CAPÍTULO 3
«Litatsamakgolh espíritu santo»
¿Tuku lalh akxni mastaka espíritu santo kPentecostés?
Takilhtinit kʼHechos 2:1-47
1. Kalichuwinanti la xwanit paskua xla Pentecostés.
LHUWA latamanin xminkgonit kJerusalén. a Ktemplo xtasiya xjini tamakamastan chu levitas xkilhtlimakgo Hallel (Salmos 113 asta 118). Xwilakgolh akgtiy grupos, akxni akgtum grupo xkilhtli, alistalh atanu grupo xkgalhti. Kkatijin xlitsamakgo latamanin xalak tanu tanu kachikinin. Xminkgonitancha kʼElam, Mesopotamia, Capadocia, Ponto, Egipto chu Roma. b ¿Tuku xtlawamaka? Paskua xla Pentecostés, o «kilhtamaku akxni chakgo xapulana tawakat» (Núm. 28:26). Uma paskua nema xtatlawa kata kata, xlimasiya pi ksputma chuna la xmakikan cebada chu xʼamaka makikan trigo.
2. ¿Tuku lalh kPentecostés kkata 33 nema kaks malakawaninan?
2 Uma kilhtamaku kkata 33, max kamakgnajatsa tsisa xwanit, lalh tuku kaks malakawaninan nema alistalh xʼamaka lakapastakkan. Kaj xalan, wi tuku takgaxmatli nema xminacha kʼakgapun. Tuku takgaxmatli xtachuna la «tliwakga un» (Hech. 2:2). 120 xtamakgalhtawakgen Jesús nema xtamakxtumikgonit kʼakgtum chiki, kgaxmatkgolh uma tliwakga un, chu lu kaks lilakawankgolh akxni akxilhkgolh pi xkaʼakwilakgolh lhkuyat nema xtachuna la simakgat: xchatunukan xkaʼakwilakgolh. Alistalh «litatsamakgolh espíritu santo», wa xlakata tsukukgolh chuwinankgo tanu tanu tachuwin. Akxni umakgolh tamakgalhtawakgen taxtukgolh, tiku xalak tanu tanu kachikinin nema xminkgonit kJerusalén, kaks lilakawankgolh xlakata «xchuwinankgo kxtachuwinkan» (Hech. 2:1-6).
3. 1) ¿Tuku xlakata lu xlakaskinka litaxtulh Pentecostés kata 33 xpalakata xaxlikana takaknin? 2) ¿La maklakaskilh Pedro akgtum “llave xla Tamapakgsin” kPentecostés?
3 Uma tuku lalh lu xlakaskinka xpalakata xaxlikana takaknin: kalaksaka xapulana kstalaninanin Cristo tiku xʼamakgo tapakgsikgo kʼIsrael xaʼespiritual (Gál. 6:16). Pero ni kajwatiya uma tuku lalh. Watiya uma kilhtamaku, Pedro katachuwinalh lhuwa latamanin, chu chuna maklakaskilh xapulana “llave xla Tamapakgsin”, uma xʼama kamaxki talakaskin pi latamanin xalak tanu tanu kachikinin xkgalhikgolh akgtum talakgalhaman (Mat. 16:18, 19). Uma llave xʼama masta talakaskin pi judíos chu tiku kstalanikgo xtamasiykan judíos c xmakgamakglhtinankgolh xalaktlan tamakatsinin chu tlan xkalilaksakka espíritu santo. Chuna tlan xmakgtapakgsikgolh kʼIsrael xaʼespiritual. Chu xʼamakgo kgalhikgo talakgalhaman xlakata mapakgsinanin chu sacerdotes xlitaxtukgolh kxTamapakgsin Mesías (Apoc. 5:9, 10). Uma talakgalhaman na xʼamakgo kgalhikgo samaritanos chu tiku ni judíos xwankgonit. ¿Tuku kinkamasiyaniyan kstalaninanin Cristo xala uku uma tuku lalh kPentecostés?
«Xputumkan lakatum xwilakgolh» (Hechos 2:1-4)
4. ¿Tuku xlakata wanaw pi congregación xla kstalaninanin Cristo lakatsukulh kkata 33?
4 Chuna la akxilhwi, congregación xla kstalaninanin Cristo talakkaxtawilalh akxni kalilaksakka espíritu santo 120 xtamakgalhtawakgen Jesús tiku «lakatum xwilakgolh» kxlikilhmaktiy chiki (Hech. 2:1). Pero kakgotanun xtamunukgonita lhuwa latamanin. Uma kajku xlitsukuma akgtum kachikin nema chuntiyaku stakma. La uku, congregación xla kstalaninanin Cristo litakgatsi lakchixkuwin chu lakpuskatin tiku paxkikgo Dios chu lichuwinamakgo «xatlan tamakatsinin xla Tamapakgsin […] kxlilakgatum katiyatni xlakata natamakatsininan kputum laklanka kachikinin» akxni nina min lisputni (Mat. 24:14).
5. ¿La xʼama makgtayanan congregación kxapulana siglo chu kkinkilhtamakujkan?
5 Congregación xʼama matliwakglha xtakanajlakan kstalaninanin Cristo: pulana, tiku xatalaksakni, chu alistalh «amakgapitsi borregos» (Juan 10:16). Pablo lu xtapalh xʼakxilha la xlamakgtayakgo natalan. Wa xlakata katsokgnanilh natalan xalak Roma: «Lu kkaʼakxilhputunan xlakata nakkamakgtayayan kmintakanajlakan, xlakata tliwakga takanajla nakgalhiyatit; tuku kwamputun wa pi nakilimatliwakglhatit mintakanajlakan chu akit nakkalimatliwakglhan kintakanajla» (Rom. 1:11, 12).
6, 7. ¿La makgantaxtimakgo natalan tuku Jesús kalakgayawalh?
6 Natalan xala uku na tlawamakgolh tuku tlawakgolh natalan xalak pulana siglo. Pulana, xlimakgantaxtitkan tuku Jesús kalakgayawalh kstalaninanin: «Kakamakgtayatit latamanin xliputum kachikinin xlakata kistalaninanin nawankgo, kakamunutit kxtukuwani xaTlat chu xaKgawasa chu kxtukuwani espíritu santo, kakamasiyanitit namakgantaxtikgo putum tuku kkalimapakgsinitan» (Mat. 28:19, 20).
7 Jehová kamaklakaskin xtatayananin xlakata nakalitachuwinankgo latamanin xalaktlan tamakatsinin. Uma tuwa, xlakata latamanin tiku katachuwinankgo tanu tanu tachuwin kgalhikgo. Maski chuna, makgantaxtimakgo uma taskujut xlakata tlawakgo likgalhtawakga nema takilhtinit kBiblia kliwaka 1,000 tachuwin. ¿Pina wix ktamakxtumit chu lichuwinampat Dios chu kamakgtayapat latamanin kstalaninanin Cristo nalitaxtukgo? Kalipaxuwa xlakata kgalhiya talakgalhaman nalichuwinana xtukuwani Jehová.
8. ¿Tuku tasikulunalin makglhtinana kcongregación?
8 Nachuna, kʼuma xatuwa kilhtamaku tuwa makgkatsiyaw nakgalhiyaw tapaxuwan chu namakgantaxtiyaw uma taskujut. Pero Jehová kinkalimakgtayayan natalan tiku wilakgolh xlikalanka katiyatni, uma tamakgtay xtachuna tuku Pablo katsokgnanilh natalan tiku xchuwinankgo hebreo: «Kalalilakgaputsaw chatunu chatunu xlakata tlakg naʼanan tapaxkit chu xalaktlan tatlaw, ni namakgxtakgaw chuna la tamakxtumiyaw, chuna la lismanikgonit makgapitsin. Wata kalamatliwakglhwi chu tlakg chuna katlawaw xlakata akxilhmaw pi xkilhtamaku Dios talakatsuwima» (Heb. 10:24, 25). Xlikana, congregación akgtum xtamaskiwin Jehová niku lamatliwakglhaw. Wa xlakata, nikxni kakatamakgatliniw natalan chu ni kamakgxtakgwi tamakxtumit.
«Xchatunukan xkgaxmatkgo pi xchuwinankgo kxtachuwinkan» (Hechos 2:5-13)
«Kgaxmatwi pi kkintachuwinkan xlichuwinamakgolh tuku kaks limalakawaninan Dios» (Hechos 2:11).
9, 10. ¿Tuku tlawakgo amakgapitsin xlakata nakalitachuwinankgo Dios latamanin tiku tanu chuwinankgo?
9 ¡Lu xpaxuwamaka kPentecostés! Lhuwa judíos chu tiku kstalanikgo xtamasiykan judíos xmaklakaskinkgo griego o hebreo xlakata xlaʼakgatekgsnikgolh. Pero la uku «xchatunukan xkgaxmatkgo pi [xtamakgalhtawakgen Jesús] xchuwinankgo kxtachuwinkan» (Hech. 2:6). Xlikana pi lu tlan limakgkatsikgolh akxni kgaxmatkgolh xalaktlan tamakatsinin kxtachuwinkan. La uku Dios nialh tlawa akgtum milagro xlakata nachuwinanaw tipalhuwa tachuwin. Maski chuna, lhuwa natalan liskujmakgo nakalitachuwinankgo xalaktlan tamakatsinin latamanin xalak tanu tanu kachikinin. ¿La tlawakgo? Makgapitsi katsinikgo atanu tachuwin xlakata namakgtayanankgo kʼakgtum congregación nema lakatsu wi o kʼatanu país. Uma tlawanit pi tiku kakgaxmatnikgo lu kaks nalilakawankgo.
10 Wa uma tuku akgspulalh Christine, xla chu kgalhtujun natalan katsinikgolh tachuwin gujaratí. Akxni tatanokglhli tiku xtaskuja chu xchuwinan uma tachuwin, tsukulh tachuwinan kʼgujaratí. Tsumat lu kaks lilakawa chu kgalhskilh tuku xlakata xkatsinima uma lu tuwa tachuwin. Christine wanilh tuku xlakata, chu uma puskat wa: «Max lu xlakaskinka tuku lichuwinanatit».
11. ¿La tlan nakalitachuwinanaw xlakata Dios latamanin tiku chuwinankgo tanu tachuwin?
11 Xlikana pi ni putum akinin tlan katsiniyaw atanu tachuwin. Pero tlan skgalalh natawilayaw xlakata nakalitachuwinanaw tamakatsinin xla Tamapakgsin latamanin tiku chuwinankgo tanu tanu tachuwin. ¿La tlan natlawayaw? Pulaktum wa akxni namaklakaskinaw aplicación JW Language® xlakata nakatsiniyaw la nakatachuwinanaw latamanin kxtachuwinkan, max chuna nakinkakgaxmatniputunkgoyan akxni nakatachuwinanaw. Kakalitachuwinaw kisitiojkan jw.org chu kakamasiyaniw likgalhtawakga chu videos kxtachuwinkan. Akxni maklakaskinaw umakgolh tamakgtay napaxuwayaw chuna la paxuwakgolh natalan xalak pulana siglo akxni latamanin kaks lilakawankgolh pi natalan «xchuwinankgo kxtachuwinkan».
«Pedro tayalh» (Hechos 2:14-37)
12. 1) ¿Tuku xlichuwinanit Joel xlakata tuku lalh kPentecostés? 2) ¿Tuku xlakata kstalaninanin Cristo xalak pulana siglo xkgalhkgalhimakgo nakgantaxtu tuku xlichuwinanit Joel?
12 «Pedro tayalh» xlakata nakatachuwinan latamanin xalak tanu tanu kachikinin (Hech. 2:14). Kawanilh pi tlan xchuwinankgo tanu tanu tachuwin xlakata Dios tlawalh akgtum milagro, chuna la xlichuwinanit Joel: «Nakkamaxki kiʼespíritu kaxatikawa latamanin» (Joel 2:28). Uma, wa tuku xkgalhkgalhimakgo kstalaninanin Cristo xalak pulana siglo, xlakata akxni nina xʼan kʼakgapun, Jesús xkamalaknuninit: «Akit nakskini xaTlat, chu xla nakamaxkiyan atanu makgtayana […], espíritu santo» (Juan 14:16, 17).
13, 14. ¿Tuku tlawalh Pedro xlakata nakalakgchani xnakujkan latamanin, chu la tlan nastalaniyaw xliʼakxilhtit?
13 Akxni Pedro masputulh xtaʼakgchuwin wa: «Liwana kakatsikgolh putum latamanin xalak Israel, pi uma Jesús tiku wixin xtokgowakatit kkiwi, Dios limaxtulh Malana chu Cristo» (Hech. 2:36). Xlikana pi ni putum tiku xkgaxmatmakgo uma taʼakgchuwin, akxilhkgolh akxni Jesús xtokgowakaka; pero xlakata watiya kachikin xmakgtapakgsikgo, na xlinkgo kuenta xlakata makgnika Jesús. Akxni apóstol Pedro katachuwinalh xnatalan, judíos, kalimasiyanilh kakni chu kalakgchanilh kxnakujkan. Nitu xkalimawakama, wata xlakaskin pi xmakgxtakgkgolh xtalakgalhinkan. Chu xlakan ni lisitsikgolh. Wata xʼakstukan «nitlan limakgkatsikgolh kxnakujkan», wa xlakata kgalhskininankgolh: «¿Tuku kilitlawatkan?». Tuku tlawalh Pedro makgtayanalh pi lhuwa latamanin xkgaxmatkgolh chu xmakgxtakgkgolh xtalakgalhinkan (Hech. 2:37).
14 Akinin na kilitlawatkan chuna la Pedro xlakata nakalakgchaniyaw kxnakujkan latamanin. Akxni lichuwinanaw Dios, ni talakaskin nawanaw pi ni xlikana putum tuku kanajlakgo latamanin. Wata nakalitachuwinanaw tuku nachuna kanajlayaw. Komo chuna natlawayaw ni tuwa nawan nakamasiyaniyaw tuku wan xTachuwin Dios. Akxni chuna namasiyayaw tuku xaxlikana, natlawa pi latamanin tiku kgalhikgo xatlan naku namakgamakglhtinankgo xaxlikana.
«Katamunutit minchatunukan» (Hechos 2:38-47)
15. 1) ¿Tuku wa Pedro chu tuku tlawakgolh tiku kgaxmatnikgolh? 2) ¿Tuku xlakata lhuwa latamanin tiku kgaxmatkgolh xalaktlan tamakatsinin tlan tamunukgolh watiya uma kilhtamaku?
15 Kʼuma lu xlakaskinka kilhtamaku, Pedro kawanilh judíos chu tiku kstalanikgo xtamasiykan judíos uma tachuwin: «Kamakgxtakgtit mintalakgalhinkan, chu katamunutit minchatunukan» (Hech. 2:38). Uma kilhtamaku tamunukgolh 3,000 latamanin max niku xʼanan chuchut kJerusalén o lakatsu. d ¿Kaj lakapala chu ni xkatsikgo tuku tlawakgolh? ¿Masiya uma pi tiku kalimakgalhtawakgekan Biblia chu xkamanankan natalan tunkun xlitamunutkan maski ni katsikgo tuku xlakata chuna tlawakgo? ¡Nichuna! Kalakapastakwi pi judíos chu tiku kstalanikgo xtamasiykan judíos nema tamunukgolh kPentecostés, liwana xlakputsananikgo tatsokgni chu xmakgtapakgsikgo kkachikin nema xtamakamastaninita Jehová. Nachuna, xlimasiyakgo pi xkakninanikgo Dios, xlakata makgat xminkgonitancha. Kajwatiya xtalakaskin nakanajlakgo pi Jesús wi tuku lu xlakaskinka xlakgayawanit Dios. Akxni chuna tlawakgolh, tlakg tlan skujnanikgolh Dios, pero la uku xtamunukgonita chuna la kstalaninanin Cristo.
16. ¿La limasiyakgolh kstalaninanin Cristo xalak pulana siglo pi xmaskiwinankgo?
16 Uma grupo xkgalhi xtasikulunalin Jehová. Biblia wan: «Putum umakgolh xalaksasti tamakgalhtawakgen xtamakxtumikgo chu xlalimakgtayakgo putum tuku xkgalhikgo, chu kstamakgo xtiyatkan chu putum tuku xkgalhikgo chu tuku kalixokgonika kamakgpitsinikgolh amakgapitsin chuna la xmaklakaskinkgo» (Hech. 2:44, 45). e Uma limasiya pi kstalaninanin Cristo xala uku na kilimasiyatkan tapaxkit chu xatapaxuwan wi tuku namaskiwinanaw.
17. ¿Tuku xlitlawat tiku tamunuputun?
17 La uku, tiku tamakamastaniputun Dios chu tamunuputun, xlitlawat tuku wan Biblia. Pulana, xlikatsit tuku xaxlikana masiya (Juan 17:3). Alistalh, xlimasiyat takanajla chu nialh xlitlawat tuku nitlan xtlawa makgasa, chuna nalitasiya pi lu nitlan limakgkatsi tuku xtlawanit (Hech. 3:19). Alistalh xlilakgpalit la xlin xlatamat, chu natsuku tlawa tuku tlan chuna la wan Jehová (Rom. 12:2; Efes. 4:23, 24). Xaʼawatiya, xlitlawat akgtum oración niku natamakamastani Dios, chu alistalh natamunu (Mat. 16:24; 1 Ped. 3:21).
18. ¿Tuku talakgalhaman kgalhi kstalanina Cristo tiku tamununita?
18 Chu wix, ¿tamakamastaninitata Jehová chu tamununita? Komo chuna, Jehová namaxkiyan xʼespíritu santo chuna la kamaxkilh xtamakgalhtawakgen Cristo kxapulana siglo xlakata namakgantaxtiya xtalakaskin. ¡Akgtum lanka talakgalhaman!
a Kaʼakxilhti recuadro « Jerusalén, niku judíos xkakninanikgo Dios».
b Kaʼakxilhti recuadros « Roma, niku xwi lanka tamapakgsin»; « ¿La chankgolh judíos kMesopotamia chu kʼEgipto?» chu « Kstalaninanin Cristo tiku xlamakgolh kPonto».
c Kaʼakxilhti recuadro « ¿Tiku uma tiku kstalanikgo xtamasiykan judíos?».
d Uma xtachuna tuku lalh 7 xla agosto kata 1993, kʼakgtum asamblea internacional xla xtatayananin Jehová nema tatlawalh kKiev (Ucrania), 7,402 latamanin tamunukgolh kʼakgchaxan piscinas. Uma makgapalalh akgtiy hora chu akgkukitsis minuto.
e Uma tuku tlawaka kamakgtayalh tiku xtamakgxtakgkgonit kJerusalén xlakata namatliwakglhkgo xtakanajlakan. Xlakata xatapaxuwan xmastakgo tuku xkgalhikgo xlimasiya pi wa tapaxkit tuku xkamakgpuwantini chu nichuna la tlawakgo políticos (Hech. 5:1-4).