1. ¿Tuku namakglhtinanaw komo nakakninaniyaw Dios la lakaskin?

JEHOVÁ DIOS lhuwa kinkapaxkiyan. Chu xlakata Dios lakaskin tlan kakinkakitaxtunin, wa xlakata kinkapulalimputunan. Komo nakakninaniyaw la lakaskin, xalipaxuw nalatamayaw chu nalakgtaxtuniyaw lhuwa taʼakglhuwit. Nachuna nakinkasikulunatlawayan chu nakinkamakgtayayan (Isaías 48:17). Pero anan akglhuwa ciento takanajla. Maski putum wankgo pi masiyakgo tuku xaxlikana xlakata Dios, ni akxtum lakapastakkgo xlakata tiku Dios chu tuku lakaskin natlawayaw.

2. ¿Tuku nalikatsiya la nakakninaniya Jehová, chu tuku liʼakxilhtit tlan xtamalakxtumiw?

² ¿La nakatsiya la tlan nakakninaniya Jehová? Ni talakaskin nalikgalhtawakgaya chu nakatamalakxtupiya tuku masiyakgo akgatunu takanajla. Kaj milikatsit tuku xlikana masiya Biblia xlakata xaxlikana takanajla. Kawiliw akgtum liʼakxilhtit. Kʼakglhuwa kachikinin nixaxlikana tumin akgtum taʼakglhuwit. Chu kalakpuwanti pi wix nawanikana pi kalaksakti tumin, tanu kawili tumin nema xaxlikana chu tanu kawili nema nixaxlikana. ¿La xtlawa xlakata xkatsi tuku xaxlikana chu  tuku nixaxlikana? ¿Tlan xwa liwana nalakgapasa la tasiyakgo makatunu tumin nixaxlikana? ¿Ni tlakg tlan xwa komo liwana xkaputsanani la tasiyakgo xaxlikana tumin? Akxni liwana nakalakgapasa, lakapala nakatsiya tuku nixaxlikana tumin. Nachuna, ni tuwa nakatsiyaw tuku nixaxlikana takanajla, akxni katsiyaw la xliwanat xaxlikana takanajla.

3. Chuna la Jesús wa, ¿tuku kilitlawatkan xlakata Dios tlan nakinkaʼakxilhan?

³ Lu xlakaskinka nakakninaniyaw Dios la lakaskin. Lhuwa latamanin lakpuwankgo pi putum takaknin lakgati Dios, pero nichuna masiya Biblia. Na nila kaj nawanaw pi kstalaninanin Cristo akinin xlakata Jesús wa: «Ni putum tiku nakiwani, “Malana, Malana”, natanu kTamapakgsin xalak akgapun, kajwatiya tiku natlawa xtalakaskin kinTlat xalak akgapun». Wa xlakata, Dios kajwatiya tlan nakinkaʼakxilhan komo nakatsiyaw tuku kinkaskiniyan chu natlawayaw. Tiku ni tlawakgo xtalakaskin Dios, Jesús kalimapakuwilh «[¡]tiku tlawayatit tuku nitlan!» (Mateo 7:21-23, TNM). Takanajla nixaxlikana xtachuna tumin nema nixaxlikana, nitu kgalhi xtapalh, chu lhuwa tuku nitlan kinkatlawaniyan.

4. ¿Tuku kilhchanima kgantiy tiji nema lichuwinalh Jesús chu niku linan?

⁴ Jehová tlawa pi putum latamanin tlan nalaksakaw latamat nema nikxni sputa. Pero, xlakata tlan nalatamayaw kxakalipaxuw Katiyatni, xlakaskinka nakakninaniyaw chu nakgalhiyaw kintayatkan chuna la lakaskin. Lu nitlan, pero lhuwa ni tlawaputunkgo, wa xlakata Jesús wa: «Anta nkalaktanutit kxatitsu malakcha; xampi luwa pakgtlanka xamalakcha, chu na luwa titlanka xatiji wa ntu an kputsankgan, na luwa lhuwa nti laktanukgo anta. Xampi luwa titsu xamalakcha, chu xatiji, na luwa  titsu wa ntu an klatamat, na luwa tsinu wa nti ntakgskgoy» (Mateo 7:13, 14). La akxilhaw, takanajla xaxlikana linan klatamat, chu takanajla nixaxlikana linan klisputni. Pero Jehová ni lakaskin pi nipara chatum lataman kanilh, wa xlakata Jehová tlawa pi putum latamanin tlan nalakgapaskgo (2 Pedro 3:9). Xlikana, chuna la kakninaniyaw Dios natlawa pi kakgalhiw latamat o naniyaw.

5. ¿La tlan nakatsiyaw tiku lilatamakgo xaxlikana takanajla?

⁵ ¿La tlan natekgsaw «xatiji na luwa titsu wa ntu an klatamat»? Jesús wa pi ni tuwa xkalakgapaswi tiku lilatamakgo xaxlikana takanajla komo naʼakxilhaw la linkgo xlatamatkan. Xla wa: «Wa xatawakat nalilakgapaskgoyatit» xlakata, «xlipaks wa ntu xatlan kiwi, mastay wa ntu xatlan xatawakat» (Mateo 7:16, 17). Tlan nawanaw pi wantiku lilamakgolh xaxlikana takanajla litalakgapaskgo xlakata tuku kanajlakgo chu tuku tlawakgo. Maski na makglakgalhinanin, chu tlawakgo tuku nitlan, putum kgoxa lakgo xlakata natlawakgo xtalakaskin Dios. Kaʼakxilhwi pulakchaxan tuku nakinkamakgtayayan nakalakgapasaw tiku lilamakgolh xaxlikana takanajla.

6, 7. ¿Tuku lakpuwankgo xlakskujnin Dios xlakata Biblia, chu tuku liʼakxilhtit wililh Jesús xlakata uma?

⁶ Wantuku masiyakgo xlakskujnin Dios takilhtinit kBiblia. Xtachuwin Dios wan: «Xlipaks yuma ntatsokgnun, paks ntimapuwanikgolh Dios lantla natsokgkgoy wa nti ntsokgkgonit, chu na luwa tlan nalimakgalhtawakganankan, chu nalimakgatanksninankan, chu nalistakyawanankan, chu nalimasiyukan wa ntu xaʼakgstitum natlawakan. Lakimpi chuna nitu nakitsankganiy nchixku  [o puskat] nti skunaniy Dios, paks tlan nakatsiy lantla natlaway xlipaks ntu tlan» (2 Timoteo 3:16, 17). Apóstol Pablo na katsokgnanilh xnatalan kxapulana siglo: «Mpi akxni makgamakglhtinantit xtachuwin Dios, ntu nkintikakgaxpatnitit, ni xtachuna xtachuwin chixkuwin ntilimakgamakglhtinantit wampi wantu xtachuwin Dios» (1 Tesalonicenses 2:13). Wa xlakata, xtamasiy chu tuku tlawakgo tiku lilamakgolh xaxlikana takanajla ni takilhti tuku kanajlakgo chu kxtalismanin lakchixkuwin. Tuku masiyakgo takilhtinit kBiblia, xTachuwin Dios.

⁷ Jesucristo wililh liʼakxilhtit, xlakata tuku masiyalh xtakilhtinit kxTachuwin Dios. Makgtum akxni tlawanilh oración xtlat wa: «Wa mintachuwin, talulokgtat [o xaxlikana]» (Juan 17:17). Jesús xkanajlani xTachuwin Dios, chu putum tuku xmasiya chuna xwi kxTachuwin Dios. Xla xwan: «Chuna ntatsokgnit» chu alistalh xwan tuku wan kBiblia (Mateo 4:4, 7, 10). Nachuna, la uku xlakskujnin Dios ni masiyakgo tuku xlakan lakapastakkgo. Kanajlakgo pi Biblia xTachuwin Dios chu kaj manwa masiyakgo tuku anta wan.

8. ¿Tuku na likakninaniyaw Dios?

⁸ Tiku lilatamakgo xaxlikana takanajla kajwatiya kakninanikgo Jehová chu lichuwinankgo xtukuwani. Jesús masiyalh: «Wa Dios mimPuchina [Jehová] nalakgatakilhputaya, chu na xman wa nti nalakgachixkuwiya» (Mateo 4:10). Wa xlakata kskujnin Dios kakninanikgo Jehová chu niti atanu. Xlikana, xlakan na likakninanikgo akxni lichuwinankgo xtukuwani chu xtayat xaxlikana Dios. Salmo 83:18, Salmos Ixtatlincan ti Talipawan Dios, wan: «Wix Dios y Jehová mintukuwani. Wata wix Dios xala talhman, ti mapakgsinan nak ixlitilanka katiyatni». Jesús wa liʼakxilhtit nema stalanikgo xlakskujnin  Dios akxni kamakgtayakgo latamanin nalakgapaskgo Dios. Jesús wanilh xtlat uma tachuwin: «Kmasiyunikgonit mintukuwini nchixkuwin wa ntu xala katuxawat nkintimaxki» (Juan 17:6). La uku nachuna, xaxlikana xlakskujnin Dios kamasiyanikgo xtalatamankan xtukuwani Dios, xtalakaskin chu la likatsi.

9, 10. ¿La limasiyakgo pi lapaxkikgo kstalaninanin Cristo?

⁹ Xlakskujnin Dios xlikana lapaxkikgo, chu ni paxkinankgo kaj xlakata wi tuku nakamaxkikan. Jesús wa: «Wa yuma nakalilakgapaskgoyan xlipaks amakgapitsin mpi wixin, nkilimakgalhtawakgat, lapi xlakgalhinitit ntapaxkit nchatunu chatunu» (Juan 13:35). Xapulana kstalaninanin Cristo chuna xlapaxkikgo. Tapaxkit nema lakgalhinikgo xlakskujni Dios tlawa pi ni katapitsikgolh kaj xlakata atanu xcolorkan, xtachuwinkan, maski kgalhikgo tumin o ni kgalhikgo chu maski xalak atanu kachikinin xlikana linatalan laʼakxilhkgo (kalikgalhtawakga Colosenses 3:14). Tiku wilakgolh knixaxlikana takanajla ni chuna lapaxkikgo. Komo xlapaxkikgolh, ni xlamakgnikgolh kaj xlakata tanu xcolorkan o xalak atanu kachikinin. Xaxlikana kstalaninanin Cristo ni tiyakgo likan xlakata nakalimakgnikgo tiku kanajlakgo la xlakan kanajlakgo, chu ni makgnikgo nipara chatum lataman. Biblia masiya: «Wa yuma litalakgapaskgoy xlakgskgatan Dios, chu xlakgskgatan akgskgawini: kaxatikawa nti ni tlaway wa ntu akgstitum, chu na ni paxkiy xtala, ni wa ntapakgsiniy Dios [...] nalapaxkiyatit nchatunu amakgapitsin. Ni wa xtachuna lantla nCaín nkatiwantit, sampi akgskgawini xtapakgsiniy, na timakgnilh xtala» (1 Juan 3:10-12; 4:20, 21).

¹⁰ Chuna xla, xaxlikana tapaxkit nema lakgalhini tlawa pi ni kamakgnikgolh xtalatamankan, pero na wi  atanu tuku kilitlawatkan. Xaxlikana kstalaninanin Cristo xatapaxuwan limaxtukgo xkilhtamakujkan, xlitliwakgakan chu tuku kgalhikgo xlakata nalamakgtaya chu nalamakgpuwantini (Hebreos 10:24, 25). Lamakgtaya akxni kgalhikgo taʼakglhuwit chu ni kamakgkgalhanankgo o ni kaʼakgskgawikgo amakgapitsin. Xlikana na kgalhakgaxmatkgo tastakyaw xalak Biblia niku wan pi «ntu ntlan nkatlawanikgow xlipaks amakgapitsin» (Gálatas 6:10).

11. ¿Tuku xlakata lu xlakaskinka namakgamakglhtinanaw Jesús tiku Dios wilinit xlakata nakinkalakgmaxtuyan?

¹¹ Xaxlikana kstalaninanin Jesús makgamakglhtinankgo pi Cristo wa tiku Dios maklakaskin xlakata nakalilakgmaxtu. Biblia masiya pi «na tini achatum mastay akgaputaxtut; xampi ni anan a akgtum ntapakuwit kxtampin akgapun ntamaxkikgonit nchixkuwin lantla naliakgaputaxtuyaw» (Hechos 4:12). La katsiw kcapítulo 5, Jesús mastalh xlatamat xlakata nakalilakgmaxtu latamanin tiku kgalhakgaxmatnankgo (Mateo 20:28). Nachuna, Jehová liwilinit Jesús, Mapakgsina xla Tamapakgsin xalak akgapun nema namapakgsinan kKatiyatni. Wa xlakata, Dios lakaskin pi kakgalhakgaxmatwi Jesús chu katlawaw la masiyalh. Komo chuna natlawayaw tlan nalatamayaw chu nikxni naniyaw. Wa xlakata Biblia kinkawaniyan: «Wanti nkanajlaniy xaKam, kgalhiy xlatamat wa ntu xaliankgalhin; wampi wa nti ni kgalhakgaxmata xaKam, ni katiukxilhli latamat» (Juan 3:36).

12. ¿Tuku wamputun ni xalak kakilhtamaku nawanaw?

¹² Xaxlikana kstalaninanin Jesús ni xalak kakilhtamaku. Akxni Jesús xwi kxlakatin mapakgsina Pilato, xalak Roma, nema xputsananima wanilh: «Wa kinTamapakgsin ni xala uma kakilhtamaku» (Juan 18:36, TNM). Maski tanu tanu kachikinin wilakgolh xaxlikana kstalaninanin  Jesús lakgachixkuwilikgo Tamapakgsin xalak akgapun. Wa xlakata ni makgtanukgo kpolítica nipara kxtaʼakglhuwit uma kakilhtamaku. Pero komo makgapitsi latamanin makgtanuputunkgo kpolítica, mapakgsinanin litaxtuputunkgo, o laksakputunkgo chatum mapakgsina, kstalaninanin Cristo ni kawanikgo tuku xlitlawatkan, ni makgtanukgo. Pero maski ni makgtanukgo kpolítica, kgalhakgaxmatkgo limapakgsin. ¿Tuku xlakata? Xlakata xtachuwin Dios wani kstalanina Cristo pi «xlilakgachixkuwitkan mapakgsinanin» (Romanos 13:1). Pero akxni mapakgsinanin wi tuku skinkgo chu uma talatlawa xlimapakgsin Dios, xaxlikana xlakskujnin Dios tlawakgo tuku tlawakgolh apóstoles tiku wankgolh: «Xlakaskinka mpi pulh wa nakkgalhakgaxmataw Dios, ni xawa nchixkuwin» (Hechos 5:29; Marcos 12:17).

13. ¿Tuku kanajlakgo xlakata xTamapakgsin Dios xaxlikana kstalaninanin Jesús, chu wa xlakata tuku tlawakgo?

¹³ Xaxlikana kstalaninanin Jesús lichuwinankgo pi kajwatiya xTamapakgsin Dios nakamakgtaya latamanin. Jesús lichuwinalh tuku xʼama la: «Chu umakgolh xalakwan tamakatsinin xla Tamapakgsin natalichuwinan xliputum katiyatni xlakata natamakatsininan kputum laklanka kachikinin, chu alistalh namin lisputni» (Mateo 24:14, TNM). Xaxlikana kstalaninanin Jesús, ni kamakgpuwantinikgo latamanin kalipawankgolh pi mapakgsinanin nakalakkaxtlawani xtaʼakglhuwitkan. Wata lichuwinankgo pi kajwatiya tiku nakamakgtaya latamanin wa xTamapakgsin Dios xalak akgapun (Salmo 146:3). Wa Jesús kinkamasiyanin naskinaw kkioracioneskan xlakata namin tlakg xatlan tamapakgsin, xla wa: «Kamilh minTamapakgsin. Katatlawalh mintalakaskin, chuna la kʼakgapun, nachuna kkatiyatni» (Mateo 6:10, TNM). Xtachuwin Dios wan pi Tamapakgsin xalak akgapun  «nakalakxpula chu nakamasputu putum umakgolh tamapakgsin chu ama tamapakgsin xliputum kilhtamaku natawila» (Daniel 2:44; Apocalipsis 16:14; 19:19-21).

14. Chuna la wix akxilha, ¿tukuya takanajla tlawakgo tuku talilakgapasa xaxlikana takanajla?

¹⁴ Xlakata tuku akxilhwita, kakgalhskinka: «¿Tiku latamanin masiyakgo tuku takilhtinit kBiblia chu makatsininankgo pi xtukuwani Dios wa Jehová? ¿Tiku lu xlikana  lapaxkikgo chuna la wa Jesucristo, limasiyakgo pi kanajlanikgo Jesús, ni makgtanukgo tuku xla kakilhtamaku chu lichuwinankgo pi tuku nakamakgtaya latamanin wa xTamapakgsin Dios? Xliputum takanajla nema anankgo kKatiyatni, ¿tukuya takanajla chuna tlawa la lichuwinawa?». Liwana tasiya pi wa xtatayananin Jehová (kalikgalhtawakga Isaías 43:10-12).

15. Dios lakaskin pi kakanajlaniw, pero ¿tuku na lakaskin natlawayaw?

¹⁵ Xlakata namakgapaxuwayaw Dios ni kaj talakaskin nakanajlaniyaw. Biblia wan pi asta demonios na kanajlakgo pi Dios lama (Santiago 2:19). Pero xlakan ni tlawakgo xtalakaskin Dios chu Dios nitlan kaʼakxilha. Xlakata namakgapaxuwayaw Dios ni kajwatiya nakanajlayaw pi xla lama, na talakaskin natlawayaw xtalakaskin. Nachuna talakaskin nataxtuyaw knixaxlikana takanajla chu namakgtanuyaw kxaxlikana takanajla.

16. ¿Tuku kilitlawatkan xlakata ni natapakgsiyaw knixaxlikana takanajla?

¹⁶ Apóstol Pablo limasiyalh pi ni natlawayaw tuku tatlawa nixaxlikana takanajla. Xla tsokgwililh: «Kalitaxtunikgotit, na katapanunikgotit, wan nkimPuchinakan, na ni tixamayatit wa ntu lixkajnit; chanchu nkit nakkamakgamakglhtinanan» (2 Corintios 6:17; Isaías 52:11). Wa xlakata xaxlikana kstalaninanin Jesús nipara tsinu makgtanukgo knixaxlikana takanajla.

17, 18. ¿Tuku kilhchani «Babilonia xaLanka», chu tuku xlakata lu xlakaskinka “nataxtuya” la uku?

¹⁷ Biblia masiya pi putum takanajla «xatlanka Babilonia» litaxtukgonit (Apocalipsis 17:5). * Uma tukuwani  kinkamalakapastakan kachikin xalamakgasa xwanikan Babilonia, anta niku kilhtsukucha nixaxlikana takanajla, akxni xtitaxtunita Munkaklat kxkilhtamaku Noé. Lhuwa tamasiy chu talismanin nema la uku kgalhikgo lhuwa nixaxlikana takanajla lakatsukukgolh kBabilonia xalamakgasa. Kaliwiliw uma, tiku xlamakgolh kBabilonia xkakninanikgo chatum Dios nema kgalhtutu Dioses xlitaxtu, chu la uku akglhuwa takanajla tuku tlakg kanajlanikgo, wa Trinidad. Pero Biblia, liwana masiya pi kaj chatum Dios anan, wa Jehová chu Jesucristo xKgawasa (Juan 17:3). Babilonios na xkanajlakgo pi latamanin xkgalhikgo akgtum espíritu nema ni niy maski xniy xtiyatliwa chu tlan xpatinalh kpupatin. La uku lhuwa takanajla masiyakgo pi kgalhiyaw akgtum espíritu nema ni niy chu tlan napatinan kpupatin.

¹⁸ Takanajla nema xtatlawa kBabilonia xalamakgasa talakgatumilh xlikalanka Katiyatni. Wa xlakata tlan nawanaw pi la uku Babilonia xaLanka, kilhchani tamapakgsin xlikalanka kakilhtamaku xla nixaxlikana takanajla. Pero Dios lichuwinanita pi uma tamapakgsin kaj xalan nakamalakgsputu. ¿Akxilha tuku xlakata lu xlakaskinka nipara tsinu namakgtanuya kBabilonia xaLanka? Jehová lakaskin pi ni kamakgapala, “kataxtu la uku”, xlakata xlimakgwaku (kalikgalhtawakga Apocalipsis 18:4, 8).

19. ¿Tuku natlajaya komo naskujnaniya Jehová?

¹⁹ Akxni wix nalakapastaka namakgxtakga nixaxlikana takanajla, max lhuwa latamanin nialh katixakgatliputunkgon. Pero komo wix naskujnaniya Jehová chu nataskuja xkachikin, tlakg natlajaya ni xtachuna tuku namakgatsankgaya. Nachuna nakitaxtuniyan  la xapulana kstalaninanin Jesús, tiku makgxtakgkgolh makgapitsi tuku xkgalhikgo kaj xlakata nastalanikgo: tiku na skujnanikgo Dios nalitaxtukgo la minatalan. Xlikana nakgalhiya akgtum familia nema wilakgolh xlikalanka Katiyatni, akglhuwa millones kstalaninanin Cristo nema xlikana napaxkikgoyan. Chu nakgalhiya akgtum xatlan takgalhkgalhin, nalatapaya chu nikxni katini «kilhtamaku nema aku mima» (kalikgalhtawakga Marcos 10:28-30, TNM). Nachuna, max tiku natamakgatlinikgoyan xlakata la uku kgalhiya atanu takanajla, natitaxtu kilhtamaku na nakatsikgo tuku masiya Biblia chu na naskujnanikgo Jehová.

20. ¿Tuku nakgalhikgo tiku lilatamakgo xaxlikana takanajla?

²⁰ Biblia masiya pi Dios nialh makgas namasputu uma xalixkajni kakilhtamaku chu nawili xlakgxokgo akgtum xasasti kakilhtamaku anta niku namapakgsinan xTamapakgsin (2 Pedro 3:9, 13). ¡Lu tlan nawan uma xasasti kakilhtamaku! Kaj akgtum takanajla natawila, wa xaxlikana takanajla. ¿Ni lakpuwana wix pi la uku xlakaskinka wi tuku militlawat xlakata tlan nakatatamakxtupiya xaxlikana kskujnin Dios?