Putum tiku paxkikgo Jehová:

Jesús wa: «[Wixin] nalakgapasatit ntalulokgtat [o tuku xaxlikana], chu na wa ntalulokgtat, nakamalakgtaxtiyan» (Juan 8:32). ¡Lu tlan limakgkatsiyaw umakgolh tachuwin! Tlan nakatsiyaw tuku xaxlikana maski la uku xakatuwa wilaw, kʼuma “kxaʼawatiya kilhtamaku” niku anan lhuwa taʼakgsanin (2 Timoteo 3:1). Lakapastakawku la lipaxuwaw akxni katsiw wantuku xaxlikana masiya xTachuwin Dios. ¡Lu tlan tuku katsiniw!

Pero ni kaj talakaskin liwana nakatsiyaw tuku xaxlikana chu xlenkgalhin nakalitachuwinanaw amakgapitsin. Xlakaskinka nalilatamayaw. Xlikana, talakaskin natamakgxtakgaw kxtapaxkit Dios. Pero, ¿tuku nakinkamakgtayayan tlan natamakgxtakgaw kxtapaxkit Dios? Katsisni akxni Jesús xʼamakaja makgnikan, wa tuku kilitlawatkan, kawanilh kstalaninanin tiku ni xmakgatsankgananikgo: «Lapi xtlawatit ntu wan nkilimapakgsin, kkintapaxkit nalilatapayatit; lantla chu nkit ktlawanit ntu wan xlimapakgsin nkinTlat, na kxtapaxkit klilama» (Juan 15:10).

¿Akxilhwi tuku tlawalh Jesús xlakata tlan xtamakgxtakgli kxtapaxkit Dios? Kgalhakgaxmatli xlimapakgsin xTlat. Akinin nachuna kilitlawatkan. Xlakata tlan natamakgxtakgaw kxtapaxkit Dios, talakaskin namakgantaxtiyaw tuku wan xlimapakgsin xliputum tuku tlawayaw kkilatamatkan. Chuna wa Jesús ama katsisni: «Lapi katsiniyatit yuma wantu klichuwinan, akgtsiyaj [o xatapaxuwan] nalatapayatit lapi natlawayatit» (Juan 13:17).

Lu lakaskinaw pi uma libro kimputumkan nakinkamakgtayayan nalilatamayaw tuku xaxlikana chu chuna tlan “natamakgxtakgaw kxtapaxkit Dios” chu nakgalhiyaw latamat nema ni kgalhi xlisputni (Judas 21).