CAPÍTULO 5
«Kilikgalhakgaxmatatkan Dios chuna la kimapakgsinakan»
Tuku tlawakgolh apóstoles kinkamasiyaniyan tuku kilitlawatkan kstalaninanin Cristo
Takilhtinit kʼHechos 5:12–6:7
1-3. 1) ¿Tuku xlakata kalinka apóstoles kxlakatin xanaPuxkun Jueces, chu tuku xlilaksakatkan xwanit? 2) ¿Tuku xlakata kilikatsitkan tuku tlawakgolh apóstoles?
¡XANAPUXKUN Jueces lu sitsikgonit! Apóstoles xyakgo kxlakatinkan. José Caifás, sacerdote tiku tlakg kgalhi limapakgsin chu tiku pulalin niku lakkaxtlawakan taʼakglhuwit asta ni mapakuwiputun Jesús chu kawani apóstoles: «Liwana kkalimapakgsin xlakata ni xmasiyatit uma tukuwani, pero ¡kaʼakxilhtit!, malakgatuminitantit kJerusalén mintamasiykan, chu wixin lakaskinatit pi naklinaw kuenta xlakata makgnika uma chixku» (Hech. 5:28). Xtachuna pi kawanika: «¡Komo chuntiya nalichuwinanatit, katsiyatita tuku nakaʼakgspulayan!».
2 ¿Tuku natlawakgo apóstoles? Tiku kamalakgachanit wa Jesús, chu wa Jehová tiku maxkinit uma limapakgsin (Mat. 28:18-20). Wa xlakata, ¿napekuankgo chu nialh katilichuwinankgolh? ¿O chuntiya nalichuwinankgo Dios chu ni napekuango? ¿Tiku xʼamakgo kgalhakgaxmatkgo: Dios o lakchixkuwin? Pedro ni pekuan chu liwana wan tuku xla chu amakgapitsi apóstoles laksakkgonit.
3 Lu katsiputunaw tuku tlawakgolh, xlakata akinin na kilimakgantaxtitkan uma xlakaskinka taskujut chu na nakinkaputsastalanikanan (Mat. 10:22). Max kintalamakgasitsinkan nialh kintikamaxkiputunkgon talakaskin natlawayaw kintaskujutkan o max namalakgachokgoputunkgo. ¿Tuku natlawayaw komo chuna nala? Komo nalikgalhtawakgayaw tuku tlawalh pi apóstoles xʼankgolh kxlakatinkan xanaPuxkun Jueces a, chu tuku laksakkgolh nakinkamakgtayayan ni napekuanaw.
«Xʼángel Jehová malakkilh malakcha» (Hechos 5:12-21a)
4, 5. ¿Tuku xlakata «lu ksitsikgonit» Caifás chu saduceos?
4 Akxni Pedro chu Juan xapulana kawanika pi nialh xlichuwinankgolh Dios, xlakan kgalhtinankgolh: «Nila nialh naklichuwinanaw tuku kakxilhnitaw chu kkgaxmatnitaw» (Hech. 4:20). ¿Tuku lalh alistalh? Akxni kilakgolh kxlakatinkan xanaPuxkun Jueces, putum apóstoles chuntiya lichuwinankgolh Dios ktemplo, anta “ktalayaw xla Salomón”, niku lhuwa judíos xlakgatikgo tamakxtumikgo. Apóstoles tlawakgolh milagros, katamakxtukgolh demonios chu kamapaksakgolh tiku xtatatlakgo. Kajwatiya xtalakaskin pi xmastilekg Pedro wi tiku xlakgchalh xlakata xpaksli. Lhuwa tiku xkamapaksamaka xmakgamakglhtinankgo xalaktlan tamakatsinin. Wa xlakata «tlakg lhuwa tiku xkanajlanimakgolh Malana, lhuwa lakchixkuwin chu lakpuskatin» (Hech. 5:12-15).
5 Xlakata «lu ksitsikgonit», Caifás chu saduceos kamatamaknuninankgolh apóstoles kpulachin (Hech. 5:17, 18). ¿Tuku xlakata lu ksitsikgo? Pulana, xlakata xmasiyakgo pi Jesús xlakastakwananit chu xlakan ni xkanajlanikgo talakastakwanat. Chu xlipulaktiy, xlakata xlichuwinankgo pi kajwatiya tlan xlakgtaxtuka komo xkanajlanika Jesús, saduceos xpekuankgo pi xliʼakxilhka Jesús la xpulalinakan, chu komo chuna xlalh, Roma xʼama kamalakgaxokge (Juan 11:48). ¡Wa xlakata nialh xlakaskinkgo pi apóstoles xlichuwinankgolh!
6. ¿Tiku pulalinankgo akxni kaputsastalanikan xtatayananin Jehová, chu tuku xlakata ni kaks kinkamalakawaniyan uma?
6 Xpulalinanin takanajla wa tiku pulalinkgo xlakata nakaputsastalanikan xtatayananin Jehová. Kamaklakaskinkgo mapakgsinanin chu tuku tasiyakgo knoticia xlakata nialh nalichuwinanaw Dios. ¿Kaks kililakawanatkan xlakata kinkasitsinikanan chu ni kinkaʼakxilhputunkanan? Ni. Xlakata tuku lichuwinanaw masiya pi ni xlikana tuku masiyakgo. Chu akxni latamanin tiku kgalhikgo tlan naku lakgapaskgo xaxlikana, lakgmakgankgo xtamasiykan nema ni takilhtinit kBiblia (Juan 8:32).
7, 8. ¿La kamakgtayalh apóstoles tuku ángel kawanilh, chu tuku takgalhskinin nalilakpuwanaw?
7 Akxni xtanumakgo kpulachin chu xkgalhkgalhimakgo xkalakputsananika, apóstoles max xlakpuwankgo komo xtalamakgasitsin xʼamakgo kamakgnikgo (Mat. 24:9). Pero katsisni lalh tuku kaks malakawaninan: «Xʼángel Jehová kamalakkilh xmalakcha pulachin» (Hech. 5:19). b Chu liwana kalimapakgsilh: «Kalichuwinantit ktemplo, chuntiya kakalitachuwinantit latamanin» (Hech. 5:20). Uma liwana kamasiyanilh pi tlan tuku xtlawamakgo chu kamaxkilh litliwakga nema xkamakgtayalh xlakata xtayanikgolh taʼakglhuwit. Xlakata xtakanajlakan xtatliwakglhnit chu ni xpekuankgo, «tanukgolh ktemplo akxni xkgakgalh chu tsukukgolh masiyakgo» (Hech. 5:21).
8 Lu tlan pi nalilakpuwanaw uma: «Komo nachuna xaktitaxtulh, ¿chuntiya xaklichuwinalh Dios chu xaklimasiyalh pi tliwakga wi kintakanajla chu ni kpekuan?». Tuku ankgalhin nakinkamakgtayayan wa nalakapastakaw pi ángeles kinkamakgtayakgoyan chu pi kinkapulalinkgoyan xlakata “liwana nalichuwinanaw xTamapakgsin Dios” (Hech. 28:23; Apoc. 14:6, 7).
«Kilikgalhakgaxmatatkan Dios chuna la kimapakgsinakan nixawa lakchixkuwin» (Hechos 5:21b-33)
«Kaliminkgolh chu anta kayawakgolh kxlakatinkan xanaPuxkun Jueces» (Hechos 5:27).
9-11. ¿Tuku tlawakgolh apóstoles akxni kalimapakgsika pi nialh xlichuwinankgolh Dios, chu tuku liʼakxilhtit kinkamaxkikgoyan?
9 Caifás chu amakgapitsi xanaPuxkun Jueces xlakkaxwilikgonita la nakatalakkaxlakgo apóstoles. Xlakata xlakan ni xkatsikgo tuku xlanit kpulachin, limapakgsinankgolh pi xʼanka katiyakan. Max lu kaks lilakawankgolh akxni akxilhkgolh pi nialhti xtanumakgolh, maski «pulachin […] liwana xtalakchuwanit» chu tiku xkuentajtlawakgo, «xyakgolh kmalakcha» (Hech. 5:23). Tiku xpulalin templo katsilh pi apóstoles xlichuwinamaparakgo Jesús ktemplo, wa xlakata kalilh ksoldados, alh kachipa xlakata nakalimpara kxlakatinkan xanaPuxkun Jueces.
10 Chuna la akxilhwi niku tsuku capítulo, xanaPuxkun Jueces xatasitsi kalimapakgsikgolh apóstoles xlakata nialh xlichuwinankgolh Jesús. ¿Tuku kgalhtinankgolh? Pedro chuwinalh chu ni xatapekua wa: «Kilikgalhakgaxmatatkan Dios chuna la kimapakgsinakan nixawa lakchixkuwin» (Hech. 5:29). Chuna apóstoles wilikgolh liʼakxilhtit xlakata tuku xlitlawatkan kstalaninanin Cristo. Maski xlikana pi kgakgalhakgaxmataw «mapakgsinanin tiku tlakg kgalhikgo limapakgsin», pero akxni kinkaskinikgoyan katlawaw tuku lakatsala xlimapakgsin Jehová, ni kakgalhakgaxmataw (Rom. 13:1). Wa xlakata, komo nakinkalimapakgsikgoyan pi nialh kalichuwinaw Dios, ni katikakgalhakgaxmatwi, xlakata uma taskujut wa Jehová tiku kinkalakgayawanitan. Nalakputsananaw la nalichuwinanaw xTamapakgsin Dios chuna la mapakgsinanin ni nakatsikgo.
11 Jueces lu sitsikgo akxni akxilhkgo pi apóstoles ni xpekuankgo, wa xlakata «xkamakgniputunkgo» (Hech. 5:33). Max apóstoles xlakpuwankgo pi xʼamaka kamakgnikan, pero Jehová kamakgtayalh.
«Nila katimalakgspututit» (Hechos 5:34-42)
12, 13. 1) ¿Tuku tastakyaw kamaxkilh Gamaliel xcompañeros, chu tuku laksakkgolh natlawakgo? 2) ¿La kamakgtaya Jehová xkachikin? ¿Tuku liwana kilikatsitkan akxni Dios masta talakaskin pi «nalipatinanaw tuku xaʼakgstitum»?
12 Gamaliel, c «makgalhtawakgena xla Limapakgsin [tiku] lu xlakaskinka xliʼakxilhkgo latamanin», tsukulh chuwinan. Xlakata jueces xmaxkikgo kakni, akxni limapakgsinalh pi xkatamakxtuka apóstoles, chuna tlawakgolh (Hech. 5:34). Alistalh kalichuwinalh tiku xlakatsalakgo limapakgsin. Wa pi akxni tiku xkapulalin, nikgolh, xlakan tapapitsikgolh. Wa xlakata kawanilh pi xkgalhkgalhinankgolh asta akxni na xtapitsikgolh, xlakata tiku xkapulalin aku xninita. Kawanilh: «Nitu kakatlawanitit umakgolh lakchixkuwin, wata kakamakgxtakgtit. Komo uma tuku tamasiyama o taskujut kaj xla lakchixkuwin, namalakgsputukan; pero komo xla Dios, nila katimalakgspututit. Xlakata max asta xtalatlawanakan Dios nalitaxtuyatit» (Hech. 5:38, 39). Jueces kgaxmatkgolh xtastakyaw Gamaliel. Maski chuna, limapakgsinankgolh pi xkakgesnokgka apóstoles chu «kalimapakgsikgolh pi nialh xlichuwinankgolh xtukuwani Jesús» (Hech. 5:40).
13 La uku, Jehová na tlan nakalimaklakaskin lakchixkuwin tiku lu kalakgapaskan, chuna la Gamaliel, xlakata nakamakgtaya xkachikin (Prov. 21:1). Limaklakaskin xʼespíritu santo xlakata nakamakgpuwantini políticos, jueces o tiku lakkaxwilikgo limapakgsin xlakata namakgantaxtikgo xtalakaskin (Neh. 2:4-8). Pero na min kilhtamaku, masta talakaskin pi xlakskujnin “napatinankgo xpalakata xaʼakgstitum” (1 Ped. 3:14). Komo chuna nala, liwana kakatsiw pi xla nakinkamaxkiyan litliwakga xlakata natayaniyaw chu pi kintalamakgasitsinkan nila katimalakgachokgokgolh uma taskujut (Is. 54:17; 1 Cor. 10:13).
14, 15. 1) ¿Tuku tlawakgolh apóstoles akxni kakgesnokgka, chu tuku xlakata? 2) Kalichuwinanti akgtum liʼakxilhtit xlakata la xatapaxuwan tayanikgonit xlakskujnin Jehová.
14 ¿Taxlajwanikgolh apóstoles akxni kakgesnokgka chu nialh lichuwinankgolh Jesús? ¡Nichuna! Wata xatapaxuwan «taxtukgolh kxlakatinkan xanaPuxkun Jueces» (Hech. 5:41). ¿Xpaxuwamakgolh? Pero ¿tuku xlakata? Ni xlakata komo xlakgatikgo patinankgo, wata xlakata xkatsikgo pi xkaputsastalanikanit xlakata ni makgxtakgkgolh Jehová chu Jesús (Mat. 5:11, 12).
15 Kstalaninanin Cristo xala uku, na paxuwayaw akxni kinkaputsastalanikanan xpalakata xalaktlan tamakatsinin, chuna la tlawakgolh kstalaninanin Cristo xalak pulana siglo (1 Ped. 4:12-14). Uma ni wamputun pi lakgatiyaw nakinkawanikanan pi nakinkatlawanikanan tuku nitlan, nakinkaputsastalanikanan o nakinkatamaknukanan kpulachin, pero lu tlan limakgkatsiyaw akxni ni makgatsankgananiyaw Jehová. Kaʼakxilhwi xliʼakxilhtit Henryk Dornik, tiku lhuwa kata lipatinalh tuku mapakgsinanin tlawanikgolh. Agosto kata 1944, mapakgsinanin wankgolh pi xla chu xtala xkamalakgachaka kcampo de concentración. Mapakgsinanin wankgolh: «Nila kamatlawiyaw tuku kalimapakgsiyaw. Tasiya pi lipaxuwakgo patinankgo». Pero tala Dornik wan: «Maski ni xakpatinamputun, xakpaxuwa naktayani tuku nitlan xaktitaxtuma xlakata xakkatsi pi ni xakmakgatsankgananima Jehová» (Sant. 1:2-4).
Chuna la apóstoles, lichuwinanaw Dios akgatunu chiki.
16. ¿La limasiyakgolh apóstoles pi chuntiya xʼamakgo lichuwinankgo Dios? ¿La tlan natlawayaw chuna la xlakan tlawakgolh?
16 Apóstoles tunkun tlawakgolh tuku xkalakgayawakanit. Ni taxlajwanikgolh, wata «chali chali anta ktemplo chu kʼakgatunu akgatunu chiki, chuntiya xmasiyamakgolh chu xlichuwinamakgolh xatlan tamakatsinin xlakata Cristo» (Hech. 5:42). d Umakgolh tamakgalhtawakgen xlakkaxwilikgonit liwana nalichuwinankgo xTamapakgsin Dios. Linkgolh xalaktlan tamakatsinin kʼakgatunu akgatunu chiki chuna la Jesús xkamasiyaninit (Mat. 10:7, 11-14). Max chuna malakgatumikgolh kJerusalén xtamasiykan. La uku, xtatayananin Jehová kinkalakgapaskanan xlakata nachuna tlawayaw. Akxni kalakgapaxiʼalhnanaw akgatunu chiki limasiyayaw pi liwana makgantaxtimaw uma taskujut chu lakaskinaw pi latamanin kakgaxmatkgolh xalaktlan tamakatsinin. ¿Sikulunatlawanit Jehová uma taskujut? Chuna tlawanit. Kʼuma xaʼawatiya kilhtamaku, lhuwa latamanin makgamakglhtinankgonit xalaktlan tamakatsinin. Lhuwa xlakan xlimakgtumku kgaxmatkgolh akxni chatum xtatayana Jehová kalakgapaxialhnalh kxchikkan.
Lakchixkuwin tiku kalakgayawaka “tuku xtalakaskima” (Hechos 6:1-6)
17-19. ¿Tuku tlawalh pi xʼanalh tapapitsit, chu la lakkaxtlawakgolh apóstoles?
17 Uma xasasti congregación titaxtulh tuku tuwa. ¿Tuku uma? Tapapitsit. Kalakapastakwi pi tiku aku xtamunukgonit xalak atanu país xwankgonit chu xtamakgxtakgkgonit kJerusalén xlakata namatliwakglhkgo xtakanajlakan. Chu tamakgalhtawakgen xalak Jerusalén xatapaxuwan xmastakgonit xtuminkan xlakata nakalitamawanikan liwat chu atanu tuku xmaklakaskinkgo (Hech. 2:44-46; 4:34-37). Uma kilhtamaku wi tuku lalh, lakpuskatin tiku xchuwinankgo hebreo chu xnikgonita xchixkukan xkamaxkimaka liwat xala chali chali, pero lakpuskatin tiku xchuwinankgo griego chu na xnikgonita xchixkukan «ni xkamaxkimaka liwat» (Hech. 6:1). Uma xlimasiya pi xkalaksakpaxkimaka, uma tayat tlawa pi naʼanan tapapitsit.
18 Apóstoles tiku xpulalimakgo congregaciones nema aku xlakatsukumakgo, wankgolh pi ni tlan xwa komo xlakan “xlimakgxtakgkgolh xtachuwin Dios kaj xlakata xʼankgolh maʼakgpitsikgo liwat” (Hech. 6:2). Wa xlakata kawanikgolh tamakgalhtawakgen pi xtalakaskin xkalaksakka kgalhtujun lakchixkuwin “tiku xlitsamakgo espíritu chu liskgalala”, xlakata xkuentajtlawakgolh “uma tuku xtalakaskima” (Hech. 6:3). Xtalakaskin lakchixkuwin tiku tlan xkalipawanka xlakata ni kajwatiya xʼamakgo maʼakgpitsikgo liwat, wata xʼamakgo maskujukgo tumin, xʼamakgo tamawakgo tuku xtamaklakaskilh chu xʼamakgo lhkawilikgo la xtalaktlawatilhalh tumin. Kgalhtujun tiku kalaksakka xkgalhikgo tukuwani griego, chu uma xtlawa pi lakpuskatin tiku xnikgonita xchixkukan chu xkalaksakpaxkikanit xkamakgamakglhtinankgolh. Apóstoles tlawakgolh oración chu alistalh kalaksakkgolh uma kgalhtujun lakchixkuwin tiku xkuentajtlawakgolh “uma tuku xtalakaskima”. e
19 Xlakata umakgolh kgalhtujun lakchixkuwin xʼamakgo maʼakgpitsikgo liwat, ¿wamputun pi nialh xtalakaskin nalichuwinankgo xalaktlan tamakatsinin? Nichuna. Tiku na xlaksakkanit wa Esteban, tiku nialh makgas xʼama lichuwinan xatlan tamakatsinin chu ni xʼama pekuan (Hech. 6:8-10). Chu atanu wa Felipe, tiku «xlichuwinan xatlan tamakatsinin» (Hech. 21:8). Xkgalhtujunkan liwana lichuwinankgolh xTamapakgsin Dios.
20. ¿La stalanikgo xkachikin Jehová tuku tlawakgolh apóstoles akxni kalaksakkan lakchixkuwin tiku napulalinkgo congregación?
20 Kkinkilhtamakujkan, xkachikin Jehová tlawakgo chuna la tlawakgolh apóstoles. Akxni nina kalaksakkgo natalan tiku lakgkgolotsin o siervos ministeriales nalitaxtukgo, xlikatsitkan komo lilamakgolh xliskgalala Dios chu kgalhikgo tayat nema espíritu santo masta. Lakgkgolotsin tiku Pulalinkgo xtatayananin Jehová, wa tiku akxilhkgo komo umakgolh lakchixkuwin makgatsikgo tuku skin Biblia (1 Tim. 3:1-9, 12, 13). f Chu komo Biblia litsokgwilika espíritu santo, tlan wanaw pi tiku kalaksakkan, kalilaksakkan espíritu santo. Umakgolh lakskulujwan natalan tipalhuwa tuku kuenta tlawakgo nema lu talakaskin. Akgtum liʼakxilhtit, lakgkgolotsin wa tiku lakkaxwilikgo taskujut nema talakaskin xlakata nakamakgtayakan natalan tiku linkgoya kata (Sant. 1:27). O max makgtayanankgo niku tlawakan Pukgalhtawakga, niku lakkaxwilikan laklanka tamakxtumit chu kComités de Enlace con los Hospitales. Nachuna, siervos ministeriales makgtayanankgo ktaskujut xalak congregación xlakata lakgkgolotsin tlan nakuentajtlawakgo natalan chu tlan namasiyakgo. Putum umakgolh lakchixkuwin tiku wi tuku kalakgayawakanit kcongregación o kxkachikin Jehová, xlimaxtutkan kilhtamaku xlakata nalichuwinankgo xalaktlan tamakatsinin (1 Cor. 9:16).
«Xtachuwin Dios chuntiya talakgatumilh» (Hechos 6:7)
21, 22. ¿Tuku xlimasiya pi Jehová ksikulunatlawama congregación?
21 Xlakata xtamakgtay Jehová, uma congregación nema aku xlakatsukuma tlan tayanilh taputsastalanit chu tapapitsit nema xʼanama kcongregación. Liwana xtasiya pi Jehová ksikulunatlawama, xlakata «xtachuwin Dios chuntiya talakgatumilh, chu tlakg xtalhuwitilhamakgo tamakgalhtawakgen kJerusalén; chu lhuwa sacerdotes na tsukukgolh makgamakglhtinankgo takanajla» (Hech. 6:7). Uma kajwatiya pulaktum tamakatsin nema lichuwinan libro xla Hechos xlakata la staktilhalh congregación (Hech. 9:31; 12:24; 16:5; 19:20; 28:31). ¿Ni xlikana pi la uku lu kinkamakgpuwantiniyan tamakatsin nema lichuwinan la tlakg talichuwinama xtachuwin Dios kxlikalanka katiyatni?
22 Kalichuwinamparaw tuku lalh kxapulana siglo. Xpulalinanin takanajla chuntiya xʼamakgo kaputsastalanikgo. Chu, chuna la naʼakxilhaw kcapítulo nema stala, Esteban wa tiku lu lipekua xʼamaka putsastalanikan.
a Kaʼakxilhti recuadro « XanaPuxkun Jueces».
b Libro xla Hechos makgpuxam kalichuwinan ángeles, uma wa xapulana niku maklakaskin tachuwin ángel, maski kʼHechos 1:10 xkalichuwinanita chatiy «lakchixkuwin tiku makgsnapapa klhakganankgonit», chu liwana katsiyaw pi ángeles xwankgonit.
c Kaʼakxilhti recuadro « Gamaliel, makgalhtawakgena tiku lu xlakaskinka xliʼakxilhkgo latamanin».
d Kaʼakxilhti recuadro « Lichuwinankan Dios “kʼakgatunu akgatunu chiki”».
e Max umakgolh natalan xlikgalhitkan xwanit tayat nema xtalakaskin xlakata kgolotsin xlitaxtukgolh, xlakata taskujut nema xʼamakgo tlawakgo lu xlakaskinka xwanit. Maski chuna, Biblia ni liwana wan tuku kilhtamaku tsukuka kalaksakkan lakgkgolotsin o tiku xpulalinkgolh congregaciones.
f Kxapulana siglo, makgapitsi lakchixkuwin tiku tliwakga xkgalhikgo xtakanajlakan kalakgayawaka nalaksakkgo tiku kgolotsin xlitaxtukgolh (Hech. 14:23; 1 Tim. 5:22; Tito 1:5). La uku, Lakgkgolotsin tiku Pulalinankgo kalaksaka tiku superintendentes de circuito nalitaxtukgo, chu umakgolh superintendentes kalakgayawakanit nakalaksakkgo tiku kgolotsin chu siervos ministerial nalitaxtukgo.
