1. ¿Tuku takgalhskinin max nalilakpuwana komo likgalhtawakgakgonitata uma libro?

KʼUMA libro, lhuwa tuku katsininita xlakata Biblia, la komo pi Dios malaknu latamat nema nikxni katisputli, tuku kinkaʼakgspulayan akxni niyaw chu takgalhkgalhin xlakata talakastakwanat (Eclesiastés 9:5; Lucas 23:43; Juan 5:28, 29; Apocalipsis 21:3, 4). Max tsukunitata pina ktamakxtumit xla xtatayananin Jehová chu kanajlaya pi xlakan kgalhikgo xaxlikana takanajla (Juan 13:35). Nachuna, max liskujpat xlakata tlan natalalipina Jehová chu lakpuwanita naskujnaniya. Wa xlakata  max lakpuwana: «¿Tuku atanu talakaskin naktlawa xlakata nakskujnani Dios?».

2. ¿Tuku xlakata xtamunuputun chatum chixku xalak Etiopía?

² Wa uma takgalhskinin nema tlawalh chatum chixku xalak Etiopía tiku latamalh kxapulana siglo. Xtitaxtunit kilhtamaku lata Jesús lakastakwanalh, Felipe, tiku kstalanina xwanit, litachuwinalh etíope pi Jesús wa Mesías. Uma etíope lu kaks lilakawa tuku katsinilh chu tunkun wa: «¡Kaʼakxilhti! Unu wi chuchut; ¿tuku tlawa pi nila naktamunu?» (Hechos 8:26-36).

3. 1) ¿Tuku kawanilh Jesús kstalaninanin? 2) ¿La xlitamunut chatum lataman?

³ Biblia liwana kinkamasiyaniyan pi komo wix skujnaniputuna Jehová, talakaskin natamunuya. Jesús kawanilh kstalaninanin: «Kakamakgtayatit latamanin xliputum kachikinin xlakata kistalaninanin nawankgo». Chu alistalh wampa: «Kakamunutit» (Mateo 28:19). Jesús kawilinilh xaliʼakxilhtit akxni tamunulh. Akxni tamunulh, ni kaj xman akgmunuka, wata xachatuminika mujuka kchuchut (Mateo 3:16). La uku, akxni wi tiku tamunu, nachuna talakaskin xachatuminika namujukan kchuchut.

4. ¿Tuku kalimasiyaniyaw amakgapitsin akxni tamunuyaw?

⁴ Akxni wi tiku tamunu, kalimasiyaniyaw amakgapitsin pi xlikana xʼamigo Dios litaxtuputunaw chu skujnaniputunaw (Salmo 40:7, 8). Wa xlakata, max wix nalakpuwana: «¿Tuku kilitlawat xlakata tlan naktamunu?».

5. 1) ¿Tuku talakaskin natlawaya wix xlakata tlan natamunuya? 2) ¿Tuku xlakata lu xlakaskinka pi ankgalhin napina ktamakxtumit?

⁵ Xlakata tlan natamunuya, talakaskin pi nalakgapasa Jehová chu Jesús. Chuna tlawapat xlakata likgalhtawakgapat Biblia (kalikgalhtawakga Juan 17:3). Pero wi  atanu tuku talakaskin natlawaya. Biblia wan pi wix milikgalhit «xatakgatsin takatsin xlakata xtalakaskin Dios» (Colosenses 1:9). Xtamakxtumitkan xtatayananin Jehová namakgtayayan tlakg tlan natalalipina Dios. Wa xlakata lu xlakaskinka pi ankgalhin napina (Hebreos 10:24, 25).

6. ¿Talakaskin pi putum nakatsiya tuku lichuwinan Biblia xlakata tlan natamunuya?

⁶ Xlikana, Jehová ni kgalhkgalhi pi wix putum nakatsiya tuku lichuwinan Biblia xlakata tlan natamunuya. Nachuna ni kgalhkgalhilh pi etíope putum xkatsilh xlakata Biblia akxni tamunulh (Hechos 8:30, 31). Chuntiya nalakgapastilhayaw Jehová (Eclesiastés 3:11). Pero, xlakata tlan natamunuya, talakaskin pi wix nakatsiniya chu namakgamakglhtinana xtamasiy Biblia nema ni xalaktuwa (Hebreos 5:12).

7. ¿La makgtayanitan mintakgalhtawakga xalak Biblia?

⁷ Biblia lichuwinan pi «tiku ni kgalhi takanajla nila makgapaxuwa Dios» (Hebreos 11:6). Wa xlakata talakaskin pi wix nakgalhiya takanajla xlakata tlan natamunuya. Biblia nachuna lichuwinan pi makgapitsin latamanin xalak Corinto kakgaxmatnikgolh kstalaninanin Jesús chu «kanajlakgolh chu tamunukgolh» (Hechos 18:8). Nachuna, xlakata likgalhtawakgaya Biblia makgtayanitan tlan nakgalhiniya takanajla xtamalaknun Dios chu xtamakamastan Jesús, nema tlan kinkalakgmaxtuyan ktalakgalhin chu klinin (Josué 23:14; Hechos 4:12; 2 Timoteo 3:16, 17).

8. ¿Tuku namaʼakgpuwantiniyan nakalitachuwinamputuna latamanin tuku katsinipat?

⁸ Chuna la tlakg nakatsinitilhaya tuku masiya Biblia chu akxni na’akxilha la makgtayayan kmilatamat, mintakanajla tlakg natatliwakglha. Nakalitachuwinamputuna  latamanin tuku katsinipat (Jeremías 20:9; 2 Corintios 4:13). Pero ¿tiku tlan nakalitachuwinana?

9, 10. 1) ¿Tiku tlan nakalitachuwinana tuku katsinipat? 2) ¿Tuku talakaskin natlawaya xlakata tlan natsukuya lichuwinana Dios?

⁹ Max tlan xkalitachuwinanti tiku xalak mifamilia tuku katsinipat, miʼamigos, tiku lakatsu katawila, tiku akxtum katapina kʼescuela o tiku kataskuja. Uma lu tlan. Pero akxni nakatachuwinana kakalimasiyani kakni chu tlan kakalikatsini. Alistalh, wix tlan akxtum nakatapina natalan xalak congregación akxni ankgo lichuwinankgo Dios. Akxni wix chuna nalakaskina, tlan natachuwinana tiku makgalhtawakgeyan chu nawaniya pi pimputuna lichuwinana Dios. Komo nawaniyan pi makgatsiya tuku taskini chu komo makgantaxtipat xtastakyaw Biblia kmilatamat, minchatiykan tlan nakatachuwinanatit chatiy lakgkgolotsin xalak congregación.

¹⁰ Lakgkgolotsin natachuwinankgoyan xlakata na’akxilhkgo komo akgatekgsa chu kanajlaya tuku masiya Biblia, chu komo makgantaxtipat xtastakyaw. Nachuna, na’akxilhkgo komo wix xlikana xtatayana Jehová litaxtuputuna. Kalakapastakti pi lakgkgolotsin kakuentajtlawakgo putum tiku xalak congregación chu nachuna xlakan nakuentajtlawakgoyan. Wa xlakata ni kapekuanti akxni nakatachuwinana (Hechos 20:28; 1 Pedro 5:2, 3). Alistalh, xlakan nawanikgoyan komo tlan natsukuya lichuwinana Dios.

11. ¿Tuku xlakata lu xlakaskinka natlawayaw talakgpalit kkilatamatkan xlakata tlan na’anaw lichuwinanaw Dios?

¹¹ Max lakgkgolotsin nawanikgoyan pi wi tuku talakaskin nalakgpaliya xlakata tlan napina lichuwinana Dios. ¿Tuku xlakata lu xlakaskinka natlawaya talakgpalit kmilatamat? Xlakata akxni anaw lichuwinanaw Dios, litaxtuyaw la xlakskujnin Dios. Wa xlakata talakaskin nalinaw  kilatamatkan chuna la namaxki kakni (1 Corintios 6:9, 10; Gálatas 5:19-21).

12. ¿Tuku xlakata talakaskin pi putum akinin nakinkatapatikanan?

¹² Wi atanu tuku militlawat xlakata tlan natamunuya. Apóstol Pedro lichuwinalh: «Kamakgxtakgtit mintalakgalhinkan chu kataspittit xlakata nakaxapanikanatit mintalakgalhinkan» (Hechos 3:19). ¿Tuku kilhchanima makgxtakgkan talakgalhin? Kilhchanima nitlan nalimakgkatsiya tuku nitlan tlawanita. Akgtum li’akxilhtit, komo wix xtlawa talakgxtumit xalimaxana, xtalakaskilh nitlan xlimakgkatsi mintalakgalhin chu nialh xtlawa. Chu maski wix nikxni tlawanita akgtum lanka talakgalhin chu ankgalhin liskujnita xlakata natlawaya tuku xatlan, chuntiya talakaskin naskiniya Dios pi katapatin, xlakata putum akinin ankgalhin makglakgalhinanaw chu maklakaskinaw pi Dios nakinkatapatiyan (Romanos 3:23; 5:12).

13. ¿Tuku wamputun taspitkan?

¹³ ¿Kajwatiya talakaskin nitlan nalimakgkatsiyaw tuku tlawanitaw? Ni. Apóstol Pedro na lichuwinalh: «Kataspittit». Uma wamputun pi nalakgmakgana nixatlan tayat nema xkgalhiya makgasa chu natlawaya tuku xatlan. Kalilakpuwanti uma: kalichuwinaw pi wix xlipulanajku pimpat kʼatanu kachikin. Titaxtu tsinu kilhtamaku, chu akxilha pi nialh anta pimpat niku milianat. ¿Tuku xtlawa? Max nialh lu lakapala katipi, natachokgoya, nataspita chu anta napina niku milianat. Nachuna, akxni nalikgalhtawakgaya Biblia max naʼakxilha pi wi tuku mililakgpalit kmilatamat. Wa xlakata kataspitti, o kalakgpali tuku natalakaskin chu katlawa tuku xatlan.

14. ¿La tlan natamakamastaniya Jehová?

¹⁴ Atanu tuku militlawat xlakata tlan natamunuya wa pi natamakamastaniya Jehová. Akxni chatum lataman tamakamastaniputun Dios, tlawani akgtum oración niku malaknuni pi kajwatiya xla naskujnani chu wa tiku tlakg xlakaskinka nalitaxtu kxlatamat (Lucas 4:8).

15, 16. ¿Tuku tlawa pi chatum lataman natamakamastaniputun Jehová?

¹⁵ Akxni malaknuniyaw Jehová pi kajwatiya xla naskujnaniyaw xtachuna la komo akxni malaknuniyaw chatum tiku lu paxkiyaw pi akxtum natalatamayaw xliputum kilhtamaku. Kalilakpuwanti chatum tsumat chu chatum kgawasa tiku lalakgapasmakgo. Chuna la kgawasa lakgapastilhama xtaskin, tlakg paxki chu tatamakgaxtokgputun. Maski uma tuku nalaksaka ni kaj takgaman, xla liwana lakpuwanit namakgantaxti xlakata lu paxki xtaskin.

¹⁶ Chuna la wix nalakgapastilhaya Jehová, tlakg napaxkiya chu naliskujputuna xlakata naskujnaniya. Uma natlawa pi namakamaxkiya milatamat. Jesús kawanilh kstalaninanin: «Komo wi tiku kistalaniputun, akstu kalakgmakganka» (Marcos 8:34). Akstu nalakgmakgankana kilhchanima nakgalhakgaxpata Jehová maski kalalh tuku nala. Wa tlakg xlakaskinka naʼakxilha Jehová nixawa tuku miʼakstu tlawaputuna (kalikgalhtawakga 1 Pedro 4:2).

17. ¿Tuku xlakata makgapitsin latamanin nina tamakamastanikgo Jehová?

¹⁷ Makgapitsin latamanin ni tamakamastaniputunkgo Jehová xlakata pekuankgo komo nila namakgantaxtikgo tuku malaknunikgolh. Max ni makgalipuwamputunkgo. O max lakpuwankgo pi Jehová ni katikaskinilh kuenta  xlakata tuku natlawakgo komo nina tamakamastanikgo.

18. ¿Tuku namakgtayayan ni nalakpuwana pi max namakgatsankgananiya Jehová?

¹⁸ Tapaxkit nema kgalhiniya Jehová namakgtayayan xlakata ni napekuana chu ni nalakpuwana pi namakgatsankgananiya. Xlakata paxkiya, naliskuja namakgantaxtiya tuku malaknuni (Eclesiastés 5:4; Colosenses 1:10). Chu ni tuwa katimakgkatsi namakgantaxtiya xtalakaskin. Apóstol Juan lichuwinalh: «Wa uma kilhchanima pi paxkiyaw Dios: nakgalhakgaxmataw xlimapakgsin; chu xlimapakgsin ni akgtum takuka» o ni tuwa makgantaxtikan (1 Juan 5:3).

19. ¿Tuku xlakata ni milipekuanat natamakamastaniya Jehová?

¹⁹ Ni talakaskin ni makglakgalhinanin nawanaw xlakata natamakamastaniyaw Jehová. Xla nikxni kintikaskinin tuku nila makgantaxtiyaw (Salmo 103:14). Nachuna, Jehová namakgtayayan xlakata natlawaya tuku xatlan (Isaías 41:10). Chuna la wan Biblia: «Xla lakatitum nalin mintiji». Wa xlakata kalipawanti Jehová xliputum minaku (Proverbios 3:5, 6).

20. ¿Tuku atanu militlawat komo tamakamastaninitata Jehová?

²⁰ ¿Makgatsiyata tuku talakaskin xlakata tlan natamunuya? Komo chuna, akxni tamakamastaninitata nawan Jehová, wi atanu tuku natalakasin natlawaya: natamunuya.

21, 22. ¿Tuku talakaskin natlawaya xlakata nalimasiyaya mintakanajla kxlakatin amakgapitsin?

²¹ Kawani tala tiku kapulalin Lakgkgolotsin xalak congregación pi wix tamakamastaninita Jehová k’oración chu tamunuputuna. Xla nalakkaxwili pi chatiy lakgkgolotsin natlawanikgoyan takgalhskinin xlakata Biblia.  Komo xlakan naʼakxilhkgo pi wix makgatsiya tuku taskini, nawanikgoyan pi tlan natamunuya kxalanka tamakxtumit xla xtatayananin Jehová. Anta kxalanka tamakxtumit namastakan akgtum taʼakgchuwin niku nalichuwinankan xlakata tuku kilhchanima tamunukan. Tala tiku namasta taʼakgchuwin nakatlawani akgtiy takgalhskinin tiku natamunukgo. Akxni wix nakgalhtinana, nalimasiyaya  mintakanajla kxlakatin amakgapitsin (Romanos 10:10).

²² Chu alistalh, wix tlan natamunuya. Xachatuminika namujukana kchuchut. Uma nakalimasiyani amakgapitsin pi wix tamakamastaninita Dios chu xtatayana Jehová litaxtuya.

23. ¿Tuku wamputun tamunukan «kxtukuwani xaTlat chu xaKgawasa chu kxtukuwani espíritu santo»?

²³ Jesús lichuwinalh pi kstalaninanin xʼamakgolh tamunukgo «kxtukuwani xaTlat chu xaKgawasa chu kxtukuwani espíritu santo» (kalikgalhtawakga Mateo 28:19). ¿Tuku wamputun umakgolh tachuwin? Pi liwana kanajlayaw pi kajwatiya Jehová lakgchan namapakgsinan, pi liwana katsiyaw tuku lakgayawakanit Jesús xlakata xtalakaskin Dios chu la limaklakaskin Jehová xʼespíritu santo xlakata namakgantaxti xtalakaskin (Salmo 83:18; Mateo 28:18; Gálatas 5:22, 23; 2 Pedro 1:21).

24. ¿Tuku limasiyayaw akxni tamunuyaw?

²⁴ Akxni tamunukan lu xlakaskinka tuku limasiyakan. Akxni xachatuminika namujukana kchuchut, xtachuna la komo «xnit» xlakata namakgxtakga la xlipina milatamat makgasa. Chu, akxni natakuta kchuchut, namatsukiya xasasti milatamat xlakata natlawaya xtalakaskin Dios. Chuna wix nalimasiyaya pi lata ama kilhtamaku xlakskujni Dios litaxtuya. Kalakapastakti pi ni kaj chatum lataman tamakamastanipat. Wata wa Jehová tiku makamaxkipat milatamat.

25. ¿Tuku naʼakxilhaw kxaʼawatiya capítulo?

²⁵ Komo natamakamastaniya Jehová tlakg tlan natalalipina (Salmo 25:14). Pero maski tamununitawa ni wamputun pi lakgtaxtunitawa. Apóstol Pablo lichuwinalh: «Kaliskujtit xlakata tlan nalakgtaxtuyatit» (Filipenses 2:12). Uma wamputun pi akxni tamunuyaw aku natsuku kilatamatkan la xlakskujnin Jehová. Wa xlakata, ¿tuku militlawat xlakata chuntiya xʼamigo Jehová nalitaxtuya? Xaʼawatiya capítulo xla uma libro nakinkamaxkiyan xatakgalhtin.