«Wixin makgalhtawakgenanin miliwanatkan» (Heb. 5:12). ¡Kalilakpuwanti! Jehová, tlakg xatlan Makgalhtawakgena xlikalanka kakilhtamaku, kinkawaniyan pi kakamasiyaniw amakgapitsin tuku katsiniyaw xpalakata. Masiyakan tuku xaxlikana xlakata Jehová kfamilia, kcongregación chu akxni anaw lichuwinanaw Dios, akgtum lanka talakgalhaman chu akgtum lanka talakgatay. Pero ¿la tlan makgalhtawakgenanin nalitaxtuyaw?

Xatakgalhtin natekgsaw ktatsokgni nema Pablo malakgachanilh Timoteo: «Chuntiya kaliskujti nakgalhtawakgaya xlakatin amakgapitsin, nawana tuku xlitatlawat, namasiyaya». Chu alistalh wanipa: «Komo chuna natlawaya, miʼakstu nalakgtaxtuya chu nachuna tiku nakgaxmatnikgoyan» (1 Tim. 4:13, 16). Tamakatsin nema linaw lakgmaxtu latamat. Wa xlakata lu xlakaskinka naliskujaw tlakg tlan nakgalhtawakgayaw chu namasiyayaw. Uma folleto namakgtayayan namakgantaxtiya uma. Kaʼakxilhwi makgapitsi tuku limin:

Jehová wa tiku “xaTlan Makgalhtawakgena” (Is. 30:20). Uma folleto namakgtayayan tlakg tlan nakgalhtawakgaya chu namasiyaya, pero ni kapatsankga pi tamakatsin nema linaw wa xla Jehová chu wa tiku kamalakatsuwi latamanin (Juan 6:44). Wa xlakata ankgalhin kaskini xʼespíritu santo. Ankgalhin kamaklakaskinti xTachuwin Dios. Wa kuenta katlawanika Jehová chu ni wix. Katlawa putum tuku talakaskin xlakata tiku kgaxmatnimakgon napaxkikgo Jehová.

Dios waninitan pi nalipina tlakg xlakaskinka tamakatsin nema nikxni lichuwinankanit kKatiyatni. Liwana kkatsiyaw pi komo wix nalipawana «litliwakga nema Dios masta», namakgantaxtiya (1 Ped. 4:11).

Tiku masiyakgo chuna la wixin,

Lakgkgolotsin tiku Pulalinkgo xTatayananin Jehová