Titaxtulh kilhtamaku, Belsasar xmapakgsina Babilonia wa. Akgtum tsisni, tlawalh paskua chu kawanilh akgtum mil latamanin. Tiku tlakg xlakaskinka xalak país xwankgonit. Kawanilh kskujnin pi xmaxtukgolh vasos xa’oro nema Nabucodonosor xliminitancha kxtemplo Jehová. Belsasar chu tiku xkatapaskuajnamakgo maklakaskinkgolh vasos xlakata nawakgo vino chu tsukukgolh malankikgo xdioseskan. Xalan, tasiyalh xmakan chatum chixku nema tsukulh tsokga tachuwin kpatsaps nema ni xta’akgatekgsa, niku xpaskuajnamakgo.

Belsasar lu pekualh. Katasanilh tiku xtlawakgo magia chu kawanilh: “Tiku nakiwani tuku wamputun umakgolh tachuwin, xlikgalhtutu tlakg xlakaskinka kBabilonia naktlawa”. Wa xlakata litsakgsakgolh, pero niti wanilh tuku xwamputun. Chalh xpuskat chu wa: “Chatum chixku wanikan Daniel xwani tuku xwamputun xtamanixni chu x’adivinanzas Nabucodonosor. Xla tlan nawaniyan tuku wamputun umakgolh tachuwin”.

Daniel alh akxilha mapakgsina. Akxni chalh, Belsasar wanilh: “Komo tlan nalikgalhtawakgaya chu nakiwaniya tuku wamputun umakgolh tachuwin, nakmaxkiyan tapixnu xa’oro chu xlikgalhtutu tlakg xlakaskinka nawana kBabilonia”. Daniel kgalhtilh: “Ni klakaskin tamaskiwin. Pero nakwaniyan tuku wamputun umakgolh tachuwin. Mintlat, Nabucodonosor, lu lanka xmakgkatsikan chu Jehová masiyanilh pi xlitaktujut xwanit. Wix katsiyata putum tuku akgspulalh, pero ni maxki kakni Jehová. Vasos xa’oro xalak xtemplo Jehová puwa vino. Wa xlakata Dios tsokgli umakgolh tachuwin: MENÉ, MENÉ, TEQUEL chu PARSÍN. Uma wamputun pi medos chu persas na’akgchipakgo Babilonia chu wix nialh mapakgsina nawana”.

Xtasiya pi niti x’ama akgchipa Babilonia. Kachikin xkgalhi laklanka patsaps chu lu pulhman kgalhtuchokgo.  Pero watiya uma tsisni, medos chu persas akgchipakgolh Babilonia. Ciro, xmapakgsina Persia, alakatanu malakgachalh chuchut xlakata soldados tlan xchaʼankgolh kxmalakcha o kxpuwilhta kachikin. Akxni chankgolh anta, ¡xmalakcha kachikin xlakki! Soldados tanukgolh, akgchipakgolh kachikin chu na makgnikgolh mapakgsina. Ciro xmapakgsina Babilonia litaxtulh.

Kxapulana kata kxtamapakgsin, Ciro makatsininalh: “Jehová kiwaninit pi nakkaxtlawa xtemplo kJerusalén. Judíos tiku makgtayanamputunkgo tlan na’ankgo”. Wa xlakata, lhuwa judíos taspitkgolh kxkachikinkan akxni xtitaxtunita 70 kata lata xmasputukanit Jerusalén. Chuna kgantaxtulh xtamalaknun Jehová. Nachuna, Ciro kamaspitnilh vasos xa’oro chu xaplata chu amakgapitsi tuku Nabucodonosor xmaxtunit ktemplo. ¿Akxilhti la Jehová maklakaskilh Ciro xlakata namakgtaya xkachikin?