1. ¿Tukuya oración nalichuwinanaw kʼuma capítulo?

LHUWA latamanin lakgapaskgo oración xla padrenuestro. Jesús maklakaskilh uma oración xlakata nakamasiyani kstalaninanin la xtlawakgolh xʼoracioneskan. ¿Tuku skilh Jesús kʼuma oración? ¿Tuku xlakata lu xlakaskinka naʼakgatekgsaw tuku kilhchanima?

2. ¿Tuku pulaktutu lu xlakaskinka kinkamasiyanin Jesús pi naskinaw kʼoración?

² Jesús lichuwinalh: «Wixin chuna natlawayatit mioracionkan: “KinTlatkan tiku wilapi kʼakgapun, katamasantujlilh mintukuwani. Kamilh minTamapakgsin. Kalalh mintalakaskin chuna la kʼakgapun nachuna kalalh kkatiyatni”» (kalikgalhtawakga Mateo 6:9-13). ¿Tuku xlakata Jesús kinkamasiyanin naskinaw uma pulaktutu? (Kaʼakxilhti nota 20, niku wan «Padrenuestro»).

3. Kalichuwinanti tuku naʼakxilhaw kʼuma capítulo.

³ Katsininitawa pi Dios wanikan Jehová. Nachuna akxilhnitawa tuku xtalakaskin Dios xpalakatakan latamanin chu xlakata Katiyatni. Pero ¿tuku xwamputun Jesús akxni wa: «Kamilh minTamapakgsin»? Kʼuma capítulo naʼakxilhaw tuku xTamapakgsin Dios, tuku natlawa chu la natlawa pi namasantujlikan xtukuwani.

4. ¿Tuku xTamapakgsin Dios chu tiku xMapakgsina?

⁴ Jehová lakkaxwililh akgtum pumapakgsin anta kʼakgapun chu laksakli Jesús xlakata wa Mapakgsina nalitaxtu kʼuma Tamapakgsin. Biblia wan pi uma pumapakgsin wa xTamapakgsin Dios. Jesús wa «xMapakgsinakan mapakgsinanin chu xMalanakan malananin» (1 Timoteo 6:15). Jesús tlakg lhuwa tuku tlan tlawa kimpalakatakan nixawa  mapakgsinanin xalak kakilhtamaku. Nachuna, xla tlakg kgalhi litliwakga nixawa putum mapakgsinanin xalak kakilhtamaku.

5. ¿Tuku namapakgsi xTamapakgsin Dios chu niku wi uma Tamapakgsin?

⁵ Jesús taspitli kʼakgapun xlitipuxam kilhtamaku lata xlakastakwananit. Titaxtulh kilhtamaku, Jehová Mapakgsina tlawalh kxTamapakgsin (Hechos 2:33). Anta kʼakgapun wi uma Tamapakgsin chu namapakgsi Katiyatni (Apocalipsis 11:15). Wa xlakata, Biblia wan pi xTamapakgsin Dios akgtum tamapakgsin xalak akgapun (2 Timoteo 4:18).

6, 7. ¿Tuku xlakata Jesús tlakg xatlan Mapakgsina nixawa mapakgsinanin xalak kakilhtamaku?

⁶ Biblia wan pi Jesús lu xatlan Mapakgsina nixawa mapakgsinanin xalak kakilhtamaku, xlakata «kajwatiya xla nila niy» (1 Timoteo 6:16). Putum mapakgsinanin xalak kakilhtamaku nikgo, pero Jesús nikxni katinilh. Wa xlakata putum tuku xatlan natlawa kimpalakatakan nikxni katisputli.

⁷ Nachuna, Biblia masiya pi Jesús xaʼakgstitum chu xalakgalhamana Mapakgsina nawan. Na lichuwinanit pi «nakgalhi xʼespíritu Jehová, xʼespíritu liskgalala chu xʼespíritu taʼakgatekgsni, xʼespíritu tastakyaw chu litliwakga, xʼespíritu takatsin chu nakgalhini Jehová tapekua, chu nalipaxuwa xlakata kgalhini tapekua Jehová». Chu nachuna wan: «Ni katiputsananinalh kaj xlakata tuku akxilha, chu ni katistakyawanalh kaj xlakata tuku kgaxmatnit. Xalakatitum nakaputsanani tiku lakglimaxkgenin, chu xaʼakgstitum nakamakgtaya tiku tlan likatsikgo unu kkatiyatni» (Isaías 11:2-4). ¿Ni xkgalhiputu chatum Mapakgsina tiku chuna likatsi?

8. ¿Tuku likatsiyaw pi Jesús ni xʼakstu katimapakgsinalh?

⁸ Dios kalaksaknit makgapitsi latamanin xlakata natamapakgsinankgo  Jesús anta kʼakgapun. Akgtum liʼakxilhtit, apóstol Pablo wanilh Timoteo: «Komo chuntiya tayaniyaw, nachuna makxtum namapakgsinanaw chuna la mapakgsinanin» (2 Timoteo 2:12). ¿La kgalhalit natamapakgsinankgo Jesús?

9. 1) ¿La kgalhalit latamanin natamapakgsinankgo Jesús? 2) ¿Tukuya kilhtamaku Jehová tsukulh kalaksaka 144,000 latamanin?

⁹ Chuna la katsiw kcapítulo 7, apóstol Juan maʼakxilhnika pi Jesús xwi la Mapakgsina kʼakgapun chu xkatawi 144,000 mapakgsinanin (kalikgalhtawakga Apocalipsis 14:1). ¿Tiku umakgolh 144,000? Juan liwana lichuwinalh tiku umakgolh: «Xlakan wa stalanikgo Borrego (o Jesús) anta niku xla an». Nachuna lichuwinalh pi xlakan «katamawaxtuka kxlakgstipan latamanin» (Apocalipsis 14:4). Chu 144,000 wa tiku Dios kalaksaknit xlakata «namapakgsinankgo kkatiyatni» chu akxtum natamapakgsinankgo Jesús. Akxni xlakan nikgo, tunkun lakastakwanankgo kʼakgapun (Apocalipsis 5:10). Jehová tsukulh kalaksaka umakgolh 144,000 lata kxapulana siglo.

10. ¿Tuku xlakata wanaw pi Jehová lu kinkapaxkiyan xlakata kalaksakli Jesús chu 144,000 latamanin xlakata wa tiku nakinkamapakgsikgoyan?

¹⁰ Jehová lu kinkapaxkiyan chu wa xlakata kalaksakli latamanin xlakata wa tiku natamapakgsinankgo Jesús. Jesús lu tlan Mapakgsina nalitaxtu xlakata xla na latamalh kkatiyatni chu patinalh. Apóstol Pablo wa pi Jesús liwana katsi la makgkatsiyaw chu «kinkaʼakgatekgsniyan akxni xlajwananaw», xlakata xla «na matlawiputunka tuku nitlan kinkamatlawiputunkanan» (Hebreos 4:15; 5:8). Nachuna, umakgolh 144,000, na akgatekgskgo tuku makgkatsikgo latamanin xlakata xlakan na makglakgalhinanin chu patinankgo xlakata tajatat. Wa xlakata, liwana kakatsiw pi Jesús chu 144,000 latamanin, naʼakgatekgskgo tuku makgkatsiyaw chu kintaʼakglhuwitkan.

11. ¿Tuku xlakata Jesús kamasiyanilh kstalaninanin naskinkgo pi xlalh xtalakaskin Dios kʼakgapun?

¹¹ Jesús kamasiyanilh kstalaninanin naskinkgo pi xlalh xtalakaskin Dios kKatiyatni chu kʼakgapun. ¿Tuku xlakata? Kcapítulo 3 katsiw pi Satanás talalakatawakalh Dios. Jehová mastalh talakaskin pi Satanás chu ángeles nema ni kgalhakgaxmatnankgolh o demonios, xtamakgxtakgkgolh kʼakgapun tsinu kilhtamaku. Wa xlakata ni putum tiku xwilakgolh kʼakgapun xtlawakgo xtalakaskin Dios. Kcapítulo 10 tlakg nakatsiniyaw xlakata Satanás chu xdemonios.

12. ¿Tuku pulaktiy lu xlakaskinka lalh nema lichuwinan Apocalipsis 12:10?

¹² Biblia xlichuwinanit pi Jesús xʼama talatlawa Satanás akxni nina makgas la Mapakgsina xlitaxtulh kxTamapakgsin Dios (kalikgalhtawakga Apocalipsis 12:7-10). Anta kʼApocalipsis 12:10 lichuwinan pulaktiy tuku lalh nema lu xlakaskinka. Pulana, Jesucristo tsukulh mapakgsinan. Chu xlipulaktiy, tamakxtukancha Satanás kʼakgapun chu makaminka kKatiyatni.

13. ¿Tuku lalh kʼakgapun akxni tamakxtukancha Satanás?

¹³ Ángeles tiku kgalhakgaxmatkgolh Dios lu paxuwakgolh akxni Satanás chu xdemonios katamakxtuka kʼakgapun. Biblia wan: «¡Kapaxuwatit, akgapun chu tiku wilatit anta!» (Apocalipsis 12:12). La uku kʼakgapun anan takaksni chu akxtum wilakgoka xlakata putum tiku anta wilakgolh tlawakgo xtalakaskin Dios.

14. ¿Tuku lanit kKatiyatni lata tamakxtukancha Satanás kʼakgapun?

¹⁴ Pero latamat kKatiyatni lu tanu. Latamanin lu patinankgo xlakata «Akgskgawini» lama kkatiyatni chu «lu sitsinit, katsi pi nialh lhuwa kilhtamaku kgalhi» (Apocalipsis 12:12). Satanás lu sitsinit xlakata tamakxtukanitancha kʼakgapun chu liwana katsi pi nialh makgas namalakgsputukan.  Wa xlakata, tlawa putum tuku matlani xlakata nakamakgapatinan latamanin.

15. ¿Tuku lakaskin Dios xpalakata Katiyatni?

¹⁵ Pero xtalakaskin Dios xlakata Katiyatni nitu talakgpalinit. Xla chuntiyaku lakaskin pi Katiyatni akgtum paraíso nawan chu pi latamanin nialh nakgalhikgo talakgalhin chu putum kilhtamaku nalatamakgo (Salmo 37:29). ¿La namakgantaxtikgo putum uma xTamapakgsin Dios?

16, 17. ¿Tuku kinkamasiyaniyan tuku lichuwinan Daniel 2:44 xlakata xTamapakgsin Dios?

¹⁶ Daniel 2:44 wan: «Kxkilhtamaku umakgolh mapakgsinanin, Dios xalak akgapun nawili akgtum tamapakgsin nema nikxni katimalakgsputuka chu ni katimakamaxkika atanu kachikin. Uma tamapakgsin nakalakxpula chu nakamalakgsputu putum umakgolh tamapakgsin, chu uma tamapakgsin xliputum kilhtamaku natawila». ¿Tuku kinkamasiyaniyan xlakata xTamapakgsin Dios uma tuku xlichuwinankanit?

¹⁷ Pulana, kinkamasiyaniyan pi xTamapakgsin Dios xtsukulh mapakgsinan «kxkilhtamaku umakgolh mapakgsinanin». Uma wamputun pi akxni xTamapakgsin Dios xtsukulh mapakgsinan chuntiyaku xʼanankgolh mapakgsinanin xalak kakilhtamaku. Xlipulaktiy, kinkamasiyaniyan pi xTamapakgsin Dios nikxni katimalakgsputuka chu niti katitawi xlakgxokgo. Chu xlipulaktutu, kinkamasiyaniyan pi mapakgsinanin xalak kakilhtamaku natalatlawakgo xTamapakgsin Dios. Pero xTamapakgsin Dios natlajanan chu kajwatiya namapakgsinan kKatiyatni. Akxni nakgantaxtu umakgolh tachuwin, latamanin nakgalhikgo lu xatlan tamapakgsin nixawa tuku anankgo la uku.

18. ¿Tuku wanikan guerra nema mapakgsinanin xalak kakilhtamaku natakgalhikgo xTamapakgsin Dios?

¹⁸ ¿Tuku nala akxni nina tsuku nawan guerra nema nakgalhikgo mapakgsinanin xalak kakilhtamaku chu  xTamapakgsin Dios? Demonios nakaʼakgskgawikgo chu «nakamamakxtumikgo putum mapakgsinanin kʼguerra nema natlawakan klanka xkilhtamaku Dios, Tiku kgalhi putum litliwakga». Uma guerra wanikan Armagedón chu anta mapakgsinanin xalak kakilhtamaku natalatlawakgo xTamapakgsin Dios (Apocalipsis 16:14, 16). (Kaʼakxilhti nota 10, niku wan «Armagedón»).

19, 20. ¿Tuku xlakata maklakaskinaw xTamapakgsin Dios?

¹⁹ ¿Tuku xlakata lakaskinaw xTamapakgsin Dios? Pulaktutu tuku xlakata. Pulana, xlakata makglakgalhinanin akinin, tatatlayaw chu niyaw. Pero akxni namapakgsinan xTamapakgsin Dios nakgalhiyaw latamat nema nikxni sputa. Anta kJuan 3:16 wan: «Dios lu kapaxkilh latamanin xalak kakilhtamaku, wa xlakata mastalh kaj xachastum xKgawasa, xlakata putum tiku nalimasiya pi kanajlani ni namalakgsputukan wata nakgalhi latamat nema ni kgalhi xlisputni».

²⁰ Xlipulaktiy tuku xlakata, wa pi lamaw kʼakgtum kakilhtamaku niku latamanin lixkajni likatsikgo. Lhuwa akgskgawinankgo chu tlawakgo tuku xalixkajni. Akinin nila tuku tlawayaw, pero Jehová wi tuku tlan natlawa. Komo ni natalakgpalikgo, xla nakamalakgsputu kʼArmagedón (kalikgalhtawakga Salmo 37:10). Xlipulaktutu tuku xlakata maklakaskinaw xTamapakgsin Dios wa pi mapakgsinanin xalak kakilhtamaku lu lixkajni likatsikgo, tlawakgo tuku nitlan chu nila masputukgo putum xtaʼakglhuwitkan latamanin. Nachuna, ni kamakgtayaputunkgo latamanin nakgalhakgaxmatkgo Dios. Wa xlakata Biblia wan: «Chixku akgchipanit chixku xlakata natlawani tuku nitlan» (Eclesiastés 8:9).

21. ¿La natlawa xTamapakgsin Dios pi nakgantaxtu xtalakaskin Dios unu kKatiyatni?

²¹ Akxni nasputa Armagedón, xTamapakgsin Dios natlawa  pi namakgantaxtikan xtalakaskin Dios kKatiyatni. Akgtum liʼakxilhtit, Satanás chu xdemonios nakamalakgsputukan (Apocalipsis 20:1-3). Alistalh, nialhti katitatatlalh chu nialhti katinilh. Xlakata talakgmaxtut, latamanin tiku kgalhakgaxmatkgo Dios putum kilhtamaku nalatamakgo kParaíso (Apocalipsis 22:1-3). Nachuna, xTamapakgsin Dios natlawa pi namasantujlikan o namaskulunkikan xtukuwani Dios. ¿Tuku wamputun uma? Pi akxni xtamapakgsin Dios natsuku mapakgsinan unu kKatiyatni, putum latamanin namaxkikgo kakni xtukuwani Dios. (Kaʼakxilhti nota 21, niku wan «Talakgmaxtut»).

22. ¿Tuku likatsiyaw pi Jesús ni akxni tsukulh mapakgsinan akxni xlamajku kKatiyatni chu ni tunkun tsukulh mapakgsinan akxni taspitli kʼakgapun?

²² Akxni Jesús xlama kKatiyatni, kamasiyanilh kstalaninanin pi naskinkgo kxʼoracionkan: «Kamilh minTamapakgsin». Uma wamputun pi xTamapakgsin Dios nina xmin. Pulana xtalakaskin pi Jehová xlakkaxwililh akgtum pumapakgsin chu Mapakgsina xlimaxtulh Jesús. ¿Jehová tunkun Mapakgsina tlawalh Jesús akxni taspitli kʼakgapun? Ni. Xtalakaskin  pi xkgalhkgalhilh tsinu kilhtamaku. Anta kSalmo 110:1, Jehová lichuwinalh: «Katawila kkimpakgastakat asta akxni nakkawili mintalatlawananin kxtampin mintantun». Akxni Jesús lakastakwanalh, apóstol Pedro chu apóstol Pablo lichuwinankgolh pi chuna kgantaxtulh. (Hechos 2:32-35; Hebreos 10:12, 13). Uma xwamputun pi Jesús xʼama kgalhkgalhi asta akxni Jehová Mapakgsina xtlawalh.

23. 1) ¿Tukuya kilhtamaku tsukulh mapakgsinan Jesús la Mapakgsina kxTamapakgsin Dios? 2) ¿Tuku naʼakxilhaw kʼatanu capítulo?

²³ Akxni nina xlakgchan kata 1914, makgapitsin kstalaninanin Cristo akgatekgskgolh pi uma kata lu xlakaskinka xʼama litaxtu xlakata akxni xʼama kgantaxtu tuku xlichuwinankanit. Tuku lanit lata kkata 1914 limasiya pi umakgolh kstalaninanin Cristo xlikana tuku xlichuwinankgonit: Jesús tsukulh mapakgsinan kʼuma kata (Salmo 110:2). Alistalh, Satanás makaminka kKatiyatni, chu la uku «nialh lhuwa kilhtamaku kgalhi» (Apocalipsis 12:12). Kʼatanu capítulo tlakg naʼakxilhaw tuku litasiya pi lamaw kxaʼawatiya kilhtamaku. Na nakatsiyaw pi xTamapakgsin Dios nialh makgas natlawa pi nakgantaxtu xtalakaskin Dios unu kKatiyatni. (Kaʼakxilhti nota 22, niku wan «¿Tuku xlakata lu xlakaskinka kata 1914?»).