Jesús chu apóstoles ankgolh ksipi xla Olivos chu titaxtukgolh kxakaxtum kCedrón. Liwaka itat tsisni chu xakatla papaʼ xwanit. Akxni chankgolh kjardín xla Getsemaní, Jesús kawanilh: “Unu katawilatit chu ni kalhtatatit”. Chu alistalh, Jesús katamakgatlinilh tsinu chu tatsokgostalh. Lu xlakgaputsama chu tlawanilh oración Jehová: “Kalalh mintalakaskin”. Wa xlakata Jehová makamilh chatum ángel xlakata namatliwakglha. Alistalh, Jesús taspitli niku xwilakgo kgalhtutu xʼapóstoles chu klhtatamakgo. Wa xlakata kawanilh: “¡Kastakwanantit! Uma ni xkilhtamaku nalhtatayatit. Lakgchanita kilhtamaku nakimakamastakan kxmakan kintalamakgasitsin”.

Kaj lakapala katamilh Judas lhuwa latamanin tiku xliminkgo espadas chu kiwi. Xkatsi niku tlan xtekgsli Jesús xlakata makglhuwa xtaʼanit Jesús chu amakgapitsi apóstoles kʼuma jardín. Judas xkawaninit soldados pi xʼama kamasiyani tiku Jesús. Titum lakgalh Jesús chu wanilh: “Tlen makgalhtawakgena”, chu lakatsukli. Jesús wanilh: “Judas, ¿akgtum tatsukni kilimakamastapat?”.

Jesús tatukilh makgtum chu kakgalhskilh lakchixkuwin: “¿Tiku putsapatit?”. Xlakan wankgolh: “Jesús tiku Nazareno”. Xla kakgalhtilh: “Akit”. Xlakan tatampuxtukgolh tsinu chu lhtujkgolh. Jesús amakgtum kakgalhskimpa: “¿Tiku putsapatit?”. Chu xlakan kgalhtiparakgolh: “Jesús tiku Nazareno”. Jesús kakgalhtilh: “Kkawaninitan pi akit. Wa xlakata kamastatit talakaskin pi kaʼankgolh umakgolh lakchixkuwin”.

Akxni Pedro akxilhli tuku xlama, maxtulh xʼespada chu kaktinilh xtakgen Malco, kskujni xapuxku sacerdote. Pero Jesús xamanilh xtakgen chu kuchilh. Chu wanilh Pedro: “Kamaki miespada. Komo nalilukunana espada, espada nalimakgnikana”. Soldados  chipakgolh Jesús chu makachikgolh, chu apóstoles tsalakgolh. Alistalh, latamanin linkgolh Jesús kxlakatin xapuxku sacerdote, Anás. Xla tlawanilh takgalhskinin Jesús chu malakgachalh kxlakatin xapuxku sacerdote, Caifás. Pero ¿tuku kaʼakgspulalh apóstoles?