Juan xlichuwinama uma tamakatsin: “Chatum tiku tlakg tliwakga nixawa akit nialh makgas namin”. Akxni Jesús xkgalhi max 30 kata, taxtulh kʼGalilea alh asta kkgalhtuchokgo Jordán. Anta Juan xkamunuma latamanin. Jesús xlakaskin pi Juan na xmunulh, pero Juan wanilh: “Akit ni kilakgchan nakmunuyan. Wata wix lakgchanan nakimunuya”. Jesús kgalhtilh: “Jehová lakaskin pi wix nakimunuya”. Wa xlakata tajukgolh kkgalhtuchokgo Jordán chu Juan liwana maʼakgtsilh kchuchut Jesús.

Akxni Jesús takutli kchuchut, tlawanilh oración Jehová. Ama kilhtamaku, akgapun talakkilh chu xʼespíritu Dios taktalh xʼakgspun Jesús la tantum paloma. Chu Jehová chuwinancha kʼakgapun: “Wix kinKgawasa tiku lu kpaxkiyan. Wix kimakgapaxuwaya”.

Chuna makglhtinalh Jesús xʼespíritu Jehová, chu lata ama kilhtamaku, Cristo o Mesías litaxtulh. Ama kilhtamaku tlan xmatsukilh taskujut nema Jehová xlakgayawanit natlawa kkatiyatni.

Akxni aku xtamununit, Jesús alh kdesierto chu anta tamakgxtakgcha 40 kilhtamaku. Akxni kitaspitli, lakgalh Juan. Xla akxilhli pi Jesús xtalakatsuwima chu wa: “Wa uma xBorrego Dios tiku namapanu xtalakgalhin kakilhtamaku”. Chuna lichuwinalh xlakata xkamakgtayalh latamanin nakatsikgo pi Jesús wa Mesías xwanit. ¿Katsiya tuku titaxtulh Jesús akxni xlama kdesierto? Kaʼakxilhwi.