1-3. 1) ¿Tukuya takgalhskinin lilakpuwanaw akxni wi tiku niy? 2) ¿Tuku wankgo makgapitsi takanajla xlakata tuku kinkaʼakgspulayan akxni niyaw?

BIBLIA malaknu pi kkilhtamaku nema aku mima «nialhti katinilh» (Apocalipsis 21:4). Kcapítulo 5 katsiniw pi xlakata talakgmaxtut, tlan nakgalhiyaw latamat nema ni kgalhi xlisputni. Pero la uku chuntiyaku niyaw (Eclesiastés 9:5). Wa xlakata max lakpuwanaw: «¿Tuku kinkaʼakgspulayan akxni niyaw?».

² Lu xlakaskinka nakatsiyaw xatakgalhtin uma takgalhskinin, liwaka akxni chatum tiku xalak kifamiliajkan o kiʼamigojkan niy. Max nalakpuwanaw: «¿Niku wi? ¿Kinkaʼakxilhman? ¿Tlan nakinkamakgtayayan? ¿Namin kilhtamaku akxni naʼakxilhparayaw?».

³ Lhuwa takanajla tanu tanu tuku wankgo xlakata umakgolh takgalhskinin. Makgapitsi masiyakgo pi tiku tlan likatsikgo ankgo kʼakgapun chu tiku nitlan likatsikgo ankgo kpupatin. Amakgapitsi wankgo pi akxni niyaw akgtum espíritu litaxtuyaw chu akxtum katatawilayaw kifamiliajkan tiku na nikgonita. Chu amakgapitsi masiyakgo pi akxni niyaw, kinkalakputsananikanan chu latamaparayaw o lakachimparayaw amakgtum kʼatanu makni o asta tantum animal nalitaxtuyaw.

4. ¿Tukuya talakapastakni masiyakgo makgapitsi takanajla xlakata akxni nikan?

⁴ Maski lhuwa takanajla tanu tanu tuku wankgo xlakata linin, putum watiya talakapastakni masiyakgo: pi akxni niyaw, wi tuku chuntiya staknan. Pero ¿xlikana uma?

5, 6. ¿Tuku kinkaʼakgspulayan akxni niyaw?

⁵ Jehová katsi tuku kinkaʼakgspulayan akxni niyaw. Xla kinkamasiyaniyan anta kBiblia pi akxni niyaw kilatamatkan sputa. Akxni niyaw nialhla akxilhaw, kgaxmataw chu nialhla lakapastaknanaw. Putum kintalakapastaknikan lakgsputkgo. Ni kgalhiyaw akgtum espíritu nema chuntiya tlan nalatama alakatanu. *

⁶ Mapakgsina Salomón tsokgwililh pi tiku nikgonita «nialhtu katsikgo». Wa xlakata ni paxkinankgo chu ni sitsikgo. Salomón nachuna lichuwinalh pi «nitula liskujkan chu nitula lakkaxtlawakan, nialhtu katsikan chu nipara anan liskgalala anta kPutaknun» (kalikgalhtawakga Eclesiastés 9:5, 6, 10). Chu Salmo 146:4 wan pi akxni wi tiku niy «putum xtalakapastakni» nachuna niy.

7. ¿Tuku tamalakxtumilh Jesús linin?

⁷ Akxni Lázaro nilh, Jesús kawanilh kstalaninanin: «Kiʼamigojkan Lázaro lhtatanit». Pero Jesús ni xwamputun pi Lázaro kaj xjaxma. Alistalh lichuwinalh tuku xwamputun: «Lázaro ninit» (Juan 11:11-14). Jesús tamalakxtumilh linin la akxni lhtatakan. Xla ni wa pi Lázaro xwilacha kʼakgapun o komo akxtum xkatawilacha xfamilia tiku na xnikgonita. Nachuna ni wa komo Lázaro xpatinamacha kpupatin o komo lakachimpa kʼatanu makni xla chatum lataman o xla tantum animal. Wata lichuwinalh pi Lázaro xtachuna la komo klhtatama. Amakgapitsi textos nachuna tamalakxtumikgo linin la komo tiku lhtatama. Biblia lichuwinan pi Esteban «lhtatalh kkalinin»  akxni makgnika (Hechos 7:60). Chu apóstol Pablo lichuwinalh pi makgapitsi kstalaninanin Cristo na «lhtatamakgolh kkalinin» (1 Tesalonicenses 4:14).

8. ¿Tuku likatsiyaw pi Dios ni kinkamalakatsukin xlakata naniyaw?

⁸ ¿Dios kamalakatsukilh latamanin xlakata nanikgo? Ni. Akxni Jehová kamalakatsukilh Adán chu Eva katlawalh xlakata putum kilhtamaku xlatamakgolh chu ni xtatatlakgolh. Kamalakatsukilh xlakata ankgalhin nalatamaputunkgo (Eclesiastés 3:11). Natlatni ni lakaskinkgo pi xkamanankan natatatlakgo chu nanikgo, nachuna Jehová ni akxilhputun akxni tatatlayaw chu niyaw. Pero, komo  Dios kinkamalakatsukin xlakata putum kilhtamaku nalatamayaw, ¿tuku xlakata niyaw?

9. ¿Tuku xlakata Adán chu Eva tlan xtikgalhakgaxmatkgolh tuku xkalimapakgsinit Jehová?

⁹ Anta kjardín xaʼEdén, Jehová wanilh Adán: «Tlan nawaya xtawakat putum kiwi nema yakgo kjardín asta nakgalhkgasa. Pero ni nawaya xtawakat kiwi nema lilakgapaskan tuku xatlan chu nixatlan, xlakata kilhtamaku akxni nawaya, xlikana pi naniya» (Génesis 2:9, 16, 17). Uma limapakgsin ni tuwa xwanit, chu Jehová wa tiku kamalakatsukilh chu xkgalhi limapakgsin nakawani tuku tlan chu tuku nitlan. Komo Adán chu Eva xtikgalhakgaxmatkgolh Jehová, xlimasiyakgolh pi ni xlakatakikgo xlimapakgsin chu pi xpaxtikatsinikgo putum tuku xla xkamaxkinit.

10, 11. 1) ¿La kaʼakgskgawilh Satanás Adán chu Eva? 2) ¿Tuku xlakata Adán chu Eva nila xwankgo pi kaj ni xkatsikgo tuku xtlawamakgo?

¹⁰ Lu nitlan, pero Adán chu Eva ni kgalhakgaxmatnankgolh. Satanás kgalhskilh Eva: «¿Xlikana Dios kawanin pi ni nawayatit xtawakat putum kiwi nema wilakgolh kJardín?». Chu Eva kgalhtilh: «Xtawakat kiwi nema wilakgolh kjardín tlan nakwayaw. Pero xtawakat kiwi nema wi kxitat Jardín, Dios wanit: “Ni nawayatit, ni, ni naxamayatit. Komo nawayatit, naniyatit”» (Génesis 3:1-3).

¹¹ Chu Satanás wanilh Eva: «Ni katinitit. Dios katsi pi kilhtamaku akxni nawayatit natalakki milakgastapukan chu chuna la Dios nawanatit: nalakgapasatit tuku xatlan chu tuku nixatlan» (Génesis 3:4-6). Satanás xlakaskin pi Eva xlakpuwa pi tlan xʼakstu xlaksakli tuku tlan chu tuku nitlan. Chu nachuna akgskgawilh akxni wanilh tuku xʼama akgspula komo ni xkgalhakgaxmatli Jehová. Xla wanilh pi ni xʼama niy, wa xlakata Eva walh xtawakat kiwi chu alistalh maxkilh xchixku uma tawakat. Adán chu Eva  xkatsikgo pi Jehová xkawaninit pi ni xwakgolh xtawakat kiwi. Akxni wakgolh, xlakan laksakkgolh ni nakgalhakgaxmatkgo akgtum limapakgsin nema ni tuwa xwanit. Xlakata tuku laksakkgolh Adán chu Eva limasiyakgolh pi ni xmaxkikgo kakni xapaxkina xTlatkan. ¡Nila xwankgo pi ni xkatsikgo tuku xtlawamakgo!

12. ¿Tuku xlakata Jehová nitlan limakgkatsilh tuku tlawakgolh Adán chu Eva?

¹² Lu nitlan pi xapulana kinatlatnikan ni kgalhakgaxmatkgolh Jehová. Kalilakpuwanti, ¿la xmakgkatsi wix komo minkamanan, tiku kaliskujti xlakata nakamakgastaka, ni natlawakgo tuku kalimapakgsi? ¿Ni xlikana pi lu nitlan xlimakgkatsi?

13. ¿Tuku xwamputun Jehová akxni wanilh Adán «kpokgxni napimparaya»?

¹³ Akxni Adán chu Eva ni kgalhakgaxmatkgolh Jehová, makgatsankgakgolh talakgalhaman pi tlan xlatamakgolh putum kilhtamaku. Jehová wanilh Adán: «Pokgxni wix chu kpokgxni napimparaya» (kalikgalhtawakga Génesis 3:19). Adán pokgxni xlitlawakanit, wa xlakata Jehová xwamputun pi Adán pokgxni xʼamapa litaxtu, xtachuna la komo nikxni xlatamanit (Génesis 2:7). Akxni nilh, xlatamat sputli.

14. ¿Tuku xlakata niyaw?

¹⁴ Komo Adán chu Eva xtikgalhakgaxmatkgolh Dios, la uku chuntiyaku xlatamakgolh. Pero akxni ni kgalhakgaxmatnankgolh, makglakgalhinankgolh chu titaxtulh kilhtamaku nikgolh. Talakgalhin xtachuna la akgtum lanka  tajatat nema kinkamatitaxtinikgon xapulana kinatlatnikan. Niyaw xlakata akxni lakachinaw kgalhiyawa talakgalhin (Romanos 5:12). Pero Jehová nikxni lakpuwa pi latamanin xʼamakgolh nikgo. Wa xlakata, Biblia lichuwinan pi linin «kintalamakgasitsinkan» (1 Corintios 15:26).

15. ¿Tuku taʼakgsanin nialh kanajlayaw akxni katsiyaw tuku xaxlikana xlakata linin?

¹⁵ Lhuwa takanajla masiyakgo pi tiku nikgonita chuntiyaku latamakgo chu akinin tlan nakamakgtayayaw. Wa xlakata, akxni wi tiku niy, xfamiliajkan kamaxkikgo tumin tiku pulalinkgo takanajla xlakata natlawa oración xpalakata tiku nilh o natlawanikan akgtum misa. Pero Biblia masiya pi tiku nikgonita ni patinankgo chu ni lipuwankgo. Akinin nila katachuwinanaw chu nila kamakgtayayaw. Xlakan nachuna nila kinkatachuwinankgoyan, nila kinkamakgtayakgoyan. Nachuna nila kinkatlawanikgoyan tuku nitlan, wa xlakata ni nakapekuaniyaw. Akxni katsiyaw tuku xaxlikana xlakata linin, nialh kanajlayaw umakgolh taʼakgsanin.

16. ¿Tuku taʼakgsanin masiyakgo makgapitsi takanajla xlakata tiku nikgonita?

¹⁶ Satanás kamaklakaskin nixaxlikana takanajla xlakata nakinkaʼakgskgawiyan chu nakanajlayaw pi tiku nikgonita chuntiya lamakgolh. Akgtum liʼakxilhtit, makgapitsi takanajla masiyakgo pi akxni niyaw wi tuku chuntiya staknan chu an latama alakatanu. ¿Wa uma tuku masiya mintakanajla o masiya tuku wan Biblia? Satanás maklakaskin uma chu amakgapitsi taʼakgsanin xlakata latamanin ni natalakatsuwinikgo Dios.

17. ¿Tuku xlakata tamasiy pi kamakgapatinankan tiku nitlan likatsikgolh tlawa pi nitlan nalichuwinankan Jehová?

¹⁷ Tuku masiyakgo makgapitsi takanajla xlakata linin,  tlawa pi nitlan nalichuwinankan Jehová. Akgtum liʼakxilhtit, makgapitsi masiyakgo pi tiku nitlan likatsikgo, putum kilhtamaku nakalhkuyukan kpupatin. Pero uma nixlikana. ¡Jehová nikxni kamakgapatinan latamanin! (Kalikgalhtawakga 1 Juan 4:8). ¿Tuku xlakpuwanti xlakata chatum tlat tiku makalhkuyu xkgawasa klhkuyat? Xlikana pi wix xlakpuwanti pi lu nitlan likatsi chu nikxni miʼamigo xliʼakxilhti. Wa uma tuku lakaskin Satanás pi nalakpuwanaw xlakata Jehová.

18. ¿Tuku xlakata ni nakapekuaniyaw tiku nikgonita?

¹⁸ Makgapitsi takanajla masiyakgo pi akxni niyaw akgtum espíritu litaxtuyaw. Nachuna lichuwinankgo pi nakamaxkiyaw kakni umakgolh espíritus chu asta nakapekuaniyaw, xlakata tlan nakinkamakgtayakgoyan o max nakinkatlawanikgoyan tuku nitlan. Lhuwa latamanin kanajlakgo uma taʼakgsanin. Wa xlakata, kapekuanikgo, kamalankikgo o kakakninanikgo tiku nikgonita chu ni wa kakninanikgo Jehová. Pero kalakapastakti pi tiku nikgonita nialhtu makgkatsikgo chu nialhla tuku tlawakgo, wa xlakata ni nakapekuaniyaw. Jehová wa kiMalakatsukinakan chu xaxlikana Dios. Kaj xman wa talakaskin nakakninaniyaw (Apocalipsis 4:11).

19. ¿La kinkamakgtayayan nakatsiyaw tuku xaxlikana xlakata linin?

¹⁹ Akxni katsiyaw tuku xaxlikana xlakata linin nialh kanajlayaw xtaʼakgsaninkan nixaxlikana takanajla chu ni pekuaniyaw linin. Nachuna kinkamakgtayayan tlakg liwana naʼakgatekgsaw tuku malaknunit Jehová xlakata kilhtamaku nema aku mima.

20. ¿Tuku takgalhskinin nakgalhtiyaw kʼatanu capítulo?

²⁰ Makgasata kilhtamaku, chatum xlakskujni Dios tiku xwanikan Job kgalhskininalh: «Komo chatum chixku naniy, ¿tlan nalatamapara?» (Job 14:14). Kʼatanu capítulo naʼakxilhaw xatakgalhtin uma takgalhskinin.