Akxni xninita Jesús, chatum chixku tiku xkgalhi tumin tiku xwanikan José skinilh Pilato xlakata namakti Jesús kkiwi. José limakgswitli Jesús lhakgat xalino nema xatlan xwanit, chu litlawalh tuku xlimamuksinankan, chu wililh kxasasti putaknun. Alistalh limapakgsinalh pi xlilakgatalaka chiwix. Xanapuxkun sacerdotes wanikgolh Pilato: “Klilakgaputsayaw pi kstalaninanin Jesús nakgalhankgo xmakni chu nawankgo pi xla lakastakwanalh”. Wa xlakata Pilato kawanilh: “Liwana kalakgatalatit putaknun chu kakamalakgachatit tiku nakuentajtlawakgo”.

Akgtutu kilhtamaku alistalh, makgapitsi lakpuskatin lu tsisa ankgolh kputaknun. Anta akxilhkgolh pi wi tiku xmalakxijnit chiwix chu putaknun xlakki. Xpulakni putaknun xwi chatum ángel, tiku kawanilh: “Ni kapekuantit. Jesús lakastakwananit. Kakawanitit kstalaninanin pi kaʼankgolh kʼGalilea xlakata natatanokglhkgo”.

María Magdalena lakapala alh kaputsa Pedro chu Juan. Kawanilh: “Wi tiku lilh xmakni Jesús”. Pedro chu Juan lakapala ankgolh kputaknun. Akxni akxilhkgolh pi niti xwi, taspitkgolh kxchikkan.

Alistalh, María taspitpa kputaknun. Anta kxpulakni putaknun akxilhli chatiy ángeles chu kawanilh: “Ni kkatsi niku linka kiMalana”. Alistalh akxilhli chatum chixku chu lakpuwa pi wa jardinero. Kgalhskilh: “Malana, katlawa litlan, kakiwani niku wilinita”. Akxni chixku kgalhtinalh: “¡María!”, xla katsilh pi wa Jesús. María wa: “¡Makgalhtawakgena!”, chu chipalh. Jesús wanilh: “Kakawani kinatalan pi kiʼakxilhnita”. Chu María lakapala alh chu kawanilh kstalaninanin Jesús pi xʼakxilhnit.

Watiya uma kilhtamaku, kakgotanun, chatiy kstalaninanin Jesús taxtukgolh kJerusalén, xʼamakgo kʼEmaús. Chatum chixku tsukulh katatlawan chu kakgalhskilh tuku xlichuwinamakgo. Xlakan wanikgolh: “¿Ni katsinita? Akgtututa kilhtamaku, xanapuxkun sacerdotes mamakgnininankgolh Jesús. Chu la uku makgapitsi lakpuskatin wankgo pi xla lama”. Chixku kakgalhskilh:  “¿Ni kanajlaniyatit wixin palakachuwinanin? Xlakan wankgolh pi Cristo xʼama niy chu alistalh xʼamaka malakastakwanikan”. Alistalh tlakg kalitachuwinalh tuku wan Tatsokgni. Akxni chankgolh kʼEmaús, wanikgolh pi xkatatamakgxtakgli. Akxni xwayamakgo, uma chixku tlawalh akgtum oración xlakata kaxtalanchu, chu kstalaninanin Jesús katsikgolh pi uma chixku wa Jesús. Xalan nialh akxilhkgolh.

Chatiy kstalaninanin lakapala ankgolh kJerusalén. Chankgolh kchiki niku xtamakxtumikgonit apóstoles chu kawanikgolh tuku xlanit. Akxni xwilakgo kxpulakni chiki, Jesús katasiyanilh. Xapulana, apóstoles nila xkanajlakgo pi wa Jesús xwanit. Pero xla kawanilh: “Kaʼakxilhtit kimakan, kakilaxamaw. Xtatsokgnit pi Cristo xʼamaka malakastakwanikan kkalinin”.