Akxni Jesús xlama kKatiyatni, xʼamigo Lázaro nilh. Xwi kBetania, akgtum aktsu kachikin lakatsu kJerusalén. Akxni chalh Jesús, akgtatita kilhtamaku xninit. Jesús, Marta chu María ankgolh niku xmaknukanit, o xʼakgtapukanit, lakapala tastokgka. ¡Max Marta chu María lu paxuwakgolh akxni akxilhkgolh pi Jesús malakastakwanilh Lázaro! (Kalikgalhtawakga Juan 11:21-24, 38-44.)

Atanu xatlan tamakatsin nema masta Biblia wa pi nalakastakwanamparakgo tiku nikgonitta. Marta xkatsininit pi Jehová nakamalakastakwanipara tiku nikgonitta xlakata nalatamaparakgo kKatiyatni. (Kalikgalhtawakga Job 14:14, 15.)

Latamanin litatlawanitaw «pokgxni» (Génesis 2:7; 3:19). Akinin ni espíritu chu ni laktanumaw tiku kgalhi makni chu lukut. Akinin tasiyayaw chu ni latamayaw alakatanu akxni niyaw. Akxni niy kiʼakskititkan, nialh kgalhiyaw talakapastakni. Wa xlakata tiku nikgonitta, nituku makgkatsikgo chu nitu lipatinankgo. Akxni Lázaro xmalakastakwanikanita, ni lichuwinalh pi wi niku xʼanit. (Kalikgalhtawakga Eclesiastés 9:5, 6, 10.)

Makgapitsi lakpuwankgo pi wi pupatin niku Dios kamapatini latamanin akxni nikgonitta, pero uma nixlikana.  Chuna la akxilhnitawa tiku nikgonitta nialhtu katsikgo. Wa xlakata tamasiy nema anan pi kamapatinikan latamanin nixlikana, uma tamasiy nitlan lichuwinan Jehová, xla nipara tsinu akxilhputun nakamapatinikan latamanin klhkuyat. (Kalikgalhtawakga Jeremías 7:31.)

Kaʼakxilhti video ¿La wilakgolh tiku nikgonita?

Tiku nikgonitta nila chuwinankgo chu ni kinkakgaxmatnikgoyan (Salmo 115:17). Pero makgapitsi laklixkajni ángeles, tlan katachuwinankgo latamanin chu tlawakgo pi katakgaxmatli pi wa chuwinama xʼespíritu tiku ninit (2 Pedro 2:4). Wa xlakata, Jehová ni lakaskin pi nakatachuwinamputunaw tiku nikgonit. (Kalikgalhtawakga Deuteronomio 18:10, 11.)

Millones latamanin tiku nikgonit, nalatamaparakgo kKatiyatni. Nalakastakwanankgo, asta wantiku ni lakgapaskgolh Jehová chu tlawakgolh tuku nitlan. (Kalikgalhtawakga Lucas 23:43 chu Hechos 24:15.)

Tiku nakamalakastakwanikan tlan nakatsinikgo xaxlikana xlakata Dios, nakanajlanikgo Jesús chu nakgalhakgaxmatkgo (Apocalipsis [Revelación] 20:11-13). Komo nakgalhakgaxmatnankgo tlan putum kilhtamaku nalatamakgo kKatiyatni. (Kalikgalhtawakga Juan 5:28, 29.)

Xlakata Jehová namalakastakwaninan, uma limasiya pi lhuwa kinkapaxkiyan maski ni kinkalakgchanan. Xlakata Dios makamilh xKgawasa chu makamastalh xlatamat kimpalakatakan kgalhiyaw uma takgalhkgalhin. Chu wix, ¿tiku akxilhputuna akxni naʼanan talakastakwanat? (Kalikgalhtawakga Juan 3:16 chu Romanos 6:23.)