CAPÍTULO 11
«Xkgalhikgo tapaxuwan chu espíritu santo»
Pablo katekgsa latamanin tiku nitlan likatsikgo chu lakatitayakgo xaxlikana
Takilhtinit kʼHechos 13:1-52
1, 2. ¿Niku ankgolh lichuwinankgo Dios Bernabé chu Saulo, chu la namakgtayanan uma taskujut xlakata nakgantaxtu Hechos 1:8?
UMA kilhtamaku natalan xalak Antioquía xla Siria lu paxuwamakgo. Xliputum palakachuwinanin chu makgalhtawakgenanin nema anan kcongregación, Bernabé a chu Saulo kalilaksakka espíritu santo xlakata tlan naʼankgo lichuwinankgo xalaktlan tamakatsinin klakgamakgat kachikinin (Hech. 13:1, 2). Ni kaj xlimakgtumku kamalakgachakan misioneros, pero kajwatiya xkilakgonit niku latamanin xmakgamakglhtinankgonita xtachuwin Dios (Hech. 8:14; 11:22). Uma kilhtamaku, Bernabé chu Saulo, chu Juan Marcos tiku kastalani, na ankgo niku kaj tsinu o nipara tsinu kgaxmatkanit xalaktlan tamakatsinin.
2 Titaxtunita 14 kata akxni Jesús kawanilh xtamakgalhtawakgen: «Nalichuwinanatit kimpalakata kJerusalén, kputum Judea chu kSamaria, chu kxlikalanka katiyatni» (Hech. 1:8). Uma lakapala nakgantaxtu xlakata taskujut nema natlawakgo Bernabé chu Saulo. b
«Tanu kakiwilinitit Bernabé chu Saulo, xlakata kkalaksaknit natlawakgo akgtum taskujut» (Hechos 13:1-12)
3. ¿Tuku xlakata lu tuwa xwanit xʼankan kʼalakatanu kachikin kxapulana siglo?
3 La uku, putlaw, avión chu atanu tuku tlawakanit makgtayanan ni lhuwa horas nalichankan alakatanu. Pero uma nichuna xwanit kxapulana siglo, xlakata katantun xʼankan kʼalakatanu chu tiji kalixkajnit xwanit. Akgatunu kilhtamaku nema max 30 kilómetros xtlawankan, lu xmakgatlakgwanan. c Wa xlakata, maski Bernabé chu Saulo lu xpaxuwamakgo xlakata xʼamakgo lichuwinankgo Dios, xʼakgatekgskgo pi lu tuwa xwanit chu lu makgat xʼamakgolh tlawankgo (Mat. 16:24).
4. 1) ¿Tuku makgtayanalh xlakata xkalaksakka Bernabé chu Saulo, chu tuku wankgolh natalan xlakata la kalaksakka? 2) ¿La kamakgtayayaw natalan tiku kalaksakkanit nalakgatayakgo akgtum taskujut congregación?
4 ¿Tuku xlakata espíritu santo masiyalh pi Bernabé chu Saulo wa tiku xkalaksakkanit? (Hech. 13:2). Biblia ni kinkawaniyan pero katsiyaw pi wa espíritu santo kalilaksakka. Chu ni anan tuku limasiya pi palakachuwinanin chu makgalhtawakgenanin xalak Antioquía xla Siria xwankgolh pi ni chuna xwanit. Wata tatayakgolh tuku xlaksakkanit. Max lu paxuwakgolh umakgolh chatiy apóstoles akxni akxilhkgolh pi natalan ni kalakgsitsinikgolh, chu «akxni xkgalhxtakgnankgonita chu xtlawakgonita oración, kaʼakwilikgolh xmakankan chu kamalakgachakgolh» (Hech. 13:3). Akinin na talakaskin nakamakgtayayaw tiku kalaksakkan kcongregación xlakata natlawakgo akgtum taskujut, chuna la tiku pulalinankgo kcongregación. Ni kalakgsitsiniyaw, wata kapaxkiyaw chu “tlakg tlan kalikatsiniyaw xlakata xtaskujutkan” (1 Tes. 5:13).
5. Kalichuwinanti tuku tlawakgolh Bernabé chu Saulo xlakata tlan xʼankgolh lichuwinankgo Dios kChipre.
5 Lata kʼAntioquía, umakgolh chatiy lakchixkuwin ankgolh kSeleucia, niku tawakakgolh kʼakgtum barco nema xʼama kChipre, nema 200 kilómetros xlimakgat xwi. d Xlakata Bernabé xalak Chipre xwanit, max lu xlichuwinamputun xalaktlan tamakatsin kxkachikin. Chuna, «akxni chankgolh kSalamina tsukukgolh lichuwinankgo Dios ksinagogaskan judíos» (Hech. 13:5). e Alistalh titaxtukgolh klakgatum isla, chu max lichuwinankgolh Dios klaklanka kachikinin niku xtitaxtukgo. Maski ni liwana katsikan la xlimakgat ankgolh, max tlawankgolh liwaka 160 kilómetros.
6, 7. 1) ¿Tiku xwanit Sergio Paulo, chu tuku xlakata Bar-Jesús xtlawaputun pi ni xkgaxmatli xalaktlan tamakatsinin? 2) ¿Tuku tlawalh Saulo xlakata skuwana ni xlaktlawalh xtakanajla Sergio Paulo?
6 Kxkilhtamakujkan apóstoles, Chipre xlitsama nixatlan talismanin. Wa uma tuku akxilhkgolh Bernabé chu Saulo akxni chankgolh kPafos, kxʼoeste isla. Anta «tatanokglhkgolh chatum chixku judío, tiku xwanikan Bar-Jesús, skuwana xwanit chu ni xaxlikana palakachuwina. Anta xtawi gobernador Sergio Paulo, skgalala chixku xwanit». Amacha kilhtamaku, lhuwa romanos tiku lu xlakaskinka xlitaxtukgo chuna la Sergio Paulo tiku «skgalala chixku xwanit» xlakgankgo skuwananin chu tiku xlakputsananikgo staku akxni nina xlaksakkgo tuku lu xlakaskinka. Maski chuna, Sergio Paulo «lu xkgaxmatputun xtachuwin Dios». Pero Bar-Jesús ni lakgatilh, tiku na lilakgapaskan Elimas, chu wamputun «skuwana» (Hech. 13:6-8).
7 Uma skuwana lakatitayalh xalaktlan tamakatsin xla Tamapakgsin. Ni xmakgatsankgaputun xlakaskinka taskujut nema xlakgaya, wa xlakata «xlaktlawaputun xtakanajla gobernador» (Hech. 13:8). Pero Saulo wi tuku tlawalh xlakata skuwana ni xlaktlawalh xtakanajla gobernador. ¿Tuku tlawalh? Biblia wan: «Saulo, tiku na xlimapakuwikan Pablo, litatsamalh espíritu santo, kaks lakaʼakxilhli [skuwana] chu wa: “Wix chixku tiku litsama lhuwa tuku liʼakgskgawinankan chu tipalhuwa tuku nitlan, xkgawasa Akgskgawini, xtalatlawana putum tuku xaʼakgstitum, ¿chuntiya nalaktlawaya tuku xaʼakgstitum xtiji Jehová? ¡Kaʼakxilhti!, xmakan Jehová nalakgchinan, chu nalakgaxokgona, chu nila katiʼakxilhti kxkgakganat chichini makgapitsi kilhtamaku”. Tunkun makgkatsilh pi xlakgastapu lakgapokglhwanalh chu kapukswanalh, chu anta xtamakgstilipula xputsama tiku tlan xmakgachipalilh». f ¿Tuku kitaxtulh xlakata uma milagro? «Akxni gobernador akxilhli tuku lalh, kanajlalh, xlakata kaks lilakawa xtamasiy Jehová» (Hech. 13:9-12).
Chuna la Pablo, tayaniyaw akxni kinkalakatakikanan, ni pekuanaw chu kgalhmakgtayayaw xaxlikana.
8. ¿La tlan nastalaniyaw xliʼakxilhtit Pablo?
8 Chuna la Pablo ni pekuanilh Bar-Jesús, akinin na ni kilipekuanitkan tiku kinkalakatakikgoyan. Xlikana pi ankgalhin tlan xlitakgaxmatat kintachuwinkan “xtachuna la xlimakgamika matsat” (Col. 4:6). Pero uma ni wamputun pi xlakata ni kgalhiputunaw taʼakglhuwit namastayaw talakaskin nakalaktlawanikan xtakanajlakan tiku kgaxmatputunkgo xtachuwin Dios. Komo nitu xtlawaw, uma xlaktlawalh xtakanajlakan. Na ni kilimastatkan talakaskin pi tapekua natlawa pi ni nalichuwinanaw la ni xaxlikana takanajla masiyama taʼakgsanin, tiku chuna la Bar-Jesús, “chuntiya laktlawama tuku xaʼakgstitum xtiji Jehová” (Hech. 13:10). Chuna la Pablo, chuntiya kalichuwinaw xaxlikana chu nakaputsayaw tiku kgaxmatputunkgo xtachuwin Dios. Maski ni naʼakxilhaw akgtum milagro chuna la Pablo, liwana katsiyaw pi Jehová namaklakaskin xʼespíritu santo xlakata nakalimin latamanin tiku katsiputunkgo xaxlikana (Juan 6:44).
“Tachuwin tuku matliwakglhnan” (Hechos 13:13-43)
9. ¿Tuku liʼakxilhtit kawilinikgolh Pablo chu Bernabé tiku pulalinkgo congregaciones la uku?
9 Alistalh, Pablo chu Bernabé taxtukgolh kPafos chu ankgolh kbarco asta kPerga, kxkilhpan Asia Menor, nema max 250 kilómetros xwi. Anta kʼHechos 13:13 tsukukan limaklakaskinkan tachuwin «Pablo chu tiku xkataʼan», uma limasiya pi Pablo wa tiku xpulalima grupo. Pero ni anan tuku masiya pi Bernabé xlakgsitsilakani Pablo. Wata xchatiykan akxtum skujkgolh xlakata natlawakgo xtalakaskin Dios. ¡Uma lu tlan liʼakxilhtit xpalakatakan tiku pulalinkgo congregaciones! Kstalaninanin Cristo ni putsakgo la xlakaskinka nalitaxtukgo, wata lakapastakkgo tuku Jesús kawani: «Putum wixin linatalan». Xla wa: «Tiku lanka namakgkatsikan namaktujukan, chu tiku nataktuju namalankikan» (Mat. 23:8, 12).
10. Kalichuwinanti la xwanit tiji nema titaxtukgolh lata kPerga asta kʼAntioquía xla Pisidia.
10 Akxni chankgolh kPerga, ni katsiyaw tuku xlakata Juan Marcos kamakgxtakgli Pablo chu Bernabé chu taspitli kJerusalén. Maski chuna, Pablo chu Bernabé chuntiya titaxtukgolh uma tiji asta nachankgo kʼAntioquía xla Pisidia. Uma tiji lu tuwa xwanit xlakata uma kachikin xtapakgsini Galacia nema wi 1,100 metros xlitalhman lata kpupunu, uma tiji lu tuwa titaxtukan chu xwilakgo lhuwa kgalhananin. Nachuna, Pablo max xtatatlaya uma kilhtamaku. g
11, 12. ¿Tuku tlawalh Pablo xlakata tiku xwilakgolh ksinagoga xla Antioquía xla Pisidia xkgaxmatkgolh?
11 Anta kʼAntioquía xla Pisidia, Pablo chu Bernabé sábado ankgolh ksinagoga. Tatsokgni wan: «Akxni xlikgalhtawakgakgokanita kxlakatinkan putum latamanin Limapakgsin chu xtatsokgnikan Palakachuwinanin, tiku xpulalinankgo ksinagoga kamalakgachanikgolh tachuwin, wankgolh: “Lakchixkuwin, natalan, komo kgalhiyatit tachuwin tuku nakalimatliwakglhatit latamanin, kawantit”» (Hech. 13:15). Wa xlakata Pablo tayalh chu mastalh akgtum taʼakgchuwin.
12 Limatsukilh uma tachuwin: «Lakchixkuwin, israelitas chu wixin tiku pekuaniyatit Dios, kakgaxpattit» (Hech. 13:16). Chuna la akxilhaw, tiku xkgaxmatnimakgo wa judíos chu tiku kstalanikgo xtamasiykan judíos. ¿Tuku tlawalh xlakata xkgaxmatnikgolh tiku ni xkatsikgo tuku xlakgaya Cristo kxtalakaskin Dios? Pulana lichuwinalh tuku xtitaxtunit kachikin Israel. Lichuwinalh pi Jehová «tliwakga kachikin katlawalh […] kxtiyat Egipto», chu akxni xkalakgmaxtunita, 40 kata xlapulakgo kxakaskakni tiyat, chu ni lakapala kasitsinilh maski nitlan tuku xtlawakgo. Nachuna, kamalakapastaknilh pi kamaxkika Tiyat nema xkaMalaknunikanit chu pi Jehová limaklakaskilh suerte xlakata xkamakgpitsinilh (Hech. 13:17-19). Wi tiku lakpuwankgo pi Pablo kalitachuwinalh tatsokgni nema aku xlikgalhtawakgakanit ksinagoga. Komo chuna, uma liʼakxilhtit masiya pi apóstol Pablo “tanu tanu tuku xkalitaxtuni latamanin” (1 Cor. 9:22).
13. ¿La tlan nakalakgchaniyaw kxnakujkan latamanin?
13 Akinin na lakaskinaw pi latamanin tiku kalitachuwinamaw Dios nakinkakgaxmatnikgoyan. ¿La tlan nalaksakaw tuku nakalitachuwinanaw? Kuenta kilitlawatkan komo kgalhikgo o ni kgalhikgo akgtum takanajla. Akgtum liʼakxilhtit, komo katsikgo tuku wan Biblia, tlan nakalikgalhtawakganiyaw akgtum texto nema lakgapaskgo, chu komo kgalhikgo xBibliajkan kakawaniw pi anta kalikgalhtawakgakgolh. Kililakpuwanatkan la tlan nakamakgpuwantiniyaw xlakata nakatsiputunkgo xpalakata Jehová.
14. 1) ¿La tlawalh Pablo xlakata nalichuwinan xatlan tamakatsinin xpalakata Jesús chu tuku tastakyaw mastalh? 2) ¿Tuku tlawakgolh tiku xkgaxmatnimakgolh?
14 Pablo lichuwinalh pi kkachikin Israel taxtulh «chatum lakgmaxtuna, Jesús», uma tiku Juan Mununa xlichuwinanit. Na kawanilh pi Jesús xmakgnikanit, pero alistalh xlakastakwananit (Hech. 13:20-37). Chu alistalh kawanilh: «Wa xlakata, liwana kakatsitit, natalan, kkalitachuwinaman pi xlakata nilh uma chixku katapatikanatit mintalakgalhinkan», chu «xaʼakgstitum nakalimaxtu putum tiku kanajlanikgo». Alistalh apóstol kalistakyawalh uma tachuwin: «Kuentajkatlawatit ni nakalakgchinan tuku lichuwinankgolh Palakachuwinanin: “Wixin tiku lakgmakgananatit, kaʼakxilhtit taskujut nema ktlawama kminkilhtamakujkan. Taskujut nema nikxni katikanajlatit pi ktlawanit maski wi tiku liwana xkawanin. Pero wixin kaks nalilakawanatit chu naniyatit”». Latamanin lu tlan makgamakglhtinankgolh uma taʼakgchuwin. Tatsokgni wan pi «latamanin tasaskinikgolh pi xkalitachuwinampa xlakata uma, Sábado nema aku xmima». Chu «akxni xʼankgonita tiku xtamakxtumikgonit ksinagoga, lhuwa judíos chu tiku xmakglhtinankgonit xtakanajlakan judíos chu xkakninanikgo Dios, stalanikgolh Pablo chu Bernabé» (Hech. 13:38-43).
«Alakatanu kachikin nakanaw» (Hechos 13:44-52)
15. ¿Tuku lalh akxni champa sábado?
15 «Akxni champa Sábado atsinu ni putum tiku xalak kachikin tamakxtumikgolh xlakata nakgaxmatkgo» xtaʼakgchuwin Pablo. Makgapitsi judíos nitlan limakgkatsikgolh tuku kgaxmatkgolh «lu sitsikgolh chu lu laklixkajni tachuwin tsukukgolh likgalhtikgo tuku xkilhwama Pablo». Ni pekuankgolh chu xchatiykan kawanikgolh tuku nitlan xtlawamakgolh: «Xtalakaskin pi pulana wixin xkalitachuwinankantit xtachuwin Dios. Xlakata lakgmakgampatit, chuna litasiya pi ni kalakgchanan latamat nema ni kgalhi xlisputni, ¡kaʼakxilhtit!, wa xlakata alakatanu kachikin nakanaw lichuwinanaw Dios. Xlakata Jehová kinkalimapakgsin akxni wa: “Klakgayawanitan xlakata makgskgot nalitaxtuya kkachikinin, xlakata nakalitaniya lakgtaxtut asta niku kgalhsputa katiyatni”» (Hech. 13:44-47; Is. 49:6).
Maski tsukuka kaputsastalanikan Pablo chu Bernabé, «tamakgalhtawakgen chuntiya xkgalhikgo tapaxuwan chu espíritu santo» (Hechos 13:50-52).
16. ¿La makgamakglhtinankgolh judíos xtachuwinkan Pablo chu Bernabé, chu tuku tlawakgolh akxni kalakatakika?
16 Tiku ni judíos xwankgonit xatapaxuwan makgamakglhtinankgolh tamakatsinin, «chu putum tiku kxnakujkan xmakgamakglhtinamputunkgo xaxlikana tuku masta latamat nema ni kgalhi xlisputni, xlakan kanajlakgolh» (Hech. 13:48). Xtachuwin Jehová lakapala talakgatumilh kʼuma kachikin. Pero judíos nitlan makgamakglhtinankgolh uma tamakatsinin. Pablo chu Bernabé kawanikgolh pi xlakata wa tiku pulana xkgaxmatkgonit xtachuwin Dios chu xlakgmakgankgonit Mesías xʼamaka kamalakgaxokgekan. Judíos lu sitsikgolh chu tlawakgolh pi lakpuskatin tiku lu xkalakgapaskan chu lakchixkuwin tiku xlakapuxkunankgo kkachikinin lu xtaʼakglhuwikgolh, «malakatsukikgolh nakaputsastalanikan, chu katamakxtukgolh asta niku pakgta kachikin». ¿Tuku tlawakgolh Pablo chu Bernabé? «Tinkxaktikgolh pokgxni kxtantunkan xlakata nakalimasiyanikgo pi xtlawakgonit tuku nitlan chu ankgolh kʼIconio». ¿Xʼamaka kamalakgsputukan kstalaninanin Cristo kʼAntioquía xla Pisidia? ¡Nichuna! Anta tamakgxtakgkgolh tamakgalhtawakgen tiku «chuntiya xkgalhikgo tapaxuwan chu espíritu santo» (Hech. 13:50-52).
17-19. ¿La tlan nachuna natlawayaw la Pablo chu Bernabé, chu la nakinkamakgtayayan uma xlakata chuntiya napaxuwayaw?
17 Tuku tlawakgolh Pablo chu Bernabé wi tuku lu xlakaskinka kinkamasiyaniyan: chuntiya nalichuwinanaw Dios maski latamanin tiku xlakaskinka litaxtukgo kkakilhtamaku natlawaputunkgo pi nialh chuna natlawayaw. Biblia wan pi akxni latamanin xalak Antioquía lakgmakgankgolh tamakatsinin, Pablo chu Bernabé «tinkxaktikgolh pokgxni kxtantunkan», uma ni wamputun pi ksitsimakgolh, kajwatiya xlimasiyamakgolh pi xlakan ni xlinkgo kuenta tuku xlakan xlaksakmakgolh. Nila xtlawakgo pi putum latamanin tlan xmakglhtinankgolh tamakatsinin, pero tlan chuntiya xtlawakgolh xtaskujutkan. Chu wa uma tuku tlawakgolh akxni chankgolh kʼIconio.
18 ¿Tuku kamakgtayalh tamakgalhtawakgen tiku xwilakgolh kʼAntioquía xla Pisidia chuntiya xpaxuwakgolh? Xlakan chuntiya xpaxuwakgo maski xwilakgolh latamanin tiku ni xkgaxmatputunkgo. ¿Tuku xlakata? Xlakata Jesús xlichuwinanit: «¡Paxuwakgo tiku kgaxmatkgo xtachuwin Dios chu makgantaxtikgo!» (Luc. 11:28). Chu wa uma tapaxuwan nema limasiyakgolh tamakgalhtawakgen xalak Antioquía.
19 Chuna la Pablo chu Bernabé, kalakapastakwi pi tuku kilitlawatkan wa nalichuwinanaw xalaktlan tamakatsinin. Latamanin tiku kinkakgaxmatnikgoyan wa tiku nalaksakkgo komo namakgamakglhtinankgo tamakatsinin o ni. Akxni tasiya pi ni kinkakgaxmatniputunkgoyan katlawaw chuna la tamakgalhtawakgen xalak pulana siglo. Ni kalilakgaputsaw komo latamanin nalakatakikgo tamakatsinin. Komo paxkiyaw xaxlikana chu namastayaw talakaskin pi espíritu santo nakinkapulalinan, chuntiya napaxuwayaw (Gál. 5:18, 22).
a Kaʼakxilhti recuadro « Bernabé, tiku kamatliwakglha amakgapitsin».
b Uma kilhtamaku anankgoya congregaciones niku lakgamakgat chuna la kʼAntioquía xla Siria, nema wi 550 kilómetros kxʼnorte Jerusalén.
d Akxni tlan xwi kilhtamaku, barcos nema xʼanankgo kxapulana siglo max 160 kilómetros xlimakgat xʼankgo akgtum kilhtamaku, pero uma tlakg xmakgapala komo nitlan xwi kilhtamaku.
e Kaʼakxilhti recuadro « Ksinagogaskan judíos».
f Lata uma kilhtamaku, Saulo tsukuka limapakuwikan Pablo. Wi tiku wankgo pi tsukulh maklakaskin tukuwani Pablo xlakata gobernador Sergio Paulo. Pero xlakata chuntiya maklakaskilh akxni nialh xtatekgsa kChipre masiya pi anan atanu tuku xlakata laksakli namaklakaskin tukuwani romano xlakata xlitaxtu “apóstol tiku xmalakgachakanit nakalitachuwinan Dios tiku ni judíos”. Atanu tuku xlakata max lakgpalilh xtukuwani wa pi ktachuwin griego tukuwani Saulo nitlan takgaxmata (Rom. 11:13).
