Jesús ni xtachuna xwanit la amakgapitsi latamanin, chatum espíritu xwanit kʼakgapun akxni nina xlakachin unu kKatiyatni (Juan 8:23). Wa tiku Jehová pulana malakatsukilh chu makgtayalh akxni tlawalh putum tuku anan. Biblia limapakuwi pi wa xKgawasa Dios “xachastum”, xlakata xakstu tlawalh (Juan 1:14). Na lilakgapaskan «Tachuwin», xlakata wa xpalakachuwinan xTlat. (Kalikgalhtawakga Proverbios 8:22, 23, 30 chu Colosenses 1:15, 16.)

Dios makamilh xKgawasa unu kKatiyatni. Wa xlakata, wililh xlatamat xkgawasa kxpan María, chatum tsumat tiku judía xwanit. Chuna, Jesús ni kgalhilh chatum tlat xalak katiyatni (Lucas 1:30-35). Pulaktutu tuku xlakata limilh kKatiyatni: 1) milh masiya xaxlikana xlakata Dios, 2) kinkalimasiyanin la natlawayaw xtalakaskin Dios maski nakgalhiyaw taʼakglhuwit chu 3) milh masta xlatamat nema ni xkgalhi talakgalhin xlakata “xkinkalilakgmaxtun”. (Kalikgalhtawakga Mateo 20:28.)

Talakgmaxtut wa tuku xokgokan xlakata nalilakgmaxtukan chatum lataman (Éxodo 21:29, 30). Dios ni xlakaskin pi latamanin xnikgolh chu xkgolonkgolh. Katsiyaw pi ni chuna xlakapastaknit Jehová xlakata wanilh Adán pi xʼama niy komo ni xkgalhakgaxmatli. Wa xlakata, komo xtikgalhakgaxmatli, nikxni xnilh (Génesis 2:16, 17; 5:5). Chuna la wan Biblia talakgalhin «tsukulh» xpalakata Adán. Wamputun pi  Adán kamatitaxtinilh talakgalhin xkamanan, chu chuna tsukukgolh nikgo. Wa xlakata kimputumkan lakaskinaw nakinkalakgmaxtukanan. (Kalikgalhtawakga Romanos 5:12 chu 6:23.)

Pero ¿tiku tlan kxokgolh tuku talakaskin xlakata xkinkalakgmaxtun klinin? Akxni niyaw lakgaxokgoyaw kintalakgalhinkan. Xlakata kgalhiyaw talakgalhin, ni tiku tlan naxokgoni xtalakgalhin achatum. (Kalikgalhtawakga Salmo 49:7-9.)

Jesús ni xkgalhi talakgalhin chu nikxni makglakgalhinalh, ni xtachuna la akinin. Wa xlakata ni nilh xlakata lakgaxokgolh xtalakgalhin, wata wa lakgaxokgolh kintalakgalhinkan. Akxni makamilh xKgawasa xlakata xnilh kimpalakatakan, Dios limasiyalh la xlilhuwa kapaxki latamanin. Chu Jesús na kinkalimasiyanin pi kinkapaxkiyan xlakata kgalhakgaxmatli xTlat chu mastalh xlatamat xlakata xkinkalakgmaxtun ktalakgalhin chu klinin. (Kalikgalhtawakga Juan 3:16 chu Romanos 5:18, 19.)

Kaʼakxilhti video ¿Tuku xlakata nilh Jesús?

Akxni xminit kKatiyatni, kamapaksalh tatatlanin, kamalakastakwanilh tiku xnikgonita chu kamakgtayalh tiku xpatinamakgolh, chuna limasiyalh tuku xʼama tlawa xpalakata xlakskujnin Dios tiku ni makgxtakgkgo (Mateo 15:30, 31; Juan 5:28). Akxni nilh Jesús, Dios malakastakwanilh xlakata espíritu xwa chu xlatamapa kʼakgapun (1 Pedro 3:18). Jesús kgalhkgalhilh kxpaxtun xTlat asta akxni xmaxkilh limapakgsin xlakata xmapakgsinalh kKatiyatni (Hebreos 10:12, 13). La uku, kʼakgapun wi xTamapakgsin Jesús chu kstalaninanin lichuwinamakgo uma xatlan tamakatsin xlikalanka katiyatni. (Kalikgalhtawakga Daniel 7:13, 14 chu Mateo 24:14.)

Xlakata maxkika limapakgsin, nialh makgas uma Mapakgsina tiku kgalhi lhuwa litliwakga nakamasputu tiku kamakgapatinamakgo amakgapitsin. Putum tiku kanajlanikgo Jesús chu kgalhakgaxmatkgo lipaxuw nalatamakgo kKatiyatni, nema akgtum paraíso nawan. (Kalikgalhtawakga Salmo 37:9-11.)