Akxni chatum chixku chu puskat tamakgaxtokgkgo, anan tanu tanu taʼakglhuwit, max xlakata ni lakxtum lakpuwankgo chu makgkatsikgo o tanu la kamakgastakkanit. Nachuna max taʼakglhuwit alakatanu minacha o kaj xalan tawila.

Max natsalaniputuna taʼakglhuwit, pero Biblia wan pi nalakkaxtlawayaw (Mateo 5:23, 24). Tlakg tlan nalakkaxtlawaya komo natlawaya la wan Biblia.

TUKU WAN BIBLIA: «Anan xkilhtamaku, [...] akxni tlan nachuwinankan» (Eclesiastés 3:1, 7). Kalimaxtu kilhtamaku nalichuwinana taʼakglhuwit; lakatanks kawani tiku tamakgaxtokga tuku makgkatsiya chu tuku lakpuwana xlakata taʼakglhuwit. Putum kilhtamaku kawani tuku xlikana (Efesios 4:25). Maski makgkatsiya pi sitsipat, ni katalakilhni. Akxni lakatitum kgalhtinankan tlawa pi uma aktsu taʼakglhuwit ni lanka nawan (Proverbios 15:4; 26:20).

Maski ni lakgatiya tuku waniyan tiku tamakgaxtokga, chuntiya tlan kalikatsini; kalimasiyani pi paxkiya chu kamaxki kakni (Colosenses 4:6). Tunkun kalakkaxtlawa taʼakglhuwit, chu chuntiya kalatachuwinantit (Efesios 4:26).

TUKU TLAN XTLAWA:

• Kalakpuwanti tukuya kilhtamaku tlakg tlan nalichuwinanatit taʼakglhuwit

• Akxni tiku tamakgaxtokga chuwinama, ni lakapala kakgalhtipaxtokgti. Kakgalhi akxni nalakgchanan nachuwinana

TUKU WAN BIBLIA: «Chatunu chatunu [...] lu kalapaxkitit. Chu xlakata nalamaxkiyatit kakni, wixin pulana katlawatit» (Romanos 12:10, TNM). Lu xlakaskinka pi nakatsiniya nakgaxpata chu naʼakgatekgsa tuku lakpuwan tiku tamakgaxtokga, «watiya kamakgkatsitit» chu «ni lankajwa kalakapastaktit» (1 Pedro 3:8, TNM; Santiago 1:19). Ni kaj kalimasiya pi kgaxpatnipat. Komo tlan, kamakgxtakgti tuku tlawapat chu kakgaxpatti tuku waniman tiku tamakgaxtokga, o kakgalhskinti komo tlan alistalh nalichuwinanatit. Komo liʼakxilha pi akxtum taskuja chu ni la tiku mintalamakgasitsin, ni tunkun katilisitsi tuku nawaniyan (Eclesiastés 7:9).

TUKU TLAN XTLAWA:

• Kakgaxpatti tuku nawaniyan tiku tamakgaxtokga, maski ni lakgatiya

• Kalakpuwanti tuku xlakata chuna wan. Kuentajkatlawa la tasiya xlakan chu la takgaxmata tuku wan

TUKU WAN BIBLIA: «Putum taskujut wi tuku tlan kitaxtu, pero tuku kaj talichuwinan kaj nitu kitaxtu» (Proverbios 14:23, La Biblia Latinoamérica, 2011). Ni kaj nalakpuwanatit la nalakkaxtlayatit taʼakglhuwit. Talakaskin pi chuna natlawayatit. Max tuwa namakgkatsiyatit pero alistalh lu tlan kitaxtu (Proverbios 10:4). Komo akxtum naliskujatit, “lhuwa tuku namakglhtinanatit” (Eclesiastés 4:9).

TUKU TLAN XTLAWA:

• Kalakpuwanti tuku tlan natlawa chatunu xlakata nalakkaxla taʼakglhuwit

• Ni xmakgasni kaʼakxilhti komo lakkaxlama mintaʼakglhuwitkan