1, 2. ¿Tuku kinkamapatiniyan, chu tukuya takgalhskinin tlawakgo lhuwa latamanin?

KʼAKGTUM kachikin niku masputunalh guerra, nikgolh lhuwa miles lakpuskatin chu laktsu kamanan. Putum umakgolh latamanin akxtum kamaknuka kʼakgtum tawaxni chu kawilinika lhuwa laktsu cruz anta niku xwan: «¿Tuku xlakata?». Uma takgalhskinin xakstukan katlawanikan tiku titaxtukgo lhuwa tuku nitlan. Akxni tlawakgo uma takgalhskinin lu lilipuwankgo akxni la guerra, akxni wi tuku malakgsputunan, tajatat o tiku nitlan likatsi kamakgni tiku xkapaxkikgo, kalakxtlawani xchikkan o lhuwa kamapakgapatinan. Katsiputunkgo tuku xlakata patinankgo.

² ¿Tuku xlakata Dios masta talakaskin kaʼanalh tapatin? Komo Dios kgalhi xliputum litliwakga, xapaxkina, xaskgalala chu xalakatitum, ¿tuku xlakata anan lhuwa talamakgasitsit chu anan tuku nitlan unu kkakilhtamaku?  ¿Minit akgtum kilhtamaku akxni wix tlawa uma takgalhskinin?

3, 4. 1) ¿Tukuya liʼakxilhtit limasiya pi tlan nakgalhskininanaw tuku xlakata Dios masta talakaskin kaʼanalh tapatin? 2) ¿La akxilha Jehová tuku nitlan chu tapatin?

³ ¿Nitlan nakgalhskininanaw tuku xlakata Dios masta talakaskin kaʼanalh tapatin? Makgapitsi lakpuwankgo pi komo nakgalhskininankgo limasiyakgo pi ni kanajlanikgo chu ni lakgachixkuwilikgo Dios. Pero akxni nalikgalhtawakgaya Biblia, naʼakxilha pi xlakskujnin Jehová tiku ni xmakgxtakgkgo na tlawakgolh takgalhskinin. Chatum tiku kgalhskininalh wa xpalakachuwina Dios, Habacuc, xla kgalhskilh Jehová: «¿Tuku xlakata mastaya talakaskin nakakxilha tuku nitlan? Chu ¿tuku xlakata mastaya talakaskin nakamapatinikan latamanin? ¿Tuku xlakata kʼakxilha tuku masputunan chu tuku xlakata kʼakxilha akxni katlawanikan tuku nitlan latamanin? Chu ¿tuku xlakata lu lhuwa tasitsi anan chu anan lhuwa latalachipat?» (Habacuc 1:3).

⁴ ¿Kilhnilh Jehová palakachuwina Habacuc xlakata  tlawalh uma takgalhskinin? Ni, ni kilhnilh. Wata tlawalh pi xtachuwin katatsokgtawilalh kBiblia. Nachuna, makgtayalh xlakata tlakg tlan naʼakgatekgsa uma, chu makgtayalh xlakata namatliwakglha xtakanajla. Jehová nachuna makgtayaputunan. Kalakapastakti pi Biblia kinkamasiyaniyan pi Dios «kinkalakgkatsanan» (1 Pedro 5:7, TNM). Dios tlakg nitlan akxilha nixawa chatum lataman, tuku nitlan anama chu tapatin nema limin (Isaías 55:8, 9). Pero ¿tuku xlakata anan lhuwa tapatin kʼuma kakilhtamaku?

5. ¿Tuku xlakata patinanaw wankgo makgapitsi, pero tuku wan Biblia?

⁵ Lhuwa latamanin xalak tanu tanu takanajla kakgalhskinkgo tiku kapulalin kxtakanajlakan chu xmakgalhtawakgenakan, tuku xlakata lhuwa patinanaw. Kawanikgo pi wa xtalakaskin Dios chu Dios lakkaxwilinita tuku aku nala chu asta tuku nitlan la. Lhuwa latamanin na kawanikan pi niti lakgapasa xtalakapastakni Dios o na kawanikan pi kalin latamanin, asta laktsu lakgskgatan xlakata natatawilakgo kʼakgapun. Pero chuna la wix katsinitata, Jehová nikxni tlawa tuku nitlan. Biblia kinkawaniyan: «¡Ni tsinu kalakpuwaw pi xaxlikana Dios tlawa tuku nitlan, chu pi tiku kgalhi xliputum litliwakga tlawa tuku ni xalakatitum!» (Job 34:10).

6. ¿Tuku xlakata lhuwa latamanin limawakakgo Dios putum tapatin nema anan?

⁶ ¿Katsiya tuku xlakata latamanin limawakakgo Dios putum tuku patinanaw? Lhuwa chuna lakapastakkgo xlakata lakpuwankgo pi Dios tiku kgalhi xliputum litliwakga wa xmapakgsina uma kakilhtamaku. Ni katsikgo tuku xlikana masiya Biblia nema wix katsita kcapítulo 3  xla uma libro. Anta katsiw pi Satanás wa xmapakgsina uma kakilhtamaku.

7, 8. 1) ¿La nachuna likatsikgo latamanin chuna la likatsi xmapakgsinakan? 2) ¿Tuku xlakata limin tapatin xlakata latamanin makglakgalhinanin chu «kilhtamaku chu tuku xalan lay»?

⁷ Biblia liwana kinkawaniyan pi «xlikatlanka katuxawat wa akgchipananit akgskgawini» (1 Juan 5:19, TXS, 1999). ¿Ni xlikana pi uma liwana kinkamasiyaniyan tuku xlakata anan tapatin? Kakilhtamaku nachuna likatsi chuna la likatsi espíritu nema ni tasiya chu «kaʼakgskgawima putum kristianos» (Apocalipsis 12:9). Satanás akgskgawinan, ni akxilhputunan chu lixkajni likatsi. Wa xlakata, latamanin tiku kxmakan Satanás wilakgolh nachuna likatsikgo, akgskgawinankgo, xalaksitsin chu lu nitlan likatsikgo. Uma tuku lichuwinaw wa xlipulaktum nema tlawa pi kaʼanalh lhuwa tapatin.

⁸ Xlipulaktiy tuku xlakata anan tapatin wa chuna la katsiw kcapítulo 3, akxni chixku nialh kgalhakgaxmatninalh anta kjardín xaʼEdén, lakgalhina litaxtulh. Wa xlakata, lakchixkuwin lakgatikgo limapakgsin chu asta lalichipakgo xlakata nakgalhikgo, chu uma tlawa pi kaʼanalh guerras, talaʼakgchipat chu tapatin (Eclesiastés 4:1; 8:9). Xlipulaktutu tuku xlakata anan tapatin wa xlakata chuna la wan Biblia «kilhtamaku chu tuku xalan lay» (kalikgalhtawakga Eclesiastés 9:11). Jehová ni makgtaya uma kakilhtamaku xlakata ni wa mapakgsi. Wa xlakata lakgachunin max latamanin wi tuku lanikgo xlakata niku wilakgolh kaj xalan wi tuku nitlan la.

9. ¿Tuku xlakata lu liwana katsiyaw pi Jehová wa katsi tuku xlakata mastama talakaskin kaʼanalh tapatin?

⁹ Lu tlan limakgkatsiyaw akxni katsiyaw pi Dios ni tlawa pi kaʼanalh tapatin. Ni wa xkuenta xlakata anan guerras, tuku nitlan la chu talaʼakgchipat, akxni min tuku  malakgsputunan nema lhuwa lipatinankan. Pero nina wanaw tuku xlakata Dios masta talakaskin kaʼanalh lhuwa tapatin. Komo xla kgalhi xliputum litliwakga, kgalhi litliwakga xlakata tlan xmapanulh tuku nitlan. Pero ¿tuku xlakata ni mapanu tapatin? Xlakata lakgapasawa Jehová chu akxilhnitawa pi xla xapaxkina, uma likatsiyaw pi wa Jehová katsi tuku xlakata mastama talakaskin kaʼanalh tapatin (1 Juan 4:8).

10. ¿Tuku tlawalh Satanás pi kalakpuwanka xlakata Dios, chu la tlawalh?

¹⁰ Xlakata tlan nakatsiyaw tuku xlakata Dios masta talakaskin kaʼanalh tapatin, xlakaskinka nalakapastakaw akxni tsukulh taʼakglhuwit. Akxni Satanás tlawalh pi Adán chu Eva nialh kakgalhakgaxmatkgolh Jehová, wi tuku lu xlakaskinka xlitalakkaxtlawat xwanit. Satanás ni wamputulh pi Jehová ni kgalhi litliwakga, xlakata  xkatsi pi lhuwa litliwakga kgalhi. Tlawalh kalakpuwanka pi ni lakgchan namapakgsinan. Akxni wa pi Dios xaʼakgsanina chu ni kamaxki talakaskin xlakskujnin kalipaxuwakgolh tuku tlan, Akgskgawini xlimawakama pi nitlan mapakgsina (kalikgalhtawakga Génesis 3:2-5). Nachuna, xlimasiyama pi latamanin tlakg tlan xkakitaxtunilh komo Dios ni xkamapakgsilh. Chuna limasiyaputulh pi Jehová ni lakgchan namapakgsinan.

11. ¿Tuku xlakata Jehová ni kamalakgsputulh tiku ni kgalhakgaxmatkgolh anta kjardín xaʼEdén?

¹¹ Akxni Adán chu Eva nialh kgalhakgaxmatkgolh Jehová, kitaxtulh la xwankgolh: «Ni kmaklakaskinaw pi Dios nakinkamapakgsiyan. Akinin tlan naklaksakaw tuku tlan chu tuku nitlan». ¿La xʼama lakkaxtlawa Jehová uma? ¿La xʼama kamasiyani putum amakgapitsi ángeles pi tiku ni kgalhakgaxmatkgolh ni xlikana tuku xkilhwamakgolh chu pi Dios tlakg tlan tlawa tuku tlawaputun? Wi tiku lakpuwankgo pi Dios xtikamalakgsputulh tiku ni kgalhakgaxmatkgolh chu xtikatlawapa atanu latamanin. Pero Jehová xlichuwinanita pi xlakaskin pi Katiyatni xakalipaxuw xwa chu xlitatsamalh xkamanan Adán chu Eva (Génesis 1:28). Chu Jehová putum tuku lichuwinan makgantaxti (Isaías 55:10, 11). Nachuna, komo xtikamalakgsputulh tiku ni kgalhakgaxmatkgolh anta kjardín xaʼEdén nila xlakkaxlalh pi xla lakgchan namapakgsinan.

12, 13. ¿Tuku liʼakxilhtit limasiya tuku xlakata Jehová mastanit talakaskin pi Satanás kamapakgsilh kakilhtamaku chu latamanin xakstukan katapakgsikgolh?

¹² Kawiliw akgtum liʼakxilhtit. Chatum makgalhtawakgena masiyama la lakkaxtlawakan xatuwa taʼakglhuwit xla matemáticas. Xalan, chatum tiku masiyanimaka xaskgalala pero lakataki tuku masiyamaka wan pi chuna la  makgalhtawakgena lakkaxtlawama taʼakglhuwit xla matemáticas nitlan, chuna limasiyaputun pi makgalhtawakgena nitu katsi. Chu ama kgawasa wan pi xla tlakg katsi la tlan lakkaxtlawakan ama taʼakglhuwit. Makgapitsi tiku kataʼan kʼescuela lakpuwankgo pi xlikana tuku wan chu na kgalhmakgtayakgo. ¿Tuku xlitlawat makgalhtawakgena? Tlan xkatamakxtulh, ¿pero la xlakpuwankgolh amakgapitsin? Max xlakpuwankgolh pi tiku chuna wan chu tiku kgalhmakgtayakgolh xlikana tuku xwankgo. Max nialh xlakgachixkuwilikgolh makgalhtawakgena chu xlakpuwankgolh pi pekuan natakatsi pi xlikana nitu katsi. Pero chu kalakpuwanti pi makgalhtawakgena maxki talakaskin pi ama kgawasa kakamasiyanilh tiku akxtum katakgalhtawakgama la xla xlakkaxtlawalh ama taʼakglhuwit.

¹³ Jehová nachuna tlawanit. Kalakapastakti tiku ni kgalhakgaxmatkgolh kjardín xaʼEdén ni kajwatiya xlakan xakxilhmakgolh. Lhuwa millones ángeles akxilhkgolh tuku lalh (Job 38:7; Daniel 7:10). Chuna la Jehová xlakkaxtlawalh uma taʼakglhuwit lu xlakaskinka xlakata la xʼama kakitaxtuni ángeles chu alistalh putum latamanin. Wa xlakata, ¿tuku tlawalh Jehová? Mastanit talakaskin pi Satanás kalimasiyalh la xʼama kamapakgsi latamanin. Nachuna mastanit talakaskin pi latamanin xakstukan katapakgsikgolh chu kakapulalilh Satanás.

14. ¿Tuku tlan nakitaxtu xlakata Jehová ni kamalakgachokgolh xakstukan xtapakgsikgolh latamanin?

¹⁴ Makgalhtawakgena nema xlichuwinamaw katsi pi kgawasa tiku wan pi xla tlakg katsi chu tiku kgalhmakgtayakgo nixlikana tuku wankgo. Pero na katsi komo nakamakgxtakga kalakkaxtlawakgolh ama taʼakglhuwit chuna la xlakan katsikgo, nakamakgtaya putum tiku na kgalhtawakgamakgolh. Akxni natasiya pi nixlikana tuku  xwankgonit, amakgapitsin nakatsikgo pi kaj xmakgalhtawakgenakan minini namakgalhtawakgenan. Nachuna, nakatsikgo tuku xlakata nakatamakxtukan tiku xlimasiyaputunkgo pi nitu katsi xmakgalhtawakgenakan. Nachuna, Jehová katsi pi putum ángeles chu latamanin tiku tlan likatsikgo nakamakgtaya akxni naʼakxilhkgo pi Satanás chu amakgapitsi ángeles tiku ni kgalhakgaxmatkgolh Dios nixlikana tuku xlimasiyaputunkgo, chu pi latamanin nila xakstukan kamapakgsikan. Nakatsikgo uma tuku lu xaxlikana lichuwinalh palakachuwina Jeremías: «Liwana kkatsi, Jehová, pi chixku ni lakgchan xtiji. Nipara tsinu lakgchan chixku xakstu napulalin xtatukit» (Jeremías 10:23).

15, 16. 1) ¿Tuku xlakata Jehová makgxtakgnit pi tapatin lhuwa kamakgapalalh? 2) ¿Tuku xlakata Dios ni makgtayanan xlakata ni kaʼanalh tuku nitlan?

¹⁵ Pero ¿tuku xlakata Jehová mastama talakaskin pi lhuwa kilhtamaku kaʼanalh tapatin? ¿Tuku xlakata ni tlawa pi ni kaʼanalh tuku nitlan? Bueno, kalilakapastakwi pulaktiy tuku xtlawalh makgalhtawakgena nema pulana lichuwinanaw. Pulana, xmaxkilh talakaskin pi ama kgawasa xlimasiyalh la xʼama lakkaxtlawa ama taʼakglhuwit xla matemáticas, xlipulaktiy, ni xmakgtayalh xlakata tlan xlakkaxtlawalh. Nachuna pulaktiy tuku Dios lakapastaknit natlawa. Xapulana, maxkinit  talakaskin Akgskgawini chu tiku stalanikgo kalimasiyakgolh pi xlikana tuku wankgolh. Pero xtalakaskin katitaxtulh kilhtamaku. Umakgolh akglhuwa miles kata nema titaxtulha, latamanin tanu tanu tamapakgsin litsakgsakgonit chu lhuwa liskgalala kgalhikgo. Pero, tuku ni xalakatitum, talimaxkgen, tiku lakatsala limapakgsin chu guerras tlakg talhuwima. Uma limasiya pi xtamapakgsin latamanin nitu litlan.

¹⁶ Xlipulaktiy, Jehová ni makgtayama Satanás natamapakgsi kakilhtamaku. Komo Dios xmakgtayanalh xlakata ni xʼanalh lhuwa tuku nitlan chu tuku xalixkajni, ¿ni xlakpuwanti pi chuna xlimasiyalh pi kamakgtayama tiku ni kgalhakgaxmatkgolh? ¿Nixlikana pi xlakapastakwi pi akinin tlan kiʼastukan kinkamapakgsikanan chu paks tlan kinkakitaxtuniyan? Komo Jehová xkamakgtayalh, na xkgalhmakgtayalh uma akgsanina. Pero, «Dios nila akgsaninan» (Hebreos 6:18).

17, 18. ¿Tuku natlawa Jehová xlakata putum tuku nitlan tlawakgonit mapakgsinanin chu Satanás?

¹⁷ Pero ¿tuku tlan nawanaw xlakata tuku nitlan liminit xlakata lu makgasa ni kgalhakgaxmatnikanit Dios? Kalakapastakwi pi Jehová lhuwa litliwakga kgalhi. Wa xlakata tlan nalakkaxtlawa putum tuku talakgalhinit, chu chuna natlawa. Chuna la katsinitawa, katiyatni natatlanipara chu xakalipaxuw nawan. Xlakata kanajlakgo kxtamakamastan Jesús, latamanin nialh makglakgalhinanin nawankgo. Chu tiku nikgonita, akxni nalakastakwanankgo nakgalhiparakgo tuku makgatsankgakgonit. Chuna Dios nalimaklakaskin Jesús “xlakata nalaktlaway xtatlaw Akgskgawini” (1 Juan 3:8). Jehová nalaktlawa xtatlaw Akgskgawini, chuna natlawa akxni nachan kilhtamaku. Tlan nalipaxuwayaw pi Jehová ni akglakgwa tuku tlawalh, xlakata chuna  kgalhiyawku kilhtamaku nakatsiyaw tuku xaxlikana chu naskujniyaw (kalikgalhtawakga 2 Pedro 3:9, 10). La uku Dios, kaputsama latamanin tiku xlikana kakninaniputunkgo chu kamakgtaya xlakata natayanikgo tapatin kʼuma kakilhtamaku niku lhuwa anan taʼakglhuwit (Juan 4:23; 1 Corintios 10:13).

¹⁸ Makgapitsi max lakpuwankgo pi uma “tapatin ni xʼanalh komo Dios xtikatlawalh Adán chu Eva chuna la nila xlakatakikgolh”. Xlakata nakatsiya tuku xlakata ni chuna katlawalh, kalakapastakti akgtum xatlan tamaskiwin nema Jehová kinkamaxkinitan.

19. ¿Tuku lu lanka tamaskiwin kinkamaxkinitan Jehová, chu tuku xlakata kilipaxtikatsinitkan?

¹⁹ La katsiw kcapítulo 5, latamanin kinkatlawakan xlakata kiakstukan nalakapastakaw tuku natatlawayaw. ¿Akxilha la xlilanka xtapalh uma tamaskiwin? Dios na tlawalh lhuwa animales, pero xlakan nila lakapastakkgo tuku natlawakgo (Proverbios 30:24). Chu lakchixkuwin tlawakgonit robots nema katlawakanit xlakata nakgalhakgaxmatkgo tuku kawanikan. ¿Tlan kawa lipaxuw xtawilaw komo Dios nachuna xkinkatlawan? Ni xalipaxuw xtawilaw. Wa xlakata lipaxuwayaw pi tlan kiʼakstukan lakapastakaw tuku natlawayaw, tlan lakapastakaw la nalikatsiyaw, la nalatamayaw chu tiku tlan natalalinaw. Akinin lu lipaxuwayaw xlakata chuna kinkatlawakan, chu Dios lakaskin pi tlan kiakstukan nalakapastakaw tuku natlawayaw.

20, 21. ¿La tlan liwana nalimaklakaskinaw xlakata kinkatlawakan chuna la tlan kiakstukan nalakapastakaw tuku natlawayaw, chu tuku xlakata chuna kilitlawatkan?

²⁰ Jehová ni lakaskin kaj fuerza naskujnaniyaw (2 Corintios 9:7). ¿Tuku tlakg lakgati chatum xatlat o xatse:  pi xkgawasa nawani «kpaxkiyan» xlakata kaj wi tiku wanima o nakatsi pi tuku wanima xaxlikana chuna lakpuwan? Wa xlakata, xlakaskinka natlawanikana uma takgalhskinin: «¿La naklimaklakaskin uma tuku Dios kimaxkinit xlakata kiʼakstu klakapastaka tuku naktlawa?». Satanás, Adán chu Eva nitlan limaklakaskinkgolh, xlakata ni kgalhakgaxmatkgolh Dios. ¿Chu wix? ¿Tuku natlawaya?

²¹ Wix tlan liwana nalimaklakaskina uma lu tlan tamaskiwin pi tlan miʼakstu nalakapastaka tuku natlawaya. Tlan akxtum nakatalaya akglhuwa millones latamanin tiku skujnanimakgolh Jehová. Uma latamanin lu makgapaxuwakgo Dios xlakata limasiyakgo pi Satanás xaʼakgsanina chu nitlan mapakgsinan (Proverbios 27:11). Wix na tlan chuna natlawaya komo nalaksaka xatlan nalipina milatamat. Kcapítulo 12 naʼakxilhaw tuku ama xatlan latamat.