CAPÍTULO 12
Xlakata Jehová kamakgtayalh, ni xatapekua chuwinankgolh
Pablo chu Bernabé limasiyakgolh tataktujut, pi ni xtaxlajwanikgo chu ni xpekuankgo
Takilhtinit kʼHechos 14:1-28
1, 2. ¿Tuku kaʼakgpulalh Pablo chu Bernabé akxni xwilakgolh kListra?
¡LATAMANIN xalak Listra lu taʼakglhuwimakgo! Pablo chu Bernabé aku mapaksakgolh chatum chixku tiku nila xtlawan lata akxni lakachilh, uma chixku lu paxuwama. Xlakata latamanin kaks lilakawankgo, wankgo pi uma lakchixkuwin la dioses litaxtukgo. Asta ksacerdote Zeus kaliminilh coronas nema xlitatlawanit xanat chu xmakamastaputun toros xpalakatakan. Pablo chu Bernabé kawanikgo latamanin pi nitlan tuku tlawamakgolh, xtitkgo klhakgatkan, kalakgstipatanukgo latamanin chu tasaskinkgo pi ni xkamaxkika kakni.
2 Uma kilhtamaku chinkgo judíos xalak Iconio chu Antioquía xla Pisidia tiku ni xkgaxmatputunkgo tamakatsinin, wankgo taʼakgsanin xpalakata Pablo chu Bernabé chu tlawakgo pi latamanin xkasitsinikgolh. ¡Lu lakapala talakgpalikgolh! ¡Latamanin tiku xkakninaniputunkgo Pablo, la uku, aktalamakgniputunkgo! Stiliyawakgo Pablo chu tsukukgo liʼaktalakgo chiwix, asta la xanin makgxtakgkgolh. Akxni xtlawanikgonita tuku nitlan, xwatalinkgo kxkilhtin kachikin chu lakpuwankgo pi ninita.
3. ¿Tuku takgalhskinin nakgalhtiyaw kʼuma capítulo?
3 ¿Tuku xlakata chuna likatsinikgolh Pablo? ¿Tuku katsiniyaw xlakata tuku titaxtukgolh Pablo, Bernabé chu latamanin xalak Listra? ¿Tuku xlitlawatkan lakgkgolotsin xalak congregación xlakata nachuna natlawakgo la Pablo chu Bernabé tiku ni pekuankgolh akxni lichuwinankgolh tuku «Jehová kalimapakgsilh»? (Hech. 14:3). Kaʼakxilhwi.
Lhuwa judíos chu griegos kanajlakgolh (Hechos 14:1-7)
4, 5. ¿Tuku xlakata Pablo chu Bernabé ankgolh kʼIconio, chu tuku lalh anta?
4 Nina makgas xtitaxtunit, Pablo chu Bernabé xkatamakxtukanit kʼAntioquía xla Pisidia nema xtapakgsini Roma xlakata judíos xtaʼakglhuwikgonit. Ni taxlajwanikgolh, «tinkxaktikgolh pokgxni kxtantunkan» xlakata umakgolh latamanin ni xmakgamakglhtinankgonit xaxlikana (Hech. 13:50-52; Mat. 10:14). Alistalh, taxtukgolh chu kamakgxtakgkgolh kxmakan Jehová (Hech. 18:5, 6; 20:26). Ni makgatsankgakgolh tapaxuwan chu tlawankgolh 150 kilómetros ksureste asta akxni chankgolh kxakaxtum, nema xlistili kxkasipijni Tauro chu Sultán.
5 Xapulana kachikin niku chankgolh wa Iconio, anta kʼGalacia, uma kachikin chuntiya xkgalhi xtalismaninkan griegos maski wa Roma xmapakgsi. a Anta xwilakgolh lhuwa judíos chu tiku xmakgamakglhtinankgonit xtakanajlakan judíos. Chuna la xlismanikgonit, Pablo chu Bernabé ankgolh lichuwinankgo Dios ksinagoga (Hech. 13:5, 14). Xlakata la chuwinankgolh, lhuwa judíos chu griegos kanajlakgolh (Hech. 14:1).
6. ¿Tuku xlakata Pablo chu Bernabé lu tlan makgalhtawakgenanin xwankgonit, chu la tlan nastalaniyaw xliʼakxilhtitkan?
6 ¿Tuku xlakata Pablo chu Bernabé lu tlan makgalhtawakgenanin xwankgonit? Pablo liwana xlakgapasa Biblia chu tlan xlimaklakaskin tuku xlanit, na limaklakaskilh Limapakgsin nema maxkika Moisés chu tuku xlichuwinankgonit palakachuwinanin xlakata xlimasiyalh pi Jesús wa Mesías tiku xwankanit pi xʼama min (Hech. 13:15-31; 26:22, 23). Chu Bernabé xlitalakgapasa xlakata lu xkalilakgaputsa amakgapitsin (Hech. 4:36, 37; 9:27; 11:23, 24). Xchatiykan xlichuwinankgo tuku “Jehová xkalimapakgsi” chu ni wa xlichuwinankgo tuku xlakan xlakpuwankgo. ¿La tlan nachuna natlawayaw akxni lichuwinanaw Dios? Liwana nalakputsananiyaw xTachuwin Dios, nalaksakaw textos nema nalakgatikgo latamanin, nalakputsayaw la tlan nakamamakgkatsiniyaw tiku kinkakgaxmatnikgoyan chu ankgalhin kBiblia nakilhtiyayaw tuku nakawaniyaw.
7. 1) ¿Tuku kitaxtu akxni lichuwinankan Dios? 2) ¿Tuku mililakapastakat komo mifamilia nalisitsi xlakata kgalhakgaxpata Jehová?
7 Lucas wa pi kʼIconio ni putum tlan makgamakglhtinankgolh tamakatsinin: «Judíos tiku ni kanajlakgolh tlawakgolh pi latamanin xalak atanu kachikinin lu xkasitsinikgolh natalan». Akxni akxilhkgolh uma, xchatiykan tamakgxtakgkgolh. Biblia wan pi «akglhuwa semanas ni pekuankgolh akxni lichuwinankgolh» xalaktlan tamakatsinin. Uma tlawalh pi “lhuwa latamanin xalak kachikin xtapitsikgolh: makgapitsi katatayakgolh judíos, pero amakgapitsi katatayakgolh apóstoles” (Hech. 14:2-4). La uku, nachuna kitaxtu, xtachuwin Dios makxtum katlawa makgapitsi pero amakgapitsi kamapitsi (Mat. 10:34-36). ¿Lisitsikgo makgapitsi kifamiliajkan xlakata kgalhakgaxmataw xtachuwin Dios? Komo chuna, kalakapastakwi pi chuna tlawakgo xlakata kgaxmatkgonit o kawanikanit taʼakgsanin kimpalakatakan. Xatlan kintayatkan nakamakgtaya xlakata naʼakxilhkgo pi tuku kgaxmatkgonit kaj taʼakgsanin chu max natlawa pi nalakgpalikgo tuku lakpuwankgo chu tlan nakinkalikatsinikgoyan (1 Ped. 2:12; 3:1, 2).
8. ¿Tuku xlakata Pablo chu Bernabé taxtukgolh kʼIconio, chu tuku kinkamasiyaniyan tuku tlawakgolh?
8 Titaxtulh kilhtamaku, xtalamakgasitsinkan lakkaxwilikgolh naʼaktalamikgo Pablo chu Bernabé, akxni xlakan katsikgolh uma, laksakkgolh alakatanu naʼankgo (Hech. 14:5-7). Akxni chuna titaxtuyaw, akinin na limasiyayaw uma liskgalala. Akxni kinkawanikanan tuku nitlan, ni mastayaw talakaskin pi tapekua natlawa pi nialh nalichuwinanaw Dios (Filip. 1:7; 1 Ped. 3:13-15). Pero komo akxilhaw pi stakma taʼakglhuwit, ni natlawayaw tuku kalipekua nawili kilatamatkan chu xlatamatkan kinatalankan (Prov. 22:3).
Kawanikan “kakakninanikgolh xastakna Dios” (Hechos 14:8-19)
9, 10. ¿Niku xwi Listra, chu tuku katsiyaw xpalakata latamanin tiku xlamakgo anta?
9 Pablo chu Bernabé ankgolh kListra maski ni lhuwa judíos xlamakgo anta. Uma aktsu kachikin nema xtapakgsini Roma, xtatekgsa 30 kilómetros kxsuroeste Iconio; latamanin xalak Listra lu xkatalalinkgo latamanin xalak Antioquía xla Pisidia. Kʼuma kachikin max xchuwinankan griego, pero xtachuwinkan wa licaonio. Pablo chu Bernabé tsukukgolh lichuwinankgo Dios niku lhuwa xtitaxtukan, max xlakata ni xʼanan sinagoga. Nachuna, Pablo watiya milagro tlawalh nema xtlawanit Pedro kJerusalén: mapaksalh chatum chixku tiku nila xtlawan lata akxni lakachilh (Hech. 14:8-10). Milagro nema tlawalh Pedro tlawalh pi lhuwa latamanin xmakgamakglhtinankgolh xaxlikana, pero nichuna kitaxtulh akxni Pablo chuna tlawalh (Hech. 3:1-10).
10 Latamanin xalak Listra xkakninanikgo atanu dioses. Wa xlakata, akxni akxilhkgolh pi chixku tiku mapaksaka tunkun tayalh, lakpuwankgolh pi Bernabé Zeus xwanit, tlakg xalanka xdios griegos, chu pi Pablo Hermes xwanit, xkgawasa Zeus chu xpalakachuwina dioses (kaʼakxilhti recuadro « Listra chu la xkakninanikan Zeus chu Hermes»). Pero Pablo chu Bernabé xkamasiyaniputunkgo pi xlakan ni dioses xwankgonit, wata wa Jehová, xaxlikana Dios, tiku xkamaxkinit litliwakga xlakata xtlawakgolh milagro (Hech. 14:11-14).
«Kkalitachuwinaman xatlan tamakatsinin, xlakata namakgxtakgatit putum uma tuku nitu litaxtu, chu nakakninaniyatit xastakna Dios» (Hechos 14:15).
11-13. 1) ¿Tuku kawanikgolh Pablo chu Bernabé latamanin xalak Listra? 2) ¿Tuku pulaktum katsiniyaw xlakata tuku tlawakgolh Pablo chu Bernabé?
11 Pablo chu Bernabé lakputsakgolh la nakalakgchanikgo xnakujkan. Kawanikgolh: «Lakchixkuwin, ¿tuku xlakata tlawapatit putum uma? Akinin na latamanin tiku kkgalhiyaw takatsanajwat chuna la wixin. Chu kkalitachuwinaman xatlan tamakatsinin, xlakata namakgxtakgatit putum uma tuku nitu litaxtu, chu nakakninaniyatit xastakna Dios, tiku tlawalh akgapun, katiyatni, pupunu chu putum tuku anta wilakgolh. Kkilhtamaku nema titaxtunita kamaxkilh talakaskin putum kachikinin natlawakgo tuku xlakaskinkgo, pero xla kalimasiyanin chuna la likatsi akxni tlawalh tuku tlan, kamaxkin sen xalak akgapun chu kilhtamaku akxni lu makgalanankan, kalimakgalhkgasan liwat chu kalimatsamanin tapaxuwan minakujkan» (Hech. 14:15-17). Tuku tsokgli Lucas kinkamasiyaniyan la tlan nakalitachuwinankgo Dios tiku ni kanajlanikgo Cristo.
12 ¿Tuku xlipulaktum katsiniyaw? Pi tiku lichuwinan Dios ni xlilakpuwanat pi tlakg katsi nixawa tiku kgaxmatnimakgo. Pablo chu Bernabé limasiyakgolh tataktujut akxni wankgolh pi na xtitaxtukgo taʼakglhuwit nema xtitaxtukgo tiku xkakgaxmatnimakgo. Xlikana pi Pablo chu Bernabé lhuwa talakgalhaman xkgalhikgo, xlakata xlakgtaxtunikgonita nixaxlikana takanajla, xmakglhtinankgonit espíritu santo chu xkgalhikgo takgalhkgalhin namapakgsinankgo kʼakgapun. Pero latamanin xalak Listra na tlan xkgalhikgolh uma talakgalhaman komo xkgalhakgaxmatkgolh Cristo.
13 ¿Tuku tayat limasiyayaw akxni lichuwinanaw Dios? ¿Limasiyayaw pi taktujuyaw? Chu komo latamanin kinkamalankikgoyan akxni kalitachuwinanaw xTachuwin Dios, ¿kamachokgoyaw chuna la tlawakgolh Pablo chu Bernabé? Tiku na limasiyalh uma tayat wa Charles Taze Russell, chatum tlan makgalhtawakgena tiku pulalilh taskujut akxni xtitaxtuma kata 1870 asta 1916. Akgtum kilhtamaku tsokgwililh: «Ni kkgalhkgalhiyaw pi nakinkamalankikanan chu nakinkakakninanikanan, nipara wa tuku ktsokgwiliyaw; na ni klakaskinaw nakinkawanikanan Pulalina o Rabí». Xla limasiyalh tataktujut chuna la tlawakgolh Pablo chu Bernabé. Chuna la xlakan, akxni lichuwinanaw Dios ni kgalhkgalhiyaw pi nakinkamalankikanan, wata kamakgtayaputunaw latamanin “nakakninanikgo xastakna Dios”.
14-16. ¿Tuku apulaktiy katsiniyaw tuku titaxtukgolh Pablo chu Bernabé kListra?
14 Xlipulaktiy tuku katsiniyaw, wa pi tiku lichuwinan Dios xlilakgpalit tuku lichuwinamputun chuna la tuku katsiputun tiku kgaxmatni. Judíos chu tiku kstalanikgo xtamasiykan judíos tiku xwilakgo kʼIconio xlakgapaskgo Tatsokgni chu la Dios xtalalin Israel, pero tiku xlamakgo kListra nitu xkatsikgo. Xlakan xlakgapaskgo xlakata tachanan, xlakata kxkachikinkan xʼanankgo pukuxtu nema lu xmakgalanankgo. Wa xlakata ni tuwa xʼamakgo akxilhkgo tayat nema Dios limasiya akxni xmakgalakgolh tuku xchankgolh. Wa xlakata Pablo chu Bernabé maklakaskinkgolh uma akxni katachuwinankgolh (Rom. 1:19, 20).
15 Chu akinin, ¿na tlan nakalitachuwinanaw latamanin tuku lakgapaskgo? Maski chanana watiya talhtsi namaklakaskin, talakaskin tanu tanu la nalakkaxwili tiyat. Anan tiyat niku ni tuwa chananankan, pero amakgapitsi talakaskin lu naliskujkan xlakata tlan nachananankan. Nachuna kitaxtu chuna la lichuwinanaw Dios. Watiya talhtsi chanaw: tamakatsinin xla Tamapakgsin, nema lichuwinan xTachuwin Dios. Pero chuna la Pablo chu Bernabé kililakgpalitkan tuku nalichuwinanaw akxni naʼakxilhaw tuku kanajlakgo chu tuku titaxtumakgo tiku kinkakgaxmatnikgoyan (Luc. 8:11, 15).
16 Xlipulaktutu tuku katsiniyaw wa pi ni kilitaxlajwanitkan komo latamanin ni kgaxmatputunkgo xaxlikana. ¿Tuku xlakata? Xlakata maski lu naliskujaw nastaka xtakanajlakan, tamakatsin xla Tamapakgsin max natamayacha kkachiwixni o wi tiku napulhakxtu (Mat. 13:18-21). Chu chuna la kawanilh Pablo kstalaninanin Cristo xalak Roma, «chatunu chatunu akinin namastayaw kuenta kxlakatin Dios», uma na kakilhchanima tiku kamasiyaniyaw tuku wan Biblia (Rom. 14:12).
«Kamakamaxkikgolh Jehová» (Hechos 14:20-28)
17. ¿Niku ankgolh Pablo chu Bernabé akxni taxtukgolh kDerbe, chu tuku xlakata?
17 La akxilhwi, latamanin xalak Listra aktalamikgolh Pablo, xwatamaxtukgolh kkachikin, lakpuwankgolh pi xanin makgxtakgkgolh chu ankgolh. Pero akxni talakatsuwikgolh tamakgalhtawakgen, tayalh chu tanulh kkachikin xlakata anta tamakgxtakgli. Lichali, akxni xtaʼan Bernabé, tlawalh 100 kilómetros asta kDerbe. Xlakata xʼaktalamikanit lu xkatsanima, pero chuna alh. Xlakata ni taxlajwanikgolh, xchatiykan chankgolh kʼDerbe chu “kamakgtayakgolh lhuwa latamanin xlakata tamakgalhtawakgen xlitaxtukgolh”. Alistalh, ni lakankgolh kxaʼaktsu tiji nema linan kʼAntioquía xla Siria, wata «taspitparakgolh kListra, kʼIconio chu kʼAntioquía [xla Pisidia]». ¿Tuku xlakata taspitparakgolh kʼumakgolh kachikin? Xlakata «kamatliwakglhkgolh tamakgalhtawakgen, kamakgpuwantinikgolh chuntiya tliwakga xkgalhikgolh xtakanajlakan» (Hech. 14:20-22). ¡Lu tlan liʼakxilhtit wilikgolh! Kalilakgaputsakgolh congregaciones chu ni xʼakstukan kalilakgaputsaka. Lhuwa misioneros chu superintendentes de circuito tlawakgonit chuna la Pablo chu Bernabé.
18. ¿La kalaksakkan tiku kgolotsin nalitaxtukgo?
18 Pablo chu Bernabé ni kajwatiya kalimatliwakglhkgolh natalan xtachuwinkan chu xliʼakxilhtitkan, nachuna «kalaksakkgolh makgapitsi lakchixkuwin xlakata lakgkgolotsin xlitaxtukgolh kʼakgatunu congregación». Maski wa «kamalakgachalh espíritu santo», Pablo chu Bernabé chuntiya xtlawakgo oración chu ni xwayankgo akxni xlaksakkgo tiku kgolotsin nalitaxtu chu “xmakamaxkikgo Jehová” (Hech. 13:1-4; 14:23). La uku, nachuna tlawakan. Akxni lakgkgolotsin xalak congregación wankgo pi chatum tala tlan kgolotsin nalitaxtu, pulana tlawakgo oración xlakata nakatsikgo komo uma tala makgatsi tuku skin Biblia (1 Tim. 3:1-10, 12, 13; Tito 1:5-9; Sant. 3:17, 18; 1 Ped. 5:2, 3). Ni wa kuenta tlawakgo komo akglhuwata kata kstalanina Cristo litaxtu. Wata akxilhkgo komo xtachuwin chu xtayat limasiya pi lilatama xtapulalit espíritu santo. Xlilakapastakatkan pi kajwatiya tlan nakaskujnani chu nakamakgtaya xnatalan komo namakgatsi tuku skin Biblia (Gál. 5:22, 23). Superintendente de circuito wa lakgchan nalaksaka tiku kgolotsin nalitaxtu (katamalakxtupi 1 Timoteo 5:22).
19. ¿Tuku talakgatay kgalhikgo lakgkgolotsin, chu la stalanikgo xliʼakxilhtitkan Pablo chu Bernabé?
19 Lakgkgolotsin katsikgo pi namastakgo kuenta kxlakatin Dios xlakata la kalikatsinikgo natalan (Heb. 13:17). Chuna la Pablo chu Bernabé, lakgkgolotsin kinkawilinikgoyan tlan liʼakxilhtit akxni lichuwinankgo Dios, kalimatliwakglhkgo natalan xtachuwinkan chu wi tuku limakgxtakgkgo xlakata nakamakgtayakgo natalan (Filip. 2:3, 4).
20. ¿La kinkamakgpuwantiniyan xliʼakxilhtitkan Pablo chu Bernabé?
20 Akxni Pablo chu Bernabé taspitkgolh kʼAntioquía xla Siria, «lichuwinankgolh chuna la Dios kalimaklakaskilh xlakata lhuwa tuku xtlawalh, chu la xmalakkinit malakcha xlakata tiku ni judíos xkanajlakgolh» (Hech. 14:27). Akxni likgalhtawakgayaw tuku natalan tlawakgolh chu la Jehová kasikulunatlawalh, ¿ni xlikana pi uma tlawa xatapaxuwan chu ni xatapekua nalichuwinanaw tuku kinkalimapakgsinitan Jehová?
a Kaʼakxilhti recuadro « Iconio, niku xlamakgolh frigios».
