Kataspitwi kata nema titaxtunita. Nehemías chatum israelita tiku xlama kSusa kachikin xalak Persia. Kskujni xwanit mapakgsina Artajerjes. Makgtum, xtala Nehemías kitaspitli kJudá chu wanilh nitlan tamakatsin: “Israelitas tiku taspitkgolh kJerusalén nitu tuku litamakgtayakgo. Patsaps chu malakcha nema babilonios malakgsputukgolh nina kaxtlawakan”. Nehemías lu lilipuwa. Xmakgtayanamputun, chu tlawanilh oración Jehová xlakata mapakgsina xmaxkilh talakaskin xʼalh kJerusalén.

Titaxtulh kilhtamaku, mapakgsina akxilhli pi Nehemías lu xlipuwan. Wanilh: “Ni makgtum chuna xakakxilhan la uku. ¿Tuku akgspulaman?”. Nehemías kgalhtinalh: “Kinkachikin Jerusalén kalipekua wi, wa xlakata klipuwama”. Mapakgsina kgalhskininalh: “¿Tuku tlan xaklimakgtayan?”. Ama kilhtamaku, Nehemías pixtsu tlawalh oración. Alistalh wa: “Katlawa litlan, kakimaxki talakaskin nakan kJerusalén xlakata naklakkaxtlawa patsaps”. Mapakgsina Artajerjes maxkilh talakaskin naʼan. Na maxkilh tuku xʼama maklakaskin xlakata nitu naʼakgspula ktiji. Nachuna, mapakgsina limaxtuka kJudá, na maxkika kiwi xlakata nalikaxtlawa xmalakcha kachikin.

Akxni Nehemías chalh kJerusalén, kiʼakxilhli la xwi patsaps. Chu alistalh, kamamakxtumilh sacerdotes chu mapakgsinanin, chu kawanilh: “Uma lu nitlan. Kiliskujatkan”. Kachikin wankgolh pi tlan chu tsukukgolh kaxtlawakgo patsaps.

Makgapitsi xtalamakgasitsinkan israelitas tsukukgolh kalikgalhkgamanankgo chu xkawanikgo: “Asta tantum wakgni tlan namalakani tuku tlawapatit”. Tiku kskujmakgolh ni kuenta tlawakgolh. Chuntiya tsukukgolh matalhmanikgo patsaps chu tliwekglh yawakgolh.

Wa xlakata, lhuwa xtalamakgasitsinkan xalak tanu tanu kachikinin, lakkaxwilikgolh pi kaj xalan natalatlawakgo Jerusalén. Judíos katsikgolh chu pekuankgolh. Pero Nehemías wa: «Ni kapekuantit. Jehová kinkatawilan».  Chu wililh tiku xkuentajtlawakgolh skujnin. Chuna xtalamakgasitsinkan nila xkatalatlawakgo.

Kaj 52 kilhtamaku litlawakgoka patsaps chu malakcha. Xlakata nalipaskuajnankgo, Nehemías kalimilh levitas kJerusalén. Pulaktiy lakkaxwililh tiku nakilhtlikgo. Esdras kataʼalh akgtum grupo chu Nehemías taʼalh atanu grupo. Lakankgolh kʼescalera kMalakcha xla Fuente. Alistalh, akgatunu grupo tanu tanu niku lakaʼankgolh xlakata nalitamakgstilikgo kachikin. Xtlakgtilhakgo trompetas, címbalos chu arpas, xkilhtlinimakgolh Jehová, asta akxni tamakxtumikgolh ktemplo. Lakchixkuwin, lakpuskatin chu lakgskgatan, maxkikgolh tamakamastan Jehová chu tlawakgolh paskua. Lu xpaxuwamakgolh, asta makgat xtakgaxmata la xkilhtlimakgolh.