1, 2. ¿Tiku xʼamigos Jehová litaxtukgolh?

¿TIKU wix miʼamigo xlimaxtu? Max wa tiku tlan talalipina, tlan likatsi chu kgalhi tayat nema wix lakgatiya.

² Jehová kalaksaknit makgapitsi latamanin xlakata x’amigos nalitaxtukgo. Akgtum li’akxilhtit, Abrahán x’amigo litaxtulh (Isaías 41:8; Santiago 2:23). Mapakgsina David na x’amigo litaxtulh. Lu tlan x’akxilha David (Hechos 13:22). Chu Jehová nachuna xʼakxilha Daniel la komo «tiku lanka xtapalh» (Daniel 9:23).

3. ¿Tuku xlakata Abrahán, David chu Daniel xʼamigos Jehová litaxtukgolh?

³ ¿Tuku xlakata Abrahán, David chu Daniel xʼamigos Jehová litaxtukgolh? Jehová wanilh Abrahán: «Wix kgalhakgaxpatnita kintachuwin» (Génesis 22:18). Jehová xʼamigo kalimaxtu tiku taktujukgo chu kgalhakgaxmatkgo. Asta tlan xʼamigo nalimaxtu akgtum kachikin. Jehová kawanilh israelitas: «Kakgalhakgaxpattit kintachuwin chu akit miDioskan naklitaxtu, chu wixin kinkachikin nawanatit» (Jeremías 7:23). Nachuna, komo wix xlikana xʼamigo Jehová wamputuna talakaskin nakgalhakgaxpata.

4, 5. ¿La kamakgtaya Jehová xʼamigos?

⁴ Kgalhiyaw chatum talatlawana chu xla ni lakaskin pi xʼamigos Jehová nalitaxtuyaw. Pero Jehová kinkamakgtayaputunan (kalikgalhtawakga Salmo 55:22). Biblia wan pi Jehová putsa la «nalimaklakaskin xlitliwakga xlakata nakalimakgtaya tiku xliputum xnaku skujnanikgo»  (2 Crónicas 16:9). Anta kSalmo 32:8, Jehová kamalaknuni xʼamigos pi nakamaxki liskgalala chu xalaktlan tastakyaw.

⁵ Xlakata xʼamigos akinin, xliputum kinakujkan skujnaniyaw chu ni makgxtakgaw maski titaxtuyaw tuku tuwa. Nachuna, akinin lipawanaw Jehová chuna la David. Xla lichuwinalh xlakata Jehová: «Xlakata xla wi kkimpakgastakat, nitu kintilakchikilh» (Salmo 16:8; 63:8). ¿Tuku tlawa Satanás xlakata ni xʼamigos Jehová nawanaw?

6. ¿Tuku kalimawaka Satanás latamanin?

⁶ Kcapítulo 11 katsiniw pi Satanás talalakatawakalh Jehová chu limawakalh pi kaj xaʼakgsanina. Nachuna, limawakalh pi ni xaʼakgstitum, xlakata ni xkamaxki talakaskin Adán chu Eva nalaksakkgo tuku tlan chu tuku nitlan. Xlibro Job kinkamasiyaniyan pi Satanás na kalimawaka taʼakgsanin latamanin tiku xʼamigos Jehová litaxtuputunkgo. Satanás wan pi latamanin skujnanikgo Dios kaj xlakata wi tuku kamaxki chu ni kaj xlakata paxkikgo. Nachuna wan pi xla tlan natlawa pi kaxatikawa nalakataki Dios. Kaʼakxilhwi tuku tlan nakatsiniyaw xlakata Job chu kaʼakxilhwi komo xla makgxtakgli Jehová o ni.

7, 8. 1) ¿Tuku xlakpuwan Jehová xlakata Job? 2) ¿Tuku limawakalh Satanás Job?

⁷ ¿Tiku xwanit Job? Chatum chixku tiku latamalh liwakaya 3,600 kata. Jehová lichuwinalh pi ama kilhtamaku ni xʼanan achatum tiku chuna la Job. Xla lu xmaxki kakni Jehová chu kxkajni tuku nitlan (Job 1:8). Jehová xaxlikana xʼamigo xliʼakxilha Job.

⁸ Satanás lichuwinalh pi Job kskujnani Dios kaj xlakata wi tuku xlakaskin. Satanás wanilh Jehová: «¿Nitu wilinita  wix tuku limakgtayaya kxlimakgstilili xchik chu putum tuku kgalhi xlakata nitu nalani? Sikulunatlawanita xtaskujut nema tlawanit, chu malhuwinita kkatiyatni xʼanimales. Pero kastonkgti mimakan chu kamakglhti putum tuku kgalhi chu naʼakxilhaw komo ni nalakawaniyan» (Job 1:10, 11).

9. ¿Tuku maxkilh talakaskin Jehová natlawa Satanás?

⁹ Satanás limawakalh Job pi kskujnani Jehová kaj xlakata tuku xmaxki. Wa pi xla tlan xtlawalh pi Job nialh kskujnanilh Jehová. Maski Jehová nichuna xlakpuwan la Satanás, maxkilh talakaskin pi naputsanani Job. Chuna xlitasiyalh komo kskujnani Jehová xlakata xpaxki.

10. ¿Tuku tlawanilh Satanás Job, chu tuku tlawalh Job?

¹⁰ Pulana, Satanás tlawalh pi nakgalhankan lhuwa xʼanimales chu makgapitsi nikgolh. Alistalh tlawalh pi xlakskujnin xkamakgnika. Job makglhtika putum tuku xkgalhi. Chu alistalh tlawalh pi kgalhkaw xkamanan Job xnikgolh akxni milh tliwakga un. Pero Job nikxni makgxtakgli Jehová. Biblia wan pi «Job ni lakgalhinalh» chu ni limawakalh Dios tuku nitlan (Job 1:12-19, 22).

11. 1) ¿Tuku tlawanipa Satanás Job? 2) ¿Tuku tlawalh Job?

¹¹ Satanás chuntiya tlawanilh tuku nitlan. Lakawanilh Dios akxni wanilh: «Kastonkgti mimakan chu katlawani tuku nitlan kxlukut chu kxtiyatliwa, chu naʼakxilhaw komo ni nalakawaniyan». Wa xlakata, Satanás tlawalh pi Job xchipalh akgtum xalixkajni tajatat (Job 2:5, 7). Pero Job chuntiya ni makgxtakgli Jehová. Lichuwinalh pi ni xʼama makgxtakga Dios asta maski xnilh (Job 27:5).

12. ¿La limasiyalh Job pi Satanás xaʼakgsanina?

¹² Job ni xkatsi tuku xlimawakama Satanás chu tuku xlakata lu xpatinama. Chu asta xlakpuwan pi wa Jehová  tiku xputsananima (Job 6:4; 16:11-14). Maski chuna, Job ni makgxtakgli Jehová. Xlikana pi Job xlimasiyanit pi ni kskujnani Dios kaj xlakata wi tuku xlakaskin. Xlikana xʼamigo xlitaxtu xlakata xpaxki. Liwana litasiyalh pi putum tuku wa Satanás kaj taʼakgsanin xwanit.

13. ¿Tuku kitaxtulh xlakata Job ni makgxtakgli Jehová?

¹³ Maski Job ni xkatsi tuku xlamacha kʼakgapun, ni makgxtakgli Jehová chu limasiyalh pi Satanás nitlan likatsi. Jehová sikulunatlawalh Job xlakata nikxni makgxtakgli (Job 42:12-17).

14, 15. ¿Tuku kalimawaka Satanás putum latamanin?

¹⁴ Pulaklhuwa tuku tlan nakatsiniyaw xlakata tuku titaxtulh Job. La uku, Satanás wan pi skujnaniyaw Jehová xlakata wi tuku lakaskinaw. Satanás wa: «Chixku namasta putum tuku kgalhi xlakata nalilakgmaxtu xlatamat» (Job 2:4). Wa xlakata Satanás kalimawaka putum latamanin pi skujnanikgo Dios kaj xlakata wi tuku lakaskinkgo, chuna la wa xlakata Job. Titaxtulh akglhuwa ciento kata lata xninita Job, Satanás chuntiyaku xlakatakima Jehová chu xlakskujnin. Katsiyaw pi chuna xlakata anta kProverbios 27:11 Jehová wa: «Xaskgalala kawanti, kinkgawasa, chu kamakgapaxuwa kinaku, xlakata tlan naktalakgalhti tiku kilakawanima».

¹⁵ Wix tlan nalaksaka komo naskujnaniya Jehová chu xʼamigo nalitaxtuya. Chuna nalimasiyaya pi Satanás xaʼakgsanina. Max natlawaya lhuwa talakgpalit kmilatamat, xlakata tlan xʼamigo Dios nawana, pero wa uma tuku tlakg tlan natlawaya kmilatamat. Uma lu xlakaskinka, xlakata Satanás wan pi wix namakgxtakga Dios akxni nakgalhiya taʼakglhuwit. Chu xla tlawa putum tuku matlani xlakata ni nakgalhakgaxpata Dios. ¿La tlawa?

16. 1) ¿Tuku maklakaskin Satanás xlakata latamanin nialh naskujnanikgo Jehová? 2) ¿Tuku max natlawaputun Satanás xlakata wix nialh naskujnaniya Dios?

 ¹⁶ Satanás pulaklhuwa tuku maklakaskin xlakata nialh xʼamigos Dios nawanaw. Lakgachunin, kinkatalatlawayan chuna la tantum «león nema putsama tiku tlan nawa» (1 Pedro 5:8). Wa xlakata ni kaks nalilakawana komo miʼamigos, mifamilia o amakgapitsi latamanin natlawaputunkgo pi wix nialh nalikgalhtawakgaya Biblia chu nialh natlawaya tuku tlan. Max namakgkatsiya pi Satanás talalakatawakaman (Juan 15:19, 20). * Chu lakgachunin Satanás «limasiya pi xatlan ángel litaxtu». Wa xlakata kinkaʼakgskgawiputunan xlakata ni nakgalhakgaxmataw Jehová (2 Corintios 11:14). Atanu tuku maklakaskin Satanás xlakata nialh naskujnaniyaw Jehová wa pi nakinkamalakpuwaniyan pi ni kinkalakgchanan nalakgtalakatsuwiyaw Jehová (Proverbios 24:10).

17. ¿Tuku xlakata kgalhakgaxmataw Jehová?

¹⁷ Akxni kgalhakgaxmataw Jehová limasiyayaw pi Satanás xaʼakgsanina. ¿Tuku nakinkamakgtayayan nakgalhakgaxmataw Jehová? Biblia lichuwinan: «Milipaxkit Jehová miDios xliputum minaku chu xliputum milatamat chu xliputum militliwakga» (Deuteronomio 6:5). Kgalhakgaxmataw Jehová xlakata paxkiyaw. Chuna la staktilha tapaxkit nema kgalhiniyaw, natlawaputunaw tuku xla nakinkaskiniyan. Apóstol Juan tsokgwililh: «Wa  uma kilhchanima pi paxkiyaw Dios: nakgalhakgaxmataw xlimapakgsin; chu xlimapakgsin ni akgtum takuka», uma wamputun pi ni tuwa makgantaxtikan (1 Juan 5:3).

18, 19. 1) Kalichuwinanti makgapitsi tuku Jehová xkajni. 2) ¿Tuku xlakata katsiyaw pi Jehová ni kinkaskiniyan tuku nila tlawayaw?

¹⁸ Jehová wan pi wi tuku nitlan. Natekgsa makgapitsi liʼakxilhtit anta krecuadro « Kaxkajni tuku Jehová xkajni». Max pulana wix nalakpuwana pi makgapitsi ni laklanka talakgalhin. Pero, akxni nalikgalhtawakgaya textos xalak Biblia chu nalilakpuwana, naʼakgatekgsa pi lu tlan kitaxtu komo nakgalhakgaxmataw xlimapakgsin Dios. Max na naʼakxilha pi talakaskin wi tuku nalakgpaliya kmilatamat. Max tuwa namakgkatsiya, pero komo chuna natlawaya, nakgalhiya takaksni chu tapaxuwan nema kgalhikgo xʼamigos Jehová tiku ni makgxtakgkgo (Isaías 48:17, 18). ¿Tuku likatsiyaw pi tlan nalakgpaliyaw kilatamatkan?

 ¹⁹ Jehová nikxni kinkaskiniyan tuku nila tlawayaw (Deuteronomio 30:11-14). Xla xaxlikana kiʼamigojkan chu xlikana kinkalakgapasan. Katsi tuku tayat kgalhiyaw chu tuku nitlan tayat kgalhiyaw (Salmo 103:14). Apóstol Pablo wa umakgolh tachuwin: «Dios ni makgxtakgnan, chu ni katimastalh talakaskin pi nala tuku nialhla natayaniyatit. Wata akxni natitaxtuyatit tuku tuwa xla natlawa pi wixin nalakgtaxtuniyatit chu nakamakgtayayan natayaniyatit» (1 Corintios 10:13). Tlan liwana nakatsiyaw pi Jehová nakinkamaxkiyan litliwakga xlakata natlawayaw tuku tlan. Chu xla namaxkiyan «litliwakga tuku latamanin nila kgalhikgo» xlakata tlan natayaniya taʼakglhuwit (2 Corintios 4:7). Akxni Pablo titaxtulh tuku tuwa kxlatamat, Jehová makgtayalh. Wa xlakata Pablo wa: «Putum tlan ktlawa xlakata Dios kimaxki litliwakga» (Filipenses 4:13).

20. ¿Tuku xtayat Jehová kilikgalhitkan, chu tuku xlakata?

²⁰ Komo xʼamigos Jehová wamputunaw, ni kajwatiya talakaskin namakgxtakgaw tuku xla kinkawaniyan pi nitlan. Wi tuku atanu talakaskin natlawayaw (Romanos 12:9). Xʼamigos Dios paxkikgo tuku xla paxki. Kgalhikgo tayat nema xla kgalhi, chu limasiyakgo la «paxkinankan, paxuwakan, kgalhikan takaksni, kgalhkgalhinankan, tlawakan tuku tlan, tlan likatsikan, kgalhikan takanajla, kgalhikan tsatata naku, machokgokan tuku tlawaputunkan» (Gálatas 5:22, 23). Xlakata nakatsiya la likatsikgo xʼamigos Dios, kalikgalhtawakga Salmo 15:1-5.

21. ¿Tuku namakgtayayan xlakata tlan nakgalhiya tayat nema Dios paxki?

²¹ ¿Tuku namakgtayayan xlakata tlan nakgalhiya umakgolh tayat? Nakatsiniya tuku paxki Jehová, akxni ankgalhin nalikgalhtawakgaya chu nalakputsananiya Biblia (Isaías 30:20, 21). Komo chuna natlawaya, tapaxkit nema kgalhiniya Jehová nastaktilha chu chuna nakgalhakgaxpata.

22. ¿Tuku nakitaxtu komo nakgalhakgaxmataw Jehová?

²² Tlawakan talakgpalit klatamat tlan natamalakxtumiyaw la komo nalakgpaliya xamakgan milhakgat chu nalhakgaya xasasti. Biblia wan pi nalakgmakganaw “xamakgan kintayatkan” chu nalilhakgananaw «xasasti tayat» (Colosenses 3:9, 10). Maski tuwa namakgkatsiyaw, Jehová kinkamalaknuniyan pi wi tuku nakinkamaxkiyan komo natlawayaw uma talakgpalit chu nakgalhakgaxmataw (Salmo 19:11). Kakgalhakgaxpatti Jehová xlakata paxkiya chu ni kaj xlakata wi tuku namaxkiyan. Komo chuna natlawaya, nalimasiyaya pi Satanás xaʼakgsanina chu xaxlikana xʼamigo Jehová nalitaxtuya.