Akxni natlatni kgalhikgo xapulana skgata lu lipaxuwakgo pero max na tuwa namakgkatsikgo. Max kaks nalilakawankgo pi lhuwa kilhtamaku chu litliwakga talakaskin xlakata nakuentajtlawakgo kskgatakan. Xlakata ni liwana jaxkgo chu talakgpali la makgkatsikgo, max nawili taʼakglhuwit. Wa xlakata xchatiykan wi tuku natalakaskin nalakgpalikgo xlakata nakuentajtlawakgo skgata chu xtamakgaxtokgatkan. ¿La tlan nakamakgtayayan xtastakyaw Biblia natayaniyatit taʼakglhuwit?

TUKU WAN BIBLIA: «Tapaxkit pati chu tlan likatsi [...] ni putsa tuku kaj xla minini, ni tunkun sitsi» (1 Corintios 13:4, 5, TNM). Xlakata kajku xapulana skgata, kaj wa lu nakuentajtlawaputuna. Pero uma max tlawa pi minchixku namakgkatsi pi lakgmakgampat, wa xlakata kalakapastakti pi xla na lakaskin nakuentajtlawaniya. Tlan kalikatsini chu ni kasitsi, kalimasini pi lakaskina xtamakgtay chu lu paxtikatsiniya pi takuentajtlawayan skgata.

«Wixin xchixkukan lakchajan, wa lantla xlilat lakatitum natatawilakgoyatit.» (1 Pedro 3:7.) Tlat, komo kajku xapulana skgata kgalhiya, kaʼakgatekgsti pi mimpuskat tlakg lhuwa kilhtamaku nalimaxtuni skgata, chu uma max natlawa pi nasitsi, natlakgwan o asta nalipuwan xasasti taskujut nema lakgaya. Chu max nasitsiniyan, pero ni kasitsini, xlakata «tiku ni lakapala sitsi tlakg tlan nixawa xatliwakga chixku» (Proverbios 16:32). Kalimasiya liskgalala chu kamaxki tuku xla maklakaskin (Proverbios 14:29).

TUKU TLAN XTLAWA:

• Komo wix xatlat: Katakuentajtlawa skgata mimpuskat, chu max asta katsisni. Nialh katlawa tuku makglhtiyan kilhtamaku wata tlakg makgas akxtum kakatatawila mimpuskat chu miskgata

• Komo wix xatse: Akxni minchixku makgtayaputunan, kamaxki talakaskin. Komo ni liwana tlawa ni kakilhni, xatapaxuwan kamasiyani la natlawa

TUKU WAN BIBLIA: «Kaj akgtum makni nawankgo» (Génesis 2:24). Maski la uku wi achatum kfamilia, kalakapastakti pi wix chu tiku tamakgaxtokga chuntiyaku «akgtum makni». Kaliskujti chuntiyaku lu tlan nalatalalipinatit.

Puskat, kapaxtikatsini xtamakgtay minchixku. Akxni napaxtikatsiniya nalitaxtu la «tuku mapaksanan» (Proverbios 12:18). Chixku, kawani mimpuskat pi lu paxkiya chu paxtikatsiniya pi kuentajtlawa familia (Proverbios 31:10, 28).

«Ti ni chatum kaputsalh [...] nkaj xakstu [tlan nakitaxtu], wampi na kaputsalh lantla ntlan [nakitaxtu] achatum.» (1 Corintios 10:24.) Katlawa tuku tlakg namakgtaya tiku tamakgaxtokga chu kaʼakxilhti xtaskujut. Kalimaxtu kilhtamaku nakgalhchuwinanatit chu nalakgaxpatniyatit. Xlakata talakgxtumit, ni kaj miʼakstu kapaxkikanti. Kalakpuwanti tuku makgkatsi tiku tamakgaxtokga. Biblia wan: «Kalamaxkitit wantu kgalhiyatit, chu wantu maklakaskin mintiyatliwakan, wampi lapi akxtum likatsiyatit» (1 Corintios 7:3-5, Hua Xasasti Talaccaxlan, 1999). Wa xlakata, lakatanks kalichuwinantit uma. Komo ni lakapala nasitsiya chu naʼakgatekgsniya natatliwakglha la latalalipinatit.

TUKU TLAN XTLAWA:

• Kalimaxtu kilhtamaku minchatiykan akxtum natawilayatit

• Maski ni lhuwa tuku kalalimasiyanitit pi lapaxkiyatit, max wi tuku natsokgniya o aktsu tamaskiwin

TUKU WAN BIBLIA: «Mpi asta kminkataskgata, katsininita xtatsokgnun Dios, wa yuma ntu makgatakgsniyan lantla nakgaputaxtuya» (2 Timoteo 3:15). Kalakkaxwili la namasiyaniya miskgata. Liwana kakatsi pi maski akxni nina lakachin, lhuwa tuku tlantiya katsini. Akgtum, liʼakxilhtit, akxni wijku kmimpan tlan kgaxmata mintachuwin chu makgkatsi pi paxkiya. Kalikgalhtawakgani akxni lakachinita, maski ni naʼakgatekgsa tuku waniya, pero namakgtaya akxni nastaka nalakgati kgalhtawakga.

Ni kalakpuwanti pi lu aktsujku miskgata xlakata nalitachuwinana Dios. Kakgaxmatli akxni tlawaniya oración Jehová (Deuteronomio 11:19). Akxni takgamanana, kawani tuku tlawanit Dios (Salmo 78:3, 4). Chuna la nastaktilha, naʼakxilha pi wix lu paxkiya Jehová chu xla na napaxki.

TUKU TLAN XTLAWA:

• Kaskinti liskgalala xlakata tlan namasiyaniya miskgata

• Makglhuwa kawani tachuwin chu talakapastakni nema tlakg xlakaskinka lakapala xlikatsinit