1. ¿Tuku lakpuwanit Dios xpalakata latamanin?

DIOS kamalakatsukilh xapulana latamanin xlakata wi tuku lu tlan x’amakgolh makgantaxtikgo. Xlakaskin pi Adán chu Eva xlatamakgolh k’akgtum xastlan jardín, xkgalhikgolh kamanan, akgtum stlan paraíso xtlawakgolh lakgatum Katiyatni chu xkakuentajtlawakgolh animales. Chu tuku xlakpuwan nitu talakgpalinit, wa uma tuku lakaskin xpalakata latamanin (Génesis 1:28; 2:8, 9, 15). (Kaʼakxilhti nota 6, niku wan «Tuku lakpuwanit Dios xlakata Katiyatni»).

2. 1) ¿Tuku likatsiyaw pi Dios namakgantaxti tuku malaknunit? 2) ¿Tiku nalatamakgo kKatiyatni chu la xlilhuwa kilhtamaku?

² ¿Lakpuwana wix pi namin kilhtamaku na nalatamayaw kʼakgtum paraíso? Jehová liwana kinkawaniyan: «Klichuwinanit chu nakmakgantaxti» (Isaías 46:9-11; 55:11). Dios namakgantaxti tuku malaknunit chu ni anan tuku namalaktlawi. Nachuna, Jehová wi tuku xlakata malakatsukilh Katiyatni. «Ni tlawalh xlakata nitu nalilakan» (Isaías 45:18). Lakaskin pi Katiyatni nalitatsama latamanin. Pero, ¿tiku latamanin lakaskin Dios nalatamakgo kKatiyatni chu la xlimakgas? Biblia wan pi latamanin tiku tlan likatsikgo chu kgalhakgaxmatnankgo «nakamaxkikan katiyatni chu putum kilhtamaku nalatamakgo anta» (Salmo 37:29; Apocalipsis 21:3, 4).

3. Xlakata latamanin chuntiya patinankgo, ¿tuku max nalakpuwanaw?

³ La uku latamanin chuntiya tatatlakgo, nikgo, latalatlawakgo chu lamakgnikgo. Chu uma ni wa tuku Dios xlakaskin. Wa xlakata, ¿tuku lalh? ¿Tuku xlakata nina kgantaxtu xtalakaskin Dios? Kajwatiya Biblia masta xatakgalhtin.

4, 5. 1) ¿Tiku maklakaskilh tantum luwa xlakata natachuwinan Eva? 2) ¿La tlan talakgpali chatum lataman tiku tlan likatsi chu alistalh chatum kgalhana nalitaxtu?

⁴ Biblia wan pi Dios kgalhi chatum xtalamakgasitsin «tiku wanikan Akgskgawini chu Satanás». Anta kjardín xaʼEdén, Satanás maklakaskilh tantum luwa xlakata natachuwinan Eva (Apocalipsis 12:9; Génesis 3:1). Satanás tlawalh pi Eva xkanajlalh pi wa luwa tiku xtachuwinama (kaʼakxilhti nota 7, niku wan «Satanás, Akgskgawini»).

⁵ Wa xlakata, ¿wa Dios tiku malakatsukilh Satanás? Nichuna. Akxni Dios malakatsukilh Katiyatni xlakata Adán chu Eva nalatamakgo anta, xʼanan lhuwa ángeles kʼakgapun. Titaxtulh kilhtamaku, chatum ángel talakgpalilh chu Akgskgawini litaxtulh (Job 38:4, 7). ¿Tuku xlakata chuna lalh? Kalilakpuwanti, ¿tlan talakgpali chatum lataman tiku tlan likatsi chu alistalh chatum kgalhana nalitaxtu? Niti xakgalhana lakachin. Pero, komo wi tiku nakgalhiputun tuku ni xla chu ankgalhin wa uma nalakapastaka, uma nixatlan talakpuwan tlakg nastaka. Alistalh max nakgalhan tuku lakpuwanit. Chuna chatum lataman tiku tlan likatsi kgalhana nalitaxtu (kalikgalhtawakga Santiago 1:13-15). (Kaʼakxilhti nota 8, niku wan «Ángeles»).

6. ¿La xtalamakgasitsin Dios litaxtulh chatum ángel?

⁶ Wa uma tuku akgspulalh ama ángel. Akxni Jehová kamalakatsukilh Adán chu Eva, kawanilh pi xkgalhikgolh xkamanankan chu xmalakgatsamakgolh Katiyatni (Génesis 1:27, 28). Max uma ángel lakpuwa: «Putum uma latamanin tlan akit nakinkakninanikgo chu ni wa Jehová». Xlakata xla chuntiya lilakpuwa uma, tlakg tsukulh kgalhiputun tuku kajwatiya Jehová lakgchan: takaknin. Wa xlakata akgskgawilh Eva (kalikgalhtawakga Génesis 3:1-5). Akxni chuna tlawalh, Satanás chu Akgskgawini litaxtulh, chu nachuna xtalamakgasitsin wa.

7. 1) ¿Tuku xlakata Adán chu Eva nikgolh? 2) Kawili akgtum liʼakxilhtit nema masiya tuku xlakata kgolonaw chu niyaw.

 ⁷ Adán chu Eva ni kgalhakgaxmatkgolh Dios chu wakgolh xtawakat kgantum kiwi nema xkawanikanit pi ni nawakgo (Génesis 2:17; 3:6). Adán chu Eva makglakgalhinankgolh chu titaxtulh kilhtamaku nikgolh, chuna la Jehová xkawaninit (Génesis 3:17-19). Akxni Adán chu Eva kgalhikgolh xkamanankan, xlakan na kgalhikgolh talakgalhin chu wa xlakata na nikgolh (kalikgalhtawakga Romanos 5:12). Xlakata naʼakgatekgsniyaw kalilakpuwanti uma li’akxilhtit: kalilakpuwanti pi tlawapat kaxtalanchu k’akgtum molde nema tachuntanit. Kaxtalanchu nachuna nataxtuyacha la uma molde nema tachuntanit. Xtachuna la uma, akxni Adán ni kgalhakgaxmatli Dios, makglakgalhina litaxtulh. Xlakata akinin putum xkamanan Adán, nachuna «kgalhiyaw talakgalhin». Chu wa xlakata putum kgolonaw chu niyaw (Romanos 3:23). (Kaʼakxilhti nota 9, niku wan «Talakgalhin»).

8, 9. 1) ¿Tuku xlakaskin Satanás pi xkanajlakgolh Adán chu Eva? 2) ¿Tuku xlakata Jehová ni tunkun kamasputulh tiku ni kgalhakgaxmatkgolh?

⁸ Satanás tsukulh talalakatawaka Jehová akxni tlawalh pi Adán chu Eva ni xkgalhakgaxmatkgolh. Xla xlakaskin pi Adán chu Eva xlakpuwankgolh pi Dios xaʼakgsanina, nixatlan mapakgsina tiku ni xlakaskin pi tlan xkakitaxtunilh. Satanás wa pi latamanin ni maklakaskinaw pi Dios nakinkawaniyan tuku natlawayaw. Nachuna wa pi Adán chu Eva tlan xʼakstukan xlaksakkgolh tuku tlan chu tuku nitlan. ¿Tuku xʼama tlawa Jehová? Tlan xkamalakgsputulh tiku ni kgalhakgaxmatkgolh chu xmasputulh tuku nitlan. Pero komo chuna xtlawalh ni xlimasiyalh pi Satanás xaʼakgsanina.

⁹ Jehová ni tunkun kamasputulh tiku ni kgalhakgaxmatkgolh, wata mastalh talakaskin pi latamanin xʼakstukan  xtapakgsikgolh tsinu kilhtamaku. Chuna xlitasiyalh pi Satanás xaʼakgsanina chu pi wa Jehová tiku katsi tuku tlan kimpalakatakan. Tlakg nakatsiniyaw xpalakata uma kcapítulo 11. Chu wix, ¿tuku lakpuwana xlakata tuku laksakkgolh Adán chu Eva? ¿Tlan pi wa kanajlanikgolh Satanás chu ni wa Dios? Jehová xkamaxkinit putum tuku xkgalhikgo,  latamat nema ni xkgalhi talakgalhin, akgtum xastlan pulataman chu akgtum tlan taskujut. Pero Satanás nitu xtlawanit xpalakatakan. Komo wix anta xtitawila, ¿tuku xtitlawa?

10. ¿Tuku lu xlakaskinka nalaksakaw?

¹⁰ La uku kilhtamaku akinin na wi tuku nalaksakaw kkilatamatkan. Talakaskin nalaksakaw komo wa Jehová nakinkamapakgsiyan o wa Satanás. Komo nalaksakaw pi wa nakgalhakgaxmataw Jehová, namakgtayayaw nalimasiya pi Satanás xaʼakgsanina (Salmo 73:28; kalikgalhtawakga Proverbios 27:11). Ni lhuwa latamanin laksakkgo nakgalhakgaxmatkgo Dios. Nachuna, xla ni wa mapakgsinama kkakilhtamaku. Pero komo ni wa Jehová mapakgsinama, ¿tiku mapakgsinama?

11, 12. 1) ¿Tuku kinkamasiyaniyan xlakata tuku malaknunilh Satanás Jesús? 2) ¿Tuku textos masiya pi Satanás mapakgsinama kkakilhtamaku?

¹¹ Jesús xkatsi tiku xlikana mapakgsinama kkakilhtamaku. Akgtum kilhtamaku, Satanás masiyanilh Jesús «putum tamapakgsin xalak kakilhtamaku chu xlilanka». Chu malaknunilh uma: «Putum umakgolh nakmaxkiyan komo natatsokgostaya, chu kaj makgtum nakinkakninaniya» (Mateo 4:8, 9; Lucas 4:5, 6). ¿Tuku kinkamasiyaniyan tuku wa Satanás? Komo umakgolh tamapakgsin ni xla Satanás, nila xmalaknunilh Jesús. Liwana tasiya pi putum tamapakgsin xla Satanás.

¹² Max nalakpuwana: «¿Tuku xlakata wa Satanás tiku mapakgsinama kkakilhtamaku? ¿Ni wa Jehová Dios tiku kgalhi putum litliwakga chu malakatsukilh putum tuku anan?» (Apocalipsis 4:11). Chuna. Pero Jesús liwana wa pi Satanás wa «xmapakgsina uma kakilhtamaku» (Juan 12:31; 14:30; 16:11). Apóstol Pablo limapakuwilh Akgskgawini pi wa «dios xalak uma kakilhtamaku» (2 Corintios 4: 3, 4). Chu apóstol Juan tsokgli pi «putum kakilhtamaku wi kxmakan Akgskgawini» o Satanás (1 Juan 5:19).

13. ¿Tuku xlakata maklakaskinaw xasasti kakilhtamaku?

¹³ Kʼuma kakilhtamaku tlakg taliwakama tuku nitlan. Anan guerras, tiku akgskgawinankgo, tiku lakgaputiyunankgo chu kaniwa latlawanikan tuku nitlan. Latamanin nila masputukgo uma taʼakglhuwit maski lhuwa tuku tlawakgo. Wa xlakata, Dios nialh makgas namasputu uma nitlan kakilhtamaku kʼguerra xla Armagedón chu nawili akgtum xasasti chu xaʼakgstitum kakilhtamaku (Apocalipsis 16:14-16). (Kaʼakxilhti nota 10, niku wan «Armagedón»).

14. 1) ¿Tiku laksakli Dios xlakata namapakgsinan kxTamapakgsin? 2) ¿Tuku xlichuwinanit Biblia xlakata Jesús?

¹⁴ Jehová laksakli Jesucristo xlakata wa namapakgsinan kxTamapakgsin anta kʼakgapun. Biblia makgasata lichuwinalh pi Jesús xʼama mapakgsinan la komo «xPuxku Takaksni» chu xtamapakgsin nikxni xʼama sputa (Isaías 9:6, 7). Jesús kamasiyanilh kstalaninanin la naskinkgo kʼoración uma tamapakgsin akxni wa: «Kamilh minTamapakgsin. Kalalh mintalakaskin chuna la kʼakgapun nachuna kalalh kkatiyatni» (Mateo 6:10). Kcapítulo 8 nakatsiyaw pi xTamapakgsin Dios namapakgsinan kkakilhtamaku chu nialh wa latamanin (kalikgalhtawakga Daniel 2:44). Alistalh, uma Tamapakgsin natlawa pi Katiyatni akgtum paraíso nawan (kaʼakxilhti nota 11, niku wan «xTamapakgsin Dios»).

15. ¿Tiku nalitaxtukgo «xasasti katiyatni»?

¹⁵ Biblia malaknu: «Kgalhkgalhimanaw xasasti akgapun chu xasasti katiyatni» chu «anta putum kilhtamaku natlawakan tuku xaʼakgstitum» (2 Pedro 3:13; Isaías 65:17). Biblia lakgachunin limaklakaskin tachuwin «katiyatni»  akxni kalichuwinan latamanin (Génesis 11:1). Wa xlakata «xasasti katiyatni», wa kilhchanima latamanin tiku kgalhakgaxmatkgo Dios, tiku nalatamakgo kParaíso kKatiyatni.

16. 1) ¿Tuku tamaskiwin nakamaxki Dios tiku nalatamakgo kxasasti kakilhtamaku? 2) ¿Tuku kilitlawatkan xlakata namakglhtinanaw uma tamaskiwin?

¹⁶ Jesús malaknu pi Dios nakamaxki «latamat nema ni kgalhi xlisputni», tiku nalatamakgo kxasasti kakilhtamaku (Marcos 10:30). ¿Tuku kilitlawatkan xlakata namakglhtinanaw uma tamaskiwin? Xatakgalhtin wi kJuan 3:16 chu 17:3 (kalikgalhtawakga). Kaʼakxilhwi tuku lichuwinan Biblia xlakata la nawan latamat anta kParaíso.

17, 18. ¿Tuku likatsiyaw pi kParaíso naʼanan takaksni chu nialhtu katilipekuaw?

¹⁷ Nialh katiʼanalh tuku nitlan, guerra, tiku lakatsala limapakgsin chu tiku ni machokgo xtasitsi. Nialh katiʼanalh kKatiyatni tiku nitlan likatsikgo (Salmo 37:10, 11). Katiyatni nalitatsama latamanin tiku napaxkikgo chu nakgalhakgaxmatkgo Dios. Ankgalhin naʼanan takaksni (Salmo 72:7). Dios namasputu guerras (Salmo 46:9; Isaías 2:4).

¹⁸ Xkachikin Jehová nialhtu katilipekuankgolh. Akxni israelitas xkgalhakgaxmatkgo Dios, xla kuenta xkatlawa chu xlakan nitu xlipekuankgo (Levítico 25:18, 19). Anta kParaíso, akinin na nialhtu katilipekuaw chu nialhti katipekuaniw. Putum kilhtamaku nitu kintikamakgapekuan (kalikgalhtawakga Isaías 32:18 chu Miqueas 4:4).

19. ¿Tuku likatsiyaw pi naʼanan lhuwa liwat kxasasti kakilhtamaku?

¹⁹ Naʼanan lhuwa liwat. Biblia wan: «Na’anan lhuwa liwat kkatiyatni, klaklanka sipi nachuna lhuwa naʼanan» (Salmo 72:16). Jehová «nakinkasikulunatlawayan» chu «katiyatni lhuwa tuku namakgala» (Salmo 67:6).

20. ¿Tuku likatsiyaw pi Katiyatni akgtum Paraíso nawan?

²⁰ Xlikalanka Katiyatni akgtum paraíso nawan.  Nakgalhiyaw lakstlan chiki chu lakstlan jardín (kalikgalhtawakga Isaías 65:21-24; chu Apocalipsis 11:18). Xlikalanka Katiyatni lu stlan nawan chuna la kjardín xaʼEdén. Jehová nakinkamaxkiyan putum tuku namaklakaskinaw. Biblia lichuwinan uma xlakata Dios: «Wix malakkiya mimakan chu kamaxkiya tuku maklakaskinkgo putum tuku staknankgo» (Salmo 145:16).

21. ¿Tuku likatsiyaw pi latamanin chu animales akxtum nalatamakgo?

²¹ Latamanin chu animales tlan akxtum nalatamakgo. Animales nialh katikatlawanikgolh tuku nitlan latamanin. Chu animales nema xalakluku nitu katikatlawanikgolh laktsu kamanan (kalikgalhtawakga Isaías 11:6-9; 65:25).

22. ¿Tuku natlawa Jesús xpalakatakan tiku tatatlakgo?

²² Nialhti katitatatlalh. Akxni Jesús xlama kKatiyatni, kamakuchilh lhuwa latamanin (Mateo 9:35; Marcos 1:40-42; Juan 5:5-9). Chu xlakata wa namapakgsinan kxTamapakgsin Dios nakamakuchi putum tiku tatatlakgo. Niti katiwa: «Ktatatla» (Isaías 33:24; 35:5, 6).

23. ¿Tuku natlawa Dios xpalakatakan tiku nikgonita?

²³ Tiku nikgonita nalatamaparakgo. Dios malaknu pi nakamalakastakwanipara lhuwa latamanin tiku nikgonita. «Dios nakamalakastakwani tiku xaʼakgstitum chu tiku ni xaʼakgstitum» (Hechos 24:15; kalikgalhtawakga Juan 5:28, 29).

24. ¿Tuku lakpuwana wix xlakata nalatamayaw kParaíso?

²⁴ Kimputumkan tlan nalaksakaw komo tlakg nakatsiniyaw xlakata Jehová chu naskujnaniyaw o natlawayaw tuku akinin lakaskinaw. Komo nakgalhakgaxmataw Jehová, nakgalhiyaw akgtum tlan latamat kkilhtamaku nema aku mima. Jesús wanilh chatum chixku tiku kxtokgowakakanit kxpaxtun: «Nakintatawilayapi kParaíso» (Lucas 23:43). Tlakg kakatsiniw xlakata Jesucristo chu la natlawa pi nakgantaxtu tuku malaknunit Dios.