José chu María xlamakgo kNazaret, anta xkatawilakgo Jesús chu amakgapitsi xlakgkgawasan chu xlaktsuman. José xwakna xwanit chu wa tuku xkalimawi xfamilia. Nachuna, xkamasiyani xlakata Jehová chu xLimapakgsin. Xlismanikgonit naʼankgo ksinagoga xlakata nakakninanikgo Dios chu xʼankgo kJerusalén akgatunu kata xlakata natlawakgo Pascua.

Akxni Jesús xkgalhi 12 kata, xfamilia alh kJerusalén chuna la xlismanikgonit. Kachikin xlitsama latamanin tiku xʼankgonit kPascua. Akxni sputli Pascua, José chu María takaxkgolh xlakata nataspitkgo kxchikkan chu lakpuwankgolh pi Jesús xkatamima amakgapitsi xfamiliajkan. Pero akxni tsukukgolh putsakgo, ni tekgskgolh.

Wa xlakata taspitparakgolh kJerusalén chu akgtutu kilhtamaku putsakgolh xkgawasakan. Chu kitekgskgolh ktemplo. Anta xwi Jesús, xlakgstipan makgalhtawakgenanin, kaks xkakgaxmatnima chu xkatlawanima takgalhskinin. Makgalhtawakgenanin lu kaks  xlilakawankgo tuku xwan Jesús, wa xlakata tsukukgolh kgalhskinkgo. Kaks xlilakawankgo la Jesús xkgalhtinan. Katsikgolh pi Jesús liwana xʼakgatekgsa xLimapakgsin Jehová.

José chu María lu xlilakgaputsamakgo. María wa: “Kinkgawasa, kaxanikawa kkaputsanitan. ¿Niku xlapat?”. Jesús kgalhtilh: “¿Ni xkatsiyatit pi kxchik kintlat kiminini naktawila?”.

Jesús katataspitli xnatlatni kNazaret. Anta, José masiyanilh Jesús la xwaknankan. ¿Tuku lakpuwana wix? ¿La xlikatsi Jesús akxni aktsujku xwanit? Jesús chuntiya staktilhalh chu tlakg skgalala wa. Chu wa xlakata, Dios chu latamanin tlakg xpaxkikgo.