Akxni nina makgas xtamununit, Jesús tsukulh lichuwinan: “Lakatsu wi xTamapakgsin Dios”. Kstalaninanin xtalapulakgo xliputuminika kʼGalilea chu kJudea. Akxni Jesús taspitli kxkachikin, kNazaret, alh ksinagoga, malakkilh xrollo Isaías chu pixlanka likgalhtawakgalh: “Jehová kimaxkinit espíritu santo xlakata naklichuwinan xalakwan tamakatsin”. ¿Tuku xwamputun? Latamanin xakxilhputunkgo xmilagros Jesús. Pero Jesús ni xmakglhtinanit espíritu santo xlakata kaj milagros natlawa. Tuku tlakg xlakaskinka wa pi xlichuwinalh xalakwan tamakatsin xla Tamapakgsin. Alistalh, kawanilh tiku xkgaxmatmakgo: “La uku kgantaxtuma uma tachuwin”.

Alistalh, alh kpupunu xalak Galilea. Anta kaʼakxilhli kgalhtati kstalaninanin tiku skitinanin xwankgonit chu kawanilh: “Kakistalanitit chu kskitinanin lakchixkuwin nakkalimaxtuyan”. Uma chixkuwin xkawanikan Pedro, Andrés, Santiago chu Juan. Tunkun makgxtakgkgolh xtaskujutkan chu stalanikgolh. Xtalapulakgo kʼGalilea, xlichuwinamakgo xTamapakgsin Jehová. Xlichuwinankgo ksinagogas, kmercados chu kkatijin. Lhuwa latamanin xkastalanikgo kanikawa niku xʼankgo. Tamakatsin xlakata Jesús lakalhuwa niku talakgatumilh, asta kSiria.

Chuna la titaxtulh kilhtamaku, Jesús kamaxkilh litliwakga makgapitsi kstalaninanin xlakata xkamapaksakgolh tatatlanin chu xkamaxtukgolh demonios. Makgapitsi xtaʼankgo lichuwinankgo Dios kʼakgatunu laklanka kachikinin chu laktsu kachikinin. Na xʼankgo makgapitsi lakpuskatin tiku ni xmakgxtakgkgo Dios, umakgolh lakpuskatin xkamakgtayakgo Jesús chu kstalaninanin. Makgapitsi umakgolh lakpuskatin wa María Magdalena, Juana, Susana chu amakgapitsin.

Akxni xkamasiyaninita kstalaninanin, kamalakgachalh xlakata nalichuwinankgo Dios. Akxni xʼamakgolh kʼGalilea, lhuwa tiku na kstalaninanin Jesús wankgolh chu tamunukgolh. Lhuwa tiku kstalaniputunkgo Jesús, wa xlakata xla katamalakxtumilh la akgtum tachanan nema xlitamakit o xlitamakgalat. Jesús wa: “Katlawaninit Jehová oración xlakata tlakg nakamalakgacha skujnin tiku namakikgo  tachanan”. Alistalh kalaksakli 70 kstalaninanin chu chatiyun kamalakgachalh nalichuwinankgo Dios xlikalanka Judea. Putum xkalitachuwinankgo xlakata Tamapakgsin. Akxni kitaspitkgolh lu xlitachuwinamputunkgo Jesús la xkakitaxtuninit. Akgskgawini nila tuku xtlawa xlakata nialh xlichuwinanka Dios.

Jesús putum lakkaxwililh xlakata kstalaninanin chuntiya xtlawakgolh uma lu xlakaskinka taskujut akxni xla xtaspitli kʼakgapun. Kawanilh: “Kalichuwinantit xalakwan tamakatsin xla Tamapakgsin xlikalanka katiyatni. Kakamasiyaninit latamanin xTachuwin Dios chu kakamunutit”.