Akxni Jesús max akgtum kata aitat la xlichuwinama Dios, wi tuku lu xlakaskinka laksakli. ¿Tiku xʼama kalaksaka xlakata akxtum xtaskujkgolh chu xpulalinkgolh congregación xla kstalaninanin Cristo? Akxni nina chuna xtlawa, Jesús putsalh xtapulalit Jehová. Wa xlakata alh kʼakgtum sipi xlakata xakstu natawila chu tantaskaka tlawalh oración. Lichali kamamakxtumilh makgapitsi kstalaninanin chu kalaksakli 12 xʼapóstoles. ¿Katsiya xtukuwani makgapitsin? Xkawanikan Pedro, Andrés, Santiago, Juan, Felipe, Bartolomé, Tomás, Mateo, Santiago xkgawasa Alfeo, Tadeo, Simón chu Judas Iscariote.

Xkgalhkutiy xtaʼankgo Jesús. Xla kamasiyanilh la nalichuwinankgo Dios chu alistalh xakstukan kamalakgachalh xlakata nalichuwinankgo. Nachuna, Jehová kamaxkilh litliwakga xlakata natamakxtukgo demonios chu nakamapaksakgo tatatlanin.

Jesús xʼamigos xkaliʼakxilha 12 xʼapóstoles chu xkalipawan. Fariseos xlakpuwankgo pi apóstoles nitu xlitaxtukgo chu nitu xkatsikgo. Pero Jesús ni chuna xkaʼakxilha. Xla liwana xkamasiyaninit  xlakata xtlawakgolh xtaskujutkan. Xlakan xʼamakgolh tatawilakgo Jesús akxni wi tuku lu xlakaskinka xʼama titaxtu kxlatamat. Akgtum liʼakxilhtit, xʼamakgolh tatawilakgo akxni nina xmakgnikan chu akxni xmalakastakwanikanita. Tlakg lhuwa xʼapóstoles xalak Galilea xwankgonit chuna la Jesús. Chu makgapitsi xtamakgaxtokgkgonit.

Apóstoles makglakgalhinanin xwankgonit, wa xlakata xʼakgtsankgakgo. Xmin kilhtamaku xwankgo tuku ni pulana xlakapastakkgo chu amakgapitsi kilhtamaku nitlan tuku xlaksakkgo. Ni putum kilhtamaku xkgalhkgalhinankgo. Asta xlitaʼakglhuwikgo tiku tlakg xlakaskinka xwanit. Pero tlan xlikatsikgo chu xpaxkikgo Jehová. Xlakan xʼamakgo pulalinkgo congregación xla kstalaninanin Cristo akxni Jesús nialh xlatamalh kkatiyatni.