Kalilakpuwanti uma: akxni Julia akxilhkan kʼespejo, akxilha pi lu xakgon. Maski xnatlatni chu xʼamigos wanikgo pi lu kgetsu la kgantum fideo, xla lakpuwan: «Kilitaktat la kilitsinka».

Nina makgas, Julia lakpuwa natlawa tuku natalakaskin xlakata natakta maski «kaj akgtiy kilo aitat». Kajwatiya talakaskin ni lhuwa nawayan...

¿Tuku xtlawa komo chuna xmakgkatsi la Julia?

Ni talakgalhin nalilakgaputsaya la tasiyaya. Biblia tlan kalichuwinan lakchixkuwin chu lakpuskatin tiku stlan xtasiyakgo, la Sara, Raquel, José, David chu Abigail. Akgtum liʼakxilhtit, litachuwinan chatum puskat tiku xwanikan Abisag nema «lu stlan xtasiya» (1 Reyes 1:4).

Pero lhuwa kamanan lu lilakgaputsakgo la tasiyakgo. Uma max nakalimini taʼakglhuwit. Kalichuwinaw makgapitsi.

• Akgtum taputsan, limasiyalh pi 58% laktsuman wankgo pi xakgon, pero kaj 17% tiku chuna.

• Kʼatanu taputsan, limasiyalh pi 45% lakpuskatin tiku lu lakgkgetsu chu ni tsinkankgo la xlitsinkatkan xlakpuwankgo pi xalakgkgon.

• Xlakata lakgkgetsu wamputunkgo lhuwa kamanan kalipekua wilikgo xlatamatkan akxni kachipa anorexia xlakata nialh wayankgo chu xlajwanankgo.

 Komo wix akxilha pi max na kgalhiya anorexia o atanu tuku natlawa pi nialh nawayamputuna, kaputsa tamakgtay. Pulana kakawani minatlatni o atanu tiku wix lipawana. Biblia wan: «Xaxlikana amigo putum kilhtamaku paxkinan, chu litaxtu la chatum tala akxni anan talakgaputsit» (Proverbios 17:17).

Tuku wi kxnaku chatum lataman wa tuku tlawa pi stlan o ni stlan nawan. Kalilakpuwaw Absalón xkgawasa mapakgsina David. Biblia wan:

«Ni xʼanan atanu chixku tiku tlan xmalankika xlakata lu stlan xtasiya. Lata kxtantun asta kxakgxakga, ni xkgalhi tuku ni stlan» (2 Samuel 14:25).

Pero, ¡uma kgawasa lu tlankajwa xmakgkatsikan, lhuwa tuku xkgalhiputun chu xastawana xwanit! Wa xlakata Biblia ni lichuwinan Absalón la tiku stlan xlikatsi; wata wan pi ni para tsinu xlakamaxanan, xmakgxtakgnan chu xamakgnina xwanit.

Wa xlakata Biblia kinkamaxkiyan uma tastakyaw:

“Katapunutit xasasti mintayatkan” (Colosenses 3:10).

«Militakaxtay ni wa kawa tuku kaj tasiya [...] wata wa kawa tuku tsekg wi kminaku» (1 Pedro 3:3, 4, TNM).

Ni talakgalhin stlan natasiyaputuna, pero tlakg xlakaskinka tuku wi kminaku nixawa la tasiyaya. Chuna la natitaxtu kilhtamaku, ¡lakwan tayat nema kgalhiya tlakg tlan naʼakxilhkgo amakgapitsin nixawa tliwakga o stlan makni nakgalhiya! Chatum tsumat tiku wanikan Phylicia, wan: «Komo stlan tasiyaya lakapala naʼakxilhkana, pero tuku wi kminaku chu mintayat wa tuku tlakg nalilakapastakkgoyan latamanin».

¿Ni lakgatiya la tasiya mimakni?

¿Minit kilhtamaku lakpuwanita nataoperarliya o nialh lhuwa nawayana xlakata nalakgpaliya tuku nitlan akxilha kmimakni?

¿Tuku xlakgpali kmimakni komo tlan chuna xtlawa? (Kalaksakti tuku lakpuwana pi xtlawa).

• KILILANKA

• KILITSINKA

• KINCHIXIT

• LA TASIYA KIMAKNI

• KILAKAN

• LA KLAKAWAN

Komo kgalhtinanti pi «chuna» kʼakgtiy takgalhskinin chu laksakti akgtutu o liwaka takgalhtin kxliʼakgtutu takgalhskinin, kalilakpuwanti uma: max amakgapitsin ni akxilhkgo tuku nitlan akxilha wix xlakata mimakni. Kaj lakapala malakatsaliyaw chu lu lilakgaputsayaw xlakata la tasiyayaw (1 Samuel 16:7).