1. ¿Tiku tlan nakinkawaniyan la nakakninaniyaw Dios?

LHUWA latamanin wankgo pi masiyakgo tuku xaxlikana xlakata Dios. Pero nixlikana, xlakata tanu tanu tuku masiyakgo xlakata Dios chu la kilikakninanitkan. Wa xlakata, ¿la nakatsiyaw la nakakninaniyaw Dios? Kajwatiya Jehová tiku tlan nakinkawaniyan la lakaskin nakakninaniyaw.

2. ¿Tuku namakgtayayan liwana nakatsiya la nakakninaniya Dios?

² Jehová kinkamaxkinitan Biblia xlakata nakatsiyaw la xla lakaskin nakakninaniyaw. Wa xlakata kalikgalhtawakgaw Biblia chu Jehová nakinkamakgtayayan naʼakgatekgsaw tuku xaxlikana masiya xTachuwin xlakata xla lu kinkalilakgaputsayan (Isaías 48:17).

3. ¿Tuku lakaskin Dios katlawaw?

³ Lhuwa latamanin wankgo pi Dios makgamakglhtinan putum takanajla, pero Jesús nichuna masiyalh. Xla wa: «Ni putum tiku kiwani “Malana, Malana”, natanu kTamapakgsin xalak akgapun, wata kajwatiya tiku tlawa xtalakaskin kinTlat». Wa xlakata talakaskin pulana nakatsiyaw tuku xtalakaskin Dios chu alistalh nalilatamayaw. Uma ni kaj takgaman, xlakata Jesús lichuwinalh pi tiku ni kgalhakgaxmatkgo Dios litaxtukgo la «xtlawananin tuku nitlan» (Mateo 7:21-23).

4. ¿Tuku lichuwinalh Jesús xlakata xtalakaskin Dios?

⁴ Jesús lichuwinalh pi lakgachunin tuwa xmakgkatsiw natlawayaw xtalakaskin Dios. Tamalakxtumilh xlatamat chatum kstalanina Cristo xtachuna la xatitsu tiji niku ni lhuwa latamanin ankgo. Xla wa: «Kalaktanutit kxatitsu malakcha, xlakata xapakglanka malakcha chu xatilanka tiji wa nema linan kpulakgsputni, chu lhuwa tiku anta laktanukgo;  pero xatitsu malakcha chu xatitsu tiji wa nema linan klatamat, chu ni chalhuwa tiku tekgskgo» (Mateo 7:13, 14). Tiji xatitsu wa kilhchanima la lakaskin Dios nakakninaniyaw. Chu tiji xatilanka kilhchanima niku masiyakan tuku nixaxlikana chu nichuna kakninanikan la Dios lakaskin. Pero Jehová ni lakaskin pi wi tiku nalakgsputa, wa xlakata kamaxki talakaskin latamanin tlakg nalakgapaskgo (2 Pedro 3:9).

5. ¿La nakalakgapasaw tiku kakninanikgo Dios chuna la xla lakaskin?

⁵ Jesús lichuwinalh pi tlan nakalakgapasaw tiku kakninanikgo Dios chuna la xla lakaskin. Xlakata tlan nakatsiyaw tiku xaxlikana xlakskujnin Dios xlakaskinka nalakgapasaw tuku kanajlakgo chu tuku tlawakgo. Jesús lichuwinalh: «Tuku tlawakgo nakalilakgapasatit». Chu lichuwinampa: «Putum xatlan kiwi masta xatlan tawakat» (Mateo 7:16, 17). Uma ni wamputun pi tiku xaxlikana xlakskujnin Dios ni kgalhikgo talakgalhin. Pero liskujkgo xlakata natlawakgo tuku tlan. Kaʼakxilhwi tuku nakinkamakgtayayan nakalakgapasaw tiku xaxlikana xlakskujnin Dios.

6, 7. 1) ¿Tuku xlakata xaxlikana xlakskujnin Dios anta kBiblia kilhtiyakgo tuku masiyakgo? 2) ¿Tuku kinkamasiyaniyan xliʼakxilhtit Jesús?

⁶ Tiku kakninanikgo Dios chuna la xla lakaskin anta kBiblia kilhtiyakgo tuku masiyakgo. Biblia wan: «Dios masta putum tuku tatsokgnit kxaSanto Tatsokgni. Makgtayanan xlakata nakamasiyanikan latamanin, xlakata nakinkawaniyan tuku nitlan tlawamaw, xlakata putum lakatitum nawilikan chu xlakata nakinkamasiyaniyan natlawayaw tuku xaʼakgstitum, xlakata kskujni Dios liwana nakatsini chuna la natlawa akgtum taskujut, liwana takaxnit nawan xlakata natlawa putum xatlan taskujut» (2 Timoteo 3:16, 17). Apóstol Pablo katsokgnanilh xaxlikana kstalaninanin  Cristo: «Akxni wixin makglhtinantit xtachuwin Dios, nema kkalitachuwinan, makgamakglhtinantit ni kaj la xtachuwin lakchixkuwin, wata chuna la xtachuwin Dios» (1 Tesalonicenses 2:13). Takaknin nema Dios makgamakglhtinan anta takilhtiyanit kBiblia xlakata wa xTachuwin Dios. Chu ni wa tuku lakpuwankgo latamanin o talismanin nema kgalhikgo.

⁷ Putum tuku xmasiya Jesús anta xkilhtiya kxTachuwin Dios (kalikgalhtawakga Juan 17:17). Ankgalhin xlimaklakaskin Biblia (Mateo 4:4, 7, 10). Xaxlikana xlakskujnin Dios stalanikgo xliʼakxilhtit Jesús, wa xlakata putum tuku masiyakgo anta kilhtiyakgo kBiblia.

8. ¿Tuku kinkamasiyanin Jesús xlakata la nakakninaniyaw Jehová?

⁸ Kajwatiya Jehová kilikakninanitkan. Salmo 83:18 wan: «Latamanin kakatsikgolh pi mintukuwani wa Jehová, pi kajwatiya wix tiku tlakg Lanka xlikalanka katiyatni». Jesús xlakaskin pi latamanin xkatsikgolh tiku xaxlikana Dios. Wa xlakata kamasiyanilh xtukuwani (kalikgalhtawakga Juan 17:6). Jesús wa: «Wa Jehová miDios tiku xlilat nakakninaniya chu kajwatiya xla nakgalhakgaxpatniya» (Mateo 4:10). Wa xlakata, xaxlikana xlakskujnin Dios kstalaniyaw xliʼakxilhtit Jesús. Kajwatiya Jehová kkakninaniyaw, kmaklakaskinaw xtukuwani chu kkamasiyaniyaw amakgapitsin. Chu nachuna kmasiyayaw tuku natlawa kimpalakatakan.

9, 10. ¿La limasiyayaw pi lapaxkiyaw?

⁹ Xlakaskinka nakalimasiyaniyaw tapaxkit amakgapitsin. Jesús kamasiyanilh kstalaninanin pi xlapaxkikgolh (kalikgalhtawakga Juan 13:35). Maski tanu tanu kinkachikinkan, la tasiyayaw, komo kgalhiyaw tumin o ni, tapaxkit nema lakgalhiniyaw makxtum kinkatlawayan (Colosenses 3:14). Wa xlakata ni anaw kʼguerra chu niti makgniyaw. Biblia wan: «Wa uma tuku kalilakgapaskan xkamanan Dios  chu xkamanan Akgskgawini: tiku ni tlawa tuku xaʼakgstitum, ni xkgawasa Dios. Chu tiku ni paxki xtala, na ni xkgawasa Dios». Chu wampara: «Kalapaxkiw chatunu chatunu. Ni kalitaxtuw chuna la Caín, tiku xkgawasa Akgskgawini litaxtulh chu makgnilh xtala» (1 Juan 3:10-12; 4:20, 21).

¹⁰ Kalimakgtayayaw kinatalankan tuku kgalhiyaw, kinkilhtamakujkan chu kilitliwakgakan, tlawayaw putum tuku matlaniyaw xpalakatakan chu kamakgpuwantiniyaw (Hebreos 10:24, 25). Akinin tlan kalikatsiniyaw putum latamanin (Gálatas 6:10).

11. ¿Tuku xlakata kgalhakgaxmataw Jesús?

¹¹ Talakaskin nakgalhakgaxmataw Jesús, xlakata chuna tlan nalakgtalakatsuwiyaw Dios. Biblia wan: «Ni anan tiku tlan lakgmaxtunan, xlakata ni anan atanu tukuwani kkatiyatni nema Dios xlaksakli kxlakgstipan latamanin xlakata xkinkalakgmaxtun» (Hechos 4:12). Kcapítulo 5 xla uma libro katsiniw pi Jehová makamilh Jesús xlakata namasta xlatamat chu nakinkalakgmaxtuyan (Mateo 20:28). Jehová laksaknit Jesús xlakata Mapakgsina nalitaxtu kKatiyatni. Wa xlakata Biblia kinkawaniyan pi nakgalhakgaxmataw Jesús komo makglhtinamputunaw latamat nema ni kgalhi xlisputni (kalikgalhtawakga Juan 3:36).

12. ¿Tuku xlakata ni makgtanuyaw kpolítica?

¹² Ni makgtanuyaw kpolítica. Jesús ni makgtanulh kpolítica. Akxni linka kxlakatin mapakgsina xalak Roma tiku xwanikan Pilato, xla wanilh: «KinTamapakgsin ni xalak uma kakilhtamaku» (kalikgalhtawakga Juan 18:36). Chuna la Jesús, kajwatiya tatayayaw xTamapakgsin Dios. Wa xlakata, xanikuta niku wilaw ni makgtanuyaw kpolítica. Pero Biblia kinkawaniyan pi nakakgalhakgaxmataw «mapakgsinanin» (Romanos 13:1). Kgalhakgaxmataw limapakgsin nema wilakgolh niku lamaw. Pero akxni akgtum limapakgsin lakatsala xlimapakgsin Dios, stalaniyaw xliʼakxilhtitkan apóstoles.  Xlakan wankgolh: «Kilikgalhakgaxmatatkan Dios chuna la kimapakgsinakan nixawa lakchixkuwin» (Hechos 5:29; Marcos 12:17).

13. ¿Tuku lichuwinanaw xlakata xTamapakgsin Dios?

¹³ Kanajlayaw pi kajwatiya xTamapakgsin Dios namasputu putum tuku nitlan anan kkakilhtamaku. Jesús lichuwinalh pi «xatlan tamakatsinin xla Tamapakgsin» xʼama litachuwinan kxlikalanka Katiyatni (kalikgalhtawakga Mateo 24:14). Mapakgsinanin xalak kakilhtamaku nila tlawakgo tuku natlawa xTamapakgsin Dios kimpalakatakan (Salmo 146:3). Jesús kinkamasiyanin pi naskinaw kkiʼoracionkan pi kamilh xTamapakgsin Dios, xla wa: «Kamilh minTamapakgsin. Kalalh mintalakaskin chuna la kʼakgapun nachuna kalalh kkatiyatni» (Mateo 6:10). Biblia kinkawaniyan pi xTamapakgsin Dios nakamasputu putum mapakgsinanin xalak kakilhtamaku chu kajwatiya «uma tamapakgsin xliputum kilhtamaku natawila» (Daniel 2:44).

14. ¿Tiku lakpuwana wix pi xaxlikana xlakskujnin Dios?

¹⁴ Kalilakpuwanti uma: «¿Tiku masiyakgo tuku xaxlikana masiya Biblia? ¿Tiku masiyakgo xtukuwani Dios? ¿Tiku xlikana lalimasiyanikgo tapaxkit? ¿Tiku kanajlakgo pi Dios makamilh Jesús xlakata nakinkalakgmaxtuyan? ¿Tiku ni makgtanukgo kpolítica? ¿Tiku lichuwinankgo pi kajwatiya xTamapakgsin Dios tlan namasputu putum tuku nitlan?». Kajwatiya xtatayananin Jehová tiku chuna tlawakgo (Isaías 43:10-12).

15. ¿Tuku kilitlawatkan komo lakaskinaw pi Dios nakinkamakgamakglhtinanan?

¹⁵ Ni kajwatiya talakaskin nakanajlayaw pi Dios lama. Xlakata asta demonios kanajlakgo pi Dios xlikana lama, pero ni tlawakgo tuku xla lakaskin (Santiago 2:19). Komo lakaskinaw pi Dios nakinkamakgamakglhtinanan,  ni kajwatiya nakanajlayaw pi xlikana lama, nachuna talakaskin natlawayaw tuku xla kinkawaniyan.

16. ¿Tuku xlakata talakaskin nataxtuyaw niku ni masiyakan tuku xaxlikana?

¹⁶ Xlakata Dios nakinkamakgamakglhtinanan, talakaskin nataxtuyaw niku ni masiyakan tuku xaxlikana. Palakachuwina Isaías tsokgwililh: «Kataxtutit kxlakgstipankan, ni xalixkajni katawilatit» (Isaías 52:11; 2 Corintios 6:17). Wa xlakata talakaskin nalakgmakganaw putum tuku nixaxlikana masiyakan.

17, 18. 1) ¿Tuku kilhchanima «xaLanka Babilonia»? 2) ¿Tuku xlakata lu xlakaskinka lakapala nataxtuya?

¹⁷ ¿Tuku kilhchanima nixaxlikana takanajla? Kilhchanima putum niku ni masiyakan tuku xaxlikana chu nichuna kakninanikan Dios chuna la xla lakaskin. Biblia limapakuwi «xaLanka Babilonia» putum niku ni masiyakan tuku xaxlikana (Apocalipsis 17:5). ¿Tuku xlakata? Akxni xtitaxtunita Munkaklat, lakatsukukgolh nixaxlikana tamasiy kʼakgtum kachikin nema xwanikan Babilonia. Amakgolh tamasiy talakgatumikgolh kxlikalanka Katiyatni. Akgtum liʼakxilhtit, latamanin xalak Babilonia xkakninanikgo chatum dios nema kgalhtutu xlitaxtu. La uku nachuna, lhuwa niku masiyakan pi Dios kgalhtutu litaxtu o akgtum trinidad, pero Biblia masiya pi kajwatiya Jehová xaxlikana Dios chu Jesús wa xKgawasa (Juan 17:3). Latamanin xalak Babilonia na xkanajlakgo pi akxni wi tiku xniy wi tuku xtaxtu nema xʼan latama alakatanu o xmakgapatinankan kpupatin. Pero uma nixlikana. (Kaʼakxilhti nota 14, niku wan «Trinidad, nixaxlikana tamasiy» chu nota 17 niku wan «Alma», chu na kaʼakxilhti nota 18, niku wan «Espíritu»).

¹⁸ Dios lichuwinanit pi nialh makgas nakamasputu putum niku masiyakan tuku nixaxlikana (Apocalipsis 18:8). ¿Akxilha tuku xlakata lu xlakaskinka pi nataxtuya niku ni masiyakan tuku xaxlikana? Jehová lakaskin pi lakapala nataxtuya (Apocalipsis 18:4).

19. Komo wix naskujnaniya Dios, ¿la nakuentajtlawayan?

 ¹⁹ Komo wix nataxtuya niku ni masiyakan tuku xaxlikana chu naskujnaniya Jehová, max mintalilakgapasni chu miʼamigos ni katiʼakgatekgskgolh tuku xlakata chuna tlawa chu wa xlakata wi tuku natlawakgo nema namaxlajwaniputunan. Pero Jehová nikxni katimakgxtakgni. Xla namaxkiyan akgtum lanka familia tiku xlikana lapaxkikgo chu takgalhkgalhin xlakata tlan nalatapaya kxasasti kakilhtamaku (Marcos 10:28-30). Max makgapitsi tiku xalak mi familia o miʼamigos, la uku ni lakgatikgo tuku wix katsinipat pero max alistalh na nalikgalhtawakgaputunkgo Biblia.

20. ¿Tuku xlakata lu xlakaskinka namakgtapakgsiya niku masiyakan tuku xaxlikana?

²⁰ Nialh makgas Dios namasputu tuku ni xatlan chu wa xTamapakgsin namapakgsinan kKatiyatni (2 Pedro 3:9, 13). Lu lipaxuw nawan. Putum tiku nalatamakgo kxasasti kakilhtamaku nakakninanikgo Jehová chuna la xla lakaskin. Wa xlakata lu xlakaskinka pi wix wi tuku natlawaya la uku chu namakgtapakgsiya niku masiyakan tuku xaxlikana.