1. ¿Tiku kinkamaxkin latamat?

JEHOVÁ «xastakna chu xaxlikana Dios» (1 Tesalonicenses 1:9). Xla kinkamalakatsukin chu kinkamaxkin latamat. Biblia wan xlakata Jehová: «Wix putum malakatsuki chu putum anan xlakata wix chuna lakaskinti» (Apocalipsis 4:11). Staknanaw xlakata Jehová chuna lakaskilh. Latamat akgtum lu tlan xtamaskiwin Dios (kalikgalhtawakga Salmo 36:9).

2. ¿Tuku talakaskin xlakata tlan nakinkakitaxtuniyan kkilatamatkan?

² Jehová kinkamaxkiyan putum tuku maklakaskinaw, la komo liwat chu chuchut (Hechos 17:28). Nachuna, xla lakaskin pi napaxuwayaw (Hechos 14:15-17). Talakaskin nakgalhakgaxmataw Dios xlakata tlan nakinkakitaxtuniyan kkilatamatkan (Isaías 48:17, 18).

3. ¿Tuku tlawalh Jehová akxni Caín makgnilh Abel?

³ Biblia kinkamasiyaniyan pi Jehová lanka xtapalh li’akxilha xlatamatkan latamanin. Kaʼakxilhwi xliʼakxilhtit Caín, xapuxku xkgawasakan Adán chu Eva. Caín lu sitsinilh xtala, tiku xwanikan Abel. Wa xlakata Jehová wanilh Caín pi xmachokgolh xtasitsi. Pero Caín ni kgalhakgaxmatnalh. Lu sitsilh chu asta «wilinilh xtala chu makgnilh» (Génesis 4:3-8). Jehová malakgaxokgelh Caín xlakata makgnilh Abel (Génesis 4:9-13). Uma kinkamasiyaniyan pi tasitsi o lu sitsikan, lu nitlan xlakata alistalh natlawa pi xaluku nawanaw. Tiku chuna likatsi ni katikgalhilh latamat nema ni kgalhi xlisputni (kalikgalhtawakga 1 Juan 3:15). Xlakata namakgapaxuwayaw Jehová talakaskin nakapaxkiyaw putum latamanin (1 Juan 3:11, 12).

4. ¿Tuku kinkamasiyaniyan pulaktum Limapakgsin nema maxkika Moisés xlakata la akxilha Dios latamat?

 ⁴ Akglhuwa mil kata alistalh, Jehová maxkilh Moisés Pulakkaw Limapakgsin. Pulaktum limapakgsin xwan: «Ni timakgninana» (Deuteronomio 5:17). Tiku xmakgni achatum lataman xtalakaskin pi na xmakgnika. Uma kinkamasiyaniyan pi Jehová lanka xtapalh liʼakxilha latamat.

5. ¿Tuku lakpuwan Dios xlakata makgankan skgata nema nina lakachin?

⁵ ¿Tuku lakpuwan Dios xlakata makgankan skgata nema nina lakachin? Asta xlatamat skgata nema nina lakachin, Jehová lanka xtapalh akxilha. Limapakgsin nema Jehová kamaxkilh israelitas, wan pi komo wi tiku natokglha chatum puskat tiku nakgalhi kskgata chu naniy kskgata, tiku chuna xtlawalh xtalakaskin namakgnikan (kalikgalhtawakga Éxodo 21:22, 23; Salmo 127:3). Uma kinkamasiyaniyan pi Jehová nitlan akxilha tiku makgan kskgata nema nina lakachin. (Kaʼakxilhti nota 28, niku wan «Makgankan skgata»).

6, 7. ¿La tlan nalimasiyaniyaw Jehová pi lanka xtapalh liʼakxilhaw latamat?

⁶ ¿La tlan nalimasiyaniyaw Jehová pi lanka xtapalh liʼakxilhaw latamat? Nitu natlawayaw tuku katuwa nawili kilatamatkan chu xlatamatkan amakgapitsin. Wa xlakata ni xkuliyaw, ni limaklakaskinaw drogas chu ni wayaw lhuwa kuchu, xlakata uma tlawani tuku nitlan kimaknikan chu asta max nakinkamakgniyan.

⁷ Xlakata Dios kinkamaxkin kilatamatkan chu kimaknikan, talakaskin nalimaklakaskinaw chuna la xla lakaskin. Wa xlakata talakaskin nakuentajtlawayaw kimaknikan. Komo nichuna natlawayaw, Dios xaxkajwani nakinkaliʼakxilhan (Romanos 6:19; 12:1; 2 Corintios 7:1). Nila nakakninaniyaw Dios komo ni maxkiyaw kakni latamat, akgtum tamaskiwin nema xla kinkamaxkinitan. Max tuwa namakgkatsiyaw namakgxtakgaw akgtum nixatlan  talismanin nema kgalhiyaw. Pero komo lanka xtapalh liʼakxilhaw latamat chu naliskujaw namakgxtakgaw umakgolh talismanin, Jehová nakinkamakgtayayan.

8. ¿Tuku natlawayaw xlakata ni katuwa natawila kilatamatkan chu xlatamatkan amakgapitsin?

⁸ Akxilhnitaw pi latamat akgtum lanka tamaskiwin. Jehová lakaskin pi nitu natlawayaw tuku katuwa nawili kilatamatkan chu xlatamatkan amakgapitsin. Wa xlakata lakatsuku matlawaniyaw kimputlawkan, moto o atanu. Nachuna ni kgamananaw ktakgaman nema katuwa nawili kilatamatkan (Salmo 11:5). Nachuna kuentajtlawayaw pi kinchikkan ni katuwa nawili kilatamatkan. Jehová kawanilh israelitas: «Komo natlawaya minchik, militlawat aktsu patsaps kxakgstin minchik, xlakata minchik ni nalitawila kgalhni komo wi tiku xmokgosli» (Deuteronomio 22:8).

9. ¿La nakalikatsiniyaw animales?

⁹ Jehová nachuna xlakaskinka liʼakxilha la kalikatsiniyaw animales. Xla kinkamaxkiyan talakaskin nakamakgniyaw xlakata nawayaw xaliwa chu namaklakaskinaw kxuwakan. Nachuna kinkamaxkiyan talakaskin nakamakgniyaw komo katuwa wili kilatamatkan (Génesis 3:21; 9:3; Éxodo 21:28). Pero ni lixkajni nakalikatsiniyaw animales chu ni nakamakgniyaw o natlawayaw pi nalamakgnikgo kaj xlakata nakalilakgastananaw (Proverbios 12:10).

10. ¿Tuku likatsiyaw pi kgalhni wa latamat?

¹⁰ Jehová lanka xtapalh liʼakxilha kgalhni xlakata wa latamat litaxtu. Wa xlakata, Jehová malakgaxokgelh Caín xlakata makgnilh Abel (Génesis 4:10). Akxni titaxtulh Munkaklat, Jehová amakgtum lichuwinampa pi kgalhni wa latamat. Jehová kamaxkilh talakaskin Noé chu xfamilia pi tlan xwakgolh animales. Kawanilh: «Tlan nawayatit putum animales nema staknankgo. Chuna la putum tuwan  kkamaxkinitan, nachuna putum animales kkamaxkiyan». Pero Jehová nachuna kawanilh: «Ni miliwatkan liwa nema kgalhijku xkgalhni» (Génesis 1:29; 9:3, 4).

11. ¿Tuku limapakgsin kamaxkilh Jehová xkachikin xlakata kgalhni?

¹¹ Titaxtulh 800 kata lata Noé wanika pi ni xwalh kgalhni, Jehová kawanilh xkachikin: «Komo chatum israelita o tiku xalak alakatanu kachikin, tiku akxtum katawilan, talatnama chu chipa tantum xaluku animal o tuku kgosa chu tlan wakan, namakgani xkgalhni chu naliʼakgtapu tiyat». Chu alistalh wampa: «Ni miliwatkan xkgalhni» (Levítico 17:13, 14). Jehová chuntiya xlakaskin pi xkachikin lanka xtapalh xliʼakxilhli kgalhni. Tlan xwakgolh liwa pero xkgalhni ni xliwatkan xwanit. Akxni xmakgnikgo tantum animal xlakata nawakgo, xtalakaskin xmakganikgolh xkgalhni ktiyat.

12. ¿La akxilhkgo kgalhni kstalaninanin Cristo?

¹² Akxni xninita Jesús, apóstoles chu lakgkgolotsin xalak Jerusalén tamakxtumikgolh xlakata nalichuwinankgo tuku limapakgsin nema xkamaxkikanit israelitas chuntiya xtalakaskin nakgalhakgaxmatkgo (kalikgalhtawakga Hechos 15:28, 29; 21:25). Jehová kamakgtayalh naʼakgatekgskgo pi kgalhni chuntiya lanka xtapalh xʼakxilha chu pi kstalaninanin Cristo nachuna xliʼakxilhatkan. Xapulana kstalaninanin Cristo ni xliwatkan xwanit kgalhni chu ni xlikgotnankgolh. Nachuna ni xliwatkan xwanit liwa nema ni liwana xtamakganinit xkgalhni. Komo xwakgolh, xlitaxtulh xtachuna la komo xkakninanikgolh tamakanitlaw o xtlawakgolh talakgxtumit xalimaxana. Wa xlakata, la uku tiku xaxlikana kstalaninanin Cristo ni wakgo kgalhni chu ni likgotnankgo. Jehová chuntiya lakaskin pi lanka xtapalh naliʼakxilhaw kgalhni.

13. ¿Tuku xlakata kstalaninanin Cristo ni mastakgo talakaskin nakawilinikan kgalhni?

¹³ ¿Wamputun uma pi kstalaninanin Cristo ni mastakgo  talakaskin nakawilinikan kgalhni? Chuna. Jehová kinkawaniyan pi ni nawayaw chu ni nalikgotnanaw kgalhni. Kalilakpuwanti uma, komo chatum makuchina nawaniyan pi ni nawaya kuchu, ¿tlan xwa komo nalilhtukukana? Nichuna. Nachuna, xlimapakgsin Dios xlakata ni nawayaw chu ni nalikgotnanaw kgalhni na kilhchanima pi ni nakinkawilinikanan kgalhni. (Kaʼakxilhti nota 29, niku wan «Nawilinikana kgalhni»).

14, 15. Maski akinin kstalaninanin Cristo maxkiyaw kakni latamat, ¿tuku xlakata ni lakatsalayaw xlimapakgsin Dios xlakata nalakgmaxtuputunaw kilatamatkan?

¹⁴ ¿Chu komo chatum makuchina nakinkawaniyan pi naniyaw komo ni nakinkawilinikanan kgalhni? Kinchatunukan kililaksakatkan komo nakgalhakgaxmataw xlimapakgsin Dios xlakata kgalhni. Kstalaninanin Cristo akgtum lanka tamaskiwin liʼakxilhaw latamat chu maxkiyaw kakni. Wa xlakata putsayaw atanu likuchun nema nakinkamakgtayayan xlakata ni naniyaw. Pero ni mastayaw talakaskin nakinkawilinikanan kgalhni.

¹⁵ Lu kuenta tlawayaw xlakata ni natatatlayaw, pero xlakata Dios lanka xtapalh liʼakxilha latamat, ni mastayaw talakaskin nakinkawilinikanan kgalhni. Tlakg xlakaskinka nakgalhakgaxmataw Jehová nixawa nalakatsalayaw xlimapakgsin xlakata nalakgmaxtuputunaw kilatamatkan. Jesús lichuwinalh: «Tiku nalakgmaxtuputun xlatamat, namakgatsankga, pero putum tiku namakgatsankga xlatamat kaj kimpalakata nakgalhipara» (Mateo 16:25). Kgalhakgaxmatputunaw Jehová xlakata paxkiyaw. Xla katsi tuku tlan kimpalakatakan chu akinin lanka xtapalh liʼakxilhaw latamat chuna la Jehová (Hebreos 11:6).

16. ¿Tuku xlakata kstalaninanin Cristo kgalhakgaxmatkgo Dios?

¹⁶ Xaxlikana kstalaninanin Cristo liwana lakpuwankgonit pi nakgalhakgaxmatkgo xlimapakgsin Dios xlakata kgalhni. Wa xlakata ni wakgo, ni likgotnankgo chu  ni mastakgo talakaskin nakawilinikan kgalhni. * Pero tlan makglhtinankgo atanu likuchun. Dios malakatsukilh latamat chu kgalhni, chu liwana katsikgo pi xla katsi tuku tlakg tlan kimpalakatakan. Chu wix, ¿nachuna lakpuwana?

17. ¿Tuku kajwatiya Jehová xmasta talakaskin nalimaklakaskinkan kgalhni?

¹⁷ Anta kxlimapakgsin Moisés, Jehová kawanilh israelitas: «Xlatamat tiyatliwa wi kkgalhni, chu akit kwilinit kpumakamastan xlakata nalilakgmaxtukan milatamatkan, xlakata kgalhni wa tuku tlan lilakgmaxtunankan», kilhchanima pi tlan kinkatapatikanan kintalakgalhinkan (Levítico 17:11). Akxni israelitas xmakglakgalhinankgo, tlan xkatapatikan xtalakgalhinkan komo xlinkgo tantum animal anta ktemplo xlakata sacerdote xmakamastalh chu xlikatlawalh xkgalhni kpumakamastan. Kajwatiya chuna Jehová xmasta talakaskin nalimaklakaskinkan kgalhni.

18. ¿La kinkamakgtayayan xtamakamastan Jesús?

¹⁸ Akxni Jesús milh kKatiyatni, mastalh xlatamat o xkgalhni xlakata nakinkatapatikanan kintalakgalhinkan. Chuna nialh talakaskilh namakamastakan animales. Chu nialh talakaskilh namakgantaxtikan uma Limapakgsin (Mateo 20:28; Hebreos 10:1). Xlatamat Jesús lu lanka xtapalh xwanit. Xlakata xtamakamastan, Jehová kinkamaxkin talakaskin tlan nalatamayaw putum kilhtamaku (Juan 3:16; Hebreos 9:11, 12; 1 Pedro 1:18, 19).

19. ¿Tuku talakaskin natlawayaw xlakata ni nalinaw «kuenta komo naniy chatum lataman»?

 ¹⁹ Lu paxtikatsiniyaw Jehová pi kinkamaskiwinitan latamat. Wa xlakata kawaniputunaw latamanin pi komo nakanajlanikgo Jesús tlan nalatamakgo putum kilhtamaku. Xlakata kapaxkiyaw latamanin, tlawayaw putum tuku matlaniyaw xlakata nakamasiyaniyaw tuku xlitlawatkan xlakata tlan nakgalhikgo latamat nema ni kgalhi xlisputni (Ezequiel 3:17-21). Chuna tlan nawanaw tuku wa Pablo: «Ni klitawaka kuenta komo naniy chatum lataman, xlakata ni klakpuwa para ni nakkawaniyan putum xtastakyaw Dios» (Hechos 20:26, 27). Akxni lichuwinanaw xlakata Jehová chu la xlilakaskinka akxilha latamat, limasiyayaw pi maxkiyaw kakni latamat chu kgalhni.