaniya taputsastalanit, asta maski tiku putsastalanimakgon xalak mifamilia. Apóstol Pablo, tiku makglhuwa putsastalanika, tsokgwililh: «Jehová kimakgtayana. Ni ktipekualh» (Hebreos 13:6).
Atanu tuku na kinkamakgtayayan ni napekuanaw wa pi ankgalhin nalichuwinanaw Dios. Akxni lichuwinanaw Dios, tlakg lipawanaw Jehová chu nialh kapekuaniyaw latamanin (Proverbios 29:25). Komo wix naliskuja la uku ni napekuana, chuntiya nalichuwinana Dios asta maski akxni mapakgsinanin nawankgo pi nialh kalichuwinaw (1 Tesalonicenses 2:2).
3. ¿La kinkamakgtayayan akxni tayaniyaw taputsastalanit?
Xlikana, ni lakgatiyaw nakinkaputsastalanikanan. Pero akxni tayaniyaw taputsastalanit, kintakanajlakan tatliwakglha. Nachuna, tlakg tlan talalinaw Jehová xlakata akxilhaw pi xla kinkamakgtayayan akxni lakpuwanaw pi nialh kgalhiyaw litliwakga xlakata natayaniyaw (kalikgalhtawakga Santiago 1:2-4). Jehová nitlan limakgkatsi akxni akxilha pi patinamaw, pero paxuwa akxni akxilha pi ni taxlajwaniyaw. Biblia wan: «Komo tayaniyatit tapatin xlakata tlawatit tuku tlan, uma wa tuku lu makgapaxuwa Dios» (1 Pedro 2:20). Tiku natayanikgo chu ni namakgxtakgkgo Jehová, xla nakamaxki latamat nema ni kgalhi xlisputni kʼakgtum kakilhtamaku niku nialh katiʼanankgolh tiku talalakatawakakgo xaskulunku takaknin (Mateo 24:13).
TLAKG KALAKPUTSANANIW
Kaʼakxilhwi tuku limasiya pi tlan ni namakgxtakgaw Jehová maski nakinkaputsastalanikanan. Chu na kaʼakxilhwi pi komo natayaniyaw, xla nakinkasikulunatlawayan.
4. Wix tlan natayaniya maski naputsastalanikgoyan tiku xalak mifamilia
Jesús liwana wa pi makgapitsi tiku xalak kifamiliajkan ni xʼamakgo lakgatikgo pi xkakninaniw Jehová. Kalikgalhtawakgatit Mateo 10:34-36 chu kalichuwinantit uma:
-
Akxni chatum lataman tsuku skujnani Jehová, ¿tuku max natlawakgo tiku xalak xfamilia?
Xlakata nakalakgapasatit makgapitsi tiku chuna titaxtukgonit, kaʼakxilhtit VIDEO. Alistalh kalichuwinantit uma:
-
¿Tuku natlawaya wix komo chatum tiku xalak mifamilia o miʼamigo nawaniyan pi nialh kaskujnani Jehová?
Kalikgalhtawakgatit Salmo 27:10 chu Marcos 10:29, 30. Akxni likgalhtawakganitantita akgatunu texto, kalichuwinantit uma:
-
¿La namakgtayayan uma tamalaknun natayaniya akxni mifamilia o miʼamigos nawanikgoyan pi nialh kaskujnani Jehová?
5. Chuntiya kakakninani Jehová maski naputsastalanikana
Talakaskin ni napekuanaw xlakata chuntiya naskujnaniyaw Jehová akxni amakgapitsin ni lakgatikgo. Kaʼakxilhtit VIDEO chu kalichuwinantit uma:
-
¿Tuku akxilhti kvideo nema lakpuwana pi namakgtayayan ni napekuana?
Kalikgalhtawakgatit Hechos 5:27-29 chu Hebreos 10:24, 25. Akxni likgalhtawakganitantita akgatunu texto, kalichuwinantit uma:
-
¿Tuku xlakata lu xlakaskinka chuntiya naskujnaniyaw Jehová maski mapakgsinanin nakinkawanikgoyan pi nialh katamakxtumiw chu nialh kalichuwinaw Dios?
6. Jehová namakgtayayan natayaniya
Xtatayananin Jehová tiku tanu tanu xkatakan chu xpaískan ni makgxtakgkgonit Jehová maski kaputsastalanikanit. Xlakata nakatsiyatit tuku kamakgtayanit, kaʼakxilhtit VIDEO. Alistalh kalichuwinantit uma:
-
¿Tuku kamakgtayalh umakgolh xtatayananin Jehová natayanikgo taputsastalanit?
Kalikgalhtawakgatit Romanos 8:35, 37-39 chu Filipenses 4:13. Akxni likgalhtawakganitantita akgatunu texto, kalichuwinantit uma:
-
¿La masiyaniyan uma texto pi wix tlan natayaniya kaxatukawa taputsan?
Kalikgalhtawakgatit Mateo 5:10-12 chu kalichuwinantit uma:
-
¿Tuku xlakata tlan napaxuwaya maski naputsastalanikana?
Lhuwa kskujnin Jehová tayanikgonit taputsastalanit. ¡Wix na tlan natayaniya!
MAKGAPITSIN WANKGO: «Akit max ni ktitayanilh taputsastalanit».
-
¿Tuku textos xalak Biblia tlan namakgtaya tiku chuna lakpuwan?
TUKU KATSINIW
Jehová lu xtapalh liʼakxilha akxni skujnaniyaw maski kinkaputsastalanikanan. Xla nakinkamakgtayayan xlakata natayaniyaw.
¿Tuku xkgalhtinanti?
-
¿Tuku xlakata ni xlilat kaks nalilakawanaw taputsastalanit?
-
¿Tuku tlan natlawaya la uku xlakata tlan natayaniya akxni nakgalhiya taputsastalanit?
-
¿Tuku xlakata kanajlaya pi tlan naskujnaniya Jehová maski tuwa tuku natitaxtuya?
TLAKG KAKATSINI
Kaʼakxilhti la makgtayalh Jehová chatum kgawasa tiku xtanuma kpulachin xlakata ni makgtanulh tuku xalak kakilhtamaku.
Kaʼakxilhti tuku kamakgtayalh akgtum tamakgaxtokgat chuntiya naskujnanikgo Jehová maski tuwa tuku titaxtukgolh.
Ni kapekuanti maski naputsastalanikana.
«Kakatsiniw tuku natlawayaw akxni nakinkaputsastalanikanan» (Makatsinina, julio kata 2019)
¿Tuku kililakapastakatkan akxni tiku xalak kifamiliajkan ni lakaskinkgo naskujnaniyaw Jehová? ¿Tuku kilitlawatkan xlakata ni naʼanan taʼakglhuwit chu ni namakgxtakgaw Jehová?
«Tuku xaxlikana ni limin takaksni wata tapapitsit» (Makatsinina, octubre kata 2017)
Max na nalakgatiya uma
TAKGALHSKININ NEMA TLAKG TLAWAKAN
¿La kmakgalhtawakgenanaw?
Ktakgalhtawakga nema mastakgo xtatayananin Jehová, wix tlan namaklakaskina Biblia nema kgalhiya. Na tlan natawilakgo mifamilia chu mi amigos akxni namakgalhtawakgekana.
