1-4. ¿Tuku xlakata Pablo an kJerusalén, chu tuku titaxtu anta?

 PABLO chu Lucas lu tuwa makgkatsikgo nataxtukgo kMileto. ¡Lu tuwa makgkatsikgo nakamakgxtakgkgo lakgkgolotsin xalak Éfeso xlakata lu kapaxkikgo! Lata kbarco, Pablo chu Lucas kaʼakxilhkgo umakgolh natalan. Na linkgo tumin nema mastokgkgonit xlakata nakamakgtayakan natalan xalak Judea. Lu mastaputunkgoya uma tuku mastokgkgonit xlakata tlan namakgantaxtikgo tuku kalakgayawakanit.

² Un tsuku snokglin barco, chu tsinu tsinu tsukukgo tamakgatlikgo. Pablo, Lucas chu kgalhtujun natalan tiku kataʼankgo kalakaʼakxilhkgo natalan, tiku lipuwamakgo xlakata xlakan amakgolha, chu tsinu tsinu nialh kaʼakxilhkgo (Hech. 20:4, 14, 15).

³ Akgtutu kata Pablo akxtum kataskujli natalan tiku xpulalinkgo congregaciones kʼÉfeso. Pero la uku xlakata espíritu santo pulalima, an kJerusalén. Katsi tsinu tuku naʼakgspula, xlakata nina makgas kawaninit umakgolh lakgkgolotsin: «Kama kJerusalén xlakata wa espíritu santo kilima, maski ni kkatsi tuku nakiʼakgspulayacha. Kajwatiya kkatsi pi kʼakgatunu kachikinin, espíritu santo makglhuwa kimakatsinitilha, kiwani pi nakimanukan kpulachin chu nakkgalhi lhuwa takatsanajwat» (Hech. 20:22, 23). Maski xkatsi tuku nitlan xʼama akgspula, xkatsi pi «wa espíritu santo» xpulalima, wa xlakata an kJerusalén. Pablo ni patinamputun, pero tlakg xlakaskinka akxilha natlawa xtalakaskin Dios.

⁴ ¿Ni xlikana pi nachuna lakpuwanaw la Pablo? Chuna, xlakata akxni makamaxkiw kilatamatkan Jehová, malaknuniw pi xʼamaw tlawayaw xtalakaskin. Wa xlakata, lu nakinkamakgtayayan komo naʼakxilhaw la Pablo ni makgxtakgli Dios chu la tlan nastalaniyaw xliʼakxilhtit.

5. ¿Tuku tiji chipakgolh Pablo, chu tiku xtaʼankgo akxni ankgolh kTiro?

⁵ Pablo chu tiku xtaʼankgo tsaj ankgo kTiro. Uma wamputun pi xlakata un kamakgtayalh, barco ni niku tachokgotayalh, uma kamaxkilh  talakaskin pi lakapala xchankgolh kCos, niku max tamakgxtakgkgolh uma katsisni (Hech. 21:1). Alistalh ankgolh kRodas chu alistalh kPátara, aktsu kachikin ksur xla Asia Menor, anta tawakakgolh kʼakgtum barco nema xlin listat chu tsaj kalilh kTiro. Akxni xʼamakgolh, lakgamakgat “akxilhkgolh isla xla Chipre kxpakgxwikikan” (Hech. 21:3). ¿Tuku xlakata Lucas lichuwinan uma?

6. 1) ¿Tuku xlakata Pablo tlan limakgkatsilh akxni akxilhli Chipre? 2) ¿Tuku katsiniya xlakata la Jehová sikulunatlawanitan chu makgtayanitan?

⁶ Max Pablo kamasiyanilh Chipre tiku xkataʼan chu kalitachuwinalh tuku xtitaxtunit anta. Xtitaxtunita akgnajatsa kata lata xapulana kilichuwinantapulilh Dios anta chu xkataʼan Bernabé chu Juan Marcos. Anta skuwana Elimas xkatalatlawanit (Hech. 13:4-12). Akxni Pablo akxilhpa uma isla chu lakapastakli tuku xtitaxtunit, kgalhilh litliwakga xlakata natayani tuku tuwa xʼama titaxtu kJerusalén. La uku akinin na lu litamakgtayayaw akxni lilakpuwanaw tasikulunalin chu tamakgtay nema kinkamaxkinitan Dios akxni titaxtunitaw tuku tuwa. Nachuna lakpuwanaw la David:  «Lhuwa taʼakglhuwit kgalhi tiku xaʼakgstitum, pero Jehová lakgmaxtu» (Sal. 34:19).

7. ¿Tuku tlawakgolh Pablo chu tiku xtaʼankgo akxni chankgolh kTiro?

⁷ Pablo lu xtapalh xliʼakxilha akxni amakgapitsin akxtum xtatawilakgo. Lucas kinkawaniyan tuku tlawakgolh akxni chankgolh kTiro: «Kkaputsaw tamakgalhtawakgen chu kkatekgswi» (Hech. 21:4). Xlakata xkatsikgo pi kTiro xwilakgolh kstalaninanin Cristo, liskujkgolh xlakata nakatekgskgo, chu max kxchikkan natalan tamakgxtakgkgolh. La uku nachuna la, pulaktum lanka tasikulunalin nema kgalhiyaw xlakata lakgapasaw xaxlikana wa pi kaxanikawa niku naʼanaw natalan xatapaxuwan nakinkamakgamakglhtinankgoyan. Chuna, putum tiku paxki Dios chu lilatama xaxlikana kgalhi amigos kxlikalanka katiyatni.

8. ¿Tuku kilhchanima Hechos 21:4?

⁸ Akxni Pablo tamakgxtakgli akgtujun kilhtamaku kTiro, Lucas lichuwinan tuku lalh: «Xlakan chuntiya xwanimakgolh Pablo pi ni xʼalh kJerusalén xlakata tuku xkawaninit espíritu santo» (Hech. 21:4). ¿Xlakaskin Jehová pi Pablo xʼalh kʼalakatanu kachikin? ¿Xkalimaklakaskima natalan xalak Tiro xlakata xwanilh pi ni xʼalh kJerusalén? Nichuna, xʼespíritu santo Jehová xtlawanita pi Pablo xkatsilh pi xʼama pati tuku nitlan, pero ni wanilh pi ni xʼalh. Chuna la akxilhaw, kstalaninanin Cristo xalak Tiro akgatekgskgolh pi Pablo lu xʼama patinan, wa xlakata, tasaskinikgolh pi ni xʼalh kJerusalén. Xlakan ni xlakaskinkgo pi xʼakgspulalh tuku nitlan. Pero Pablo, xlakkaxwilinit namakgantaxti xtalakaskin Jehová, wa xlakata alh kJerusalén (Hech. 21:12).

9, 10. 1) Akxni Pablo akxilhli pi natalan xalak Tiro lu xlakgaputsamakgolh, ¿tuku malakapastakalh? 2) ¿Tuku tayat kgalhikgo latamanin xalak kakilhtamaku, pero tuku kinkawaniyan Jesús pi kilitlawatkan?

⁹ Akxni Pablo akxilhli pi natalan lu xlakgaputsamakgo, max lakapastakli pi Jesús nachuna xtitaxtunit. Akxni Jesús kawanilh xtamakgalhtawakgen pi xʼama kJerusalén xlakata napatinan chu namakgnikan, Pedro wanilh: «Miʼakstu kalakgalhamankanti Malana, nichuna katiʼakgspulan». Pero xla kgalhtilh: «¡Kakintapanuni Satanás! Kilakgapaxtokgpat kkintiji, xlakata ni kgalhiya xtalakapastakni Dios, wata xtalakapastaknikan lakchixkuwin» (Mat. 16:21-23). Jesús liwana xlakkaxwilinit namakgantaxti xtalakaskin xTlat chu xʼama makamasta xlatamat. Pablo nachuna xlakkaxwilinit natlawa. Natalan xalak Tiro nachuna xlakpuwankgo la Pedro, pero ni liwana xʼakgatekgskgo pi Dios xlakaskin pi Pablo xʼalh kJerusalén.

¹⁰ La uku, lhuwa latamanin ni liskujputunkgo chu ni lipatinamputunkgo, wa xlakata putsakgo takanajla nema nitu kawani. Pero Jesús kawanilh xtamakgalhtawakgen tuku xlitlawatkan: «Komo wi tiku kistalaniputun,  akstu kalakgmakganka, chu katiyalh xkiwi nema makgapatinan chu chuntiya kakistalanilh» (Mat. 16:24). Tlawakan tuku tlawalh Jesús tuwa, pero wa tuku tlakg tlan kitaxtu.

11. ¿La limasiyakgolh natalan xalak Tiro pi xpaxkikgo Pablo chu xmakgtayakgo?

¹¹ Xchanit kilhtamaku xlakata Pablo, Lucas chu amakgapitsi tiku xkataʼankgo xʼamparakgolh lichuwinantapulikgo Dios. Tuku tasiyalh akxni natalan xalak Tiro kilakgaxtakgkgolh Pablo kbarco, xlimasiya pi lu xpaxkikgo chu xmakgtayakgo xlakata taskujut nema xtlawa. Umakgolh lakchixkuwin, lakpuskatin chu laktsu kamanan ankgolh lakgaxtakgkgo Pablo chu tiku xkataʼankgo kbarco, anta, xputumkan tatsokgostakgolh, tlawakgolh oración chu lamakgxtakgkgolh. Alistalh, Pablo, Lucas chu tiku xkataʼankgo tawakakgolh kbarco nema xʼama kTolemaida, niku akgtum kilhtamaku akxtum katatawilakgolh natalan (Hech. 21:5-7).

12, 13. 1) ¿Tuku xlismaninit tlawa Felipe? 2) ¿Tuku xlakata Felipe lu tlan liʼakxilhtit kawilini natalan tiku kgalhikgo xkamanankan?

¹² Chuna la wan Lucas, Pablo chu tiku xkataʼan alistalh ankgolh kCesarea, a chu chankgolh «kxchik Felipe tiku xlichuwinan xatlan tamakatsinin» (Hech. 21:8). ¡Lu paxuwakgolh akxni akxilhkgolh! Xtitaxtunita 20 kata la apóstoles xlakgayawakgonit xlakata namakgpitsi liwat kcongregación nema aku xtalakkaxtawilanit kJerusalén. Nachuna, lu xlismaninit lichuwinan Dios. Kalakapastakwi pi akxni tamakgalhtawakgen takgawanikgolh xlakata xkaputsastalanimaka, xla alh lichuwinan xalaktlan tamakatsinin kSamaria. Alistalh masiyanilh xaxlikana chatum eunuco xalak Etiopía chu munulh (Hech. 6:2-6; 8:4-13, 26-38). Felipe akglhuwa kata skujnanilh Jehová.

¹³ Felipe chuntiya xatapaxuwan xlichuwinan Dios. Ama kilhtamaku xlamaja kCesarea chu chuntiya lu xlichuwinan Dios, chu wa xlakata Lucas limapakuwi «tiku xlichuwinan xatlan tamakatsinin». Nachuna, Lucas wan pi Felipe xkgalhiya kgalhtati xlaktsuman tiku xpalakachuwinankgo Dios, uma masiya pi kstalanikgonit xliʼakxilhtit xtlat (Hech. 21:9). b Chuna la akxilhaw, Felipe liwana xpulalin xfamilia xlakata xliskuja tliwakga natawila xtakanajlakan.  Natalan tiku kgalhikgo xkamanankan lu tlan komo nastalanikgo xliʼakxilhtit Felipe, na nakamasiyanikgo xkamanankan nalipaxuwakgo akxni nalichuwinankgo Dios.

14. ¿Tuku tlawakgolh natalan akxni Pablo kalakgapaxialhnalh, chu la tlan nachuna natlawayaw?

¹⁴ Kaxanikawa niku xʼan, Pablo xkaputsa natalan chu akxtum xkatatawila. Xlikana pi natalan lu xpaxuwakgo pi Pablo chu tiku xkataʼankgo xtamakgxtakgkgo kxchikkan, chu akxni akxtum xtawilakgo “xlamatliwakglhnikgo xtakanajlakan” (Rom. 1:11, 12). Akinin na tlan namakglhtinanaw tasikulunalin komo nakamakgamakglhtinanaw natalan kkinchikkan, maski ni lhuwa tuku kgalhiyaw, chuna la superintendente de circuito chu xpuskat (Rom. 12:13).

15, 16. ¿Tuku lichuwinalh Ágabo pi xʼama la, chu la makgkatsikgolh tiku kgaxmatkgolh?

¹⁵ Akxni Pablo xwi kxchik Felipe, milh kalakgapaxialhnan palakachuwina Ágabo. Tiku anta xwilakgo liwana xlakgapaskgo chu xkatsikgo pi wa tiku makatsininalh tatsinkstat nema analh akxni xmapakgsinama Claudio (Hech. 11:27, 28). Wa xlakata max lakpuwankgolh: «¿Tuku lakgmima? ¿Tuku tamakatsin limima?». Lu kuenta xtlawanimakgolh. Kaj xalan akxilhkgolh pi «tiyalh xlitatampulakgchin Pablo». Uma litatampulakgchin xmaklakaskinkan xlakata namakikan tumin o atanu. Watiya uma litatampulakgchin, Ágabo maklakaskilh xlakata xlitantuchika chu xlimakachika, chu alistalh mastalh uma tamakatsin: «Chuna wan espíritu santo: “Judíos chuna nachikgo kJerusalén chixku tiku tapakgsini uma litatampulakgchin, chu namakamastakan kxmakankan latamanin xalak atanu kachikinin”» (Hech. 21:11).

¹⁶ Uma tuku lichuwinalh Ágabo masiyalh pi Pablo xʼama an kJerusalén. Na wa  pi judíos xʼamakgo makamastakgo «kxmakankan latamanin xalak atanu kachikinin». Uma tamakatsin kaks kamalakawanilh tiku anta xwilakgo. Lucas wan: «Akxni kkgaxmatwi uma, ktsukuw tasaskiniyaw, lata akinin chu tiku na anta xwilakgolh, pi ni xʼalh kJerusalén. Alistalh Pablo kgalhtinalh: “¿Tuku xlakata tasapatit chu makgalipuwampatit kinaku? Liwana kakatsitit pi ktakaxnita ni kaj xlakata nakinchikan, nachuna xlakata nakni kJerusalén kaj xpalakata xtukuwani Malana Jesús”» (Hech. 21:12, 13).

17, 18. ¿La limasiyalh Pablo pi xmakgantaxtiputun xtalakaskin Dios, chu tuku tlawakgolh natalan?

¹⁷ ¡Kalilakpuwanti tuku lama! Putum natalan, asta Lucas, tasaskinikgo Pablo pi ni kaʼalh kJerusalén. Pablo lu kalakgalhaman natalan akxni akxilhkgo pi lu paxkikgo, lilakgaputsamakgo chu tasamakgo, kawani: «¿Tuku xlakata makgalipuwampatit kinaku?». Maski chuna, Pablo xʼama makgantaxti tuku xlakkaxwilinit chuna la akxni katachuwinalh natalan xalak Tiro. Maski xtasaskinimakgolh, xla ni xʼama lakgpali xtapuwan. Wata kawani tuku xlakata xliʼanat kJerusalén. ¡Pablo ni pekuan chu lakkaxwilinit pi namakgantaxti xtalakaskin Dios! Chuna la Jesús, ni pekuan chu an kJerusalén (Heb. 12:2). Maski ni niputun, pero komo chuna xlilat, xatapaxuwan chuna natlawa xlakata akgtum talakgalhaman akxilha nani xpalakata Cristo.

¹⁸ ¿Tuku tlawakgolh natalan? Biblia wan: «Akxni kakxilhwi pi nila klakgpaliw tuku xlakpuwanit, nialh kmachokgoputuw, chu klawaniw: “Kalalh xtalakaskin Jehová”» (Hech. 21:14). Wa xlakata, nialh wanikgolh pi ni xʼalh kJerusalén. Kgaxmatnikgolh chu akxilhkgolh pi xlimakgantaxtit xwanit xtalakaskin Jehová maski xkakatsanilh. Apóstol xmatsukinit akgtum taskujut nema xʼama tlawa pi xmakgnika, chu tlakg ni tuwa xmakgkatsilh komo natalan tiku lu xpaxkikgo ni xmalaktlawiputunkgolh tuku xlitlawat xwanit.

19. ¿Tuku xlakaskinka kinkamasiyaniyan tuku titaxtulh Pablo?

¹⁹ Uma tuku lalh wi tuku lu xlakaskinka kinkamasiyaniyan: nikxni kakamalaktlawiw amakgapitsin komo laksakkgonit tlakg naskujnanikgo Jehová. Uma ni wamputun pi kalipekua natawila xlatamatkan chuna la Pablo. Akgtum liʼakxilhtit wa akxni kamanan lakkaxwilikgo naʼankgo skujnanikgo Dios alakatanu. Maski xanatlatni ni kamakgxtakgputunkgo xkamanankan, ni kamalaktlawikgo tuku lakkaxwilikgonit. Kalilakpuwaw xliʼakxilhtit Phyllis, chatum tala puskat xalak Inglaterra. Akxni xachastum xtsumat alh skujnani Dios la misionera kʼÁfrica, lu tuwa makgkatsilh. Xla wan: «Maski xkimakgapaxuwa tuku xlaksaknit, pero na xaklilipuwama. Makglhuwa ktlawalh oración. Pero wa tuku xlaksaknit natlawa, chu nikxni klakpuwa naklakgpalini xtapuwan. ¡Akit xakmasiyaninit pulana nawili xTamapakgsin Dios kxlatamat! Kintsumat lina 30 kata lata skujnanima Dios kʼatanu país, chu chali chali kmasta tapaxtikatsinit xlakata chuntiya skujnanima Jehová». ¡Lu tlan pi na kamakgtayayaw natalan tiku lhuwa tuku limakgxtakgkgo xlakata naskujnanikgo Jehová!

20, 21. ¿Tuku limasiya pi Pablo akxtum xkatatawilaputun natalan, chu tuku xlakata xlakaskinka xʼakxilha akxtum nakatatawila?

²⁰ Akxni xlakkaxwilikgonita tuku xtalakaskin xlakata naʼankgo kJerusalén, Pablo chu tiku xkataʼan tiyaparakgolh xtijikan. Xlakan ankgalhin xkaputsakgo natalan kaxanikawa niku xchankgo. Anta kTiro, katekgskgolh natalan chu katatamakgxtakgkgolh akgtum semana. Anta kTolemaida, na kalakgapaxialhnankgolh natalan chu tamakgxtakgkgolh akgtum kilhtamaku. Anta kCesarea, xtamakgxtakgkgonit lhuwa kilhtamaku kxchik Felipe. Alistalh makgapitsi natalan xalak uma kachikin taʼankgolh kJerusalén. Akxni chankgolh anta, kamakgamakglhtinalh tamakgalhtawakgen Mnasón, chu chuna la wan Lucas, “natalan xatapaxuwan kamakgamakglhtinankgolh” (Hech. 21:17).

²¹ Pablo ankgalhin akxtum xkatatawilaputun xnatalan. Akinin na kinkamatliwakglhan akxni akxtum katatawilayaw kinatalankan. Wa uma tuku makgtayalh Pablo natayani akxni xtalamakgasitsin xmakgniputunkgo.