1, 2. 1) ¿Tuku xlakata lakpuwana wix pi oración akgtum lu xatlan tamaskiwin? 2) ¿Tuku xlakata xlakaskinka nakatsiyaw tuku masiya Biblia xlakata oración?

KATIYATNI lu aktsu nixawa lanka akgapun. Jehová kaʼakxilha latamanin xtachuna la akgtum slankgat o stajat (Salmo 115:15; Isaías 40:15). Maski akinin lu laktsu nixawa lanka akgapun, Biblia wan: «Jehová lakatsu katawi putum tiku kilhanimakgo, putum tiku xlikana putsakgo. Kamaxki tuku lakaskinkgo tiku pekuanikgo, kgaxmata akxni tasaskinikgo tamakgtay, chu kalakgmaxtu» (Salmo 145:18, 19). Kgalhiyaw lu lanka talakgalhaman. Jehová wa Malakatsukina tiku kgalhi xliputum litliwakga chu kiʼamigojkan litaxtuputun, chu kgaxmatputun kioracioneskan. Oración wa akgtum lu tlan tamaskiwin nema Jehová kinkamaxkinitan chatunu chatunu akinin.

² Jehová nakinkakgaxmatniyan komo natlawaniyaw oración chuna la xla lakaskin. ¿La natlawayaw? Kaʼakxilhwi tuku masiya Biblia xlakata oración.

3. ¿Tuku xlakata xlakaskinka natlawaniya oración Jehová?

³ Jehová lakaskin pi wix natlawaniya oración, pi katachuwinanti. ¿Tuku likatsiyaw? Kalilakpuwanti tuku kinkawaniyan Dios anta kFilipenses 4:6, 7 (kalikgalhtawakga). Dios tiku xMalakatsukina kakilhtamaku lu lilakgaputsayan, chu lakaskin pi nawaniya mintaʼakglhuwit chu tuku makgkatsiya.

4. Komo ankgalhin natlawayaw oración, ¿tuku nakitaxtu, chu tuku xlakata?

⁴ Oración tlawa pi tlan natalalinaw Jehová. Akxni chatiy  tiku amigos litaxtukgo nalalitachuwinankgo tuku lakpuwankgo, tuku makgkatsikgo chu tuku lilakgaputsakgo, tlakg tlan nalatalalinkgo. Nachuna, Jehová waninitan kBiblia tuku lakpuwan, tuku makgkatsi chu tuku natlawa kkilhtamaku nema aku mima. Akxni wix tlawaya oración na tlan nawaniya tuku makgkatsiya. Komo ankgalhin natlawaya oración tlakg natatliwakglha la talalipina (Santiago 4:8).

5. ¿Tuku likatsiyaw pi Jehová ni kgaxmata putum oraciones?

⁵ ¿Kgaxmata Jehová putum oraciones? Ni. Akxni xlama palakachuwina Isaías, Jehová kawanilh israelitas: «Maski lhuwa oraciones tlawayatit ni kkgaxmata; mimakankan litatsamanit kgalhni» (Isaías 1:15). Komo ni kuenta natlawayaw, max wi tuku natlawayaw nema nalaktlawa la talalinaw Jehová. Komo chuna xtlawaw, xla nialh katikgaxmatli kioracioneskan.

6. 1) ¿Tuku xlakata lu xlakaskinka nakgalhiyaw takanajla? 2) ¿La nalimasiyayaw pi kgalhiyaw takanajla?

 ⁶ Komo lakaskinaw pi Jehová nakgaxmata kioracioneskan, talakaskin nakgalhiniyaw takanajla (Marcos 11:24). Apóstol Pablo lichuwinan: «Komo wi tiku ni kgalhi takanajla nila makgapaxuwa Dios, xlakata putum tiku lakgtalakatsuwini Dios xlakata nakakninani, xlikanajlat pi lama chu xlikanajlat pi nakasikulunatlawa tiku xatapaxuwan tlawaputunkgo xtalakaskin» (Hebreos 11:6). Pero ni kajwatiya talakaskin nawanaw pi kgalhiyaw takanajla. Talakaskin nalimasiyayaw akxni ankgalhin nakgalhakgaxmataw Jehová (kalikgalhtawakga Santiago 2:26).

7. 1) ¿Tuku xlakata talakaskin nataktujuyaw chu namaxkiyaw kakni Jehová akxni natlawaniyaw oración? 2) ¿La nalimasiyayaw pi xlikana tuku wanaw akxni tlawayaw oración?

⁷ Akxni natlawaniyaw oración Jehová, talakaskin nataktujuyaw chu namaxkiyaw kakni. ¿Tuku xlakata? Komo xtachuwinaw chatum mapakgsina o chatum presidente, xlimasiyaniw kakni. Xlakata Jehová tiku kgalhi putum litliwakga, talakaskin pi tlakg nalimasiyaniyaw kakni chu nataktujuyaw akxni natachuwinanaw (Génesis 17:1; Salmo 138:6). Nachuna nawaniyaw tuku xlikana makgkatsiyaw, tuku wi kkinakujkan, chu ni ankgalhin watiya tachuwin nawaniyaw (Mateo 6:7, 8).

8. ¿Tuku talakaskin natlawayaw akxni wi tuku skiniyaw Jehová?

⁸ Nachuna, akxni wi tuku skiniyaw Jehová, talakaskin naliskujaw xlakata natlawayaw tuku skiniw kʼoración. Akgtum li’akxilhtit, max naskiniyaw pi kakinkamakgtayan natekgsaw tuku namaklakaskinaw chali chali. Pero ni talakaskin pi nalhkititnanaw chu nakgalhkgalhiyaw pi Jehová putum nakinkamaxkiyan. Komo tlan skujaw xlakata natekgsaw tuku maklakaskinaw, kaskujwi chu kamakglhtinaw putum taskujut nema tlan tlawayaw (Mateo 6:11; 2 Tesalonicenses 3:10). Nachuna, komo natlawaniyaw oración  Jehová xlakata nakinkamakgtayayan namakgxtakgaw tuku nitlan tlawamaw, talakaskin nalakgmakganaw putum tuku nakinkamatlawiputunan tuku nitlan (Colosenses 3:5). Kalichuwinaw makgapitsi takgalhskinin nema tlawakgo latamanin xlakata oración.

9. 1) ¿Tiku natlawaniyaw oración? 2) ¿Tuku kinkamasiyaniyan Juan 14:6 xlakata oración?

⁹ ¿Tiku natlawaniyaw oración? Jesús kamasiyanilh kstalaninanin la xlitlawatkan oración: «KinTlatkan tiku wilapi kʼakgapun» (Mateo 6:9). Wa xlakata kajwatiya Jehová natlawaniyaw oración. Jesús nachuna lichuwinalh: «Akit tiji chu xaxlikana chu latamat. Kaj kimpalakata tlan lakgankan xaTlat» (Juan 14:6). Uma kinkamasiyaniyan pi natlawayaw oración kxtukuwani Jesús. ¿Tuku kilhchanima uma? Komo lakaskinaw pi Jehová nakgaxmata kioracioneskan, talakaskin nalimasiyayaw kakni xlakata tuku lakgayawalh xKgawasa. Chuna la katsiniw, Jesús milh kKatiyatni xlakata nakinkalakgmaxtuyan ktalakgalhin chu klinin (Juan 3:16; Romanos 5:12). Nachuna, Jehová limapakuwinit la xaPuxku Sacerdote chu Juez (Juan 5:22; Hebreos 6:20).

10. ¿Xlakaskinka natatsokgostayaw akxni natlawayaw oración? Kalichuwinanti.

¹⁰ ¿Xlakaskinka natatsokgostayaw akxni natlawayaw oración? Ni. Jehová ni wan komo natatsokgostayaw, natawilayaw o natayayaw akxni natlawaniyaw oración. Biblia kinkamasiyaniyan pi tlan natlawayaw oración chuna la akinin matlaniyaw, pero ankgalhin nalimasiyaniyaw kakni (1 Crónicas 17:16; Nehemías 8:6; Daniel 6:10; Marcos 11:25). Tuku xlakaskinka akxilha Jehová wa pi xliputum kinakujkan natachuwinanaw, chu ni wa komo tatsokgostayaw, tawilayaw o tayayaw. Tlan pixlanka nachuwinanaw o maski ni natakgaxmata akxni natlawayaw oración niku wilaw,  kakuwani o katsisni. Akxni tlawayaw oración, liwana kakatsiw pi Jehová nakinkakgaxmatniyan maski amakgapitsin ni katikgaxmatkgolh (Nehemías 2:1-6).

11. ¿Tuku tlan nawanaw kkioracioneskan?

¹¹ ¿Tuku tlan nawanaw kkioracioneskan? Tlan nawaniyaw tuku akinin lakaskinaw, pero wa tuku Jehová tlan akxilha. Biblia wan: «Tlan naskiniyaw kaxatukawa, pero chuna la xtalakaskin chu xla kinkakgaxmatniyan» (1 Juan 5:14). ¿Tlan nawaniyaw tuku makgkatsiyaw? Chuna. Natachuwinanaw Jehová chuna la tachuwinanaw chatum amigo. Tlan nawaniyaw putum tuku lakpuwanaw chu tuku makgkatsiyaw (Salmo 62:8). Na tlan naskiniyaw xʼespíritu santo xlakata nakinkamakgtayayan natlawayaw tuku xatlan (Lucas 11:13). Nachuna tlan naskiniyaw kakinkamaxkin liskgalala xlakata tlan tuku nalaksakaw chu litliwakga xlakata tlan natayaniyaw taʼakglhuwit (Santiago 1:5). Talakaskin natasaskiniyaw Jehová pi kakinkatapatin kintalakgalhinkan (Efesios 1:3, 7). Nachuna talakaskin nakapalakaskinaw amakgapitsin latamanin, la komo tiku xalak kifamiliajkan chu natalan xalak congregación (Hechos 12:5; Colosenses 4:12).

12. ¿Tuku tlakg xlakaskinka xliwanat kkioracioneskan?

¹² ¿Tuku tlakg xlakaskinka xliwanat kkioracioneskan? Jehová chu xtalakaskin. Talakaskin napaxtikatsiniyaw Jehová xliputum kinakujkan xlakata putum tuku xla tlawanit kimpalakatakan (1 Crónicas 29:10-13). Akxni Jesús kamasiyanilh kstalaninanin la natlawakgo oración, masiyalh tuku tlakg xlakaskinka xliwanat kkioracioneskan (kalikgalhtawakga Mateo 6:9-13). Xla lichuwinalh pi tuku pulana naskinaw wa pi natamasantujli xtukuwani Jehová, uma kilhchanima pi xaskulunku naliʼakxilhkan. Alistalh, Jesús masiyalh pi talakaskin naskinaw kamilh xTamapakgsin Dios chu kalalh xtalakaskin unu kKatiyatni. Chu alistalh, akxni skinitawa nawan putum umakgolh tlan nawanaw tuku akinin lakaskinaw. Akxni wa pulana nawiliyaw  Jehová chu xtalakaskin kkioracioneskan, limasiyayaw pi wa tlakg xlakaskinka akxilhaw.

13. ¿La xlimakgapalat kioracioneskan?

¹³ ¿La xlimakgapalat kioracioneskan? Biblia ni lichuwinan. Kioracioneskan tlan namakgapala komo akinin chuna lakaskinaw. Akgtum liʼakxilhtit, akxni amaw wayanaw max ni lu katimakgapalaw natlawayaw oración, pero max namakgapalayaw akxni nawaniyaw Jehová kintaʼakglhuwitkan o akxni wi tuku nalipaxtikatsiniyaw (1 Samuel 1: 12, 15). Kioracioneskan ni xlimakgapalat kaj xlakata kaks nakamalakawaniyaw amakgapitsin, chuna la xtlawakgo makgapitsi latamanin kxkilhtamaku Jesús (Lucas 20:46, 47). Jehová ni kaks malakawani tiku chuna tlawakgo. Xla lakaskin pi xliputum kinakujkan natlawaniyaw oración.

14. 1) ¿La xlimakglhuwa kilitlawatkan oración? 2) ¿Tuku kinkamasiyaniyan uma xpalakata Jehová?

¹⁴ ¿La xlimakglhuwa kilitlawatkan oración? Jehová kinkawaniyan pi ankgalhin natachuwinanaw. Biblia wan: «Katlawatit mioracionkan», «chuntiya katlawatit oración» chu «ankgalhin katlawatit oración» (Mateo 26:41; 1 Tesalonicenses 5:17; Romanos 12:12). Jehová ankgalhin kinkakgaxmatniyan. Chali chali tlan napaxtikatsiniyaw la kinkalimasiyaniyan xtapaxkit chu xtalakgalhaman. Nachuna tlan naskiniyaw pi kakinkapulalin chu kakinkamaxkin litliwakga  chu kakinkamakgoxamixin. Komo lanka xtapalh liʼakxilhaw oración ankgalhin natachuwinanaw Jehová.

15. ¿Tuku xlakata nawanaw «amén» akxni masputuyaw akgtum oración?

¹⁵ ¿Tuku xlakata nawanaw «amén» akxni masputuyaw akgtum oración? Tachuwin amén kilhchanima «chuna kalalh». Akxni chuna wanaw, limasiyayaw pi xlikana chuna lakpuwanaw tuku lichuwinaw kʼoración (Salmo 41:13). Nachuna, Biblia kinkamasiyaniyan pi akxni masputukan akgtum oración niku lhuwa wilaka tlan pixlanka nawanaw «chuna kalalh» o maski ni natakgaxmata. Komo chuna nawanaw, nalimasiyayaw pi nachuna lakpuwanaw tuku wanka kʼoración (1 Crónicas 16:36; 1 Corintios 14:16).

16. ¿Tuku likatsiyaw pi Dios kgaxmata kioracioneskan?

¹⁶ ¿Xlikana kgalhti Dios kioracioneskan? Chuna. Biblia lichuwinan pi Dios «kgaxmata oraciones» chu pi nakinkakgalhtiyan (Salmo 65:2; Isaías 30:19). Jehová kgaxmata xʼoracioneskan tiku xliputum xnakujkan tlawanikgo chu pulaklhuwa la kakgalhti.

17. ¿La kamaklakaskin Jehová xʼángeles chu latamanin tiku skujnikgo xlakata nakinkakgalhtiyan kioracioneskan?

¹⁷ Jehová kamaklakaskin xʼángeles chu latamanin tiku skujnikgo xlakata nakinkakgalhtiyan kioracioneskan (Hebreos 1:13, 14). Lhuwa latamanin tlawakgonit oración xlakata naʼakgatekgskgo Biblia, alistalh xtatayananin Jehová kalakgapaxialhnankgo. Uma limasiya pi ángeles pulalimakgo taskujut xlakata natalichuwinan «xatlan tamakatsinin» xlikalanka Katiyatni (kalikgalhtawakga Apocalipsis 14:6). Nachuna, lhuwa akinin tlawaninitaw oración Jehová xlakata xkgalhiyaw akgtum taʼakglhuwit o wi tuku xmaklakaskimaw, chu max chatum tala xalak congregación kinkamakgtayan (Proverbios 12:25; Santiago 2:16).

18. ¿La maklakaskin Jehová xʼespíritu santo chu Biblia xlakata nakgalhti kioracioneskan?

 ¹⁸ Jehová na maklakaskin xʼespíritu santo xlakata nakinkakgalhtiyan kioracioneskan. Akxni skiniyaw xtamakgtay xlakata natayaniyaw akgtum taʼakglhuwit, max nalimaklakaskin xʼespíritu santo xlakata nakinkapulalinan chu nakinkamatliwakglhan (2 Corintios 4:7). Nachuna, Jehová maklakaskin Biblia xlakata nakinkakgalhtiyan chu nakinkamakgtayayan nalaksakaw tuku tlan. Max akxni nalikgalhtawakgayaw natekgsaw makgapitsi textos nema nakinkamakgtayayan. Jehová na tlan natlawa pi wi tiku namasta akgtum takgalhtin anta ktamakxtumit nema nakinkamakgtayayan. Chu na tlan namaklakaskin chatum kgolotsin xlakata nakinkamasiyaniyan akgtum texto xalak Biblia (Gálatas 6:1).

19. Komo lakgachunin lakpuwana pi Jehová ni lakapala kgalhti mioración, ¿tuku xlakata max chuna la?

¹⁹ Komo lakgachunin lakpuwana pi Jehová ni lakapala kgalhti mioración, kalakapastakti pi xla katsi tuku kilhtamaku chu la nakgalhti mioración. Jehová liwana katsi tuku maklakaskinaw. Pero max natalakaskin pi chuntiya naskinaw xlakata nalimasiyayaw pi xlakaskinka akxilhaw tuku skimaw chu pi kanajlaniyaw (Lucas 11:5-10). Lakgachunin Jehová kinkakgalhtiyan chuna la nikxni xlakpuwanitaw. Akgtum liʼakxilhtit, max tlawaniyaw oración xlakata kgalhiyaw akgtum lanka taʼakglhuwit, pero max Jehová ni mapanu kintaʼakglhuwitkan, wata kinkamaxkiyan litliwakga xlakata natayaniyaw (kalikgalhtawakga Filipenses 4:13).

20. ¿Tuku xlakata ankgalhin natlawayaw oración?

²⁰ Xlikana pi oración akgtum lu xatlan tamaskiwin nema Jehová kinkamaxkinitan. Tlan liwana nakatsiyaw pi xla kinkakgaxmatniyan (Salmo 145:18). Chu komo xliputum kinakujkan natlawaniyaw oración, tlakg natatliwakglha la talalinaw.