Natalan tiku lichuwinanatit xTamapakgsin Dios:

Kalilakpuwaw pi akinin chatum apóstol chu wilaw ksipi xla Olivos. Aku kinkatasiyanin Jesús chu akxni amaja an kʼakgapun kinkawaniyan: «Namakglhtinanatit litliwakga akxni espíritu santo nakalakgminan, chu nalichuwinanatit kimpalakata kJerusalén, kputum Judea chu kSamaria, chu kxlikalanka katiyatni» (Hech. 1:8). ¿Tuku xmakgkatsiw?

Max xkinkamakgapekuan uma taskujut chu max xlakpuwaw: «¿La naklichuwinanaw Dios kxlikalanka katiyatni komo ni kinchalhuwakan?». Max lakapastakaw tuku wa Jesús katsisni akxni nina xmakgnikan: «Skujni ni tlakg xlakaskinka nixawa xmalana. Komo xlakan kimputsastalanikgonit, na nakaputsastalanikgoyan; komo xlakan kgalhakgaxmatkgonit kintachuwin, wixin na nakakgalhakgaxmatnikgoyan. Pero putum uma chuna nakatlawanikgoyan kaj xpalakata kintukuwani, xlakata xlakan ni lakgapaskgo Tiku kimalakgachanit» (Juan 15:20, 21). Xlakata umakgolh tachuwin, max nalakpuwanaw: «Xlakata anan lhuwa kintalamakgasitsinkan chu kinkaputsastalanikanan, ¿la tlan namakgantaxtiyaw uma taskujut?».

La uku, xtatayananin Jehová nachuna makgkatsiyaw, na talakaskin nalichuwinanaw Dios «kxlikalanka katiyatni» xlakata nakalakgchanaw «latamanin xliputum kachikinin» (Mat. 28:19, 20). ¿La namakgantaxtiyaw uma lanka taskujut, maski Biblia wa pi xʼamaka kinkaputsastalanikan?

Libro xla Hechos kinkalitachuwinanan la apóstoles chu amakgapitsi kstalaninanin Cristo xalak pulana siglo, makgantaxtikgolh xtaskujutkan xlakata Jehová kamakgtayalh. Uma likgalhtawakga tlawaka xlakata nakinkamakgtayayan nakatsiyaw tuku tlawakgolh chu tuku titaxtukgolh xapulana kstalaninanin Cristo. Naʼakxilhaw la tatalakxtumi tuku titaxtukgolh chu tuku akinin titaxtumaw la uku. Na naʼakxilhaw pi ni kajwatiya tatalakxtumi la lichuwinanaw Dios, wata nachuna la talakkaxtawilanit congregación. Akxni nalikgalhtawakgayaw uma, tlakg nakanajlayaw pi Jehová wa tiku pulalima xkachikin la uku chuna la tlawalh makgasa.

Kskiniyaw Jehová pi akxni nalikgalhtawakgayatit libro xla Hechos, tlakg nalipawanatit pi Jehová nakamakgtayayan chu nakamaxkiyan xʼespíritu santo. Nachuna, nakamakgpuwantiniyan liwana nalichuwinanatit xTamapakgsin Dios chu nakamakgtayayatit latamanin naʼankgo ktiji nema linan klakgtaxtut (Hech. 28:23; 1 Tim. 4:16).