CAPÍTULO 23
«Kakgaxpattit xlakata nakkawaniyan tuku lanit»
Pablo kgalhmakgtaya xaxlikana kxlakatinkan xanaPuxkun Jueces chu latamanin tiku xtlawaniputunkgo tuku nitlan
Takilhtinit kʼHechos 21:18–23:10
1, 2. ¿Tuku xlakata Pablo an kJerusalén, chu tuku taʼakglhuwit xʼama titaxtu anta?
PABLO amakgtum tlawama kxkatijin Jerusalén. Lata makgasa, Jerusalén wa kachikin niku xkakninanikan Jehová. Latamanin tiku lamakgolh anta lu lanka kamakgkatsikan xlakata kʼuma kachikin lhuwa tuku lanit. Pablo katsi pi lhuwa kstalaninanin Cristo chuntiya stalanimakgo xLimapakgsin Moisés chu tuwa makgkatsikgo nakakninanikgo Jehová chuna la xla lakaskin. Wa xlakata akxni Pablo xwi kʼÉfeso, lakkaxwililh naʼan kJerusalén xlakata nakamakgtaya natalan. Ni kajwatiya xkalimakgtayaputun tumin, wata na xkamakgtayaputun nalakgpalikgo xtalakapastaknikan (Hech. 19:21). Maski katsi pi tuwa tuku natitaxtu, lakpuwanit namakgantaxti xtaskujut.
2 ¿Tuku titaxtulh Pablo kJerusalén? Makgapitsi kstalaninanin Cristo kanajlakgolh taʼakgsanin nema xwankan xpalakata Pablo. Xtalamakgasitsin Jesús tlawanikgolh tuku nitlan, wankgolh taʼakgsanin xpalakata, kgaxikgolh chu xmakgniputunkgo. Pero uma tuku titaxtulh maxkilh talakaskin nakgalhmakgtaya xaxlikana. Xla limasiyalh tataktujut, ni pekualh chu kgalhmakgtayalh xtakanajla. Akinin tlan nastalaniyaw xliʼakxilhtit.
«Tsukukgolh malankikgo Dios» (Hechos 21:18-20a)
3-5. 1) ¿Tiku katatamakxtumilh Pablo, chu tuku kalitachuwinalh? 2) ¿Tuku katsiniyaw akxni lilakpuwanaw tamakxtumit nema Pablo katakgalhilh lakgkgolotsin xalak Jerusalén?
3 Xlichali la chalh kJerusalén, Pablo chu tiku akxtum xtaʼankgo, ankgolh katatamakxtumikgo lakgkgolotsin tiku xpulalinkgo congregación. Biblia ni lichuwinan komo kʼuma tamakxtumit na xwilakgolh apóstoles; max xʼankgonit lichuwinankgo Dios kʼatanu kachikin. Pero tiku xwi kʼuma tamakxtumit wa Santiago, xtala Jesús (Gál. 2:9). Max wa tiku pulalilh uma tamakxtumit niku na «xwilakgolh putum lakgkgolotsin» (Hech. 21:18).
4 Akxni xkamakgachipanita lakgkgolotsin, Pablo «tsukulh liwana kalitachuwinan tuku Dios xtlawanit kxlakgstipankan kachikinin xlakata chuna la xlichuwinama Dios» (Hech. 21:19). ¡Xlikana pi lu tatliwakglhkgolh akxni kgaxmatkgolh tuku kalitachuwinalh! Akinin na lu lipaxuwayaw akxni kgaxmataw pi lhuwa latamanin katsimakgolh tuku xaxlikana (Prov. 25:25).
5 Chuna la xtlawamaka uma tamakxtumit, apóstol lichuwinalh tumin nema xatapaxuwan xmalakgachakgonit congregaciones xalak Europa. Lakgkgolotsin max lu paxuwakgolh akxni akxilhkgolh la kstalaninanin Cristo xalak atanu kachikinin xlimasiyakgonit pi xkalilakgaputsakgo. Wa xlakata, akxni kgaxmatkgolh tamakatsinin, «tsukukgolh malankikgo Dios» (Hech. 21:20a). La uku nachuna la. Lhuwa natalan tiku titaxtukgo tuku tuwa xlakata tuku masputunan chu xlakata tajatat, lu paxuwakgo chu paxtikatsininankgo xlakata takgoxamixat chu tamakgtay nema kamaxkiyaw.
Xwilakgolhku lhuwa tiku “lu xmakgantaxtiputunkgo Limapakgsin” (Hechos 21:20b, 21)
6. ¿Tuku taʼakglhuwit xʼanan nema litachuwinanka Pablo?
6 Alistalh, lakgkgolotsin wanikgolh Pablo pi xwi akgtum taʼakglhuwit kJudea xlakata tuku natalan xkgaxmatkgonit xpalakata. Xlakan wanikgolh: «Wix katsiya, tala, pi lhuwa mil judíos kanajlakgonit, chu xputumkan lu makgantaxtiputunkgo Limapakgsin. Pero xlakan kgaxmatkgonit tuku lichuwinankan mimpalakata pi kamasiyaninita putum judíos tiku wilakgolh kʼatanu kachikinin pi kamakgxtakgkgolh xLimapakgsin Moisés, pi kawanipat nialh kakaʼakstilichukunikgolh kxuwa xlichixkukan xkamanankan chu nialh katlawakgolh talismanin nema anan» (Hech. 21:20b, 21). a
7, 8. 1) ¿Tuku nitlan xlakapastakkgo lhuwa kstalaninanin Cristo xalak Judea? 2) ¿Tuku xlakata wanaw pi tiku lu xmakgantaxtiputunkgo xLimapakgsin Moisés ni apóstatas xwankgonit?
7 Xtitaxtunita liwaka 20 kata lata nialh xtalakaskin xmakgantaxtika xLimapakgsin Moisés. Komo chuna, ¿tuku xlakata lhuwa kstalaninanin Cristo chuntiya xmakgantaxtiputunkgo? (Col. 2:14). Xlikana pi kkata 49, apóstoles chu lakgkgolotsin xalak Jerusalén xkamalakgachanikgonit congregaciones maktum carta niku xkalitachuwinankgo pi kstalaninanin Cristo tiku ni judíos xwankgonit ni xtalakaskin pi xkaʼakstilichukunika kxuwa xlichixkukan chu ni xlikgalhakgaxmatatkan xwanit xLimapakgsin Moisés (Hech. 15:23-29). Pero komo ni kalichuwinankgolh kstalaninanin Cristo tiku judíos xwankgonit, xlakan xlakpuwankgo pi chuntiya xlimakgantaxtitkan xLimapakgsin Moisés.
8 Maski umakgolh natalan ni liwana xʼakgatekgskgonit tuku kawanika, ¿kilhchanima pi apóstatas xlitaxtukgo? Ni, nichuna. Xlakan xmakgantaxtiputunkgo akgtum limapakgsin nema xmastanit Jehová. Uma limapakgsin ni lixkajni chu ni xla demonios xwanit. Pero kstalaninanin Cristo xmakgtanukgonit kʼakgtum xasasti talakkaxlan, chu xLimapakgsin Moisés xmakgtanuma kʼakgtum talakkaxlan nema xtitaxtunita, wa xlakata nialh xtalakaskin xmakgantaxtika. Kstalaninanin Cristo tiku judíos xwankgonit chu lu xmakgantaxtiputunkgo Limapakgsin xlimasiyamakgo pi ni xlipawankgo congregación xla kstalaninanin Cristo chu pi ni xʼakgatekgskgo tuku Jehová xlakgpalima. Wa xlakata lu xtalakaskin pi xlakgpalikgolh xtalakapastaknikan chu xtatayakgolh tuku Jehová xlakkaxwilima (Jer. 31:31-34; Luc. 22:20). b
«Ni xlikana tuku kawanika mimpalakata» (Hechos 21:22-26)
9. ¿Tuku xmasiya Pablo xlakata xLimapakgsin Moisés?
9 ¿Tuku xwankan xpalakata Pablo? Latamanin xwankgo pi xkamasiyani judíos pi ni xkaʼakstilichukunikgolh kxuwa xlichixkukan xkamanankan chu nialh xtlawakgolh talismanin nema xʼanan. ¿Xlikana tuku xwankan? Kalakapastakwi pi Pablo xkalitachuwinan xalaktlan tamakatsinin tiku ni judíos xwankgonit, chu wa xlakata xkawani pi ni xtalakaskin xkgalhakgaxmatkgolh xLimapakgsin Moisés. Nachuna, lichuwinalh pi nitlan xkamakgpuwantinika tiku ni judíos xwankgonit pi xkaʼakstilichukunika kxuwa xlichixkukan chu xkgalhakgaxmatkgolh Limapakgsin (Gál. 5:1-7). Pero na xkalitachuwinan xalaktlan tamakatsinin judíos tiku xlamakgolh kkachikinin nema xlakgapaxialhnan. Wa xlakata, na xkalitachuwinan pi xlakata Jesús nilh xmalakgsputunit xLimapakgsin Moisés chu nialh xtalakaskin xkgalhakgaxmatkgolh xlakata Dios xaʼakgstitum xkaliʼakxilhli (Rom. 2:28, 29; 3:21-26).
10. ¿La limasiyalh Pablo pi ni xmalakatsali tuku xlakpuwan xlakata Limapakgsin chu naʼakstilichukunikan kxuwa xlichixku chatum lataman?
10 Pero apóstol Pablo chuntiya kaʼakgatekgsnilh tiku chuntiya xtlawaputunkgo xtalismaninkan judíos, chuna la jaxkan sábado o ni nawakan makgapitsi liwat (Rom. 14:1-6). Nachuna, ni kawilinilh limapakgsin xlakata naʼakstilichukunikan kxuwa xlichixku chatum lataman. Xtlat Timoteo griego xwanit, wa xlakata skinilh Timoteo pi xʼakstilichukunika kxuwa xlichixku xlakata judíos xlipawankgolh (Hech. 16:3). Xlakata xkatsi pi chatunu chatunu xlilaksakat xwanit komo chuna natlawa o ni, katsokgnanilh natalan xalak Galacia: «Ni xlakaskinka komo chatum lataman akstilichukunikanit kxuwa xlichixku o ni, pero takanajla wa tuku xlakaskinka, chu tuku tlawa takanajla chuna tlawa kaj xlakata tapaxkit» (Gál. 5:6). Pero komo wi tiku lu xmakgantaxtiputun uma limapakgsin chu xkamakgpuwantini amakgapitsin nachuna xtlawakgolh xlakata Jehová tlan xkaʼakxilhli, xlimasiya pi nitlan tuku xtlawama chu pi ni tliwakga xwi xtakanajla.
11. ¿Tuku tastakyaw maxkikgolh lakgkgolotsin Pablo, chu tuku kuenta tlawalh xlakata tlan xmakgantaxtilh? (Na kaʼakxilhti nota).
11 Maski tuku xlichuwinamaka xpalakata Pablo ni xlikana xwanit, kstalaninanin Cristo tiku judíos xwankgonit chuntiya xlitaʼakglhuwimakgolh. Wa xlakata, lakgkgolotsin wanikgolh Pablo pi xtlawalh uma: «Wilakgolh kgalhtati lakchixkuwin tiku wi tuku malaknunikgolh Dios. Kakalipi umakgolh lakchixkuwin chu kataskulunki wix chu nachuna xlakan chu kakaxokgoni tuku nalaktlawakgo, xlakata tutsu nakaʼakgsitkan. Uma putum nalikatsikgokan pi ni xlikana tuku kawanika mimpalakata, wata lipimpat milatamat chuna la xlilat chu makgantaxtipat Limapakgsin» (Hech. 21:23, 24). c
12. ¿La limasiyalh Pablo pi xkamakgtayaputun lakgkgolotsin xalak Jerusalén?
12 Pablo tlan xkawanilh pi taʼakglhuwit nema xkilhtsukunit ni wa xlakata tuku xlichuwinamaka, wata umakgolh judíos tiku kstalaninanin Cristo xlitaxtukgo chuntiya xmakgantaxtiputunkgo xLimapakgsin Moisés. Pero Pablo tlawalh tuku lakgkgolotsin wanikgolh, xlakata ni xlakatsalaka xlimapakgsin Dios. Xtitaxtunita kilhtamaku xla xtsokgwilinit: «Xpalakata tiku makgantaxtikgo xLimapakgsin Moisés, na xmakgantaxtina Limapakgsin klitaxtulh maski ni wa xLimapakgsin Moisés kimpulalin» (1 Cor. 9:20). Uma kilhtamaku, xla kataskujli lakgkgolotsin xalak Jerusalén chu chuna limasiyalh pi «xmakgantaxtina Limapakgsin». Chuna kinkawilinin akgtum lu tlan liʼakxilhtit nema kinkamakgpuwantiniyan akxtum nakataskujaw lakgkgolotsin chu ni nawanaw pi xafuerza katlawaka tuku akinin lakpuwanaw (Heb. 13:17).
Chuna la Pablo, ¿mastayaw talakaskin katlawaka tuku ni lakatsala xtastakyaw Biblia?
«Ni xlilat nalatama» (Hechos 21:27–22:30)
13. 1) ¿Tuku xlakata makgapitsi judíos tlawakgolh pi lhuwa latamanin xtaʼakglhuwikgolh ktemplo? 2) ¿La makgtayaka Pablo xlakata ni xmakgnika?
13 Akxni xtalakatsuwitilhama kilhtamaku xlakata lakchixkuwin xmakgantaxtikgolh tuku xmalaknukgonit, Pablo alh ktemplo. Pero ni lu tlan kitaxtunilh. Makgapitsi judíos xalak Asia liyawakgolh pi xkamanukgonit latamanin tiku ni judíos xwankgonit ktemplo, tlawakgolh pi lhuwa latamanin xtaʼakglhuwikgolh chu kgaxikgolh. Komo chatum xpuxkukan soldados xalak Roma ni xtimakgtanulh, Pablo xtimakgnika. Wa xlakata, xpuxkukan soldados kalakgayawalh makgapitsi soldados pi xlinkgolh Pablo kpulachin (lata uma kilhtamaku, xʼama titaxtu akgtati kata xlakata Pablo xtaxtulh kpulachin). Pero chuntiya kalipekua xwi xlatamat. Akxni uma xpuxkukan soldados kakgalhskilh judíos tuku xlakata xtlawanikgonit tuku nitlan, pixlanka tsukukgolh chuwinankgo chu tanu tanu tuku limawakakgolh, wa xlakata ni liwana katsilh tuku xlama. Lu lhuwa latamanin xtaʼakglhuwimakgolh anta, wa xlakata makgapitsi soldados alakatanu niku linkgolh Pablo. Akxni soldados xʼamakgolha manukgo apóstol niku xlakan xtawilakgo, Pablo wanilh xpuxkukan soldados: «Lu kskiniyan kakimaxki talakaskin nakkatachuwinan latamanin» (Hech. 21:39). Akxni maxkika talakaskin chuna xtlawalh, ni pekualh chu kgalhmakgtayalh xtakanajla.
14, 15. 1) ¿Tuku kalitachuwinalh Pablo judíos? 2) ¿Tuku tlawalh xpuxkukan soldados xalak Roma xlakata xkatsilh tuku xlakata judíos lu ksitsinimakgo Pablo?
14 Pablo kawanilh: «Kakgaxpattit xlakata nakkawaniyan tuku lanit» (Hech. 22:1). Akxni chuwinalh ktachuwin xahebreo, latamanin takakskgolh. Alistalh, kawanilh tuku xlakata kstalanina Cristo xlitaxtunit. Tsukulh kawani makgapitsi tuku xtlawanit makgasa. Akgtum liʼakxilhtit, pi xmakgalhtawakgenit Gamaliel, chu pi xminit kilhtamaku xkaputsastalaninit kstalaninanin Jesús, chuna la xkatsikgo makgapitsi tiku xwilakgolh anta. Na wampa pi akxni xʼama kDamasco, Cristo tiku xlakastakwananita tasiyanilh chu tachuwinalh, chu pi tiku xkataʼan akxilhkgolh xkgakganat chu kgaxmatkgolh akgtum tachuwin pero ni akgatekgskgolh (Hechos 9:7 chu 22:9, kaʼakxilhti nota xla takgalhtawakga, nwtsty-S). Tuku akxilhli tlawalh pi nialh xlakawanalh, wa xlakata kaj makgachipalinka asta kDamasco. Anta tatanokglhli Ananías, chatum chixku tiku judío xwanit nema lu xlakgapaskan, tiku tlawalh akgtum milagro xlakata xlakawanampa.
15 Alistalh kawanilh pi akxni xtaspitma kJerusalén, Jesús tasiyanipa anta ktemplo. Akxni lichuwinalh uma, judíos tiku xkgaxmatnimakgolh lu sitsikgolh chu pixlanka wankgolh: «¡Kamakgni uma chixku, xlakata ni xlilat nalatama!» (Hech. 22:22). Xlakata ni xmakgnika, xpuxkukan soldados tamaknulh niku xlakan xtamakgxtakgkgo. Limapakgsinalh pi xkgesnokgka xlakata xwa tuku xlakata xlisitsinikan. Pero Pablo kawanilh pi romano xwanit chu pi ni xlilat tuku xtlawamimaka. La uku, xlakskujnin Jehová na limaklakaskinaw limapakgsin xlakata nakgalhmakgtayayaw kintakanajlakan (kaʼakxilhti recuadro « Xlimapakgsin Roma chu tiku xmakgtapakgsikgo», chu « Akxni anaw kxlakatinkan jueces»). Akxni xpuxkukan soldados katsilh pi Pablo romano xwanit, atanu tuku tlawalh xlakata xwanilh tuku xkatsiputun. Lichali, tlawalh pi xlinka kxlakatinkan xanaPuxkun Jueces, tiku xkalakputsananikgo judíos.
«Akit fariseo» (Hechos 23:1-10)
16, 17. 1) ¿Tuku lalh akxni Pablo chuwinalh kxlakatinkan xanaPuxkun Jueces? 2) ¿La limasiyalh apóstol pi xtataktuju maski xkilhlaskanit?
16 Wa uma tuku Pablo tsukulh litakgalhmakgtaya kxlakatinkan xanaPuxkun Jueces: «Lakchixkuwin, natalan, Dios katsi pi kintalakapastakni kimakatsininit pi ni ktlawanit tuku nitlan asta uku» (Hech. 23:1). Pero nialhla tuku wa, xlakata Ananías «sacerdote tiku tlakg kgalhi limapakgsin, kalimapakgsilh tiku lakatsu xpaxtuyakgolh Pablo pi xkilhlaskgolh» (Hech. 23:2). ¡Lu nitlan tuku tlawanika! Tunkun tasiya pi sacerdote ni xʼakxilhputun, xlakata ni mastalh talakaskin pi Pablo xtakgalhmakgtayalh. Ni kaks kinkamalakawaniyan pi apóstol wanilh: «Dios namasipaniyan, lakgaputiyuna. ¿Wix tawilaya xlakata nakilakputsananiya chuna la wan Limapakgsin, chu lakatsalaya Limapakgsin akxni limapakgsinana kakimasipanika?» (Hech. 23:3).
17 Makgapitsi tiku anta xwilakgo kaks lilakawankgolh, pero ni xlakata kilhlaska Pablo, wata xlakata tuku wa, wa xlakata lilakawanika: «¿Lixkajni tachuwin waniya sacerdote tiku tlakg kgalhi limapakgsin, nema Dios wilinit?». Pablo kalimasiyanilh pi xmaxki kakni Limapakgsin chu pi xtaktuju akxni kakgalhtilh: «Natalan, ni xakkatsi pi wa uma sacerdote tiku tlakg kgalhi limapakgsin. Xlakata tatsokgnit: “Ni lixkajni nawaniya chatum xmapakgsina minkachikin”» (Hech. 23:4, 5; Éx. 22:28). d Alistalh atanu tuku tlawalh. Xlakata xkatsi pi xanaPuxkun Jueces xlitakgatsikgo fariseos chu saduceos, wa: «Lakchixkuwin, natalan, akit fariseo, chu kinatlatni na fariseos xwankgonit. Kilakputsananimaka xlakata kkanajla pi nalakastakwanankgo tiku nikgonita» (Hech. 23:6).
Chuna la Pablo, kalitachuwinanaw latamanin xalak atanu takanajla tuku watiya kanajlayaw.
18. ¿Tuku xlakata Pablo wa pi fariseo xwanit, chu la tlan nastalaniyaw xliʼakxilhtit akxni nalichuwinanaw Dios?
18 ¿Tuku xlakata Pablo wa pi fariseo xwanit? Xlakata «xnatlatni fariseos xwankgonit», uma wamputun pi xnatlatni xmakgtapakgsikgo kʼuma takanajla chu wa xlakata lhuwa chuntiya fariseo xliʼakxilhkgo. e Pero ¿tuku xlakata lichuwinalh talakastakwanat xtachuna la komo fariseos xkanajlakgolh uma tamasiy? Fariseos xkanajlakgo pi akxni chatum lataman xniy wi tuku xtaxtu kxmakni chu chuntiya xlatama, chu komo tlan xlikatsikgo tlan xlatamaparakgolh kʼatanu makni. Pero Pablo xkanajlani talakastakwanat chuna la Jesús masiyalh (Juan 5:25-29). Maski chuna, Pablo chu fariseos wi tuku watiya xkanajlakgo: pi tlan nalatamaparakgo tiku nikgonita. La uku, tlan nastalaniyaw xliʼakxilhtit Pablo akxni nakatachuwinanaw tiku católicos chu tiku wankgo pi kanajlanikgo Cristo. Tlan nakawaniyaw pi akinin na kanajlaniyaw Dios. Xlikana max xlakan kanajlakgo pi Dios, Jesús chu espíritu santo chatum Dios litaxtu, pero akinin kanajlaniyaw Dios tiku talichuwinan kBiblia. Maski chuna, tuku lakxtum kanajlayaw wa pi Dios lama.
19. ¿Tuku xlakata lu nitlan la kgalhsputli xtamakxtumitkan xanaPuxkun Jueces?
19 Tuku wa Pablo tlawalh pi xanaPuxkun Jueces xtapitsikgolh. Likgalhtawakgayaw pi «pixlanka tsukukgolh taʼakglhuwikgo, chu makgapitsi lakgtsokgkinanin tiku xtatayakgo fariseos tliwakga tsukukgolh lakilhnikgo, xwankgo: «Ni tekgsninitaw tuku nitlan uma chixku. ¿Chu komo chatum espíritu o chatum ángel tachuwinalh?» (Hech. 23:9). Saduceos nipara tsinu xkanajlakgo pi xʼanankgo ángeles, wa xlakata akxni kgaxmatkgolh uma, lu sitiskgolh (kaʼakxilhti recuadro « Saduceos chu fariseos»). Lanka taʼakglhuwit tawi chu asta talakaskilh pi xpuxkukan soldados xlakgmaxtulh Pablo (Hech. 23:10). Pero Pablo chuntiya kalipekua xwi. ¿Tuku xʼama akgspula? Kaʼakxilhwi kcapítulo nema aku mima.
a Xlakata xwilakgolh lhuwa kstalaninanin Cristo tiku judíos xwankgonit, xʼanankgo lhuwa congregaciones nema xtamakxtumikgo kxchikkan natalan.
b Makgapitsi kata alistalh, Pablo katsokgwililh Hebreos, niku kawanilh pi xasasti talakkaxlan tlakg xlakaskinka xwanit nixawa xamakgan chu pi nialh xtalakaskin kstalanika. Nachuna, tuku Pablo tsokgwililh kamakgtayalh kstalaninanin Cristo tiku judíos xwankgonit tlan xkakgalhtikgolh tiku xwankgo pi lu xlakaskinka xwanit namakgantaxtikan xLimapakgsin Moisés. Xtachuwin na kamatliwakglhnilh xtakanajlakan natalan tiku lu xlakaskinka xliʼakxilhkgo uma Limapakgsin (Heb. 8:7-13).
c Makgapitsi lakpuwankgo pi uma akgtum tamalaknun xlakata nazareo nalitaxtukan (Núm. 6:1-21). Maski nialh xtalakaskin pi xmakgantaxtika xLimapakgsin Moisés, niku xwan pi tlan xtlawakan uma tamalaknun, Pablo max lakpuwa pi nitu xwamputun komo umakgolh lakchixkuwin xmakgantaxtikgolh tuku xmalaknunikgonit Jehová. Wa xlakata, tlan kaxokgonilh tuku xmaklakaskinkgo chu kataʼalh ktemplo. Ni liwana katsiyaw tuku tamalaknun xtlawakgonit, pero Pablo ni xtikamakgtayalh komo umakgolh tiku nazareos xlitaxtukgo xmakamastakgolh tantum animal xlakata xlitaskulunkikgolh xtalakgalhinkan. Xtamakamastan Cristo nema ni xkgalhi talakgalhin xmapanukgonit umakgolh tamakamastan. Liwana kakatsiw pi apóstol Pablo ni xʼama tlawa tuku xlaktlawanilh xtalakapastakni.
d ¿Tuku xlakata Pablo ni xkatsi pi Ananías wa sacerdote tiku tlakg xkgalhi limapakgsin? Makgapitsi wankgo pi max xlakata ni liwana xlakawanan. O ni xkatsi tiku sacerdote xwanit xlakata lhuwata kilhtamaku ni anta xwi kJerusalén. O max, xlakata lhuwa xwilaka, ni liwana akxilhli tiku limapakgsinalh pi xkilhlaska.
e Kkata 49, akxni apóstoles chu lakgkgolotsin tamakxtumikgolh xlakata nalakputsananikgo komo tiku ni judíos xwankgonit xlikgalhakgaxmatatkan xwanit xLimapakgsin Moisés, makgapitsi kstalaninanin Cristo tiku anta xwilakgolh kalimapakuwika «tiku xapulana fariseos xwankgonit chu xkanajlakgonit» (Hech. 15:5). Liwana tasiya pi tiku fariseos xwankgonit xapulana, chuntiya fariseos xkalilakgapaskan.
