BIBLIA ni kinkawaniyan tuku kilhtamaku lakachilh Jesús. Pero kBiblia wi tuku tatsokgnit nema likatsiyaw pi ni diciembre lakachilh.

¿La tawila kilhtamaku ama papaʼ diciembre kBelén kachikin niku lakachilh Jesús? Calendario judío kgalhi akgtum papaʼ wanikan kislev, nema lakgchan noviembre chu diciembre, ama kilhtamaku lhuwa lonkgnan chu lhuwa senan. Alistalh min papaʼ tebet, chu lakgchan papaʼ diciembre chu enero, ama kilhtamaku tlakg lonkgnan chu lakgachunin takta miki kkasipijni. Kaʼakxilhwi tuku wan Biblia xlakata la xtawila kilhtamaku kBelén.

Esdras, chatum tiku na makgtsokgli Biblia, masiya pi papaʼ kislev lhuwa xlonkgnan chu xsenan. Wan pi «xliʼakgnajatsa papaʼ  [kislev], kilhtamaku akgpuxam xla papaʼ» lhuwa tamakxtumikgolh kJerusalén, chu xlakan «klhpipimakgolh [...] xlakata lhuwa ksenama». Nachuna wan pi lhuwa latamanin tiku anta xwilakgolh wa uma tuku lichuwinankgolh xlakata la xwi kilhtamaku: «Wa uma xkilhtamaku akxni lhuwa senan chu nila tawilakan kkilhtin» (Esdras 10:9, 13; Jeremías 36:22). Uma liwana litakatsi pi akxni xtalakatsuwi diciembre, tiku xkuentajtlawakgo borregos xkamakikgo xborregos xlakata ni kalakgwan xtawilakgolh kkatsisni.

Pero Biblia wan pi katsisni akxni lakachilh Jesús xlamakgolh kkakiwin tiku xkuentajtlawamakgolh borregos. Lucas chatum tiku tsokgli akgtum Evangelio, wan pi lakatsu kBelén, «na xwilakgo mapuchwaninanin antiya lakatsu nkapukuxtun nti kskakamakgtakgalhmakgo xʼanimalhnakan nkalakgwan» (Lucas 2:8-12). Kaʼakxilhti pi xkuentajtlawananin borregos anta xwilakgolh kalakgwan kkakiwin, chu ni xʼankgo kakuwani. Xlinkgo xborregos kkakiwin katsisni. Komo diciembre xlonkgnan chu lhuwa ksenan kBelén, ¿tlan kalakgwan xtawilakgolh tantaskaka chu tantaku ama papaʼ? Xlikana pi ni. Wa xlakata  putum tuku lalh akxni lakachilh Jesús limasiya pi ni lakachilh papaʼ diciembre. *

Xtachuwin Dios liwana wan tuku kilhtamaku nilh Jesús, pero ni lhuwa kinkawaniyan tuku kilhtamaku lakachilh. Uma kinkamalakapastakayan xtachuwin mapakgsina Salomón: «Tlakg tlan akgtum tlan tukuwani nixawa xatlan aceite, tlakg tlan kilhtamaku akxni nikan nixawa akxni lakachinkan» (Eclesiastés 7:1). Liwana akgatekgsaw tuku xlakata Biblia lhuwa tuku lichuwinan xlakata xtaskujut chu akxni nilh Cristo, pero ni lhuwa tuku kinkawaniyan xlakata kilhtamaku akxni lakachilh.