Xanapuxkun sacerdotes linkgolh Jesús kxlakatin mapakgsina. Anta Pilato kakgalhskilh: “¿Tuku limawakapatit uma chixku?”. Xlakan kgalhtinankgolh: “¡Wan pi mapakgsina!”. Pilato kgalhskilh Jesús: “¿Wix xmapakgsina judíos?”. Jesús kgalhtilh: “Wa kinTamapakgsin ni tapakgsi kʼuma kakilhtamaku”.

Alistalh Pilato malakgachalh Jesús kxlakatin Herodes, xmapakgsina Galilea, xlakata xʼakxilhli komo xtekgsli tu xlimawakalh. Herodes akxilhli pi Jesús nitu xtlawanit chu malakgachanipa Pilato. Chu Pilato kawanilh latamanin: “Herodes chu akit ni ktekgsaw komo uma chixku lin kuenta. Nakmakgxtakga”. Pero latamanin pixlanka xwankgo: “¡Kamakgni! ¡Kamakgni!”. Soldados snokgkgolh, lakachujmanikgolh chu kgaxikgolh. Akwilikgolh akgtum corona xalhtukun chu tsukukgolh likgalhkgamanankgo: “¡Tlen, xmapakgsina judíos!”. Pilato amakgtum kawanipa latamanin: “Akit ni kakxilha pi uma chixku tlawanit tuku nitlan”. Pero xlakan pixlanka xwankgo: “¡Kaxtokgowaka kkiwi!”. Wa xlakata, Pilato makamastalh Jesús xlakata xmakgnikgolh.

Jesús linka kʼGólgota. Xtokgowakaka kkgantum kiwi chu anta mawakaka. Jesús tlawanilh oración Jehová: “Tlat, kakatapati xlakata ni katsikgo tuku tlawamakgo”. Latamanin xlikgalhkgamanankgo Jesús chu xwankgo: “¡Komo xKgawasa Dios wix, katakta kkiwi chu kalakgtaxtu!”.

Chatum tiku xtlawanit tuku nitlan chu anta kxtokgowakakanit kxpaxtun Jesús wanilh: “Kakilakapastakti akxni natanuya kminTamapakgsin”. Jesús wanilh: “Nakintatawilaya kParaíso”. Kakgotanun, akgtutu hora kapukswalh. Makgapitsi kstalaninanin tayakgolh lakatsu niku kxtokgowakakanit, asta María, tiku xtse xwanit. Jesús skinilh Juan pi xkuentajtlawalh María chuna la xtse.

Xaʼawatiya, Jesús wa: “¡Kgantaxtunita!”. Takilhputalh chu xaʼawatiya jaxanalh. Watiya uma kilhtamaku, lu tliwakga tachikilh tiyat. Lanka cortina nema xkamapitsi Santo chu Santísimo akgputiy  lalh. Wa xlakata, chatum xapuxku soldado wa: “Uma xlikana xKgawasa Dios xwanit”.