TAKGALHTAWAKGA 76
Jesús ni masta talakaskin namaxkajwanikan templo
Max papaʼ xla abril kata 30, Jesús alh kJerusalén. Lhuwa latamanin xʼankgonit kJerusalén xlakata natlawakgo Pascua. Kʼuma Pascua xkamakamastakan animales ktemplo. Makgapitsi xliminkgo xʼanimaleskan, pero makgapitsi anta xtamawakgo kJerusalén.
Akxni Jesús chaʼalh ktemplo, akxilhli pi makgapitsi latamanin kstamakgo animales anta. ¡Xtlawamakgo negocio kchiki niku xkakninanikan Jehová! ¿Tuku tlawalh Jesús? Tlawalh tuku xlisnokgnankan chu maklakaskilh xlakata nakatamakxtu ktemplo borregos chu wakax. Na kamakgpuspitnilh xmesajkan tiku xlakgpalikgo tumin, chu putum tumin lakgatum taʼakgawanilh kkatutsu. Jesús kawanilh tiku kstamakgo palomas: “¡Kamapanutit putum uma! ¡Ni akgtum pustan kalimaxtutit xchik kinTlat!”
Latamanin tiku xwilakgo ktemplo, kaks lilakawankgolh tuku tlawalh Jesús. Kstalaninanin lakapastakkgolh tuku xlichuwinankanit xlakata Mesías: “Lu nakmaxki kakni xchik Jehová”.
Titaxtulh kilhtamaku, kkata 33, Jesús xlimakgtiy maskulunki templo. Ni xmasta talakaskin pi wi tiku ni xmakilh kakni xchik xTlat.
«Nila xlakskujnin Dios nalitaxtuyatit chu nachuna lu naputsastalaniyatit tumin» (Lucas 16:13).
Max na nalakgatiya uma
JESÚS WA TIJI, XAXLIKANA CHU LATAMAT
Jesús limasiya pi paxki xaxlikana takaknin
Xlimapakgsin Dios xmasta talakaskin pi latamanin xtamawakgolh animales kJerusalén xlakata xtlawakgolh tamakamastan. Komo chuna, ¿tuku xlakata Jesús kasitsini tiku stanamakgo ktemplo?
X’AMIGO JEHOVÁ KAWANTI
Kamaxki kakni xchik Jehová
¿La tlan nalimasiyayaw pi maxkiyaw kakni xchik Jehová?
