Jesús chu xtamakgalhtawakgen masiyakgolh pi kaj akgtum xaxlikana takanajla anan chu wa pi xtachuna tiji nema linan klatamat nema ni kgalhi xlisputni chu ni lhuwa tiku tekgskgo (Mateo 7:14). Dios kaj wa makgamakglhtinan takaknin nema takilhtinit kxTachuwin, Biblia. Tiku chuna kakninanikgo kaj akgtum takanajla kgalhikgo. (Kalikgalhtawakga Juan 4:23, 24; 14:6, chu Efesios 4:4, 5.)

Kaʼakxilhti video ¿Makgamakglhtinan Dios putum takanajla?

Jesús lichuwinalh pi xʼama anan nixaxlikana palakachuwinanin nema xʼamakgo laktlawakgo xtamasiy Cristo. Umakgolh latamanin wankgo pi kstalaninanin Cristo. Maski wankgo pi masiyakgo xaxlikana kaj kaʼakgskgawikgo latamanin. Pero, tlan nalakgapasaw xaxlikana takanajla, xlakata tiku ankgo kʼuma takanajla limasiyakgo tuku litalakgapasa xaxlikana kstalaninanin Cristo. (Kalikgalhtawakga Mateo 7:13-23.)

Kaʼakxilhwi pulakkitsis nema kalilakgapaskan:

• Akxilhkgo pi Biblia wa xTachuwin Dios. Wa kgalhakgaxmatkgo xtastakyaw Biblia chu ni wa xtamasiykan latamanin (Mateo 15:7-9). Nachuna, tlawakgo tuku lichuwinankgo. (Kalikgalhtawakga Juan 17:17 chu 2 Timoteo 3:16, 17.)

•   Malankikgo xtukuwani Dios, Jehová. Jesús chuna tlawalh akxni lichuwinalh xtukuwani xTlat. Kalitachuwinalh latamanin xlakata Jehová chu kamasiyanilh pi akxni xtlawakgolh oración kskinkgolh pi katamasantujlilh xtukuwani (Mateo 6:9). ¿Tukuya takanajla lichuwinan xtukuwani Dios anta niku lapat? (Kalikgalhtawakga Juan 17:26 chu Romanos 10:13, 14.)

• Lichuwinankgo xTamapakgsin Dios. Jesús makaminka kKatiyatni xlakata xlichuwinalh xalakwan tamakatsinin xlakata Tamapakgsin, nema kajwatiya nakamakgtaya latamanin. Chu chuna tlawalh asta akxni nilh (Lucas 4:43; 8:1; 23:42, 43). Nachuna, wa pi kstalaninanin xʼamakgo lichuwinankgo uma tamapakgsin. Wa xlakata, komo wi tiku nalakgminan chu nalitachuwinanan xTamapakgsin Dios, ¿tukuya takanajla tapakgsi? (Kalikgalhtawakga Mateo 24:14.)

• Ni makgtapakgsikgo kʼuma xalixkajni kakilhtamaku. Kstalaninanin Jesús ni makgtanukgo kpolítica, chu taʼakglhuwit nema wilikgo latamanin kʼakgtum kachikin (Juan 17:16; 18:36). Na ni tlawakgo tuku nitlan chu ni lakapastakkgo la xalak kakilhtamaku. (Kalikgalhtawakga Santiago 4:4.)

• Tasiya la lapaxkikgo. Xtachuwin Dios kamasiyaninit pi nakamaxkikgo kakni putum latamanin, maski kaniwa niku xalanin. Lhuwa takanajla makgtanukgo akxni tlawakan guerras, pero xaxlikana kstalaninanin Cristo nichuna tlawakgo (Miqueas 4:1-3). Wata limaxtukgo xkilhtamakujkan chu tuku kgalhikgo xlakata nakamakgtayakgo latamanin. (Kalikgalhtawakga Juan 13:34, 35 chu 1 Juan 4:20.)

¿Tukuya takanajla masiya tuku wan Biblia, maxki kakni xtukuwani Dios chu lichuwinan pi xTamapakgsin Dios wa tuku nakamakgtaya latamanin? ¿Tukuya takanajla lu xlikana lapaxkikgo chu ni makgtanukgo guerra? ¿Tuku lakpuwana wix? (Kalikgalhtawakga 1 Juan 3:10-12.)