Darío xalak Media atanu mapakgsina xalak Babilonia. Akxilhli pi Daniel tanu xwanit, wa xlakata lakgayawalh pi xkapulalilh lakchixkuwin tiku tlakg xlakaskinka kkachikin. Uma lakchixkuwin xlakgsitsinikgo Daniel chu xmakgniputunkgo. Xkatsikgo pi Daniel makgtutu xtlawa oración chali chali, wa xlakata wanikgolh Darío: “Oh, mapakgsina, xliʼanat limapakgsin xlakata kaj wix natlawanikgoyan oración. Komo wi tiku ni nakgalhakgaxmata uma limapakgsin kamakanka niku wilakgo leones”. Darío lakgatilh tuku wanika, chu firmarlilh limapakgsin.

Akxni Daniel katsilh xasasti limapakgsin, alh kxchik. Akxni xwija kxchik, tatsokgostalh chu tlawanilh oración Jehová xlakatin xventana nema xlakki. Umakgolh lakchixkuwin tiku xlakgkatsananikgo kaj xalan tanukgolh kxchik chu manokglhokgolh akxni xtlawama oración. Lakapala ankgolh wanikgo Darío: “Daniel ni kgalhakgaxmatni. Chali chali makgtutu tlawani oración xDios”. Darío tlan xtalalin Daniel chu ni xlakaskin namakgnikan. Tantaku lakapastakli la namakgtaya xlakata nalakgmaxtu, pero nipara wa mapakgsina tlan xlakgpali tuku xfirmarlinit. Wa xlakata wa pi xmakanka Daniel niku tanumakgolh xalakluku leones.

 Uma tsisni, Darío lu xlilakgaputsama Daniel, asta nila lhtatalh. Lichali tsisa, lakapala alh niku xwilakgo leones, talakgajulh chu pixlanka wa: “¡Daniel! ¿Lakgmaxtun miDios?”.

Darío kgaxmatli akgtum tachuwin. Wa Daniel tiku kgalhtilh: “Xʼángel Jehová kamakgalhchuwalh leones, chu nitu kintlawanikgolh”. Darío lu xpaxuwama chu wa pi tunkun xmaxtuka. Daniel taxtulh chu nitu xlaninit. Alistalh, mapakgsina wa: “¡Kakamakapitit lakchixkuwin tiku makamastakgolh Daniel!”. Akxni kalakgmakanka, leones tunkun kawakgolh.

Darío kalimapakgsilh xkachikin: “Putum xlimaxkitkan kakni xDios Daniel. Xla lakgmaxtulh xlakata leones nitu xtlawanikgolh”.

¿Chu wix? ¿Na chali chali tlawaniya oración Jehová la Daniel?