Jehová kiMalakatsukinakan chu kinTlatkan, lu skgalala ni xtachuna la akinin. Nachuna, xla kinkapaxkiyan chu lakaskin tlan kalatamaw. Ni kinkatlawanitan xlakata kiʼakstukan nalatamayaw (Jeremías 10:23). Chuna la laktsu kamanan maklakaskinkgo pi nakapulalin xtlatkan, akinin maklakaskinaw pi nakinkapulalinan Dios (Isaías 48:17, 18). Tastakyaw nema masta Biblia akgtum tamaskiwin nema kinkamaxkin Dios. (Kalikgalhtawakga 2 Timoteo 3:16.)

Limapakgsin chu tastakyaw nema kinkamaxkiyan Jehová kinkamasiyaniyan la nalatamayaw chu la tlan namakglhtinanaw tasikulunalin nema ni katisputli. Xlakata Jehová kinkatlawanitan, xatapaxuwan kamastaw talakaskin nakinkapulalinan. (Kalikgalhtawakga Salmo 19:7, 11 chu Apocalipsis [Revelación] 4:11.)

Xtastakyaw Biblia wa tuku kinkamakgtayayan nakatsiyaw tuku natlawayaw akxni wi tuku kililaksakatkan. Pero, limapakgsin kaj pulaktum tuku kilhchani (Deuteronomio 22:8). Xlakata nakatsiyaw la namaklakaskinaw akgtum tastakyaw xalak Biblia akxni wi tuku titaxtuyaw, talakaskin namaskujuyaw kintalakapastaknikan (Proverbios 2:10-12). Akgtum liʼakxilhtit, Biblia masiya pi latamat xtamaskiwin Dios. Uma lu xlakaskinka tastakyaw kinkamakgtayayan ktaskujut, kkinchikkan chu akxni anaw paxialhnanaw, xlakata kinkamalakapastakayan pi kuenta kilitlawatkan. (Kalikgalhtawakga Hechos 17:28.)

Jesús lichuwinalh pulaktiy. Xapulana wan tuku xlakata lamaw: xlakata nalakgapasaw Dios, napaxkiyaw chu ni namakgatsankgananiyaw. Nalakapastakaw uma tastakyaw akxni wi tuku natlawaputunaw (Proverbios 3:6). Tiku chuna natlawakgo xʼamigo Dios nawankgo chu nakgalhikgo xaxlikana tapaxuwan chu latamat nema nikxni katisputli. (Kalikgalhtawakga Mateo 22:36-38.)

Xliʼakgtiy tastakyaw makgtayanan xlakata tlan nakatalalinaw amakgapitsin (1 Corintios 13:4-7). Akxni makgantaxtiyaw uma tastakyaw, nachuna tlawamaw la kalikatsini Dios latamanin. (Kalikgalhtawakga Mateo 7:12 chu 22:39, 40.)

Xtastakyaw Biblia kamakgtaya familias xlakata nalapaxkikgo chu tlan natawilakgo (Colosenses 3:12-14). Pulaktum tastakyaw nema makgtaya tamakgaxtokgat, masiya pi tiku tamakgaxtokgkgonit nikxni nalamakgxtakga. (Kalikgalhtawakga Génesis 2:24.)

Akxni kgalhakgaxmataw xtastakyaw Biblia tlakg tlan tawilayaw chu tlan natawila kintalakapastaknikan. Akgtum liʼakxilhtit, tiku mastakgo taskujut wa kaputsakgo tiku lilatamakgo xtastakyaw Biblia, tiku ni kgalhanankgo chu liwana skujkgo (Proverbios 10:4, 26; Hebreos 13:18). Nachuna, xTachuwin Dios kinkamasiyaniyan pi nalipaxuwayaw komo kgalhiyaw tuku maklakaskinaw chu tlakg xlakaskinka naʼakxilhaw natalalinaw Dios nixawa lhuwa tuku nakgalhiputunaw. (Kalikgalhtawakga Mateo 6:24, 25, 33 chu 1 Timoteo 6:8-10.)

Xtastakyaw Biblia kinkamakgtayayan na ni lu natatatlayaw chu xlimapakgsin Dios niku wan pi ni nakgachiyaw, kinkamakgtayayan xlakata ni nalitatatlayaw chu nitu nakinkaʼakgspulayan (Proverbios 14:30; 22:24, 25; 23:20). Xlikana, Jehová kinkamaxkiyan talakaskin tlan nawayaw kuchu pero ni lhuwa (Salmo 104:15; 1 Corintios 6:10). Xtastakyaw Biblia kinkamakgtayayan, xlakata tlawa pi kuenta natlawayaw la linaw kilatamatkan chu kintalakapastaknikan (Salmo 119:97-100). Pero, akinin kstalaninanin Cristo ni kgalhakgaxmataw tastakyaw kaj xlakata tlan nakinkakitaxtuniyan; kgalhakgaxmataw xlakata namalankiyaw Jehová, kinTlatkan xalak akgapun. (Kalikgalhtawakga Mateo 5:14-16.)