Jehová, xapaxuwana Dios tiku masta xalakwan tamakatsinin, lakaskin pi familias kapaxuwakgolh (1 Timoteo 1:11). Wa lakkaxwilinit tamakgaxtokgat. Tamakgaxtokgkan xlakatin mapakgsinanin makgtayanan xlakata tlan nakamakgastakkan kamanan chu tlan xatapaxuwan natawila familia. Kstalaninanin Cristo xlitamakgaxtokgatkan xlakatin mapakgsinanin xlakata chuna skinkgo. (Kalikgalhtawakga Lucas 2:1, 4, 5.)

Dios lakaskin pi akxni natamakgaxtokgkgo chatum chixku chu puskat putum kilhtamaku nalatatawilakgo. Jehová lakaskin pi chixku chu puskat ni nalaʼakgskgawi (Hebreos 13:4). Jehová ni akxilhputun tiku lamakgxtakga (Malaquías 2:16). Pero masta talakaskin tlan nalamakgxtakga komo tiku tamakgaxtokga akgskgawilh, chu tlan natamakgaxtokgpara. (Kalikgalhtawakga Mateo 19:3-6, 9.)

Jehová tlawalh chixku chu puskat xlakata nalamakgtaya ktamakgaxtokgat (Génesis 2:18). Xachixku wa napulalin xtamakgaxtokgat, wa xlakata wa lakgchan nakamaxki tuku maklakaskinkgo xfamilia chu nakamasiyani xlakata Dios. Nachuna wi tuku nalimakgxtakga xlakata paxki xpuskat. Chixku chu puskat nalapaxkikgo chu nalamaxki kakni. Chu xlakata xchatiykan makglakgalhinanin, talakaskin nakatsinikgo nalatapati xlakata xatapaxuwan natawilakgo. (Kalikgalhtawakga Efesios 4:31, 32; 5:22-25, 33 chu 1 Pedro 3:7.)

Komo akgtum tamakgaxtokgat kgalhi taʼakglhuwit, xchatiykan xlikatsinitkan nalapaxki (1 Corintios 13:4, 5). Xtachuwin Dios ni wan pi akxni nakgalhikgo taʼakglhuwit tiku tamakgaxtokgkgonit tlan nalamakgxtakgkgo. (Kalikgalhtawakga 1 Corintios 7:10-13.)

Jehová lakaskin pi kamanan kapaxuwakgolh. Wa xlakata kamasiyani la tlan napaxuwakgo akxni lakgkgawasanku. Na lakaskin pi kuenta katlawakgolh tuku katsikgo chu tuku titaxtukgonit xtlatkan (Colosenses 3:20). Nachuna, lakaskin pi kakatsikgolh la tamakgkatsi akxni skujnikan Jehová chu xKgawasa. (Kalikgalhtawakga Eclesiastés 11:9–12:1; Mateo 19:13-15, chu 21:15, 16.)

Natlatni naliskujkgo xlakata nakamaxkikgo tuku nawakgo, niku natawilakgo chu tuku nalhakgakgo (1 Timoteo 5:8). Pero ni kajwatiya uma talakaskin. Na nakamasiyanikgo la napaxkikgo chu nalikatsikgo la Dios (Efesios 6:4). Akxni xanatlatni lu paxkikgo Dios, kamanan nachuna paxkikgo. Akxni kastakyawakan chuna la wan xTachuwin Dios, lu kamakgtaya nakgalhikgo xatlan talakapastakni. (Kalikgalhtawakga Deuteronomio 6:4-7 chu Proverbios 22:6.)

Kamanan lakaskinkgo nakawanikan pi tlan tuku tlawamakgolh. Namin kilhtamaku na natalakaskin nakastakyawakan chu nakawanikan tuku nitlan tlawakgolh, chuna ni katitlawakgolh tuku nakalimini tuku nitlan (Proverbios 22:15). Pero akxni nakastakyawakan ni lixkajni nakalikatsinikan. (Kalikgalhtawakga Colosenses 3:21.)

Xtatayananin Jehová tlawakgonit maklhuwa libros nema kamakgtaya natlatni chu kamanan. Putum uma likgalhtawakga takilhtikgonit kBiblia. (Kalikgalhtawakga Salmo 19:7, 11.)