1, 2. ¿Tuku katsiputunkgo lhuwa latamanin?

CHALI chali kgaxmataw pi la tuku nitlan kkakilhtamaku. Kalilakpuwanti uma: kʼakgtum kachikin tachiki tiyat chu lhuwa latamanin nikgo, chatum chixku kamakgni latamanin, chatum tse kanimakgan xkamanan xlakata chipa cáncer.

² Akxni la tuku nitlan, lhuwa latamanin lilakpuwankgo chu katsiputunkgo tuku xlakata kakilhtamaku litatsamanit tasitsi chu tapatin. ¿Minit kilhtamaku nachuna lakpuwanita?

3, 4. 1) ¿Tuku kgalhskininalh Habacuc? 2) ¿Tuku malaknunilh Jehová?

³ Biblia lichuwinan pi makgapitsi xlakskujnin Dios na xkatsiputunkgo tuku xlakata anan tapatin. Akgtum liʼakxilhtit, palakachuwina Habacuc kgalhskilh Jehová: «¿Tuku xlakata kimaʼakxilhniya lhuwa tuku nitlan? ¿Tuku xlakata mastaya talakaskin nakamapatinikan latamanin? ¿Tuku xlakata anan tuku masputunan chu tuku xlakata kakxilha akxni katlawanikan tuku nitlan latamanin? Chu ¿tuku xlakata latalatlawakan chu anan lhuwa taʼakglhuwit?» (Habacuc 1:3).

⁴ Biblia lichuwinan pi Jehová malaknunilh Habacuc pi xʼama lakkaxtlawa taʼakglhuwit (Habacuc 2:2,3). Jehová lu kapaxki latamanin. Biblia wan: «Xla kalilakgaputsayan» (1 Pedro 5:7). Dios lu ni akxilhputun tapatin (Isaías 55:8, 9). Wa xlakata, ¿tuku xlakata anan lhuwa tapatin? Kaʼakxilhwi.

5. 1) ¿Tuku wankgo xpulalinanin nixaxlikana takanajla? 2) ¿Chu tuku wan Biblia?

⁵ Lhuwa pastores, curas chu tiku pulalinkgo nixaxlikana  takanajla wankgo pi patinanaw xlakata wa xtalakaskin Dios. Max wankgo pi Dios lakkaxwilinit tuku nakinkaʼakgspulayan chu asta tuku nitlan natitaxtuyaw. Chu asta max nawankgo pi nikxni katiʼakgatekgswi tuku xlakata patinanaw. Amakgapitsi wankgo pi latamanin chu laktsu kamanan nikgo xlakata natatawilakgo Dios kʼakgapun. Pero uma nixlikana. Jehová nikxni tlawa pi kalalh tuku nitlan. Biblia wan: «¡Nipara tsinu nalakpuwanaw pi xaxlikana Dios natlawa tuku nitlan, chu Tiku kgalhi putum litliwakga nikxni tlawa tuku ni xaʼakgstitum!» (Job 34:10).

6. ¿Tuku xlakata latamanin limawakakgo Dios putum tapatin?

⁶ Lhuwa latamanin limawakakgo Dios putum tapatin, xlakata lakpuwankgo pi wa mapakgsinama kkakilhtamaku. Pero kcapítulo 3 katsiniw pi wa Satanás tiku mapakgsi kakilhtamaku.

7, 8. ¿Tuku xlakata anan lhuwa tapatin?

⁷ Biblia wan pi «kakilhtamaku wi kxmakan Akgskgawini» (1 Juan 5:19). Xmapakgsina uma kakilhtamaku wa Satanás, tiku lu lixkajnit likatsi. Xla kaʼakgskgawima «putum tiku lamakgolh kkatiyatni» (Apocalipsis 12:9). Lhuwa latamanin stalanikgo xliʼakxilhtit. Wa uma pulaktum tuku xlakata kakilhtamaku litatsamanit taʼakgsanin, tasitsi chu tuku nitlan.

⁸ Kaʼakxilhwi xlipulaktiy tuku xlakata anan tapatin. Xlakata Adán chu Eva ni kgalhakgaxmatkgolh Jehová, kamatitaxtinikgolh talakgalhin xkamanankan. Wa xlakata latamanin ankgalhin tlawakgo tuku nitlan chu kamakgapatinankgo amakgapitsin. Tlakg lanka kamakgkatsikan nixawa amakgapitsin, latalatlawakgo, ankgo kʼguerra chu katlawanikgo tuku nitlan amakgapitsin (Eclesiastés 4:1; 8:9). Xlipulaktutu tuku xlakata anan tapatin wa «xlakata  min kilhtamaku akxni la tuku nitlan chu tuku kaj xalan [o lakapala] la» (Eclesiastés 9:11). Uma wamputun pi max wi tuku lakapala nalaniyaw o nala tuku nitlan akxni wi niku titaxtumaw.

9. ¿Tuku xlakata tlan nawanaw pi wi tuku xlakata Dios mastama talakaskin kaʼanalh tapatin?

⁹ Jehová ni wa tlawa pi kaʼanalh tapatin. Ni wa lin kuenta xlakata tlawakan tuku nitlan, guerras, lawilinikan chu xlakata latlawanikan tuku ni xaʼakgstitum, ni wa xkuenta xlakata tachiki tiyat, akxni min tliwakga un, lhuwa senan chu atanu tuku masputunan. Pero max wix nalakpuwana: «Komo Jehová wa tiku kgalhi xliputum litliwakga, ¿tuku xlakata masta talakaskin chuntiya kalalh tuku nitlan?». Katsiyaw pi Dios lu kinkapaxkiyan, wa xlakata tlan nawanaw pi xla katsi tuku xlakata mastama talakaskin kaʼanalh tapatin (1 Juan 4:8).

10. ¿Tuku limawakalh Satanás Jehová?

¹⁰ Anta kjardín xa’Edén, Satanás kaʼakgskgawilh Adán chu Eva. Limawakalh Jehová pi xla nitlan mapakgsina. Kawanilh pi wi tuku Dios ni xkamaxkiputun. Satanás xtlawaputun pi xkanajlakgolh pi wa tlakg tlan mapakgsina nixawa Jehová chu pi ni xmaklakaskinkgo xtamakgtay (Génesis 3:2-5). (Kaʼakxilhti nota 27, niku wan «Jehová lakgchan namapakgsinan»).

11. ¿Tuku takgalhskinin talakaskin nakgalhtiyaw?

¹¹ Adán chu Eva ni kgalhakgaxmatkgolh Jehová chu chuna talalakatawakakgolh. Lakpuwankgolh pi wa xkalakgchan nalaksakkgo tuku tlan chu tuku nitlan. ¿Tuku tlan xtlawalh Jehová xlakata nakalimasiyani Adán chu Eva pi nichuna la xlakpuwankgo chu pi wa katsi tuku tlan kimpalakatakan?

12, 13. 1) ¿Tuku xlakata Jehová ni tunkun kamalakgsputulh Adán chu Eva? 2) ¿Tuku xlakata Jehová mastanit talakaskin pi Satanás namapakgsi kakilhtamaku chu pi latamanin x’akstukan natapakgsikgo?

 ¹² Dios xlakaskin pi Katiyatni akgtum paraíso xlitaxtulh, chu pi Adán chu Eva xlimalakgatsamakgolh xkamanan. Chu Jehová namakgantaxti xtalakaskin maski Satanás ni maxkiputun talakaskin (Génesis 1:28; Isaías 55:10, 11). Wa xlakata Jehová ni tunkun kamalakgsputulh Adán chu Eva, wata kamaxkilh talakaskin nakgalhikgo kamanan. Chuna xkamanankan Adán chu Eva tlan xlaksakkgolh tiku nakamapakgsi.

¹³ Satanás limawakalh tuku nitlan Jehová kxlakatin lhuwa ángeles (Job 38:7; Daniel 7:10). Wa xlakata Jehová maxkilh kilhtamaku Satanás xlakata nalimasiya komo xlikana tuku xkilhwama. Nachuna kamaxkilh kilhtamaku latamanin xlakata x’akstukan natapakgsikgo chu chuna nalimasiyakgo komo xlikana ni maklakaskinkgo xtamakgtay Jehová.

14. ¿Tuku liwana tasiyanit chuna la titaxtunit kilhtamaku?

¹⁴ Chuna la titaxtunit kilhtamaku, latamanin x’akstukan tapakgsikgonit, pero xmapakgsinakan nitlan tuku katlawanikgonit. Wa xlakata liwana tasiya pi Satanás xa’akgsanina chu latamanin xlikana maklakaskinkgo xtamakgtay Dios. Palakachuwina Jeremías xlikana tuku xlichuwinama akxni wa: «Oh, Jehová, liwana kkatsi pi chixku ni lakgchan namapakgsi xtiji. Chixku ni lakgchan x’akstu napulalinkan» (Jeremías 10:23).

15, 16. 1) ¿Tuku xlakata Jehová mastanit talakaskin lhuwa kilhtamaku kaʼanalh tapatin? 2) ¿Tuku xlakata Jehová nina lakkaxtlawa taʼakglhuwit nema Satanás malakatsukinit?

¹⁵ ¿Tuku xlakata Jehová mastanit talakaskin lhuwa kilhtamaku kaʼanalh tapatin? ¿Tuku xlakata masta talakaskin  kalalh tuku nitlan? Talakaskinit kilhtamaku xlakata nalitasiya pi Satanás nitlan mapakgsina. Latamanin wilikgonit pulaklhuwa pumapakgsin, pero putum nitlan kitaxtunit. Nachuna, maski ciencia chu tuku xasasti taxtuma talhuwinit, la uku anan lhuwa guerras, tlawakan tuku nitlan, talimaxkget chu kaniwa tlawakan tuku ni xa’akgstitum. Nila tlan kiʼakstukan natapakgsiyaw komo ni wa Dios nakinkamakgtayayan.

¹⁶ Jehová nina lakkaxtlawa taʼakglhuwit nema Satanás malakatsukinit. Komo chuna xtlawalh, xlimasiyalh pi tataya xtamapakgsin Satanás, chu Dios nikxni tataya Satanás. Nachuna, latamanin xlakpuwankgolh pi tlan x’akstukan natapakgsikgo. Pero uma nixlikana, Dios nila tataya uma (Hebreos 6:18).

17, 18. ¿Tuku natlawa Jehová xlakata nalakkaxtlawa putum tuku nitlan tlawanit Satanás?

¹⁷ ¿Tlan nalakkaxtlawa Jehová putum tuku nitlan tlawakgonit Satanás chu latamanin? Chuna. Xla kgalhi putum limakgatliwakga. Jehová katsi akxni nalitasiya pi nixlikana tuku Satanás limawakalh. Chu alistalh natlawa pi Katiyatni akgtum paraíso nawan, chuna la xlakaskin xapulana. «Putum tiku wilakgolh kputaknun» nalakastakwanamparakgo (Juan 5:28, 29). Latamanin nialh katitatatlakgolh chu nialh katinikgolh. Jehová nalimaklakaskin Jesús «xlakata namalakgsputu putum tuku tlawanit Akgskgawini» (1 Juan 3:8). Xlakata nina chin uma kilhtamaku, kapaxtikatsiniw Jehová xlakata xakgalhkgalhina. Uma kinkamaxkiyan kilhtamaku xlakata tlan nalakgapasaw chu nalaksakaw komo wa lakaskinaw nakinkamapakgsiyan (kalikgalhtawakga 2 Pedro 3:9, 10). Nachuna, akxni patinamaw, Jehová kinkamakgtayayan natayaniyaw (kalikgalhtawakga 1 Corintios 10:13).

 ¹⁸ Jehová ni fuerza kinkawaniyan pi wa natapakgsiniyaw. Kinkamaxkinitan akgtum tamaskiwin nema lu lanka xtapalh: tlan nalaksakaw tuku natlawayaw. Kaʼakxilhwi tuku kilhchanima.

19. 1) ¿Tuku tamaskiwin kinkamaxkinitan Jehová? 2) ¿Tuku xlakata napaxtikatsiniyaw Jehová xlakata uma tamaskiwin?

¹⁹ Jehová kinkamaxkin talakaskin xlakata tlan nalaksakaw tuku natlawayaw. Xlakata uma tamaskiwin, tlan nalaksakaw tuku natlawayaw kkilatamatkan chu nalaksakaw komo naskujnaniyaw Jehová o ni. Akinin ni xtachuna la animales, xlakan ni kgalhikgo liskgalala xlakata nalaksakkgo tuku natlawakgo (Proverbios 30:24-28). Nachuna, akinin ni xtachuna la máquinas, nema kajwatiya tlawakgo tuku kalilakkaxtlawakanit. Tlan nalaksakaw la nalikatsiyaw, tiku nakatalalinaw chu tuku natlawayaw kkilatamatkan. Jehová lakaskin pi napaxuwayaw.

20, 21. ¿Tuku tlakg xatlan nalaksaka wix la uku?

²⁰ Jehová lakaskin pi napaxkiyaw (Mateo 22:37, 38). Xla xtachuna la chatum tlat tiku lipaxuwa pi xkgawasa nawani xliputum xnaku pi lu paxki chu ni kaj xlakata fuerza tlawama. Jehová kinkamaxkin talakaskin nalaksakaw komo naskujnaniyaw o ni. Satanás, Adán chu Eva laksakkgolh nalakgmakgankgo Jehová. Chu wix, ¿tuku nalaksaka?

²¹ Tuku tlakg tlan nalaksaka la uku wa pi naskujnaniya Jehová. Lhuwa latamanin laksakkgonit naskujnanikgo Jehová chu lakgmakgankgonit Satanás (Proverbios 27:11). Chuna la akxilhnitaw, Dios namasputu tapatin chu akgtum paraíso natlawa Katiyatni. ¿Tuku militlawat xlakata tlan anta nalatapaya? Kʼatanu capítulo naʼakxilhaw xatakgalhtin.