1, 2. ¿Niku tlan natatsekgaw la uku?

KALILAKPUWANTI pi pimpat paxialhnana chu kaj lakapala akgapun tsuku tapokglha chu lakgtsitsakga puklhni tawaka. Tsuku makglipa, jili chu palha tsuku senan. Wa xlakata wix putsaya niku tlan nakasa. ¡Lu tlan makgkatsiya akxni tekgsa niku tlan nakasa!

² La uku, nachuna titaxtumaw. Kkakilhtamaku tlakg taliwakama tuku nixatlan. Max wix lakpuwana: «¿Niku tlan natatsekgaw?». Chatum tiku tsokgli Biblia wa umakgolh tachuwin: «Nakwani Jehová: “Wix kimputatsekgni chu xatliwakga kilitatsekgni, kiDios, tiku klipawan”» (Salmo 91:2). Jehová tlan nakinkamakgtayayan akxni kgalhiyaw akgtum taʼakglhuwit chu kinkamaxkiyan akgtum lu xatlan takgalhkgalhin.

3. ¿Tuku kilitlawatkan xlakata Jehová tlan nakinkamakgtayayan?

³ ¿La kinkamakgtayayan Jehová? Xla tlan nakinkamakgtayayan natayaniyaw akxni titaxtuyaw akgtum taʼakglhuwit. Nachuna, xla tlakg tliwakga nixawa chatum lataman tiku nakinkatlawaniputunan tuku nitlan. Chu asta maski la uku nakinkatlawanikanan tuku nitlan liwana katsiyaw pi Jehová tlan nalakkaxtlawa tuku nitlan nakinkatlawanikanan. Biblia wan: «Chuntiya natamakgxtakgatit kxtapaxkit Dios» (Judas 21). Talakaskin chuntiya tlan natalalinaw Jehová xlakata nakinkamakgtayayan natayaniyaw tuku tuwa natitaxtuyaw. Pero ¿tuku natlawayaw xlakata tlan natalalinaw?

4, 5. ¿La limasiyanit Jehová pi xlikana kinkapaxkiyan?

⁴ Xlakata chuntiya xʼamigos Jehová nawanaw, talakaskin  naʼakgatekgsaw la xlilhuwa kinkapaxkiyan. Kalilakpuwanti putum tuku tlawanit Jehová kimpalakatakan. Kinkamaxkinitan Katiyatni, niku anan lakstlan xanat chu lhuwa animales nema stlan tasiyakgo. Nachuna kinkamaxkinitan lhuwa liwat chu lhuwa chuchut. Nachuna, Jehová kinkamasiyaninitan anta kBiblia tuku wanikan chu la likatsi. Pero tuku tlakg limasiyalh pi kinkapaxkiyan wa akxni makamilh xKgawasa unu kkatiyatni xlakata namasta xlatamat kimpalakatakan (Juan 3:16). Xlakata xtamakamastan, akinin kgalhiyaw akgtum lu xatlan takgalhkgalhin xlakata kilhtamaku nema aku mima.

⁵ Jehová lakkaxwilinit xTamapakgsin Mesías anta kʼakgapun. Uma tamapakgsin nialh makgas namasputu tapatin chu akgtum Paraíso natlawa uma Katiyatni niku putum kilhtamaku nalatamayaw, napaxuwayaw chu nakgalhiyaw takaksni (Salmo 37:29). Jehová nachuna kinkalimasiyaninitan pi kinkapaxkiyan xlakata kinkamasiyaniyan la lipaxuw nalatamayaw. Nachuna, kinkawaniyan pi katlawaniw oración chu xla ankgalhin nakinkakgaxmatniyan. Chuna la akxilhaw, Jehová xlikana kinkapaxkiyan.

6. Akxni akxilha la xlilhuwa paxkiyan Jehová, ¿tuku militlawat?

⁶ Akxni akxilha putum tuku Jehová tlawanit mimpalakata chu la xlilhuwa paxkiyan, ¿la makgkatsiya? ¿Ni xlikana pi lu paxtikatsiniya? Komo chuna, kalimasiyani. Lu nitlan, pero kkakilhtamaku anan lhuwa latamanin tiku ni paxtikatsininankgo. Nachuna xlikatsikgo latamanin kxkilhtamaku Jesús. Akgtum kilhtamaku, Jesús kamapaksalh kgalhakaw tiku xkgalhikgo lepra, pero kaj chatum tiku paxtikatsinilh (Lucas 17:12-17). Akinin likatsiputunaw chuna la uma chixku chu limasiyaniputunaw Jehová pi paxtikatsiniyaw.

7. ¿La kilipaxkitkan Jehová?

⁷ Nachuna, talakaskin napaxkiyaw Jehová. Jesús kawanilh kstalaninanin pi xlipaxkitkan xwanit Jehová xliputum xnakujkan, xlatamatkan chu xliputum xtalakapastaknikan  (kalikgalhtawakga Mateo 22:37). ¿Tuku kilhchanima uma?

8, 9. ¿La limasiyaniyaw Jehová pi paxkiyaw?

⁸ Ni kajwatiya talakaskin nawanaw pi paxkiyaw Jehová. Komo paxkiyaw Jehová xliputum kinakujkan, kilatamatkan chu kintalakapastaknikan, nalimasiyayaw kkilatamatkan (Mateo 7:16-20). Biblia liwana kinkamasiyaniyan pi komo xlikana paxkiyaw Dios nakgalhakgaxmataw xlimapakgsin. ¿Tuwa tlawakan uma? Nichuna, xlakata xlimapakgsin Jehová ni tuwa makgantaxtikan (kalikgalhtawakga 1 Juan 5:3).

⁹ Akxni kgalhakgaxmataw Jehová, tlan kinkakitaxtuniyan kkilatamatkan chu paxuwayaw (Isaías 48:17, 18). Pero ¿tuku nakinkamakgtayayan chuntiya xʼamigos nalitaxtuyaw? Kaʼakxilhwi.

10. ¿Tuku xlakata talakaskin chuntiya tlakg nalakgapasa Jehová?

¹⁰ ¿Tuku tlawa wix xlakata xʼamigo Jehová nalitaxtuya? Akxni likgalhtawakga Biblia, tlakg liwana lakgapasti Jehová chu tlan tsuku talalipina. Tapaxkit nema kgalhiniya xtachuna la lhkuyat. Xlakata ni namixa, talakaskin namapuniyaw kiwi. Uma wamputun pi talakaskin ankgalhin tlakg nalakgapasa Jehová xlakata chuntiya tlan natalalipina (Proverbios 2:1-5).

11. ¿La namakgtayayan tuku katsinipat anta kBiblia?

¹¹ Chuna la nalikgalhtawakgatilhaya Biblia, wix lhuwa tuku nakatsiniya nema nalakgchan minaku. Kaʼakxilhti la makgkatsikgolh chatiy kstalaninanin Cristo akxni xla kalitachuwinalh tuku xkilhchanima tuku xlichuwinankanit. Xlakan wankgolh: «¿Ni xlikana pi xtachuwin xlakgchan kinakujkan akxni xkinkatachuwinantilhayan ktiji chu liwana xkinkamaʼakgatekgsniman xTachuwin Dios?» (Lucas 24:32).

12, 13. 1) ¿Tuku max naʼakgspula tapaxkit nema kgalhiniyaw Jehová? 2) ¿Tuku kilitlawatkan xlakata ni nasputa tapaxkit nema kgalhiniyaw Jehová?

 ¹² Tuku Jesús kamasiyanilh chatiy kstalaninanin kalakgchanilh kxnakujkan. Max wix na lu lipaxuwa akxni tsuku katsiniya tuku masiya Biblia. Xlakata tuku katsini kBiblia tlakg lakgapasti Jehová chu tsuku paxkiya. Xlikana pi ni lakaskina namixa uma tapaxkit (Mateo 24:12).

¹³ Xlakata wix xʼamigo Dios, talakaskin chuntiya naliskuja xlakata tlan natalalipina. Wa xlakata talakaskin chuntiya nakalakgapasa Jehová chu Jesús. Nachuna, talakaskin nalilakpuwana tuku katsinipat chu la tlan nalilatapaya (Juan 17:3). Akxni nalikgalhtawakgaya Biblia, kalilakpuwanti umakgolh takgalhskinin: «¿Tuku kimasiyani uma xlakata Jehová? ¿Tuku xlakata kilipaxkit Jehová xliputum kinaku chu xliputum kilatamat?» (1 Timoteo 4:15).

14. ¿La kinkamakgtayayan oración xlakata chuntiya natatliwakglha tapaxkit nema kgalhiniyaw Jehová?

¹⁴ Komo wix kgalhiya chatum amigo, xlikana pi max ankgalhin  tachuwinana. Uma tlawa pi tlakg tlan natalalipina. Nachuna, tapaxkit nema kgalhiniyaw Jehová tlakg natatliwakglha komo ankgalhin natlawaniyaw oración (kalikgalhtawakga 1 Tesalonicenses 5:17). Tlawanikan oración Jehová akgtum lanka tamaskiwin. Ankgalhin nawaniyaw tuku wi kkinakujkan (Salmo 62:8). Akxni natlawaniyaw oración ni watiya tachuwin nawaniyaw, wata nawaniyaw tuku makgkatsiyaw kkinakujkan. Komo chuntiya nalikgalhtawakgayaw Biblia chu ankgalhin natlawaniyaw oración Jehová, chuntiya natatliwakglha la talalinaw.

15, 16. ¿Tuku lakpuwana xlakata lichuwinankan Dios?

¹⁵ Xlakata chuntiya xʼamigos Jehová nawanaw, talakaskin nakalitachuwinanaw amakgapitsin tuku kanajlayaw. Akgtum lanka talakgalhaman nakalitachuwinanaw xlakata Jehová (Lucas 1:74). Nachuna, akgtum limapakgsin nema Jesús kalakgayawalh putum xaxlikana kstalaninanin. Wa xlakata talakaskin putum akinin nalichuwinanaw xalakwan tamakatsinin xla xTamapakgsin Dios. ¿Chuna tlawapat wix? (Mateo 24:14; 28:19, 20).

¹⁶ Apóstol Pablo lanka xtapalh xʼakxilha nalichuwinan xtachuwin Dios chu asta wa pi «lhuwa xtapalh» xlitaxtu (2 Corintios 4:7). Nakalitachuwinana amakgapitsi xpalakata Jehová chu tuku natlawa wa tuku tlakg tlan natlawaya kmilatamat. Akxni lichuwinana Dios limasiya pi kakninaniya chu xla lanka xtapalh akxilha tuku tlawaya (Hebreos 6:10). Akxni lichuwinana Dios kamakgtayaya amakgapitsin tlan xʼamigos Dios nalitaxtukgo chu uma namatliwakglha la talalipina. Xlakata lichuwinana Dios tlan nakgalhiya latamat nema nikxni katisputli chu nachuna tiku kgaxmatnikgoyan tlan nalakgtaxtukgo (kalikgalhtawakga 1 Corintios 15:58). ¡Ni anan atanu tuku tlakg makgapaxuwanan!

17. ¿Tuku xlakata lu xlakaskinka nalichuwinanaw Dios?

 ¹⁷ Lu xlakaskinka nalichuwinanaw Dios. Biblia kinkawaniyan: «Xatapaxuwan kalichuwinanti xtachuwin Dios» (2 Timoteo 4:2). Latamanin xlikgaxmatatkan xalakwan tamakatsinin xla xTamapakgsin Dios. Nachuna, Biblia wan pi «¡Xalanka xkilhtamaku Jehová lakatsu wi! ¡Lakatsu wi chu lakapala talakatsuwima!». Lisputni «ni katimakgapalalh» (Sofonías 1:14; Habacuc 2:3). Nialh makgas Jehová namasputu xkakilhtamaku Satanás. Xlakata nina chin uma kilhtamaku, talakaskin nakamakatsiniyaw latamanin xlakata nalakskujnanikgo Jehová.

18. ¿Tuku xlakata akinin xaxlikana kstalaninanin Cristo kilitamakxtumitkan xlakata nakakninaniyaw Jehová?

¹⁸ Jehová lakaskin pi akinin xaxlikana kstalaninanin Cristo natamakxtumiyaw xlakata nakakninaniyaw. Biblia lichuwinan: «Kalalilakgaputsaw chatunu chatunu xlakata tlakg naʼanan tapaxkit chu xalaktlan tatlaw, ni namakgxtakgaw chuna la tamakxtumiyaw, chuna la lismanikgonit makgapitsin. Wata kalamatliwakglhwi chu tlakg chuna katlawaw xlakata akxilhmaw pi xkilhtamaku Dios talakatsuwima» (Hebreos 10:24, 25). Talakaskin lu naliskujaw xlakata naʼanaw ktamakxtumit. Anta tlan nalamakgpuwantiniyaw chu nalamatliwakglhaw kinchatunukan.

19. ¿Tuku nakinkamakgtayayan xlakata tlakg nakapaxkiyaw natalan?

¹⁹ Anta ktamakxtumit wix nakatekgsa xalaktlan amigos. Xlakan namakgtayakgoyan xlakata tlan nalakskujnaniya Jehová. Nakalakgapasa natalan tiku tanu tanu xtayatkan chu tanu tanu tuku titaxtukgonit kxlatamatkan chu liskujkgo xlakata naskujnanikgo Jehová. Pero chuna la wix, xlakan na makglakgalhinanin chu lakgachunin max tlawakgo tuku nitlan. Akxni chuna nala, xatapaxuwan kakatapati (kalikgalhtawakga Colosenses 3:13). Ankgalhin wa kaʼakxilhti lakwan tayat nema kgalhikgo. Uma namakgtayayan xlakata tlakg nakapaxkiya chu namatliwakglha la talalipina Jehová.

20, 21. ¿Tuku «xaxlikana latamat»?

²⁰ Jehová lakaskin pi putum xʼamigos kakgalhikgolh xaxlikana latamat. Biblia masiya pi kkilhtamaku nema aku mima, latamat lu tanu nawan nixawa la uku.

²¹ Kilhtamaku nema aku mima, ankgalhin nalatamayaw, chu ni kajwatiya 70 chu 80 kata. Nalipaxuwayaw «latamat nema ni kgalhi xlisputni» kxastlan Paraíso, niku nialh katitatatlaw, nakgalhiyaw takaksni chu napaxuwayaw. Wa uma tuku Biblia limapakuwi «xaxlikana latamat». Jehová malaknu pi nakinkamaxkiyan uma latamat, pero talakaskin pi akinin la uku lu naliskujaw xlakata tlan nakinkamaxkiyan (1 Timoteo 6:12, 19).

22. 1) ¿Tuku kilitlawatkan xlakata nakgalhiyaw «xaxlikana latamat»? 2) ¿Tuku xlakata wanaw pi ni kinkalakgchanan namakglhtinanaw latamat nema ni kgalhi xlisputni?

²² ¿Tuku kilitlawatkan xlakata nakgalhiyaw «xaxlikana latamat»? Talakaskin natlawayaw «tuku tlan» chu nakalimakgtayayaw amakgapitsin tuku kgalhiyaw (1 Timoteo 6:18). Uma kilhchanima pi nalilatamayaw tuku katsininitaw anta kBiblia. Pero latamat nema ni kgalhi xlisputni ni katimakglhtinaw kaj xlakata tuku kiʼakstukan natlawayaw. Akgtum tamaskiwin nema Jehová kamaxki putum xlakskujnin tiku ni makgxtakgkgo chu chuna kalimasiyani «xtalakgalhaman» (Romanos 5:15). Jehová kamaxkiputun uma tamaskiwin putum xlakskujnin.

23. ¿Tuku xlakata la uku talakaskin nalaksaka tuku xatlan?

²³ Kalilakpuwanti uma takgalhskinin: «Chu akit, ¿kkakninani Dios chuna la lakaskin?». Komo naʼakxilha pi wi tuku talakaskin nalakgpaliya kmilatamat, lakapala katlawa tuku natalakaskin. Akxni lipawanaw Jehová chu liskujaw xlakata nakgalhakgaxmataw xla kilitatsekgnikan nalitaxtu. Jehová nakakuentajtlawa xlakskujnin tiku ni makgxtakgkgo kʼuma xaʼawatiya kilhtamaku. Chu alistalh nakinkamaxkiyan  latamat nema ni kgalhi xlisputni kʼakgtum Paraíso, chuna la kinkawaninitan. Komo wix nalaksaka tuku xatlan la uku, namakglhtinana latamat nema ni kgalhi xlisputni.